tes mots me donnent envie de reprendre l'écriture.. c'est tellement juste, c'est tellement beau.. merci pour ce magnifique partage..  الله يهديك عليا و الله لا ينسيني فيك ❤️❤️

tunis

une chanson collective avec la participation des jeunes artistes ; 

- chaima mahmoud ( asha )
- bayrem kilani ( bendir man )
- najet ounis 
- amal cherif
- fahmi riahi 
- hatem karoui
- yasser jradi

Ghnéya lik ( une chanson pour toi )

نخاف منّك عليّ ، نخاف منّي عليك ، نخاف عليك ، نخاف تغيب عليّ تضيع ...
نخاف نقدّم، نخمّم نجيك تدزّني بيديك ، ترميني تخلّيني وحدي نلوّج عليك
نخاف نبعد كلملح نذوب من قدّام عينيك ترميني بسهامك تنساني و تحرمني من سلامك
نخاف نقلّك توحٌشتك ما نسمع كان صوتي و أنفاسي و تجاوبني بسكاتك
نخاف نسكت يجرحني ملامك و تذبحني بشوك كلامك
نخاف نكتبلك تحرقلي أوراقي تنشرلي أسراري
تحكيلهم على خنّاري و قدّاش خنقتك و من حبّي تعاني
نخاف نصوّرلك  ذاتك تسكّر عليّ بابك و شبابك حياتك
تبلّها التّصويره و تبزّع ماها عل عتبه و ترمي وراي ألف حجره و حجره
نخاف نبكي تقول عليّ ممثّله و نحبّ نسخّف الغير و نوّلّي كيفي كيف الطّفل الصّغير
نخاف نضحك نولّي حجره في عينيك ، نولّي ثلجه و لعبت بيك ، لا خمّمت فيك لا نهار حبّيت
نخاف نرقد و غدوه نلقاك عليّ مشيت
نخاف نسهر و حياتي عليّ تضيع
نخاف نكبّش نخنقك نقتلك نفدّدك و بيدي نكتب إخرّ كلمه في الحكايه و تولّي غريب
نخاف نسلّم نأيّس نعدّي ندوّر الصّفحه يتحرق لكتاب يولّي رماد يهزّو الرّيح
نخاف نخاف و نهدّ الّي بنيتو سنين
نخاف ما نخافش و حقيقتك تقتلني و برودك يحرق لكنين
نخاف منّك ، نخاف منّي ،  نخاف من النّسمه إلّي تمسّح على شوافر عينيك
مالغنايه إلّي تدغدغ وذنيك ،
مالدّنيا إلّي عاكستني و خلّاتني بعيده عليك
نخاف من قلبك ،من دقّاتو نخاف لا نهار ما يعقلينش
نخاف لا تطلع ما تحبّنيش ...

