والله ما عايز غير بيت فيه واحدة الصبح بتفرد ضفايرها

وعيال بتقوم من النوم تجرى عليا من غير حتى ما تفتح عينها

والله ما عايز غير كوباية شاى بحليب الصبح

وبوسة حب ورضا بالحال وجرايد كاتبة أخبار عال

وابتسمات الناس فى الشارع ترجع تانى زى زمان

وصباح فل فى وشك دايما من عسكرى مهموم تعبان

نفسه يسلم خدمة ويجرى يروح بيته ينام

من كمسارى زهقان من الزحمة من تاكسى فى شارع غرقان

والله ما عايز إلا تلاتة جنيه تمن الدمغة وختم النسر

وكوباية شاى لموظف غلبان والله ما عايز إلا بطاقتى يا ناس

حتى ولو من غير عنوان والله ما عايز غير الشغل

لا كلام يعنى ولا حديت ولا قالوا قولنا

ولت وعجن وحواديت

ولا ذر ونم وهيصة فاضية وتخبيط وقوم اقف وانت بتكلمنى

وضحكة غش وتظبيط والله ما عايز حد عبيط

والله ما ناقص تنطيط والله ما عايز بعد الشغل غير إنى أرّوح

تعبان من الحر وباطوّح وألقى حبيبة قلبى بتضحك

والقى طراوة بيت بتاخدنى ترد الروح

هم الدنيا فى لحظة يروح وألقى عيالى بيجروا عليا

ويحضنوا فيا وياخدوا الشنطة يقلبوا فيها

وياخدوا الحاجة الحلوة ويجروا

وبعد الضهر اقرأ الجرنان وانت يا أجمل شىء فى الدنيا

واقفة بتكوى لى القمصان وبتبصيلى وأنا تعبان

والله ما عايز غير حضنك واتغطى وأنام

ولله ما عايز

Fady Fouad