
الكلمات :

أمريكا قالت 
ياعرب
العلم قال 
إن السما من غير عمود
إحنا العرب قولنا
دى حكمة ربنا
أمريكا قالت 
ياعرب
العلم قال
الكون مابيحدوش حدود
إحنا العرب قولنا 
دى قدرة ربنا
أمريكا قالت
ياعرب
القدس من حق اليهود
إحنا العرب
قولنا يبارك ربنا

مليون قصيدة ياعرب مليت خلاص من دى القصايد والخطب
مليون قصيدة ياعرب والقدس أهى محبوسة فى أوضة يهودى بتغتصب
وانتوا اخواتها وبكره ييجى الدور عليكوا
وهتدخلوا اوضة اليهودى اللى بناها بجبنكم من غير حيطان 
مليون قصيدة ياعرب كان نفسها تتقال فى يوم الانتصار
كان نفسها تهرب من الليل للنهار
كان نفسها وكان نفسها لكن كسرتم نفسها ميتى تفوقوا ياعرب ؟

لفيت
قوموا يافرسان العرب للمعركة
اللى يقولى مسكونى سيف عمر 
وأنا ضرورى هنتصر
ياسيف عمر 
قولى إيه السر فيك 
حدادك اللى صنعك ركب زرار النصر فيك 
خليك تحارب تنتصر حتى لو فى إيدين جبان 
واللى يقولى
ركبونى حصان صلاح
هتلاقوا عصر الظلم راح
ياحصان صلاح
ماتقولى ايه خلاك بطل
كانت وكلتك وكلة ميتين من الاحصنة ولا براسين ولا تلاجيك بعشر رجول تدخل المعركة وبتنتصر 
حتى لو كان اللى راكبك حاضن الخمرة بين شفايفه
المعجزة مش فى الحصان ولا عمرها كانت فى سيف

بالمناسبة
قبل ماخلص كلام
أمريكا باعتالكم سلام
بتقولكم متشكرين
لولاكم انتوا ياعرب
ماكانتش ليا منزلة بين الأمم
انتوا اللى وطيتم عشان
نركب على أكتافكم سنين
وعشان كده بنقولكم من قلبنا متشكرين
وعشان كده هوصى اسرائيل عليكم
عشان تبطل ضرب فيكم
يا اسرائيل يابنيتى اطمنى مافيش سلام
لكن بلاش الضرب فى بلاد العرب
ده مش عشان انتى رحيمة وطيبة يابنيتى
لكن عشان الضرب فى الميت حرام

مليون قصيدة ( امريكا قالت ) - علي الهلباوي

جميع ابتهالات و اغاني الفنان علي الهلباوي 

 Official YouTube : www.youtube.com/AliElhelbawy

هو المطرب ومنشد ومبتهل، من مواليد محافظة القليوبية، وهو عضو بمجلس إدارة نقابة الإنشاد الدينى. وهو ابن المنشد دينى محمد الهلباوي

مليون قصيدة ( امريكا قالت ) - علي الهلباوي

Ali Elhelbawy