نخاف

Lobna Noomene - Keb Elfoulara

نتفـكِّر - رؤوف بن عمر

الحب كلام أما العشق أسرار الحب كلمة تتقال بين زوز .. تتشاف فالعينين .. تتوشوش فالوذنين.. وتتحس في بوستين .. ومحلاه الحب كي يبدا مباح .
أما العشق حكاية أخرى حكاية تحكيها بينك وبن روحك كل يوم تسال روحك علاش هي ولا علاش هو تي كفاه جا ما ستانيتوش كفاه نحس فيه وما ريتوش كفاه دخل حياتي وما خترتوش هذاك علاش الحب كلام أما العشق أسرار
الحب كلام مزيان كلام حلو كلام كما حبي عينيا وروحي كلمة زادة كما توحشتك وكما نموت عليك أما العشق كلام أخر وهدرة أخرى كلام كما ''تي صلي عل نبي طفلة كيف أختي ''.. كما زادة ''وه هذاك لمازال الطفل محسوب كي خويا يا غلبة'' ولا "ليك وحشة يا بنت الناس "ولا "طل عاد خلي نشوفوك يا طفل"
وكما قلت الحب كلام أما العشق أسرار هذاك علاه الحب ما يجي كان جهار بهار يبدا ببرومو ويوفا فالدار أما العشق ما ينجم يكون كان أسرار خاطر حد ما يعرف سر الغيرة وحرقتها سر الغزرة وكلمتها سر البوسة وبنتها سر المسة وخرّافتها وسر الضحكة و حكايتها مش ساهل بش تغزر في عينين حد وتقولوا راني نعشقك ولا تشم ريحتو و تحكيلو راني نتنفسك ولا تشدو من يدو وتوشوشلو محنّك تي ساعات ترزن عليك حتّى كلمة مبنّك 
الحب كلمة أما العشق سكات والسكات أكثر حاجة تنجم تعبر بها فالدنيا هاذي هذاك عليه تسكت كي تبوس تسكت كي تعنّق تسكت كي تحلم وتسكت كي تخمم وزادة تسكت كي تموت أي نعم العشق موت تموت لداخل تموت الف مرة وما يشوفك حد تموت الف مرة لا يسمع بيك حد تموت الف مرة ولا يشلق بيك حد.. تموت بينك وبن روحك هذاك علاه الحب كلام أما العشق سكات والسكات هو برشة كلام ما تقالش وبرشة كلام مش بش يتقال السكات زادة تبسيمة في الوجه و ساعات غصة فالقلب أما مخيبو السكات كي يبدا دمعة عالخد
و الحب كلام لغة و سياسة أما العشق غرام و سناسة .. سناسة كلبة .. سناسة كلبة بيّا وبيك ومخيبني كي ستانست بيك ستانست بضحكتك صوتك وتذبيلت عينيك بريحتك شعرك ولمسة اديك بهبلتك وريقك والدموع على خديك 
ونعمبوه الحب كي يبدا كلام أما العشق سناسة وانا ستانست بيك أما ما نحبكش .. ستانست نعرف شبيك وما نسئلكش ستانست نغير عليك وما نقلكش ستانست نشتهاك وما نبوسكش .. نشم ريحترك وما نشوفكش .. و ما اصعبها كي نقربلك وما نمسكش .. و كي نشدك نتمنّى ما نسيبكش..اما محلاني كي نسمعك وما نقلقش .. نغزرلك وما نتعبش نعاتبك و ما نوجعكش زادة ستانست نحلم بيك وما نرقدش .. نتونس بيك وما نشبعش .. نمشي وراك وما نخلطش
ستانست نتمعشق فيك أما كما قلت ما نحبكش

سناسة

قداش -
  صوت: يسر مشفر
نص: أمين ڨلّح

قداش لا عندك لا وعد ولا عندك كلمة 
وقداش منها الساق تعفس حافية عالجمرة 
وقداش مني نستنى فيك تحت حيط خايخ 
بارد سارد اكثر من جواجيك 
وقداش كرهتك ومزال عيني فيك 
وقداش عشقتك وهربت من مسة يديك 
وقداش اشتهيت نكذب عليك 
نسبلك عرق بلوتك لولاني الي سلسلني فيك 
وقداش منو الوقت الي قالو ينسي
والشكوى لسكات الليل وين بش ترصي 
وقداش الدمع نشح 
وقداش منها لغبينة والقلب لابس اكحل مافرح 
وقداش منو عمري وعرفو الي تهد 
وقداش ماحلاها الدنيا ومكش فيها 
تب اي نكذب ماو قالو الكذب ينجي والدنيا تربي الي نساها
قداش طويلة الدقيقة
وقداش باردة لمخدة 
وقداش من تصويرة في اللحظة تعمل بلعاني لا تتفسخ لا تتعدى 
ضيعت حسابي 
ونسيت ناسي وحبابي 
وغزرت بعين الشماتة لشبابي
ونسيت قداش عبيت من غزرتك عيون وجوابي 
ونسيت قداش كتبتلك "نحبك" بسكاتي الي تدفن في ترابي
قداش مانترباش ومانشعفش 
وقداش سكاتك مايرحمش
قداش من علاش 
وقداش منها عشقة ماتموتش وماتوفاش 
وقداش ماتكلش وماتعياش
وقداش ماعنديش كلمة ومانترباش

