إتدلّعي واتبغدَدِي واتفاخري واتباهي

قولي لكل الناس .. ده عشقني والله

لِـمِّي العيال حواليا زِفُّـوني

ظاظوا عليّا وحَدِّفُوني طوب

ما انا اللي سِبْت عنيكي لَفُّوني

وانا اللي استاهل كل يوم مركوب

 

فاتدلعي واتبغددي واتفاخري واتباهي

آدي ضَحِيَّة كمان فِدا رِمشك الساهي

موت الضحايا جَزَايَـا ما انا اللي وَدِّيـتِـك

و لْـحَدْ حَدْ ما وَدِّتُـوش ولا حَدْ وَدِّيـتـك

و قلعت كل سنيني على خَصْرِك

ضَفَّرْت شَعْرِك عشّ جُوَّايا

بايَـعْت حُكمِك وابتديت عصرِك

ووقَفْت ورا عرشِك ومَسَكْت هـوَّاية

 

موت الضحايا جَزَايَـا وكُلَّها ضحايا

مين اللي قال الحب آخره عَمَار

الحب آخره نهاية في رحَاية

القسوة طاحنة والحجر دوَّار

 

فاتدلعي واتبغددي واتفاخري واتباهي

واستنكري من عزتي واستهتري بـجاهي

خَلِّيني مضرب مَثَل من بعد هيبة و وزن

كُبَّي المرار في العسل واملي الفرح بالحزن

 

يعني انتي أولهم ولا انتي اول همّ

ولّا انتي اول سهم إتْسَنْ لي واتسمّ

لو تكشفي ضهري تلقي السهام علامات

وانا زي زرع ف هوا وَطَّى حِيِـي وعَلا مات

 

موت العلالي شرف بس اسمها موتة

مش عدل تبقي ف ترف وانا باطفح الكوتة

ما يا إمَّا نَقْسَمْهُم وَخْزَة قصاد وخزة

يا إمَّا لا مواخذة توتة يا حدوتة

 

وابقِي اكدبي براحتِك واتدلعي براحتِك

طعم الهزيمة جِزَا للي يزور ساحتِك

وانا قلبي يا ما غلب.. مش عيب يبات مغلوب

اهو برضه فِدْتينا وكَفَّـرنا بيكي ذنوب

ولَـحَسْـنا من شَهْدِك وشرِبْـنا من رِيقِك

وسْكِرْنا من كاسِك وكَسَرْنا إبريقِك

وطْعِمْنَا من حُسْنِك وشْبِعنا بِـبَـريقِك

 

ومْشِينا في طَريقِك ورجِعْنا مَـلْـوِ اليَدّ

جَرْحِي قُصَاد جَرْحِك ولا حد ظالم حد

 

ولا انتي فاكرانا رجالة خيبانه

نبكي على النسوان ونْسِحّ في بكانا

كنتي اسألي نانا

اللي اسمها نانا

يا دوب زِعِلْنا يومين واهي دنيا لاهْيَانا

 

ما تكدبيش ع الناس.. الناس دي عارفاني

قلبي خشب لو غطس بِيْقِب من تاني

فماتحرجيش روحِك وتقولي ده عشقني

بدال ما صاحباتك يقولك آدي دقني

 

حِبِّي على قَدِّك واحكي على قدك

وان جت سيرتنا ف يوم ابقي الزَمِي حَدِّك

 

تتدلعي ماشي .. تتبغددي ماشي

وتقولي حبني موت برضه ما يـجراشي

بس انتي من جوا فاهمة ان زمنك مات

وبقيتي زي اميرة قلبها شحات

 

لِفِّي على صحابي .. سِبِّـيني في غيابي

قولي ان عمرك يوم ما وقفتي على بابي

لا كَوِيتي قمصاني و لا جِيتِي زُرتيني

و لا تعرفي مكاني و لا تعرفي تـجيني

 

