فؤاد حداد

شعر

نجوم لاونج

كرامة فؤاد حداد

my fav

mostafa_ibrahim

اشعار

Poetry - شعر

موسيقى مقدمة برنامج نجوم لاونج على نجوم إف إم ، البرنامج الوحيد اللي بسمعه على نجوم إف إم عشان أستمتع بالموسيقى فيه .

موسيقى مقدمة برنامج نجوم لاونج على نجوم إف إم

نجوم لاونج 01  -  2013 - 02

البنّ
			
القهوه تحبّ كنكه
والكنكه تحبّ كنبه
والكنبه تحبّ قعده
مبسوطه مربّعه
و كنّا أربعه
أنا و انتِ و انا و انتِ

و كنّا عيون كتير
و طبليّه و زير
ولا بنحبّ نبكى
ولا بنعرف نطير
أنا و انتِ و انا و انتِ

سبنا البوسطه ورانا
فى الترماى اللى داير
العتبه للإمام
كان ريقك جنبى ساكت
حبّيتك من زمان
أنا و انتِ و انا و انتِ

شمّيت لادن سعيد
شمّيته من بعيد
شمّيته من قريّب
خمس سنين حاغيّب
على الشمّاعه خايف
و باخاف على الدولاب
و بادوب على البلاط
و باحسّ الظلّه تقلت
و باسمع الوابور
و باحسّ الميّه تقلب
أنا و انتِ و انا و انتِ

الظُهر الشمس تلحس
الظلّه فى الليمان
والظُهر الشمس تعمل
سيبرتايه دهب
بصّينا لبعض فيها
و مشينا لبعض نبكى
و قعدنا من التعب
أنا و انتِ و انا و انتِ

باقول لك إيه باقول لك
حاجيب حاجات قديمه
قلبى كوره شراب
نلعب والاّ ما نلعب
فرحت لنا المدينه
و امبارح فى التراب
أنا و انتِ و انا و انتِ

و بنفرش ضيّنا 
على ظلّة بعضنا
و احنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنيّنه
أنا و انتِ و انا و انتِ

قصيدة البن بصوت فؤاد حدّاد

من نور الخيال و صنع الأجيال في تاريخ القاهرة - حلقة سيد درويش
تأليف: فؤاد حداد
ألحان و غناء: سيد مكاوي
إخراج: فتح الله الصفتي

نص الحلقة:
ليه يا عرب تستبدل القفطان
عرب التفت على مهله واتبسّم
يا سنته نوارة الأوطان
خلى الكلام يحلى ويتقسم
يا سامعين أبناء بلد واحده
تحت السما الواحده عرب بيقول:
أيام تسعتاشر بتحيى الحى
و تخلى فنان البلد مسئول
يا سامعين يا اهل الزمان الجاى
ليلكم منور فى العزب والقرى
كان ياما كان من مبدأ الذاكره
الشمس طالعه وصوتى مش سامعاه
حرمت أغنى لها وانا فى الدرا
فتحت شباكى وقلبى معاه
وجبت ريح البحر للقاهره
وطلقت حنجرة الفتاه والشاب
ورفعت فنى الى مقام الشعب
فنى رجع للأصل بالطفره
رجعت لى مصر بقوة الثوره
الثوره ضاربه فى صميمى جدور
أغنيه أمنيه قدر مقدور
الحدادين نافخين معاى الكور
والخبازين قايدين معاى الفرن
أخبز لكل الناس عشا وفطور
والفلاحين ماليين معاى الجرن
داقين فى قلبى السبع والعصفور
منورين المونه والمعجنه
كاتبين لى أيام الزمن والسنه
نسمه بنفسهم جايه متلحنه
وسؤال فى ودنى زى نبض النور
يا مصرى يا سيد وابوك درويش
النيل بيجرى والا ما بيجريش
النيل بيجرى والعجل بيدور
والفجر طالع بالصنايعيه
ومصر لازم تبقى مصريه
وكل كلمه تقولها أغنيه
وكل أمنيه وأمل دستور

يا مصر يا مصريه كتر خيرك
طالقه على جناح الأمل طيرك
يا مصر راضيه و ربنا أعطاها
شوقى وبيرم والأديب طه
فيه ناس طوت أشجانها جوه الصدور
حافظ يناجى فى الخيال والطيف
وبين عيونه زى ضربة سيف
وفى سكوته آهة المقهور
هاتى الآهات اللى ما تتأوهش
هاتى الآهات اللى ترج الوحش
وفى سجن الاستعمار تهد السور
عَلّى رقبتك زى جيش منصور
صبى علينا زى شمس الظهر
فى الأرض ما تخليش خيال مكسور
يا مصر يا أول كتاب العصور
أنا ابوس ايديك الشريفه كل ما تولّد
سنين ورجاله تحيى الأرض وتخلد
أبوس ايديك لتسعتاشر وشيخ سيد
يا مصر يا أول كتاب العصور
أنا ابوس ايديك الشريفه كل ما تولّد
سنين ورجاله تحيى الأرض وتخلد
أبوس ايديك لتسعتاشر وشيخ سيد
عرب التفت فى هيئة الفنان
فى عروته الورده اللى بتفتح
قال كان بودى ألحن الجرنان
أخبار تجينا الصبح وتفرح
عرب اللى دايب من أمل وحنان
كل الشوارع تعرفه والدور
ألفين سلام مطرح ما عينه تدور
مشى فى الجنينه اتقطفت له الزهور
قال كلنا نحب الوطن يا ولادى
أنا كنت باحلم بالنهاردا الليله دى
صبحت بلادى بلادى
وانتوا المغنيين وانا الجمهور