قداش - بقلم أمين ڨلّح- صوت يسر مشفر

بجاه اللي خلقك و خلقني

- و شيء- 
  اداء صوت :يسر مشفر
نص:  خديجه بكوش

و شيء- نص:  خديجه بكوش / اداء صوت :يسر مشفر

يا خيال مصور،
عايش في فكري المتهور.
يا غزرة ، تقتل الي فات.
يا فرحة تبدل الايامات
نتفكرك ..تتبهذل الشيرة...
نستاحشك كيف الغشيرة..

نعيشك ،نتنفسك ونحبك
من تحت السكات
يا فلة في عروش الروح كي تنور
يا شهوة عقاب الليل تلب وتفور
يا هبال الكبر والرزانة
يا حضن عشقة ومسة حنانة

مانتربى كان في قلبك
ومانترشف في لهوى كان نسمة حبك
ونتوحشك قبل ما غصة الوحش تشدك
ونحيك من بالي ولروحي نتمنى نمدك
يا عقاب خرافة عشتها كي تحكات
يا ممو الشفر وتسلطينة لغنايات
يا كل يوم وغدوة الي عاش في الحلمات
يا شطر الشيخة وشطر الحيرة
يا شطر العشرة وكل الجيرة

نلبسك، نشعلك فيا ومانطفيك
نقراك قبل مانراك ونكتب عليك
ونحبك بالسكات قبل ما حروفي ليك
في الروح ترشقت ماتقرات
ومن تحت سكاتها ... نوات
نوات تذوب على يدين العشقة،

وتحبك بين التنهيدة والشهقة..
وكاسها ، مالي شايخ ما يشقى.
يا كلمة حفرتها على صدري..
يا فرحة في عروقي تجري.
يا عرق على بدني يسري....
ياباب تسكر وخبى الرواية..
يا كتاب ضيع اخر ورقة في الحكاية..

يا صلاة نصليها فوق الخمس
و قبلة نتبعها بلا قمرة ولا شمس..
يا محراب عايشة فيه...
يا معبد ساكنة روحي فيه...

وحي على عينيك وفيهم القبلة
والروح الي عشقتك بخيالك حبلة
وعمرها ماتموت البلوة بيك
كيما عمري مانسيت اول ضحكة رميتهالي بعينيك
وكل يوم تشرق نفس الشمس ويحضنها السحاب
وكل يوم خايف مانرلك وقت نعتب من هاك الباب
وكان نسيت ماقتلكش
ايجا نقلك الي انت اول لعذاب واخر لحباب
والي انت كمالة السكات في المكتوب والجواب
والي انت لفتيلة الي لا طفاها بعد ولا ردمها تراب
والي انت دمعتين مافسخو حرف من اخر صفحة في هاك لكتاب
الي كتبتو بش تقراه
والي لا حب غيرك ولا تمنى غيرك يهواه
يا سنة
يا فرض
يا كية
يا بية
يا ثنية
ضيعتني
بالطول
والعرض

كل نفس بهواك تمشيه
وكل عذاب ستناك تعبث بيه
وكل لحظة غمضت قلبي عليك
غدرني وتحل وترشقت فيه
لا ززاك ولا هواك ولى يززيه
الله لا يحرمني منك ويرزيني فيه
فماش ماتصلي على قبري
وترميلي نوارة حمرة كي دمك
ونرجع نحيا معاه وترجعلي روحي الي فيه....

