مرسال لحبيبى

تترمسلسل ساره

كيف التسلي

كلمات : عمر أبو زيد .
اهداء لشيكابالا .. وليكى تقريبا . 

خمس أسباب
غير الاحراج
والخوف م الرفض
ومرتب الجيش الفقير
مانعيني أقدم دعوتي
ليكي عشان نخرج سوا
في معاد متأجل من فترة
والفترة دي لسالها كتير
........................

( 1 )
.........
مشكلتي الدايمة الأزلية
في اجادة اللغة الانجليزية
والاكسنت بتاعتي الضايعة
واللبخة في تكوين الجملة
كل دي أبعاد أول أزمة
وأنا عندي الأزمات بالجُملة
ومافيش ولا نية ولا رغبة
ولا طاقة تكَّفي لتحسينهم
مش عارف دول يفرقوا ولّا ؟
اذا كان مالكيش موقف منهم
بس أنا متأكد
ومسَلِم
ان ده هيكون عائق واضح
وهيحرج فيا
كتير جدا
ويضَيَّع أشياء مشتركة
مثلا شغلانة تجيبيهالي
من حد قريبِك في الشَرِكة
قال ممكن جدا يجاملني
لكن في اللغة مش هيجامل
أو كنتي بتحلمي كما غيرِك
ان انتي تسافري بلاد بره
مع واحد أمور بيحبك
ويكون مسئول وبيتعامل
فيلم جديد نازل في السيما
عامل ايرادات قالبة العالم
ولحظي المعتاد السيئ
مافيهوش ترجمة عربي عليه
أغنية ( أديل ) المشهورة
لو جيتي ف يوم تبعتيهالي
وعليها سؤال ( ها ؟ .. ايه رأيك ؟ )
هسمعها واقول رأيي ف ايه ؟
ألماني في شارع طلعت حرب
يشوفنا ويتوسم فينا
ان اننا من ضمن الواقفين
هنساعده في توهته وهندلُه
فيقرب مننا بالراحة
بأقل انجليزية متاحة
يستفسر عن معهد ( جوته )
ومنين لو مشي راح يوصلُه ؟
وساعتها أنا هتلخبط طبعا
وهتأتأ واضحك بلا داعي
واشاورله بعيني وبدراعي
ولا هعرف لا اشرح .. ولا أقوله
مش قاصد خالص على فكرة
اني أوصل بيكي
وبالفكرة
لحدود الكليشيه البايخ
عن شاب معذب ومكافح
والبنت الدلوعة الناعمة
الدور ده لطيف أه ولا يقلق
ومناسبِك جدا
ولايقلِك
دلوعة وناعمة ورقيقة
بسكوتة بشكولاتة جميلة
بس أنا لا معذب ومحطم
ولا حتى مكافح
ولا نيلة
وأظن الفرق اللي ما بنا
أهيف من كده
واعمق
وأكبر
وأبعد بكتير
بكتير ياما ...
عن فكره هذا الكليشيه
وعشان كده وجب التنويه
........................

( 2 )
.........
أزمة صناعة السينما
.......................

( 3 )
.........
3 سنين وخمس شهور
و حداشر يوم أو و اتناشر
وهكون في عمر شيكابالا
دلوقتي .. في ألفين ستاشر
شيكابالا اللي خلاص تقريبا
مابقاش ليه ريحة شيكابالا
بعد التلاتين فيه حاجات ياما
اختلفت فيه .. لو بتشوفي
لساه بيهزر وبيضحك
ويرتب رقصات مع ( كوفي )
لكنه خلاص مابقاش هوّ
وده شئ بقى واضح
ومؤكد
ومافيش فيه شكوك
بالنسبالي
شيكابالا هيفضل شيكابالا
لكن شيكابالا اللي في بالي
يمكن دلوقتي يكون أحسن
ومفيد ومطيع ومشاكله أهدى
يمكن نضج .. يمكن كبر
وخلاص مابقاش حمل مناهدة
يمكن رضخ
يمكن زهق
يمكن تعب
يمكن عِقِل
يمكن كمان حُكم الزمان
بس الأكيد انه تِقِل
مش بس في وزن ولا في حركة
ولكنه كمان تُقل تجارب
شيكابالا تحسيه مستسلم
مابقاش جواه طاقة يحارب
مابقاش جواه طاقة يخبَّط
ويزعق
ويسب ويلعن
يغضب كما كان دايما يغضب
ويسيبها تولَّع
ولا فارقة
مابقاش متمرد ولا فارس
حاوطوه وخلوه كابتن فرقة
مسئول وعليه التزامات
لازم يستحمل
ويكمل
ويبطل شغل المزاجات
ويركز بس في تمرينه
وفي دوره
كقائد للتيم
يقبل بخروجه من القايمة
مع انه كويس وسليم
ويكون تغيير تالت باهت
في نهاية الماتش كتكريم
ينزل متردد قلقان
والبنط الضايع بقى راعبه
بيفكر قبل ما بيرقَّص
أو يعمل تمويهة ب كعبُه
بيباصي السهلة المضمونة
ويشوط
علشان يتقال شاط
رجليه مابتطيرش كما الأول
وده مش علشان نقص نشاط
لكن علشان بقى بيهمه
كام رِجل مدافع قدامُه
وكأن فرص عمره الضايعة
بقت أكياس رمل في أقدامه
بتثبت رجليه ع الأرض
وتشكك في بواقي غروره
شيكابالا
وبعد التلاتين
جاي يثبت نفسه لجمهوره
وأنا اسف
اسف مش هعرف
ييجي يوم أضطر أثبت نفسي
أو أكون قلقان قدام حد
وخصوصا
وخصوصا جدا
قدامِك .. يا جميلة الخد
..............................

