المناظره

أكونت الفيس https://www.facebook.com/islam.akmal.9
رسايل البحر
(1)
جرّب تلبس نضّارة بعين واحدة
وتبص لسما بعد السابعة
وتستدعي الفِكر المحبوس 
جوّاك من غير أي مُتابعة
واشرب واسكر من غير خمرا
ومن غير أي ليالي حمرا
قوم واتوضّى وافضل ساجد
وانسى الكل في سبيل الواحد
وقبل ماتنوي تسلّم سلّم
واقلع من تاني النضّارة
واستدعي الملكوت واتكلّم
وتخيّل ان السما سامعة
تخيّل ان السما 
ما بعد السابعة !!
(2)
تفتكر انك شايف نفسك
بالظبط أقصد أو بالميلّي ؟!
تفتكر انّك أصلاً عايش 
علشان بتصوم أو بتصلّي ؟!
طب لو صُمت وصلّيت وكأن ماكان
هترجع تاني تعيد الكرّا ؟
ولا هتكتفي وتقول ياللااا
ماعدش لينا فـ الجنّة مكان
ماعدتش أشوف نفسي كمان
بأدق التفاصيل والميلّي !!
(3)
اقفل كل البِبان 
وسيب باب السما موارب
وزّع ورقك ع الحيطان
واحتفظ دايماً بالشايب
افرد الستاير بالعرض
ع الأرض
وخلّي فنجان قهوتك دايماً مابيفضاش
أو يمكن أصلاً ماتملاش
اكتب زي ماعلّموك في المدرسة
م.........ماتقومش للناظر غير لما يقول "قيام"
د ........دم الشهيد عمره ماهيروح هدر
ر..........رؤية سيدنا إبراهيم في المنام
س...........سابتني عشان بداعي القدر
ت...........تأبين الذكرى التانية لهندسة
(4)
لأمي اللي عاشت ميّتة
وابويا اللي مات في بداية عامي العشرين
أو يمكن ميّت من سنين
لكن امي اللي ماسكة فيه ومتبّتة
مش عارف على ايه أو ليه !!
واختي اللي شايفاني عبقري
واصحابي اللي عاملنّي "افّيه"
والناس اللي كانوا في يوم عايشين
والناس اللي عاشوا جوّا منّي 
برغم موتهم من سنين !!
والناس اللي راحوا يمخمخوا
فأنتخوا
والناس اللي راحوا يدفنوا
فدفنوا اللي عاش وسطهم
ورجعوا اللي أصلاً ميّتين !!
(5)
البنت اللي عاشت معاك 5 سنين
وباعتك بس في 5 ثواني
البنت اللي قلت "هتروح لمين !!"
"مسيرها هتجيني تاني"
البنت اللي كنت بتفارقها 
لاجل ماتبل بالخصام ريقها
أديها عاشت وانت مُت
ومُت ......ومُت ......ومُت
بعدد القصايد اللي كتبتها لها
بعدد الهدايا اللي جبتها لها
بعدد اقلامك اللي رفضت
ترسم حاجة غير اللي ف خيالها
بعدد فناجين قهوتك ف وحدتك
بعدد الحاجات اللي تمّت وكانت فِكرتك
وعدد أساطير النينجا ترتر 
والبلونات المليانة رُز
بعدد كل حاجة قلت بعد فُراقها "طُز"
بعدد الحاجات اللي اتخلقت
علشان تكون بس ليها
بعدد ماعرفت بنات بعديها !!
"6"
لم يعُد نهدكِ يكفيني 
ياصاحبة النهد الأصغر
وسفوح نساءٍ تُناديني
كي أبني عليها شراعاتي
وأشيُّد اسطولي وأكثر
وأناضل أجل الحريّة
حرية أهل فلسطينِ
وفوق الحلمات الورديّة
وبسيف صلاح الدينِ
أُعلنها "الله أكبر"
لقد خلقنا اللهُ أحراراً
ولن نركع بعد اليومِ 
لنهدِ آخر
وفـ جوف الليل اتّاخر
لاجل ماتقعد جنبي نجوم
ويجي دوري ف الآخر 
فتنادي بلا صوت "قوم"
فيتكسف القمر فـ السما
ويتحامى بيها
فـ استسمحك اني أموت عشان
أعيش فيها !!
"7"
وقّف كل الساعات
واحبس نَفَسَك كاللي مات
خُد قَناعة مـ الحياة
خُد مناعة مـ الممات !!
وافتح باب السما على آخره
واخسر فـ أول الدور
ما يرجعلك فـ آخره
لاجل ماتغري فم الحيتان
استرجع جميع الورق من ع الحيطان
دلوقتي عمرك ماهتتعايب
دلوقتي تقدر تفرّت فـ الشايب 
دلوقتي بقيت رسالة 
من اللا بحر للا انسان !!


اسلام أكمل_رسايل البحر

Islam akmal

Related tracks