نخافها تذبال وتموت قدام هواك..
ونخاف تخطفها النسمة والريح و تخطاك..
و علاش الدموع والنوارة .. واحنا عشقتنا بينا مسرارة..
معاك وبيك ، تحت السماء وترابها..
و فوق الارض ، وتحت سحابها..
نصليك ..
نغنيك..
نبكيك..
ونترنم .. و اناجي مانعيشش بلا بيك
*******
نص ببلومة Myriam Bribri و [Amine.G]

يا خيال مصور (Amine.G & مريم بريبري)

مغرفتك ماتهز كان قسمك
ومكتوبك ماينادي كان بإسمك
خليك طبيب روحك
وقت تتمكّن بيك جروحك
خليك الصوت المخفي في كلامك
خليك تغير وتدوان على غرامك
خليك تغزر لبعيد
وماتنساش الركزة الي قدامك
خليك دوزة لهبال الي تحلّي ايامك
وخليك لكلام لمحرّم عليك وهو حلالك

واش كان عليه
كان الي مايجيش جاء
واش كان عليه
كان غزرة تسحرك كي تترمى
واش كان عليه
كان قلبك طاير غادي
وجهامتك ملطوخة لهنى
واش كان عليه
كان سكاتك تعلم لغناء
واش كان عليه
كان تتوجع وتتكوى
واش كان عليه
تطيح
تتكب وتتقعد
وتلقى وحدك الدواء لكل داء
واش كان عليه
كان تخلق مالظلام ضو
واش كان عليه
كان تقول يزي مالصبر لازم تو
تي اش كان عليه
كان من وسط المر تذوق شوية حلو

تي ايييييه ....
لكلها أيامات تعاود في بعضها
تحب شطرها والباقي تبغضها

تي أنسى الي خان وغدر
وتفكّر الي تقوّى وقدر
وخليها للمكتوب والفرتونة والزهر
وأرمي وراء ظهرك إلي تعدّى وحصل
وتبّع صنيعة الي قال وفعل

تي بعد هذا ودونو

قدّاش الفرحة في القلب تعزّت
وقدّاش العين عالبكية تلزّت

إحسب ... وأعرف حكّر
أنسى ... وساعات تفكّر

إلّي كل واحد ومغرفتو آش شهزت

ولاباس
الروح صبيّة
والقلب عليها حزّار

مايهدناش إلّي صار
ولا يقتلنا زمان بكلو خنّار
وديما صح ستّار

[Amine.G]

صح ستّار

شنية إسمها ؟
وشنية أصلها ومنين فصلها ؟
حبّوني نورِّيها
ومن أوراقي نخرَّجها ولحضني نرميها
سألوني عليها من قديم الزمان
تمناوني في سكاتي نصيح
وبهواها نسبّح وننطق بالفم المليان
سألوني شكوني :
إلي سلبت عقلي وعملت فيَّا الدوني
إلي طيرت مخي
وهزتلي كنيني
وصنعتلي الفرحة من جرح محوني
ما لقيت ما نجاوب وما نقول
ما لقيتلها أوصاف ولا حروف ولو الدهر يطول :

في بالي ... صوَّرتها
في بالي ... عبَّرْتها
في بالي ... كبَّرْتها
في بالي ... غرَّمْتها
في بالي ... خطِّيتْها
في بالي ... ربِّيتْها
في بالي ... شْتْهِيتْها
في بالي ... كلِيتْها
في بالي ... حْكِيتْها
في بالي ... ڨمرة ضوَّاية حطِّيتْها
في بالي ... بروحي في ڨرْسِتْها غطِّيتْها
في بالي ... عرِّيتْها وسخانِةْ صِدْري لَبَّسْتْها ودارِيتْهَا
في بالي ... عشِڨْتهَا وجَافِيتْهَا
في بالي ... سلطانة لحياتي إستَفْتِيتْهَا وعلِّيتْهَا
في بالي ... وشمة لجواجيَّا تِشْويتْهَا
في بالي ... مَمُّو عيني إِلِّي لاڨِيتْهَا
في بالي ... صفحة من منامة وحلمة على رقبتها قْرِيتهَا