الاخلاص

يابحر الهوا #بصوتي

خلينا صحاب - كلمات الشاعر عمرو حسن 
أداء صوتي / أحمد سمري 
شايفاك انسان طيب حسّاس 
راجل ورقيق 
تنفع كصديق ، لكن كحبيب ؟ عمري مافكرت 
تستاهل أحسن مني كتير 
والله ياواد لاهجيبهالك 
عاوزين بقا نفرح بعيالك 
وبحبك جداً صدقني وجوايا حاجات 
بس احنا اخوات 
سِكتِتْ وسكِتت
مشيّت ووقِفتْ 
وكإن الدنيا بتتحول اسود بهتان 
لون أنا مش عارفه لحد الآن
وكإن فيه خيط مزيكا حزين 
طالع من مطرح وقفِتْها 
هل حبيتها ؟ أم ان الأمر بحاله سراب 
قولتلها : انا رافض نبقى صحاب 
ياتكوني معايا يامتكونيليش 
سِكتِتْ لحظة .. علشان كانت هي ملاحظة 
ان انا مكسور وبهددها 
مدت إيدها مسكت ايدي 
وقالتلي خلاص فُك ياسيدي عازماك على قهوة ماتكسفنيش
كانت فاهمة ان الموقف صعب 
والصعب حبيبتك تتعاطف علشان تواسيك
فأخدت قرار اني انساها 
من يومها وانا بدونها معاها 
براقبها بعين عيّل محروم 
وباقول ما اطلبش باكلمها 
وبفكّر هي بتعرف مين 
ضحكتها لمين 
وباموت لو كانت بصاله 
أصبحنا لاننفع متصاحبين ولا عُدنا صحاب 
وبقينا برغم اللي مابيننا 
شخصين أغراب
تسعين في المية من الأشخاص المكتئبين 
بيحسّوا حنين لقلوب بتحِّن لناس غيرهم 
الواحد ضيّع وقت كبير مع ناس مش شاغل تفكيرهم 
هذا التفكير الغير صحيّ
هو المتسبب في القهوة 
ف عمر خيرت وtrio goubran 
وف قلب نظام النوم للعكس 
وصداع القولون العصبي
تضييع ستاشر ساعة ف شات
ودخولك ف مشاكل وحاجات 
وخروجك منك آخر الليل 
هتروح لطبيب هيبص عليك 
وهيكتبلك أدوية للنوم 
ومهدأ ويسيبك تمشي 
وهتفضل برضه مابتنامشي 
وهيفضل جسمك بيعاندك 
كل الموضوع انك عندك 
" متلازمة حُب اللي ماحبكش "
انت معندكش سبب عضوي 
يمنع عينك تقفل لساعات
السبب الأصلي ف عدم النوم 
انها شايفاكوا اتنين اخوات 
بالنسبالها .. هي بتعشق في اللي قَتَلها 
واللي ماقدّرش ودخلها ف مساحه كبيرة من الإهمال 
بتحب جنونه وعصبيته 
وتحب تشوفه بيجرحها
وتحب انه مابيكلمهاش 
مع انه مكلم ناس تانيين 
وتحب عدم غيرته عليها 
وتحب قساوته وهي تلين 
بالنسبالها .. عمرك ماهتبقى اللي ف بالها 
فافهم ياحزين 
واعرف دستور البني آدمين
عمرك بيضيع والوضع وضيع 
والعالم أجمل من غيرها 
عمرك ماهتيجي ف تفكيرها 
مع انك شاغل ناس تانيين 
وحاططهم ف القايمة اياها ( خلينا صحاب ) 
داين تتدان 
ومافيش مجروح مابقاش جارح
كله بيبحث على ألمه الخاص 
وكإن الحب بدون راحه 
وكإن الشوق لازمُه جراحه 
علشان مايروحش لناس ببلاش
اعتبره ماجاش 
ونصيحة ياريت لو كنتوا صحاب ، خليكوا صحاب 
علشان لو قولت على مشاعرك 
هتكون بتضحّي بصداقتها 
وان فعلاً فعلاً حبيتها 
استنى عنيها تقول قبلك 
واستنى الشوق فيها يقابلك 
وساعتها يجوز تنسى المسافات 
فيما عدا ذلك ف انت هتسمع 
انا آه حباك بس احنا اخوات .

خلينا اصحاب كلمات الشاعر / عمرو حسن .. أداء صوتي / أحمد سمري

موقع دندنها

احمد سعد - سألت نفسى - من فيلم الشبح - MP3

قالوا ايه علينا دول .صيحة الصاعقه المصريه

عمران الوصابي

اعطيه يابدري .. اعطيه يابدري ..اعطيه يابدري .. اضرب يابدري ايييييييييلييييييييه

تفاعل ضباط وجنود امن مركزى مع اغنية حدوتة مصرية بوقفة لرفض قانون التظاهر

عمرو قطامش .. انا مش أسف

تفاعل ضباط وجنود امن مركزى مع اغنية حدوتة مصرية بوقفة لرفض قانون التظاهر

Ahmed EL morsy