من نور الخيال حلقة سيد درويش

الوصايا العَشْر - أحمد النجّار

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
 يدوسه عَجَل الميكروباص
 النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
 مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
 "العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
 القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
 أبو طلق من غير صوت
فيه الجيوش ما بقوش
 لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
 ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
 و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا



www.facebook.com/Mostfa.Ibrahim

هندسة صوتية : رفيق عدلى
One Take Studio

البنكنوت - مصطفى إبراهيم

لسه فاكر يوم فراقك..
لسه حافظ يومها صم..
لسه بسرح ف اشتياقك..
لسه عاوزك ليا ام..
لسه مش شايفك لغيري..
لسه ايدي ماسكه ايدك..
لسه شايفك خط سيري..
نفسي لسه ارجع واعيدك..
لسه فاكر يوم خروجنا..
وانتي بين حضنك كتاب..
لسه عينك رافضه خوفنا..
وفاتحه ليا الف باب..
لسه حلمك هو حلمي..
لسه ضحكاتك سامعها..
لسه ابيات شعرى ليكى..
قلمى بيبنيها ويبيعها..
لجل يوم تكونيلي بيتي..
وان نسيتك غصب عنى ..
بلقي صورتك ضل حيطي..!!


#عمرو_عابدين

عمرو عابدين لسه فاكر

خلي بالْك معايا ما تسوقش الهبل
بهلوانْ ؟ مش بهلوانْ ، فار ؟ أيوه فار
واللبن فار
وكان زمانْ الجماد له في الحبل
وتمخض الجبل
فولدني!
حد قال يا فار انت طالع منينْ ؟
يا فار أبوك الجبل ثابت وجبت منينْ الوسوسة
تكفر حبه أكفر حبتين
تاخذ خطوه قدام آخذ خطوه كسكسة
تشوح لي أشوَّح لك
سنّ بسنّ وعين بعين
وفْن بفن أصل الفنّ أوله نسنسة
توِّجني مَلِكْ
بارك للأرض وبارك لي
الحشرات سبع تاشرات تحت رجلي
انا من فصيلة أصيله
أخويا الوطواط أعجوبه : حيوانْ وطير
واخويا القنفد أعجوبة : حيوانْ ونباتْ شوكي
وانا اللي مش أعجوبه لكن انا اللي فيهم
انا المشتهرْ المنتشر وكل الدنيا جيراني
انا   فار فيراني
في قلبي كلاكيع لغم ونغم
والاَّ بلاشْ
خلينا في الوصف البراني
انا عيني اللي يمين يمين
وعيني اللي شمالْ شمالْ
والحول حواليَّا
حنختلف في دي ما نختلفش في رجليا
قول أربعه
انا الفار الفيراني اللي جلدي حرير
وفْروى قشعرير
وأسناني مسرسعه
بتشق من بوز
ما تقولش لما يبوسْ
إبرة الدبوسْ
وداني مطرطقة من غير حموريهّ
انا مش بسيط زى ما تظن
انا جحرى مش خن
انا لي ناب مملوك وناب انْكشاري
استني
الوصف لسه ما خلصشي
نسيت ديلي اللي طوله خمسة اعشاري
يعني نُصِّى
ويادنيا بصىّ
حارقص وارقـَّص
وخيالي متقصقص
على الحيطانْ
****
والليله دي بنت عرسه يا ابن آوى
شوفْ دلعها حضن صدّ وحضن آوى
رايحْــه جـايه لعب ميهّ في حوض نقاوة
بــسّ قــــولــــوا يــا دراوشــــــــــــــــهْ
رقصـــى إسمــــــــه دوشــــــــــة روشة
أو منــــاوشــــــــــــه أو شــ ..  أوشــ ..
أو شقاوهْ
اللــــــيه دي القــط بايـــــــت ع البلاطهْ
احْــــــنا كــــــنا أتىن وجـــا تالت تلاته
قــــال له ضد الموتْ ما تنفع الاستماتهْ
بــــــس قـــــولــــــوا يــــــــــــادراوشهْ
رقصـــــى إسمـــــه دوشــــــــــه روشهْ
أو مناوشهْ
 أو شــ ..  أوشــ ..
أو شماتهْ
ســاقطه قدامي ومن غير غشّ اراها
دنــــيا تفـــاحَه زباله مقشراها
مــــن شراها باعها من باعها شراها
بــسّ قـــــولـــــوا يـــــــــــــادراوشهْ
رقصــــى إســـــــمه دوشـــــه روشهْ
أو مناوشه
 أو شــ ..  أوشــ ..
أو شراههْ
تنـــكمش م البرد تغطس في العطارهْ
وأمــــا تدألــــج بتدألـــــــــــــج بَطارهْ
يـــا بـــني آدم ولــــك برضه الصدارهْ
بــــسّ قولــــــــــــــــوا يادراوشـــــــهْ
رقصـــــى إسمـــــــــه دوشــــه روشهْ
أو مناوشه
 أو شــ ..  أوشــ ..
أو شطاره
قلـــت إيــــــه الساعه واحدَه إلا ساعه
قلــــت صـــــاحب كرش بيحب اللكاعه
قلــــــت نـــص الليلْ لفرسانْ المجاعه
بـــــس قــولــــــــوا يــا دراوشــــــــة
رقصـــــى إسـمــــه دوشــــــــه روشه
أو مناوشه
 أو شــ ..  أوشــ ..
أو شجاعه
***
ولا حد يفهم في الشجاعة
زى الطاحْونة الجعجاعة
قال انت أول خلق بتسيب السفينْة
خاين؟ ..لأ
خايب؟.. لأ
خايف؟ .. آه
يا بنت يا نعناعة
أما مش طالع أبيع جرانينْ بالْليلْ
انا طالع آكل أقرض انتش انتشي
واضرب الأخماس في الأسداس
أضرب الحماس في الاحْداث
الحركه بركه
سكرانْ؟ يمكن سكرانْ، خايف؟ أيوه خايف
وسلام على الخوفْ مَلِكْ الاحْساس
سلام عليه متراس
وسلام عليه فرّاس
سلام على الفار اللي بيلْعب في عب الفار اللي
بيلْعب في عبّ الناسْ

