كانت هتفرق فى الوداع

she3r <3

مصطفى إبراهيم

صوتيات شعر

شعر

مصطفي ابراهيم

Mostafa Ibrahim

Barody

Mostafa Ibrahem

مصطفى ابراهيم

ساعات بلاك تيما

أصل الحياه للعلم
مفهاش حاجات ببلاش
وعشان ماتصبح فيلم
وأصلا عشان تتعاش
كادر الحياه المشحون
فرح والم وشجون
لازم يكون بيلف
لازم يكون بيدور
يتقل عليك ويخف
ويعشّمك بالنور
ف نهاية المشوار
ونا قلبي لف و دار
ميت ألف ليل ونهار
نفسه ف فرحه كادوه
وحلاوه من غير نار
ومّا الزمن تعبه
قصقص شريط الفيلم
وخَد كادر كان عاجبه
وقرر يعيش ف الحلم
و الحلم كان كامل
جدا تمام خالص
ولجل الكمال لله
كل الحاجات جواه
لكن في شيء ناقص
فاضي بشكل غريب

‫قصيدة مافهاش حاجات ببلاش - مصطفى إبراهيم‬‎

معرفش ليه
تنحت للدنيا كده !
وفجأة لقيتني مسكون بالملل
لاعندي رغبة ف البكا
ولا في الكلام
ولا عايز أنام
ولا حتي بسأل إيه ده ليه
وآخرتها إيه
وإيه العمل
وأخاف أقول لأي حد
أحسن يقوم يقلبها جد
حد صاحبي ينزعج
يمد إيده جوه قلبه من باب الكرم
عشان يشاركني الألم
أو يستلفلي من لئيم حبة أمل
حالة كده
معرفش إيه
ملهاش معاد
ساعات تزورني ف الربيع
ف الحر
وف عز الشتا
وتجيب حاجات
لا فيها روح ولا ميته
حالة كده
لا معاها تنفع كلمتين ولا غنوتين
ولا لقطة من ألبوم صور
آلاقي قلبي ف الهوا ويا الكور
أخاف أقول لأي حد
أحسن يقوم يقلبها جد
حالة كده
معرفش إيه
لكني بطلع منها بعد السكات
فاهم شويه ف اللي فات
حاسس أوي بحضن الصحاب



‫على سلامة ,, حالة كده‬‎

لما تغــيبــي
أنا بتلخبط بين السكر والملح
وأدور ف الدواليب على حبة فرح
وملاقيش
لما تغيبى
أنا والبيت بنتوه من بعض
وبابص فى عينه مايعرفنيش
وبخاف م القطة لما تنونو
ومن صوت الريح اللى بيهرب من بين الشيش
لما تغيبى
كل الحاجات الحلوة يا حبيبتــى بترفض تعيش
لما تغيبى 
أنا بحتاس
بنسى الدنيا وكل العناوين وأسامى الناس
واكل واشرب واكتب
لكن كده  من غير إحساس
لما تغيبى 
بانسى القهوة ع النار
ويروح الطعم ويغيب الوش
لما تغيبى
كل المرايات يا حبيبتى تغش
وبحس أن النفس اللى طالع من صدرى غريب
لما تغــيبــي
أنا بتلخبط بين السكر والملح
ارجوكى .. اوعى تغيبى

لما تغيبي <3 ,, علي سلامة

الصورة قصادك ممدودة...
و مش محدودة...
بالطول و العرض...
و البرواز ضلعه الفوقاني...
ف السما....
و التاني مساوي الأرض...
و بما إنك حيلتك بس عينين...
ف قصادك حل من الإتنين...
يا تقرّب جامد م الصورة...
و تاخدلك كادر تركز فيه...
و تعيش حكاويه...
و ساعتها مفيش..
و لا كادر يعيش...
و يكونله لزوم...
غير كادر الزووم...
أصغر تفصيل ف الصورة يبان...
ريحة الدنيا و طعم الأحداث...
الفرق ف تدريج الألوان...
شكل التجاعيد ف وشوش الناس...
ف تعيش مستمتع بالتفاصيل...
الجهل... جميل...
بيقربلك سقف النشوة...
و الحزن كمان...

