كلمات بديع خيري
ألحان سيد درويش


شد الحزام على وسطك غيره ما يفيدك
لابد عن يوم برده ويعدلها سيدك
إن كان شيل الحمول على ظهرك يكيدك
أهون عليك ياحر من مَدّت إيدك

ما تيالله بينا انت ويّاه ونستعان ع الشقا بالله
واهو اللى فيه القسمه جبناه واللى ما يجيش انشالله ما جا
مادام بتلقى عيش وغموس يهمك ايه تفضل موحوس
ما تحط راسك بين الروس لا تقوللي لا خيار ولا فقوس

حقولك ايه واعيد لك ايه كله له آخر
دى خبطة جامدة وجت على عينك ياتاجر
يا وكستك دلوقت لا وارد ولا صادر
يحلها الفين حلال ربك قادر

قل لي في عرض النبي ياحسين رايحين نلاقيها منين ومنين
والاش متجوز اثنين يا دنيا روقي جاتك البين
شوفوا البخيل يفضل موحوس ولو علقوا على بابه فانوس
فلوس دي ايه سكتر يا جاموس هيه السعادة في غنا النفوس

نهايته ياللا بينا والاكسبريس بقى ع الرصيف
وادي أحنا بقالنا كام يوم ما عملناش بحق رغيف
كل المحطات قبلي وبحري بقيت "لام اليف"
والسكة انقطعت من دي الهيصة يا لطيف يا لطيف

ما قطعوا لنا التيفونات وعطلوا التلغرافات
عمركش سمعت الدلنجات بيسافروا ليها ببزابورتات
غلب حمار اللى ما له حمار يحملولك ست انفار
واهو السفر في الأيام دي صار على البهايم ليل ونهار

شد الحزام على وسطك غيره ما يفيدك
لابد عن يوم برده ويعدلها سيدك
إن كان شيل الحمول على ظهرك يكيدك
أهون عليك ياحر من مَدّة إيدك

قرب شيلني شيل لا تقولي كتير وقليل
لاتقلي كتير وقليل عمر الشدة ما تطول
عمر الشدة ما تطول عمرك مش زي الأول
هيلا هيلا هيلا هيلا هيلا هيلا هيلا هيلا
هيلا هيلا هيلا هيلا هيلا هيلا هيلا هيصة

ريما خشيش _ الشيالين

Whtever Sounds Gr8 in my ears through my Mind.
Only GiGs that rhythm with my Vibes!

I dream that songs i share can change how people think , can make anyone feel better :)
Thank you for following ... Enjoy :)

ريما خشيش _ الشيالين

Eng M. Tarek