رقصة الفار- بصوت فؤاد حداد

شَرع التسالي- بصوت فؤاد حداد

من ديوان - "نور الخيال و صنع الأجيال"

ياسامعين : أبناء بلد واحده

تحت السما الواحده وياما جرى

مرت سنين ع الدنيا متقدره

الغرب سماها العصور الوسيطه

ونظر وقال كان الزمن مظلم

أما الحقيقة البسيطة

بتقول فى دار الشرق

مهما جرى ومهما يجرا

من أول تاريخ الهجرة

كان عندى فجر أنشق

نوره فى عين الجبارين مؤلم

حتى اذا ما ألتقوا بالفارس المسلم

عرفوا الحقيقة وعظموا فارس

صلب القوام والدرع تحت العمامة

حتى اذا مانزل من السرج ونصب خيمة

سهل الدموع الا أبتسام الراضي

مايل بجسمه لأستماع الأراضي

وعلى العيدان الطرية

ايديه نديه كيف أيدين الفارس الغارس

هذا الذى رد الثغور البهيه

وبنى باسماء الأئمة المدارس

وحضر مع الخصم لمقام القاضي

وأعاد الى الأم الصليبيه ابنها

أما عن المنكر نهى

وأما فى ليلة شجن بالشام

حلف يمين أفضل له

يفقد ولاده ومؤنسته ولا يهدم

هذا صلاح الدين فتى مقدم

حامل لواء الفتيه والأجناد

فوق الخيول المسرجات الجياد

وهى ليله من ليالى ربيع

أو هى ليله من ليالى جماد

القاهرة أولى رايات الجميع

عند المقطم كبرت للجهاد

يارب تشفى الصدور

يارب توفى الأمهات الندور

يارب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن فى عكة عظيم الليل

يلقى الآذان بيشق فوق السور

الحق ياولاد العرب منصور

فى كل أرض اتكلمت عربى.