أما لو اخترت إنك تبعد...
و تشوف المنظر من برة...
حتغطي عينيك كادرات أكبر...
و حاجات أكتر...
لكن أحجامها بقت أصغر...
م الأول ميت مليون مرة...
تكتشف إنك...
مبقتش في حاجة تأثر فيك...
و لا بتبكيك...
مبقتش بتزعل تقريباً...
و الدنيا بقت أبيض فاقع...
و إن انت بقيت إنسان ساقع...
مبقيتش بتضحك بالساهل...
و لا حاجة ف نظرك تستاهل...
تتمنى ساعتها تعود جاهل...
ف تلاقي الزووم...
كان رايح بس...
و لجل النحس...
مفيش راجع.

شعر : مصطفى إبراهيم : الصورة قصادك

تفرانيل مصطفى ابراهيم

ولحد ماتميت ست سنين
انا كنت بحب البني ادمين
وكرهت الناس من بعديها
علشان نسوني انا اصلا مين
مش فاكر امتى حقيقي بدات
انما في فتره فاكرها طشاش
كان فنجان قهوتي مبيفضاش
وكنت بكلم ربنا طول الوقت
عمري ماصدقت بنات غير ريم
ويمكن دلوقتي مصدقهاش
اخر مره شفتها فيها
كانت تقريبا بتعزل
وكان في سواق تاكسي منزل
في شنط ناس هتحل مكانها
وشوش بني ادمين معرفهاش
انا ريم يمكن كانت قدي
ايامها لكن دلوقتي اصغر
عارفه ان انا يوميا بكبر .. وبعجز
اكمني مبنساش
انا فاكر ايام بالملي
انا فاكر ايام بالتفصيل
انا فاكر يوم دفنة اختي
هتصدقي اكتر ما فاكرها
وساعات بنسى في ليله كبيرها
انا فاكر شقة قصر النيل
ومش فاكر حد من السكان
من صغري وعمري مابنسى مكان
انا اصلا فاكر بيت شادي
مع اني مزرتوش غير مره
بامارة في برواز بره
كان جواه صورته في اعدادي
كان لسه طالعله شنب
وانا حاسس اني طلعلي اتب
من تقل الشيله ومـ التفكير
معلشي انا اسف برغي كتير
وبسف فوقتك وفوقتي
انا نفسي انااام
انا عاوز اروح دلوقتي
متشكر جدا عـ الجلسه
هنكمل امتى علاج طيب
لازم هنشوف بعض قريب
انا ماشي .. سلام

تفرانيل ,, مصطفى ابراهيم

يا كل حاجه كسبتها
أو سبتها
و ملحقتش اشبع منّها
اكمنّها
قالت “حنروح من بعض فين؟ "
يا ناس يا عبط يا عشمانين
ف فرصه تانيه للقا
بطلوا اوهام بقي
وكفايه أحلام واسمعوا
عيشوا بذمه و ودعوا
كل حاجة بتعملوها
وكل حد بتشوفوه
وكل كلمه بتقولوها
وكل لحن بتسمعوه
عيشوا المشاهد ,, كل مشهد
زي مايكون الأخير
واشبعوا ساعة الوداع
واحضنوا الحاجه بـضمير
دا اللي فاضل مش كتير
اللي فاضل مش كتير



‫كانت هتفرق فى الوداع ,, مصطفى ابراهيم‬‎


مين فينا عارفك يا رب و مين فينا لأ
مين اللى فينا لو قال بحبك قالها بحق
واحد بدقن بيقول حلال و يقول حرام
وللا فواعلى أرزقى شادد الحزام
وللا خمورجى استسمحك قبل أما نام
وللا عيل لسه معرفش الكلام
وللا حاطلع انا اللى عارفك
انا اللى تايه ف الزحام


تايه في الزحام ,, مصطفى ابراهيم

سلك السماعه - مصطفى ابراهيم

شهيد الثورة - مصطفى إبراهيم

فلان الفلاني - مصطفي إبراهيم

قالولى زمان - مصطفى ابراهيم

دفتر أسامى - مصطفى ابراهيم

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



‫كانت هتفرق فى الوداع ,, مصطفى ابراهيم‬‎

Amera Abd Elaziz