واني يا دوب واحد دايب ف دباديبك

عامل كما عَيِّل شابط في جلاليبك

وانتي يا عيني أُف زهقانة مني خلاص

عملتي زار بالدُّف وسُقْتِي كل الناس

وانا برضه لازِقلك

معلش حظك كدة ربك ورازِقلِـك

 

روحي يا شاطرة هناك انضمي للالبوم

انا كل عشرتي بيكي 22 يوم

عملتي نفسك حكاية

ومحبة فيَّـاضة ومَخَدَّة بَكِّاية

وسهر وسُهْد وويل وبكا و غنا و مواويل

في 22 ليل

 

على أي حال شكرا وشكرا

ثم شكرا للقصيدة

قَلَّما تأتيني امرأةٌ بأفكارٍ جديدة

هشام الجخ - 24 شارع الحجاز

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

 

إنك تبيع قلبك وجسمك

وإنك تبيع قلمك وإسمك

ما يجيبوش حق الرغيف

 

سألوا جحا عن سر ضحكه

قالك أصل اتنين وشبكو

اللى كان من تحت ميت

واللى كان من فوق كفيف

دا شعور سخيف

 

وشعور سخيف

إنك تكون رمز الشحاتة

تبنى مبنى للشحاتة

تعمل وزراة للشحاتة

 

يا ساقية دورى عدى فوقى ودوسى

نصبوا عليا وشحتونى فلوسى

ربطونى فيكى .. حتى ما اتغميت

هما اللى فرحوا ووحدى أنا اتغميت

 

أنا اللى صاحب البيت

عايش بدون لازمة

ولما مرة شكيت

إدونى بالجزمة

 

مش لاقى تطفح اديك

هاتولنا و جيبولنا و ادونا ودونا

هنجيب منين نديك

طافح يا بلدى غدايا و لوعتى غدايا

و آدى الأحبه التفوا و اتجمعوا عدايا

 

أنا اللى زارعك دهب

بتأكلينى سباخ

إن كان دة تقل ودلع

بزيادة دلعك باخ

 

لا شفت فيكى هنا

ولا شفت فيكى ترف

كل اللى فيكى قرف

 

كرامتنا متهانة

واللقمة بإهانة

بتخلفينا ليه

لما انتى كارهانا

 

يعنى ايه تبقى إنتى هبة النيل يا بوبه

وكل يوم المية تقطع

يعنى ايه لما اشتكى غلو الفاتورة

يقولو تشكى بس تدفع

 

لما قش الرز ثروة بتتحرق

وأما نفط الأمة ثروة بتتسرق

وأما جلادك على ولادك بيبطش

وأما علمك ما يلاقيش يآكل فيطفش

 

يعنى ايه نرفع ايدينا بالسلام لجل الغزاه

ويعنى ايه لما ابقى ماشى فى حالى اتشد اشتباه

يعنى ايه لما اتحبس أربع سنين حبس احتياطى

حبس اعتباطى

يعنى ايه مش حاسة بالعمر وغلاوته

بتصبى مر العمر ليه

دة انا كنت ح اوهب لك حلاوته

 

أنا عمرى ما أتأمرت ولا حطيت شروطى

ومكان ما ترسى مركبك بابنى شطوطى

أنا كنت جيشك لما مماليلك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

 

دة انا كل شبر فى أرضك اتمرمغت فيه

وكل يوم عشتيه أنا اتغذبت بيه

 

على صوت أدانك جرس فى الشدة صاحينلك

من امتى كانوا الحرس هما اللى باقينلك

بعتينى علشانهم وعنيكى معصوبة

ياهل ترى خاينة ولا زيى مغصوبة

 

كل الكلام اتقال و الشعر بقى ماسخ

و الصبر علو جبال والظلم شئ راسخ

وطن وغرقان فى النطاعه

كل شئ ريحته نطاعه

علمونا بالعصاية

ورضعونا الخوف رضاعة

 

علمونا فى المدارس يعنى ايه كلمة قيام

علمونا نخاف من الناظر فيتمنع الكلام

علمونا ازاى نخاف وازاى نكش

بس نسيوا يعلمونا الاحترام

فماتزعلوش لما ابقى مش باسمع كلامكم

وماتزعلوش لما ابقى خارج عن النظام

 

