اخذني و من عساني ما ارد منك

تبقى انتَ الوحيد العازتك عازه

الماي الماشربه من ايدك يعطش

لو ترسوا عيوني الناس تبقى أنتَ الوحيد العازتك عازة..

انا الكاره الدنيا وحبنها علىموج اسمك

يمن جسمي فدااا لجسمك 🥺

الوحدة : سلوك يلازمك من تفتهم حجم الخسارات
من تفقد احساس الطعم بآخر بدايات
لأنك فاقده بأولى النهايات

الوحدة : حذر من موقف يّذكرك
هروبك من تفاصيل الوداعات الاخيرة
شرود عيونك من عيون ما مستوعب تكسرك

الوحدة : وطن، تستوطنه من تطيح.

الوحدة : دليلك، بالضبابيات
خلاصك من صدى الواقع
ورق لافكارك الماتنعرف يا لون

الوحدة : امتلاكك للچنت تنطيه
سِما بلا رغبة للتأثيث
حقيقة كل حرف ينكسر من ينگال
آخر شمّة الك من قبل لا تنشال

الوحدة : مُحيطك، ما عداك انتَ

برّه المشهد تغيّر
بعد ماتنتمي لأي شي
غرفتك أأمن من الچان يتأمن

غرفتك فارغة من الصوت
ويمكن .. فارغة .. من الموت

يمتى آخر وكت فات الضوه ومات اعله صورتها؟
يمتى آخر فجر فات؟
يمتى آخر هروب من الحچي ويّه الجمادات؟

برّه .. الجو حبيب لكل شخص مخدوع
برّه .. الجو حقير لكل شخص مثلك

برّه المشهد تكرر

مساحة من الأنا والناس
كمية صداع من الحچي المألوف
شوارع ماتدلّيك اعله روحتها
وهوا بظهرك.

الوحدة : غرفتك، ما عداك انتَ.

هنا جوّه .. المدينة الممكن تحبها
هنا جوّه .. المدينة الممكن تحبّك

خلّي الباب .. لا تِثبِت
محد شاغله غيابك

لا تِثبَت
هدوءك زاعج الغرفة
هدوء بنص زخم الافكار شيفيدك؟

لا تِثبَت ولا ترفض
رخي عظامك لأي زاوية تريدك.

إشاراتك، لغة، إلمن؟ للحيطان؟
لِمّ آخر أصابيعك
توتر سطحي للماضي انكسر بيدك

هنا جوّه .. مزاد لكلشي ماينباع.

الوحدة : الفجوة التنفتح بالروح
الفجوة : مقاس لوجه فارگته

وجه ما ينسأل عنه
وجه ما ينلگي منه
وجه ماضل مطار وشارع ومقهى
وجه حتى الجرايد ما حچت عنه
وجه حتى برحيله ما أكو منه
ملامح شاردة من العين

الوحدة : نزيفك، ما عداك انتَ.

الظلمة ضوه لليحچن جروحه
والحيرة سچچ للخوف للما يندل بروحه
والوحدة مدينة انعافت من الناس

ظلمة ونزفك يضوّي
لا تستخدم عيونك
نزفك بردة للشبّاچ
يا شباچ ما ضل شارع يفهمك

گوم تأكد من الباب
گوم تحاضن ويه الباب
ظلّك نِزَف جوّه الباب
وأحقر سالفة من يوجعك ظلّك

الوحدة : حضنها ما عداك انتَ.

الوحدة | Based on true scars

‎⁨عروة | Babel | هناء⁩

أجِلّ روحتك

بالله وبيك | زيد الهاجري

عراب القلب | زيد الهاجري

كلمات : مظفر النواب
صوت : زيد الهاجري

ثلاث أمنيات | مظفر النواب

رب العين | زيد الهاجري

يا گبل روحي وبعدها | زيد الهاجري

شتاء ريتا الطويل | محمود درويش

يحرگنا النسيم الما يهب منك - زيد الهاجري

الشاعر زيد الهاجري

شعر شعبي عراقي

عراب القلب | زيد الهاجري

Zaid Alhajry

Recent comments

بَس بَنان

Zahraa Munther

Roya wajdi alsalihi 🔹| Mshmsh 🧡

Roya wajdi alsalihi 🔹| Mshmsh 🧡

Related tracks