************

الأرض بتتكلم عربى وقول الله

ان الفجر لمن صلاه

ماتطولش معاك الآه

الأرض بتتكلم عربى

***

الأرض بتتكلم عربى ومن حطين

بترد على قدس فلسطين

أصللك ميه وأصلك طين

الأرض بتتكلم عربى

***

الأرض بتتكلم عربى سبل وكروم

تجرى اللقمه على المحروم

ما تثبتش حصون الروم

الأرض بتتكلم عربى

***

الأرض بتتكلم عربى ياخيال

بيعد سيفك أم عيال

ظهرك ياما من الأجيال

الأرض بتتكلم عربى

***

الأرض بتتكلم عربى حتى البور

بنت الساقيه والطنبور

حتى فى بطون الأرض قبور

الأرض بتتكلم عربى

***

الأرض بتتكلم عربى بوجد وشوق

الفرع اللى يهم لفوق

لأجل الجدر يشم الضوء

الأرض بتتكلم عربى

***

الأرض بتتكلم عربى جدورها جدود

مد اتوسع زى العود

انت الباكر والمولود

الأرض بتتكلم عربى

***

الأرض بتتكلم عربى ولا ترتاح

واصل كالسيل المجتاح

فتحك ياعبد الفتاح

الأرض بتتكلم عربى

لما العواطف تكتمل بالعقل
الأرض أطيب من مزاج الحليب
والأرض هى الحاكمة بالعدل
بين ابنها والمستبد الغريب
الجبارين اللى احتموا بالصليب
داسوا على عيسى وكتاب المحبة
عملوا الدمار والقتل والتخريب
والأرض صنعتها الأمل والبشاير
والشمس دوّاره عليها تشاور
تاخد وتدى فى خيال الشاعر
تلقاه عجب فى الدنيا هلل وراج
فى الشام ومصر تنادت الأبراج
الفتح تم فى ليلة المعراج
صلوا على طه الرسول الحبيب
أفتح أيدىَّ لفوق والاقى المجيب
يا قاهره نجومك ملاليه
فيها الهدايه لآخر المعمور
أما رياحك حامله ليه
صوت المرتل فى آيات النور:
” نصرٌ من الله وفتحٌ قريب “

الأرض بتتكلم عربي - بصوت فؤاد حداد

بكوب الشراب المرصّع باللازورد
انتظرها،
على بركة الماء حول المساء وزهر الكولونيا
انتظرها،
بصبر الحصان المعدّ لمنحدرات الجبال
انتظرها،
بذوق الأمير الرفيع البديع
انتظرها،
بسبع وسائد محشوّةٍ بالسحاب الخفيف
انتظرها
بنار البخور النسائيّ ملء المكان
انتظرها،
برائحة الصّندل الذّكريّة حول ظهور الخيول
انتظرها،
ولا تتعجّل، فإن أقبلت بعد موعدها
فانتظرها،
وإن أقبلت قبل موعدها
فانتظرها،
ولا تجفل الطير فوق جدائلها
وانتظرها،
لتجلس مرتاحةً كالحديقة في أوج زينتها
وانتظرها،
لكي تتنفّس هذا الهواء الغريب على قلبها
وانتظرها،
ترفع عن ساقها ثوبها غيمةً غيمةً
وانتظرها،
وخذها إلى شرفة لترى قمرًا غارقًا في الحليب
انتظرها،
وقدّم لها الماء، قبل النبيذ، ولا
تتطلّع إلى توآمي حجلٍ نائمين على صدرها
وانتظرها،
ومسّ على مهل يدها عندما
تضع الكأس فوق الرخام
كأنّك تحمل عنها الندى
وانتظرها،
تحدّث إليها كما يتحدّث نايٌ
إلى وترٍ خائفٍ في الكمان
كأنكما شاهدان على ما يعدّ غدٌ لكما
وانتظرها
ولمّع لها ليلها خاتمًا خاتمًا
وانتظرها
إلى أن يقول لك الليل:
لم يبق غيركما في الوجود
فخذها، برفقٍ، إلى موتك المشتهى
وانتظرها 

محمود درويش - كاماسوترا في فن الإنتظار

هذه قصيدة "محمد عبيد"(الأميرالاى محمد عبيد لعب دورا هاما في الثورة العرابية, و استشهد في معركة التل الكبير) لفؤاد حداد بصوته

((محمد عبيد))
زرع الأمل والامانى له تاريخ وأصول
احمد عرابى ربط فوق الليالى خيول 
ساعة ما بتشب يلقاها القمر مذهول
يلقى انتباه البروجى وزهرة الأرغول 
والملحمة الفلاحة والبدوية 
بنت العرب فى ساحة الفداوية
أم العيون الندية تلتفت وتقول 
شوف البطل 
الفارس المصرى الشهم
زارق من الدوامة زى السهم 
وجبينه صاحب هم بيفكر
ويغازل النور اللى يتفجر 
أتم أوضح من هلال أبو زيد
شوف البطل اسمه محمد عبيد
اسامينا فى الشهداء طرب غالى
نوارة الأيام وحنتها
وعصرت قلبى لما غنتها
شوف البطل
مصرى وشفايفه تشبه الوليفين
والأرض قايمه معاه على الجنبين
والأمهات بحرى البلاد تناديه
دهب الحريم عيط عشان يفديه
لأجل الولاد خلى البطل يضرب
يكسر صفوف الإنجليز يضرب
يا بنايين نضرب معاه الطوب
الفجر لمحمد عبيد مكتوب
في الجنة عرض السيف مع دراعه
شوف البطل فى هجومه ودفاعه 
الفارس المصرى الأصيل الحر
يرجع على التل الكبير ويكر 
رمق الشهادة فى الطريق المر
يفضل على طول الزمن منصور
وما يتقلعشى من السلاح والمهر 
ولا من شبابه لحد نفخ الصور
الملحمة أخلد من التماثيل 
كان حى ماله فى الشجاعة مثيل
كان جسم فى تراب الوطن مثواه
كان قلب كل المؤمنين جواه
عظم شهيدك كل دم يسيل
على ارض مصرية عظيم الجاه
قول كل حرف فى اسمه وأتهجاه 
محمد عبيد
والاوله غنى الأمل وجهاده
والتانية واصل غنوة استشهاده
والتالته علمها الولاد يتهادوا 
سيرة محمد عبيد المصرى فى الفرسان
واعزف على كل آلة وقول بكل لسان
ايمانى بالنصر قوة مصر بالإنسان