مستنى ايه من طفل ربوه بالزعاق غير المشاكل والخناق

كل اللى بيقولك بحبك دول نفاق

أنا لما قلت لك بحبك كان نفاق

 

الحب يعنى اتين بيدّوا

مش ايد بتبنى وستميت تيت تيت يهدوا

الحب حالة

الحب مش شعر وقوالة

الحب يعنى براح فى قلب العاشقين للمعشوقين

يعنى الغلابة يناموا فى الليل دفيانين

الحب يعنى جواب لكل المسجونين

هما ليه بقوا مسجونين

 

يعنى أعيش علشان هدف علشان رسالة

يعنى احس بقيمتى فيكى إنى مش عايش عوالة

يعنى لما اعرق تكافئيى بعدالة

الحب حالة الحب

مش شعر وقوالة

الحب حاجة ما تتوجدش فى وسط ناس

بتجيب غداها من صناديق الزبالة

الحب جواكى استحاله

 

بَارَت مَرَاعِينا والبِئر قَد جَف

وَالْجُوْع يِكْوِينَا وَالْصَّبْرُ مَا كَفّى

وَالْقَلْب لَا يَهْدَا وَالْجُرْح لَا يُشْفَى

وَلِأَنَّنَا طَوْع زِنِّا لَهُم خفّا

جَاءُوَا بِمَوكَبِهم.. واشتغلت الزفة

 

الدفة مظبوطة وأصلا مافيش دفة

والكفة مش مايلة علشان مافيش كفة

و جحا اللى جاى بالليل لساه بيتخفى

 

شايف ديدان الغيط سارحة وما راحماشى

من جبنه شاف الدود سابه وراح ماشى

ولا اتكسف للناس ولا حس على طوله

الناس عشمها كبير جريوا بيشكوله

ضحك جحا ضحكة مواشى

مادام بعيد عن طينى ... ماشى

 

الدود قاعد لك يا جحا ولابد فى طينك

بعد ما يمص فى دمانا مش هيحلاله الا طينك

احنا اهلك احنا رجالتك عمادك

إحنا وقت الشدة سندك إحنا زادك

يا جحا احمى ولادك لو كنت عايز تحمى طينك

 

سوف أرحل ربما يلقانى من ارجو لقاه

هامشى ويا الشحاتين وابكى على حلمى اللى تاه

بس مش هاشحت رغيف

هاشحت وطن لله

هشام الجخ - جحا

هشام الجخ بني الانسان على خمس "قصيدة نادرة"

هشام الجخ _ طبعا مصلتش العشا

وصية هشام الجخ لــ إبنه حمزة

كلمات القصيدة مكتوبة والفيديو :
http://www.algakh.com/albums/%d8%ba%d9%81%d9%8a%d8%b1-%d8%a7%d9%84%d9%82%d8%b5%d8%b1/

جديد : هشام الجخ - غفير القصر

هشام الجخ - 3 خرفان

Watch it here: http://youtu.be/R2q6F48jVz8 ;)

