من وجوه ما تستاهل عيوني

يا نهاية تلوگلي؟
يا طريقة برأيچ درامية أكثر؟

شنو اليخلّيچ كونچ إمرأة أقوى؟
شنو غير الحب يخلي الرجل يخسر؟

يا شذوذ القاعدة البيها " النساء التحب أكثر "
يا نهاية حافّة الحبها فضولي
آنه يم عينچ عرفت الارض تفتر
آنه هسه بالبداية
رجعتني الذاكرة من چذبتها
آنه وحدي بالبداية
مايريد الزمن يرجع بس التخذله النهاية

آنه هسه بالبداية وچنچ مرتبة كلشي
غلطة وحدة كلّفت بابل حضارة
يا ربح حصة سنيني! ودورة عيونچ خسارة؟
الخطوة الاولى للضرر چانت عيونچ

الطريقة
الزاوية
التستخدميها بنظرة الي لو صحت باسمچ
چانت تخلي رجل كافي الرجولة، يفهى، ويسلم مفاتيحه وغروره وينذر اسمه ودمه لاسمچ

ما چنت أگدر أصير أكثر جريء وما أحبچ

ما چنت أگدر أعالج روحي من حبي لأذيتي
لأن أعرف حتى لو ينّسي كلشي
حتى لو ينعاد كلشي
حتى لو شخصين مختلفين چنه بغير عالم
هم أوازي الروح بيچ وهم أحبچ

كونچ الاولى من نوعچ عيب عمري
يم منو أستشهد بروحي وبچيها ؟
إلچ حصة بكسر روحي نافست صاحبها بيها

الزمن من ذاته ما يگدر ينّسي
التعوّد حجة للعنده بديل
الزمن تأثيره قليل .. الذاكرة أخطر
الذاكرة تكبّر الماضي من تشوف الحاضر أصغر
وآنه ما أدري منو اللاحگ الثاني؟
آنه ؟ .. لو ماضيي دونچ ؟

آنه هسه بالنهاية
دخيلچ آنه وحدي بالنهاية
آنه بالمنتصف مني
والدوائر مستمرة وخانگتني
والمحوطني رحيلچ

منين؟ من يا ثغرة رحتي؟
هذا يا باب اليضمچ عني ولهسه آنه ما فكرت أكسره؟

إنتِ مستوعبة فراگچ؟
ماكو شي گبلچ يبچيني من أذكره
ماكو شي گبلچ أخذ مني من أخسره

إنتِ مستوعبة فراگي؟
هاي من يمتى إلي ذكرى؟
هاي من يمتى ألمّ دموعي الأبچيهن وأحبهن؟
ذكرياتي مو إلي إنتِ سببهن

إنتِ خليتي الارقام التافهة يصيرن تواريخ إلها قيمة
وإنتِ دليتيني بيها
والاماكن گمت أشوفن بيها قدسية وعظيمة

منين كل هذا الضعف وشلون صار؟
شنو من حب اليخلي من الرجل بس الاطار؟

زيد الهاجري | Babel | ن . ح . ع

الوحدة : سلوك يلازمك من تفتهم حجم الخسارات
من تفقد احساس الطعم بآخر بدايات
لأنك فاقده بأولى النهايات

الوحدة : حذر من موقف يّذكرك
هروبك من تفاصيل الوداعات الاخيرة
شرود عيونك من عيون ما مستوعب تكسرك

الوحدة : وطن، تستوطنه من تطيح.

الوحدة : دليلك، بالضبابيات
خلاصك من صدى الواقع
ورق لافكارك الماتنعرف يا لون

الوحدة : امتلاكك للچنت تنطيه
سِما بلا رغبة للتأثيث
حقيقة كل حرف ينكسر من ينگال
آخر شمّة الك من قبل لا تنشال

الوحدة : مُحيطك، ما عداك انتَ

برّه المشهد تغيّر
بعد ماتنتمي لأي شي
غرفتك أأمن من الچان يتأمن

غرفتك فارغة من الصوت
ويمكن .. فارغة .. من الموت

يمتى آخر وكت فات الضوه ومات اعله صورتها؟
يمتى آخر فجر فات؟
يمتى آخر هروب من الحچي ويّه الجمادات؟

برّه .. الجو حبيب لكل شخص مخدوع
برّه .. الجو حقير لكل شخص مثلك

برّه المشهد تكرر

مساحة من الأنا والناس
كمية صداع من الحچي المألوف
شوارع ماتدلّيك اعله روحتها
وهوا بظهرك.

الوحدة : غرفتك، ما عداك انتَ.

هنا جوّه .. المدينة الممكن تحبها
هنا جوّه .. المدينة الممكن تحبّك

خلّي الباب .. لا تِثبِت
محد شاغله غيابك

لا تِثبَت
هدوءك زاعج الغرفة
هدوء بنص زخم الافكار شيفيدك؟

لا تِثبَت ولا ترفض
رخي عظامك لأي زاوية تريدك.

إشاراتك، لغة، إلمن؟ للحيطان؟
لِمّ آخر أصابيعك
توتر سطحي للماضي انكسر بيدك

هنا جوّه .. مزاد لكلشي ماينباع.

الوحدة : الفجوة التنفتح بالروح
الفجوة : مقاس لوجه فارگته

وجه ما ينسأل عنه
وجه ما ينلگي منه
وجه ماضل مطار وشارع ومقهى
وجه حتى الجرايد ما حچت عنه
وجه حتى برحيله ما أكو منه
ملامح شاردة من العين

الوحدة : نزيفك، ما عداك انتَ.

الظلمة ضوه لليحچن جروحه
والحيرة سچچ للخوف للما يندل بروحه
والوحدة مدينة انعافت من الناس

ظلمة ونزفك يضوّي
لا تستخدم عيونك
نزفك بردة للشبّاچ
يا شباچ ما ضل شارع يفهمك

گوم تأكد من الباب
گوم تحاضن ويه الباب
ظلّك نِزَف جوّه الباب
وأحقر سالفة من يوجعك ظلّك

الوحدة : حضنها ما عداك انتَ.

بالله وبيك | زيد الهاجري

Zaid Alhajry

Recent comments

hanen

hanen

hanen

thefajr♾

Related tracks