في بالي ... تلَحَّفْت شْعَرهَا
في بالي ... ترشَّفْت شْفَرْهَا
في بالي ... كفوفي غطَّات حِشْمتْهَا
في بالي ... تِفْطَمْتْ على حلاوة صُرُّتْهَا
في بالي ... تعلَّمْت نرضع رجوليتي في شِفِّتْهَا
في بالي ... عَرْقِي هو الدواء لوْجَعْهَا وعِلِّتْهَا
في بالي ... كْفَرتْ بالعيبْ وقت ما عْبِدتْ مَشْيِتْهَا
في بالي ... تغرِّيتْ بزنودها وتشنقت بضَفْرِتْهَا
في بالي ... تعلّمت نشْكِيلهَا بَاسِي
في بالي ... وْصُلْتْ نْسَمَّعْهَا حرارة شِيرتِي ونْحَفَّضْهَا إحْسَاسِي
في بالي ... على صدرها نفرغ شكارة أوجاعي ونْخَبِّي رَاسِي

في بالي ... خْرَافَةْ مِزْيَانَةْ
في بالي ... بْنَيَّةْ بِحْلَاوِتْهَا فَرْحَانَةْ
في بالي ... تَبْسِيمَةْ صَافْيَةْ عِرْيَانَةْ
في بالي ... زَعْبَانَةْ دَلُّولَةْ وْسَاعَاتْ خَرْنَانَةْ
في بالي ... رَعْشِةْ خُوفْ وْبَرْشَةْ حْنَانَةْ

في بالي ... مِسْكْ اللِّيلْ
في بالي ... عمبر منوّر ومشموم كْلِيلْ
في بالي ... نِسْمِةْ عْشِيَّة
في بالي ... مُرْجَانَة زِمْنِيَّة
في بالي ... عِشْڨَة عَرْبِيَّة
في بالي ... هَبْلَة رُومِيَّة
في بالي ... رِيحَانَة عَجْمِيَّة
في بالي ... خْيَالْ و مُمْكِنْ جِنِيَّة
في بالي ... رُوحِي مِبْلِيَّة
في بالي ... تْرَهْوِيجَة
في بالي ... تْمَهْمِيشَة
في بالي ... تْبَرْبِيشَة
في بالي ... تْدُولِيشَة
في بالي ... تَرْبِيجَة
في بالي ... تْخَلْوِيضَة
في بالي ... حاجة صغيرة و مُمْكِنْ حْوِيجَة

في بالي ... ومَا تْرَاوْهَاشْ
في بالي ... وما نَعْطِيهَاشْ
في بالي ... وما نْسَمِّيهَاشْ

في بالي ... إِلِّي هِيَّ
في بالي ... إلي على عِينِيكُمْ طَلِّتْهَا عْصِيَّةْ

في بالي ... خُلْقُتْ وتْرَبَّاتْ
في بالي ... ماتت بِالحْيَا ومَا مْشَاتْ
في بالي ... شَهَّدْتْ وحَبِّيتها وبْحْرَامْ كلامي تْكَفْنِتْ وتْخَبَّاتْ

في بالي ... عْشَقْتْهَا
في بالي ... وْلِدْتْهَا
وفي بالي ... هِيَّ حْلَالِي وْبِنْتْ خْيَالِي

[Amine.G]

في بالي

يا غلطة لعمر
يا ثنية تعبها بلاش سفر
يا شطر لحلاوة
وكل المر
يا شبعة
الي قام سعدو
وزهرو ما حضر

اي شبيه
كان سمعت منّي كلمتين
محصورين في قلبي توة سنين

واي شبيه
كان بتنا
ليلة من بعضنا شبعانين
وليلة بعدها عاشقين
وتزيد تكبر الرعشة
وتولّي الدقة دقتين

واي شبيه كان تدمع العين
وترجع محبة هاك السنين
وعزقة في الروح ترجعنا حيّين

واي شبيه كان حد مايشبّهلك
ولا ينجّم حد يوصلك
ولا ينجّم الزمان يصدّي شبابك
ولا ينجّم البعد ينسّيك احبابك

قد ما حاولت نحّيك من جاشي
ونمحي حروفي الي تشبّه لحكاياتهم
ونبدلك بللاّتهم ...