Hamza Namira - Mawaweel   حمزة نمرة - مواويل

قصيدة " شمياء يا مكة " للشاعر هشام الجخ مع موسيقى رائعة 

هشام الجخ - شيماء يا مكة Hisham Al Gakh - shaimaa Ya Makka

الشتا مش ليك
الشتا للي اتلفوا ببطاطين لابسين لكاليك
شايفين الدنيا قزاز في قزاز
المطرة ما توجعش اللي يشوفها من البرواز
المطرة رصاص لو جت في عنيك 
المطرة ف عينهم هم رذاذ
بس ما تتغرّش بالمكشوف
لِف من الناحية التانية تشوف
حتلاقي الواحد لابس صوف زي الحلّوف
ويقول لك ضهري ورجليا وداء الغضروف
واحنا اللي شقينا ف عز البرد جسمنا فاق
ماهو زي ما كان الدفا أرزاق
العفا أرزاق
واهي دنيا مقسمها الخلاق
ناس تدّارَى من المطرة وناس
واقفة بتتفرج في الشبابيك
الشتا مش ليك
.......
الشتا لو ما لقيش الحضن بيبقى مرار
بتحب الشتا على إيه يا حزين؟
وانت حيطانك من قش وطين
ولا عندك خل ولا عندك جار؟
ولا عندك حد يقيد في وقيد ولا حد يقوم يحمي لك نار
بتحب الشتا على إيه يا حمار؟
ده انت بتدارى في قولة آه 
وف كام ذكرى وتليفون مركون مش راضي يرن
خليك زي اللامؤاخذة ليلاتي تتوب والصبح تحن
بتحب الشتا؟ ياخي حبك جِن
شتا أيه اللي بيتحب ف وسط الفقر ووسط صوابع إيد سقعانة
المطرة عقارب بتقرّص في كعوب الناس الحفيانة
الشتا مش ليك .. الشتا للناس الدفيانة
أما احنا الشتا بيجيلنا هموم؟
حتجيب من فين حضن يدفيك وتجيب من فين للقلب هدوم؟
ماتقولش كلام مدهون بكلام
البرد بيفرش على أسفلت الفقرا زكام
ويولع شمع في أوضة النوم للبيه
لما انت فقير .. بتحب الشتا على إيه؟
على رعشة جسمك وإديك اللي في جيب مقطوع
برد الفقر وبرد الغِنَى مش نفس النوع
ياك فاكر نفسك (كاظم الساهر) بتصور بقميص مبلول؟
المطرة سيول بتهد بيوت مالهاش أساسات
والله انا شفت بعيني الموت حكايات حكايات
فيه بيوت مسقوفة بجذعين نخل ودروة هيش
سبحان الله
بيجيها البرد يوماتي بموت 
وقادرة تعيش
......
كل الذكريات الصعبة كانت في الشتا
أول ميعاد .. ساعة الفراق .. آخر لقا
كأنه فصل مخلوق للشقا
فصل الوجع والذكريات .. فصل الدموع
فصل حرمان.. فصل جوع
أي ذكرى بتوجعك حتلاقي فيها من الشتا
يا إما مطرة .. يا إما برد
يا إما ليل طولان ساعاته تمد مد
يا إما قلب في الطريق مادد إيديه يشحت محبة أي حد
الشتا من دون فصول كل السنة
بيسكت الطير في السما 
ولا تلقى عشاق في السكك ولا تلقى ورد
لونه غيم وصوته رعد
الشتا عتمة تدوس ع الناس ومش عاتقة
حتى الفواكه في الشتا حادقة
حتى القمر بيختفي ويخبي إحساسه
سيب الشتا لناسه
أحنا مش ناقصين وجع
الشتا بيدفي بس المعشوقين 
ويغفّل وشوشنا ويرسم التجاعيد
اللي بيحبوا الشتا ماشيين ورا الوهم السعيد
وانت حتى الوهم مش عايز يصاحبك 
إيه اللي جابك في القصيدة من أساسه
مش قلت لك سيب الشتا لناسه
.......
يا شتا
أحلى ما فيك لمة القصعة ولسعة القالوح في النار
وأمر ما فيك الانتظار
كان ممكن امدح فيك لو كنت خليتها
طلعت لي لسانك مع كل لسعة برد 
وكل لحظة وجع
وبنت حبيتها
خلاص يا عم الشتا ما تزقش الأبواب
الشاب شعره شاب
وماعدش يقعد بالحمالات في البيت
فاكرني ولا نسيت؟
أنا اللي كنت زمان بفتح قميص الخلا صدر ودراع مكشوف
أديني لابس صوف
بتدارَى م المطرة 
وباقفل الشبابيك
الشتا مش ليك