http://www.facebook.com/Haddad.ElTo7fageyya

قصيدة أسامينا في الشهداء  - فؤاد حداد

دخلت مرة لسقف من حي الازهر
في ليلة و احنا صغيرين يا زمان
صوته لقاني قبل ما اقعد قصاده
زان المنصة و ف يمينه عصاته
قصاص بيروي سيرة الفرسان
و السامعين حواليه لمّه قليله
من دنيا فيما سلف أصحاب ليالي قديمه
و ما ينعسوش بالسهم .. لابسين من الجلاليب ما يشبه القفطان
على الكراسي بيشربوا الكلمة و بيستذكروا الحكمة و بيلتفتوا باستحسان
قولنا : في يمينه عصاته يا اهل النظر و اتوسطنت بميزان
إلا و قامت على بركه و عجب و ما بين صوابعه توجهت للميدان
توجهت لرحيل .. لحرب .. لحيله .. تتبادل .. تمانع .. ترمي الخديعه .. تتقي الخوان
و تلف لفات الرماح الطويله أو تنكسر كما تدبل الأغصان
أو ترتفع أبصر من السلطان على ما تراها العين ترى الإمكان
قصاص .. و ريث ألف بين مشرق و من مغرب و مدونات العجم و سجية العربان
الله يبارك سقف من حي الازهر في ليلة و احنا صغيرين يا زمان

حي الأزهر-فؤاد حداد-سيد مكاوي

واللي بيعلا بيعلي
وقولة القلوب عند بعضها 
واصلة السما بأرضها 

وبني آدم سلاح نفسه وصاحب رأي
وقبل الناس ماتكبر السنين كانت كتيرة 
افرش حصيرة وخلي البساط أحمدي
الليل بساط يا مصادفني من آخر السكة 
قرب من الناحية دي

ماليش خيال إلا ان رميتني بنور هادي
ورميت عليا السلام

في مرة طالع من حسن الأكبر 
على باب الخلق بين مغربية وعشا
لاقيت القمر في وشي كبير وقريب 
تطلع عيونك سلم سطوح بيت
على حدف الدراع من هنا القلعة ومن هنا العتبة
والقمر لون الحنان الصيفي
والماضي الصغير 
زي اللي خجلان شوية 
من بهجته وحسنه

وعلى مذهب شارع محمد علي
الترامايات قاطعة الخليج بجرس يجري
والقمر ميال لكل الدنيا مالي الدنيا
فوق العباسية ولبعد الزيتون على نخل
لبلاد تقول نجع
وبلاد تقول كوم
في نفس اليوم
على مزلقان الجيزة ومقبل، سارح غيطان

واقف على كل محطات السكة الحديد
واسكندرية
في باب الخلق
اتملى القرطاس 
بفول أخضر 
رمت عليا السلام
نورت يا ولدي
نورت يا ولدي

موال باب الخلق - فؤاد حداد - سيد مكاوي



من كلمات فؤاد حداد

لحن و أداء سيد مكاوي نستمع للمسحراتي

الأجر نور

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
فى طلتى
بطبلتى
من جنب شارع
لجنب حاره
كان نجم والع
زى الشراره
من البخور
الدنيا حلوه
والريحه أحلى
سمعت غنوه
ورجلى نحله
فضلت تدور
وفى طلتى
بطبلتى
من حى ريحنا
لشيخ قريب
قال يا ابنى احنا
عملنا طيب
والأجر نور
خيالات صداقه
تسرح فى عينى
من ألف طاقه
بينكم وبينى
يا اهل الندور
وفى طلتى
بطبلتى
م الحاره د كها
للحاره ديه
سمعنى ديكها
أدان هديه
يا شيخ سرور
الديك دا صايح
لازم نصحصح
اسمع نصايح
الى نصح صح
فى السحور
المشى طاب لى
و الدق على طبلى
ناس كانوا قبلى
قالوا فى الأمثال :
“الرجل تدب مطرح ما تحب”


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

أنا قلبى غاوى اللبان والجاوى بخرنا
ياطيبة الاسم يادلنجات وبحرنا
ولقبلى أسيوط فؤاد مبسوط وسحرنا
حنية الليل قطعها الجرح ياولادى
لما سمعنا المنادى ما تأخرنا

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق


المسحراتي - سيد مكاوي - فؤاد حداد

أصل الحياه للعلم
مفهاش حاجات ببلاش
وعشان ماتصبح فيلم
وأصلا عشان تتعاش
كادر الحياه المشحون
فرح والم وشجون
لازم يكون بيلف
لازم يكون بيدور
يتقل عليك ويخف
ويعشّمك بالنور
ف نهاية المشوار
ونا قلبي لف و دار
ميت ألف ليل ونهار
نفسه ف فرحه كادوه
وحلاوه من غير نار
ومّا الزمن تعبه
قصقص شريط الفيلم
وخَد كادر كان عاجبه
وقرر يعيش ف الحلم
و الحلم كان كامل
جدا تمام خالص
ولجل الكمال لله
كل الحاجات جواه
لكن في شيء ناقص
فاضي بشكل غريب