شي ... مانجّمتش ...

عيوني ماطاوعتني
ورجعو من غير مايشاورو
في خيالك لمتخبي مرشوقين

قد ماتبرّي بكية فراق الميتين
قد ما تزيد تشعّل نار الحيّين

تي افهم
الي قلبك وقلبي
على بعضهم مفطومين

وحتى كان يسكت مايدق
ويهفت حس جاشي
الي منك تحرق
عمرو مايرجّعلي عمري
الي من جرة بلاك تسرق

يا رعشة كنيني
الي لبّو لعرق
يا تزلزيلة لوطا
كي تمشي عليها
وانا ندعي
تبلعني كي تتشق

يا حرارة لكنين
وفزعة النّو بعد لبرق
يا نفس يرجّع الروح
بعد ما لكلام نشح وسكت
والريق شاح وزاد شرق

تي وقتاش تطّل
ويرجع يفتّح معاك
نوّار الفل

وترجع يدّي
بعرقة من يدك تتبل

يا أصل المشكل
وكل الحلّ

يا غلطة ماتصلحتش
تصورت في ورقة لعمر

مهما بردو أطرافي
كي نتوحشك
يرجع يشعل في روحي الجمر

يا دعيوة الخير في سواد الشر
يا خبابل لبحر واسرار البر
يا أحلى غلطة في جاشي تتحفر

انت هي ...غلطة لعمر

[Amine.G]

يا غلطة لعمر

هكّا يا قلبي
تخلّيني نحب
وتعلّمني الي ورا كل روح صافية
فما عزقة تحكي حتّى وهي غافية

يصيح سكاتها
وماتتحكاش حكاياتها
حتى كي تتكوى وتزيد تتعطب

وهكّا ... تحبنا ننطقوا
بش نقولوا... ونقعدو نعاودوها :
ايه .... مزلنا عايشين
بش نضحكوا ونحكيوا
وحلفنا معادش بش نبكيوا
وديما شادين في بعضنا
بش نحبّنا كي نزيدو نعشقو تبسيمة حيّة
تبسيمة تفرفط في الجواجي
وتجي على غرادة
وتبهنيسة تحكي علينا
حتّى ببلادة

تي هذيكا هي صنيعتنا
كيف ماكانت ديما العادة

هكّا يا قلبي
سرّيتك على سرّي
وفضحتهم انت عينيّا
وعرّيتهم وحدك شهاويّا

خاطر وحدك الي تفيق بيّا
حتى كي نقلّك اخطاني راك بليّة

وقد ما ترعش عليّا وتسترني
نلقاك زادة تفضح فيّا

أما انا مزلت نحب نحب
ونحبّك معايا تقعد تتلب
خاطرك بدقّاتك
رشقت فيّا
العشقة واسرارها
وزرعت جاشي
بالحشمة وخنّارها
وعلّمتني الغيرة وعزارها

هكّا يا قلبي
بعد هذا الكل
تخلّيها بيّا

وقت الروح
لقات وين تتنفّس لهوا
ولقات كاس منّو
تترشّف غرام وتتروى
ولقات شكون سقاها
وشكون غطّاها
وخذا منها خزرة حشّامة
وقوّة في الشدّة عطاها

هكّا يا قلبي
وقت الي لازمك تدق دقّة
دقّيت مرتين
وفضحتني بلمعة عالشفرين :
لمعة لا تتشرى ولا تتباع
لا تتعطى لا تتفك
ولا تتكال بالغرام
ولا حتى بالصاع

تي هكّا يا قلبي
تفكني من دنيتهم
وتدّيني لدنيا احلى
وتسلطنّي بغناية تشبهلي
وماتشبهش لحكايتهم

وهكّا ماتقلّيش ؟
ماتورّينيش ؟... وماتوصّينيش ؟

قدّاش مزالت طويلة الثنية
وقدّاش منها النيّة
وقدّاش بش نقعد نتكّى عليك
ونقيّدها على منامة مشتهيّة
وموش مالعدم مكريّة