هشام الجخ - الشتا مش ليك

مصر جميله - محمد طه
: الكلمات 

أبويا نصحني وقالي امشي علي قدك
وفصل التوب يكون مسبوك علي قدك
وأن شايلوك حمل شيل الحمل علي قدك
أوصيك يا ولدي وصية والوصية حساب
أمشي كمشي التجارة وللتجاره حساب
واللي ما يعمل حسابة ما يتعملو حساب
كنت في قلب الميدان .... تحت السماء الزرقا
جابت عنيا الغيطان ...... والترعة والزرعه
أنتي الأصيلة يا مصر .... وكلنا عارفين
أنتي الأصيلة يا مصر ....  وكلنا شاهدين
بحق محمد نبينا وعيسي نبي اللة
النور ويانا والعمال العاملين المخلصين والأحباب ويانا
دي مصر أم العَلم
مصر جميلة وأصيلة فيها ولدي وفيها بلدي
انا أبن المنوفية وصعيدي يا سيدي
وسيدي كان فلاح وأصلي فلاح وحى على الفلاح
وأبو زرع طيب يقول حى لي الأصلاح
وعمال عاملين عملو الخزف والصيني
 مواصيني أبويا بكل فَـلاح
وقالي : ♥ ♥
 مصر جميلة , مصر جميلة , خليك فاكر , مصر جميلة
لما تكلم ولاغاني من بحر المواويل والأغاني
محدش من فكرة لغاني , مصر جميله
♥ ♥

 نبذة عن محمد طه
محمد طه مغنى شعبى مصرى اسمه بالكامل "محمد طه مصطفى أبو دوح"، اتولد في بلد أبوه "طهطا" بصعيد مصر في 24 سبتمبر 1902، واتربى في بلدأمه "عزبة عطا الله سليمان" بقرية "سندبيس" التابعة لمركز "قليوب".

فنان"بلدي" شعبى تلقائى صاحب الـ10 آلاف موال من غير اى إعداد وكان بيؤلف ويلحن ويغنى، كمان كان صاحب فرقة موسيقية وشركة اسطوانات
غني على مسارح الفن الشعبي في القاهرة ، ومنها قهاوى حى "الحسين" و"السيدة زينب" اللي كان بيغنى فيها في احتفالات بالموالد والمناسبات الدينية
في سنة 1954 تصادف أنه استمع ليه الإذاعيان "طاهر أبو زيد" و"إيهاب الأزهرى" وهو بيغنى في قهوه "المعلم علي الأعرج" بالحسين، فجابوه للاذاعة فسجل شويه من مواويله
زكريا الحجاوى ضم "محمد طه" ل"فرقة الفلاحين للفنون الشعبية" اللى كلفته "وزارة الثقافة" بتشكيلها
ضمه الإذاعي جلال معوض لإحياء حفل اضواء المدينة، في غزة
غنى في الاحتفال بعيد الثورة قدام جمهور يتقدمه جمال عبد الناصر و عبد الحكيم عامر وكمال الدين حسين وغيرهم من القادة
كون فرقته الموسيقية الخاصة "الفرقة الذهبية للفنون الشعبية" وضم ليها أخوه "شعبان طه" اللى يشبهه كمان ضمت الفرقة عازفين للناى والأرغول والكمان والعود والطبلة، وهي الفرقة اللى لازمته في كل حفلاته وأسفاره ووبرضه في الأفلام اللى شارك فيها.
كون شركة لطباعة اسطواناته سماها شركة "ابن البلد"

: شارك بالغنا في 30 فيلم زى 
ابن الحتة، بنات بحري، أشجع رجل في العالم، خلخال حبيبي، شقاوة رجالة، السفيرة عزيزة، الزوج العازب، دعاء الكروان، المراهق الكبير، ملك البترول، زوجة ليوم واحد، رحلة العجائب، دستة مجانين.

اتوفي في 12 من نوفمبر 2008 في حي شبرا

له 8 اولاد، أكبرهم "صالح" وهو الوحيد اللي ورث حلاوة الصوت عن أبوه، وغني مرة في برنامج تليفزيوني وعمره 16 سنه لكن أبوه منعه.

مينا عادل جيد

هشام الجخ - 3 خرفان

Bash Mohandsa Emy