‫قصيدة مافهاش حاجات ببلاش - مصطفى إبراهيم‬‎

رباعيات صلاح جاهين

الصورة قصادك ممدودة...
و مش محدودة...
بالطول و العرض...
و البرواز ضلعه الفوقاني...
ف السما....
و التاني مساوي الأرض...
و بما إنك حيلتك بس عينين...
ف قصادك حل من الإتنين...
يا تقرّب جامد م الصورة...
و تاخدلك كادر تركز فيه...
و تعيش حكاويه...
و ساعتها مفيش..
و لا كادر يعيش...
و يكونله لزوم...
غير كادر الزووم...
أصغر تفصيل ف الصورة يبان...
ريحة الدنيا و طعم الأحداث...
الفرق ف تدريج الألوان...
شكل التجاعيد ف وشوش الناس...
ف تعيش مستمتع بالتفاصيل...
الجهل... جميل...
بيقربلك سقف النشوة...
و الحزن كمان...

أما لو اخترت إنك تبعد...
و تشوف المنظر من برة...
حتغطي عينيك كادرات أكبر...
و حاجات أكتر...
لكن أحجامها بقت أصغر...
م الأول ميت مليون مرة...
تكتشف إنك...
مبقتش في حاجة تأثر فيك...
و لا بتبكيك...
مبقتش بتزعل تقريباً...
و الدنيا بقت أبيض فاقع...
و إن انت بقيت إنسان ساقع...
مبقيتش بتضحك بالساهل...
و لا حاجة ف نظرك تستاهل...
تتمنى ساعتها تعود جاهل...
ف تلاقي الزووم...
كان رايح بس...
و لجل النحس...
مفيش راجع.

شعر : مصطفى إبراهيم : الصورة قصادك

في الذكرى السابعة والعشرين لوفاة الشاعر فؤاد حداد ننشر ثلاثة تسجيلات نادرة بصوته لثلاث من قصائده

بكيت في الأول بكيت في الثاني - فؤاد حداد

أهل الأمانة - ديوان الحضرة ذكية - فؤاد حداد

قصيدة استشهاد جمال عبد الناصر - فؤاد حداد

قل للمليحة في الخمار الاسود .ماذا فعلت بناسك متعبد
قد كان شمر للصلاة ردائة ..حتى وقفتي له بباب المسجد
فسلبت منه دينه وبقينه وتركتيه فى حيره لا يهتدي
ردي عليه صلاته وصيامه لا تقتليه بحق دين محمد
قالوا تسلي عن المحبوب .. قلت بمن ؟؟
كيف التسلي؟؟؟ وفي الأحشاء نيرانِ..
إن التسلي حراام في مذاهبنا ... وكيف أرضي بكفر بعد إيمانِ
فشارب الخمر يصحو بعد سكرته ...وشارب الحب طول العمر سكرااان
أي شئ في العيد أهديه إليكي يا ملاكي ..
وكل شئ لديك أسوارا .. أسوارا ..
أم خمورا..!
وليس في الأرض خمرا كالتي تسكبين من عينيكي ..
أم ورودا ..!
والورد أجمله عندي الذي قد نشقت من خديكي..
أم عقيقا..!
كمهجتي يتلظي والعقيق الثمين في شفتيكي.
ليس عندي أعز من الروح ...وروحي مرهونة في يديكي
بلغوها .. 
بلغوها إذا أتيتم حماها ..أنني مت في الغرام فداها..
وأذكروني لها بكل جميل عساها أن تحن عليا عساها ..
وأصحبوها لتربتي ...فإن عظامي تشتاق ان تدوسها قدماها ....
--------------------------------------------------------------

قصة قصيدة قل للمليحة فى الخمار الأسود

في العصر الأموي الأول
عاش ( الدارمي ) وهو أحد الشعراء والمغنين الظرفاء في الحجاز
وكان يتشبب ( يتغزل ) بالنساء الجميلات، إلا أنه عندما تقدم به العمر ترك نظم الشعر والغناء وتنسك وأصبح متنقلاً بين مكة والمدينة للعبادة ..
وفى إحدى زياراته للمدينة التقى بأحد أصدقائه وهو من أهل الكوفة بالعراق يعمل تاجراً ، وكان قدومه إلى المدينة للتجارة ويحمل من ضمن تجارته (خمر عراقية)

فباع التاجر العراقي جميع الألوان من تلك الخمر ما عدى اللون الأسود،
فشكا التاجر لصديقه الشاعر ( الدارمي ) عن عدم بيعه اللون الأسود
ولعله غير مرغوب فيه عند نساء أهل المدينة فقال له: ( الدارمي ) لا تهتم بذلك فإني سأنفقها لك حتى تبيعها أجمع،
ثم نظم ( الدارمي ) بيتين من الشعر و تغنى بهما كما طلب من مغنيين بالمدينة وهما (سريح وسنان) أن يتغنوا بالبيتين الذي قال فيهما 
قل للمليحة فى الخمار الأسود ** ماذا فعـلت بـناســك مـتعبـــد
قد كان شـمر للصلاة ثــيابــه ** حتى وقفـت له بباب المسجـد
و أضاف إليها أحدهم بيتين آخرين هما:
فسـلبت منه دينــه ويقـيـنــــه ** وتركتـه فى حــيرة لايهتــدي