هكّا يا قلبي
كي نشدتك خلّيتني وما لبّيتني
وزدت دزّيتني
ولحضن الدنيا رميتني
وقتلي برّه فارع
فك ليك وخوذ بايك

وأقعد أسمعني وكلّمني
وعمرك ماتخلّيه ينشح حبارك

تي هكّا يا قلبي
ماتقلّيش وماتسرليش
الي العيشة فيها
ديما كيّة ووجيعة

كيف مافيها انت وانا
ستانسنا نزهاو
ولسابع سماء نطيروا
ونخليو شيختنا احلى صنيعة

وفما انا نمّن بيك
يلعن مذهبك
قبل السنّة والشيعة

هكّا يا قلبي
تغدرني
وتخبّي عليّا
وتقلي برّة جرّب وحدك

واصبر ميسالش ...
وتعلّم من غير علاش
وتفكّر ديما وماتنساش :

الي جاية الراحة بعد التعب
وحتى كي تفركس وما تلقاش
ماتسلّمش ! وارجع فركس ...
لازمك تتليّع بش تفهم وتتفهم
وانا راني مانحيركش من عدم

ولازم توة تلقى فيّا فيّة
وهذيكا هي لهديّة
وممكن هذيكا هي الديّة

هكّا يا قلبي
تزرع فيّا نوار عشيّة
وتوصّيني نبكي
كي نرخ بش نرتاح
ونحسب كسوحيتك
ديما في حضني طريّة

تي الحسبة ما تقابلش :
انت مزلت شادد صحيح
تضربني وتضرب عليّا
وتجافيني وماتحملش فيّا
وديما تقلّي ديما هذيكا هيّ

هكّا يا قلبي
ساعات تقوّيني وتعّلمني
وتقرّيني والطريق تورّيني
وساعات تعاندني وتوصّيني :

وتقلّي مزالت تستنّى فيك
ولازم بش تلقاها
الي بش تخطفك بغزرتها
وفي اسمك بش تنسّيك
وتلهّيك حتى عليّا

تو وقتها نرجع نفكّرك ونقلّك :

ايه ... هكّا يا قلبك الي دق ووصّاك :

ماتمسحش ندوة سقات عروش لحبق
وماتنساش الي ديما عندي عليك حق
حتى في كمشة حروف تفرتهم عالورق

وهكّاكا قلبك
اش بغى
وهاكي روحك كي تحب
كيفاش تتبلى
وهاكا جاشك الي اشتهى
كيفاش يتعمى
ولا تشيلو لا أرض ولا وطا

وهكّاكا ... لازمك تحب
وماتسألنيش كيفاش
يصبح شبعان وهو عالخواء

هكّاكا القلب فاش يتلهى
هكّاكا هو ...
ما يعشق كان كي نوا
ومزال ما صحى ...

وهكّا يا قلبي
قد ماتفرغ
ديما بالمعزّة تقعد معبّي
وانا في وسطك متخبّي
نشهدلك ونشهد بيك
ويشهد علينا ربّي

[Amine.G]
-------------------------------------
نص وإلقاء : أمين ڨلّح
موسيقى وعزف : Rami Ourabi

هكّا يا قلبي (نص [Amine.G] موسيقى رامي عرابي)

Mehdy Khmili - قلقت و إلا تخنقت ؟ -〚Live Session〛

نعتذر على البحّة في صوتي و على رداءة التّسجيل، كان تحبّو، النّصّ موجود هوني: 
https://www.facebook.com/notes/shams-radhouani-abdi/%D9%86%D8%AD%D8%A8%D9%91%D9%83/10151224064041359

صفحة كلام شارع: 
https://www.facebook.com/KlemChere3?fref=ts

يا خيال مصور (Amine.G & مريم بريبري)

Amine Gallah

Recent comments

Samarie

Related tracks