بصل الصبر 

" حوار بين اللهجة العامية الشعبية و موسيقى الچاز العالمية " 
- Dialogue between popular vernacular and world jazz

قَشَرت بَصل الصبر
عَيطني
هَشكني كَفّ الموز 
ماضحكنيش
نَزِلت شيش اليك 
قشطني
ولعبت شيش البيش 
ماكسبنيش
وبَخت بَخت الطاولة 
حبستني
وقرصت ودن الزهر
ماسمعنيش
رخيّت فـ خيط الذكرى
خنقتني
والذكرى شادة خيوطها
مابترخيش
————-
انا خُفت موت م الموت
يموتني.. 
شَفعلي عنده الخوف 
ماموتنيش
فَتّحت تحت المطرة
بَلِتني
غمضت عيني النور
مانشفنيش
دقيت رؤوس الدُف
رقصني
مريت في جوف الناي بقيت
درويش
جَريّت عقارب الساعة في
بعادِك
والوقت واقف برضه 
مابيمشيش
—————
العمر فيا بيجري في 
ميعادك
أقدامه باينة فـ وشي زي 
الفيش
شقايا شاب في الشقة 
شقاني
طبقلي قلبي وشاله وسط 
النيش
ولعت نور الأوضة 
عراني
وطفيته تاني لكنه 
مابيطفيش
الماضي تاعب نفسه 
علشاني
جاي من بعيد وانا قولتله 
ماتجيش
———— 
مَيّل عليا الجَرح 
وإداني
حسرة وندامة ودمعتين
بقشيش
أنا خفت أدوس ع الشوك 
يشوكني
لطَخت وِش الورد 
بالورنيش
عَدا الهوى على وشي 
خربشني
قالي: بلاش تتمشى ع 
الكورنيش
وجري ورايا الحزن 
يقفشني
زغزغت روحي
ضحكت ..
مالحقنيش !

بصل الصبر- أمير صلاح الدين  |   Amir Salaheldeen - Basal Elsabr

وابْكِ وحدك ما استطعتَ.

زدني بفرطِ الحبِّ فيكَ تحيُّراً

مخرج سينمائي مش مشهور بس معلش بكره هبقي من اهم مخرجين الكوكب!

 . ..روح بتغني لروح
_______________

مش عارف .. .

بس حتى العيوب بتحليها🖤