ردي عليه صلاتـه وصيــامــه ** لاتقـتـليـه بحـق دين محمــــد 
فشاع الخبر فى المدينة بأن الشاعر ( الدارمي ) رجع عن تنسكه و زهده
وعشق صاحبة الخمار الأسود، فلم تبق مليحة إلا اشترت من التاجر خمارا أسوداً لها. فلما تيقن ( الدارمي ) أن جميع الخمر السوداء قد نفذت من عند صديقه ترك الغناء
و رجع إلى زهده وتنسكه ولزم المسجد

قل للمليحة في الخمار الاسود & ابعتلى جواب على الهلباوي

تفرانيل مصطفى ابراهيم

يا كل حاجه كسبتها
أو سبتها
و ملحقتش اشبع منّها
اكمنّها
قالت “حنروح من بعض فين؟ "
يا ناس يا عبط يا عشمانين
ف فرصه تانيه للقا
بطلوا اوهام بقي
وكفايه أحلام واسمعوا
عيشوا بذمه و ودعوا
كل حاجة بتعملوها
وكل حد بتشوفوه
وكل كلمه بتقولوها
وكل لحن بتسمعوه
عيشوا المشاهد ,, كل مشهد
زي مايكون الأخير
واشبعوا ساعة الوداع
واحضنوا الحاجه بـضمير
دا اللي فاضل مش كتير
اللي فاضل مش كتير



‫كانت هتفرق فى الوداع ,, مصطفى ابراهيم‬‎

صلاح جاهين - الشاى باللبن

البالونه - مصطفى ابراهيم

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



المانيفستو - مصطفى إبراهيم

انا شعرى غامق
بس قلبى مطقطق ابيض من زمان
جايز عشان
الناس ساعات بتلاقى ناس
تعرف تشوفها بجد
و انا قلبى لسه عمره ما اتكشف على حد
بقابل اد ما اقابل
و افارق اد ما افارق
و ما اتعلمش
بلخبط ف الاسامى عشان
بخاف انسى
بلخبط ف الدنيا عشان
بخاف لا ما اعيشش
بقالى كتير ما بتكلمش
بخاف يبقى الكلام متعاد
ما كملتش ف اى رحيل ..
ما كملتش ف اى قعاد !
و بدى للحياة بالكاد
ما يكفيها
و يكفينى
شرور البهدلة فيها ...

تفرانيل 100: مصطفي ابراهيم / شعر

الزمان..
أيام ما كان لسه فى ناس ممكن تموت..
مش لاجل لقمة و لأجل قوت
يعنى الزمان كان من زمان
المكان..
جوه العراق..
صحرا على مد البصر ..
رمله بدون نقطة مطر
و الكوفة على رمية حجر من كربلاء

السيين يبدأ..
صوت نفس ..
مزيكا توحى بالقلق
دقات قلب بينتفض
منظر لحبات العرق ..على جبهة من الشمس استوت
الكاميرا تعمل زووم أوت
السيين بدأ..
أصوات حوافر ع الطريق..
الصوت بيعلى ويقترب
فى نقطة ع الشوف من بعيد
الزووم يزيد ..
يظهر بتاع خمسين فرس..
من لبسهم واضح بأن دول حرس..
من جيش "يزيد"
يغمس حصانه فينطلق زى الهوا
تلمح عينيهم م العفارة جريته
تلمع عينيهم..كله يجرى ناحيته
مشهد مطاردة بدون أمل ..
خلفيته.. صوت طبل افريقى اشتغل
و مفيش دقيقة ..بعدها كان سهم لحقه و إتقتل ..
ف يسيب حصانه و يتهبد..
يمسك السهم بإيديه..
و يشوف شريط الفيلم كله قصاد عينيه

الشاشة تبهت لون ضباب
علشان تجيبه بيفتكر
والذكريات دايماً بتصحى..
لما نيجى نحتضر

كنا قصاد قصر الخليفة ..باالآلاف
من كل شارع ف المدينة ..حتلاقينا
شئ مهول و مهما أحكى أو أقول ..
اللى سمع طبعاً مش زى اللى ..شاف
كان هوه جوّا بيرتعش و زى منه حاشيته
طوفانّا عمّال يقترب .. والكل جاى ف سكته
و الكاميرا جايه ع الرؤوس مع صوت ..هتاف
الصورة تعمل فيد أوت..
كل الملامح تختفى..
الصورة ترجع..الإضاءة نور قمر
و المشاعل اللى باقية نورها قرّب ينطفى
و اللى فاضلين م الآلاف يتعدوا يمكن ع الإيدين
معرفش لسة الغلطة فين ..
بس الحسين لازم خبرنا يوصله قبل ما يفوت الأوان
خوفنا خلّانا عبيد مالناش أمان
إحنا مش قد اللى عاوز يعمله
و صوتنا النهاردة جمب صوته
وموتنا موته ..
و بكرة قدام الخليفة إحنا اللى ممكن نقتله ..
صمت تام ..بعده يبدأ صوت يبان
صوت لعزف حزاينى جداً ع الكمان ..
سيين المظاهرة خلاص خِلِص ..
و سيين العقاب واضح إنه فى أوله ..
الكاميرا فجأة تلتفت ..
جايبة شكل القصر كله من بعيد ..
زووم ع الفراندة اللى طلّة ع الجنينة
من وسط ظباط حاشيته يظهر "يزيد"
زى اللى دبت روحه جواه من جديد..
يكشف سنانه و يبتسم ..
و بسيفه يشاور علينا
من غير ما ينطق كلمة واحدة ..
فى ظرف لحظة إفترقنا
كل واحد ودّع الباقيين بنظره
و هو بيلف بحصانه .. وانطلق
كل واحد فى إتجاه
كل واحد منا يجرى .. وألف كلب صيد وراه
معرفش مين فينا اتصلب
مين انضرب ..
مين فينا بالمدنة احتمى .. مين اللى من فوقها اترمى
أو حتى مين قتله العطش بعد اما تاه ..
كل الشوارع مصيدة وكل البيوت ..
الكوفة نايمة حتى من قبل العِشا..
حَطَّت صُباعها ف ودنها ..
وسابتنا بره الباب نموت ..
الليل يفوت..
و الحظ يلعب لعبته و يسيبنى أعيش .

الكاميرا قدام الحصان
الحركة ماشة بالبطئ ..
الكاميرا تعلى لفوق اوى ..الصحرا تملا الكادر كله
و الشمس ف نهاية الطريق..
ع الضُهر حسيت بالتعب ..
بطّلت جرى..الشمس حامية وصدرى من كتر العطش
عمّال يضيق ..
ريقى بحاول أبلعه مش لاقى ريق..
حسيت ساعتها إن النهاية بتقترب
ف نزلت من فوق الحصان ..
طبطبت على كتفه وسندت ..
و بنظرة بصيت للسما زى الغريق

الصورة تتثبت بتاع أربع ثوانى ..
الصورة فجأة تجرى بس بسرعة جداً..
مع صوت كأن حد بيسف الشريط ..
الصورة تثبت مرة تانى
جثة فوق الرملة نايمة ..
سهم راشق نفسه فيها ..
زى شاهد من فوقيها
الكاميرا تبعد حبة حبة ..
والإضاءة تنطفى..أصوات نايات ملو السمع
و الكادر بيلّم الوجع .. وبعدين يقرر يختفى
صورة سودا للسما من غير نجوم..
مع صوت هوا عمّال يزووم فوق الرمال..
قدام بعيد ..أشباح جِمال..أصوات خفيفة للخيول
ينزل كبيرهم من على جناح الفَرَس .. و يلف كفه ع اللجام
بعدين يقول ..
الليلادى نبات هنا ..دقّوا الخيام
ساعتين وكان الكل نام ..
يصحى فى نص الليل لوحده من القلق ..
ابنه الصغير يسأله ..مالك؟
مفيش..
هو إحنا مش ع الحق برضه ؟
يبقى تفرق إيه نعيش..
تلمع عيونه بدمعتين ..
يحضن دراع "الحسين"
و الحضن دايماً يختصر نص الكلام
يا رب مغلوب ف أنتَصِر
الظلم عمره فى يوم ما دام ..
و تفوت ساعات الليل قوام
الفجر يبدأ..يوم جديد
و ينكتب ع الشاشة بالفونت العريض ..
يوم كربـــلاء
آخر ساعات قبل المصير
و الكاميرا تتسحّب ع السيين الأخير..قبل الختام
الكاميرا جايبة صقر طاير فوق بعيد ..عمّال يلف
ويرسم دايرة مقفولة ..
كأنه حاسس ب اللى هينقتل تحته..
و إن الحسين على وش مدبحته..
و إن الرمال تحتيه بالدم راح تشبع ..
و إن الهوا حواليه حبة و حيبقى تراب ..
و حيبقى هوّه وصُحبته أغراب
و إن المدد مش جاى مش هوّه ده عَلَمهُم
إللى قالولك تيجى ..رجعوا ف كلامهم
يا حسين هتيجى تموت لمين ؟
إرجع..
كل إللى جاى عشانهم تِفدى وتناضل ..
راضيين يعيشوا عبيد ..
و المشهد الفاضل هتموت ف آخره وحيد ..

الشاشة تتفتَّح بالراحة ع المشهد ..
الصورة سودا و تاريخ بينكتب بأبيض ..
الزمان ..20 ديسيمبر
شهر و نكمل سنة ع الثورة تقريباً
الوقت..قبل الفجر
المكان.. أسفل إشارة عمر مكرم
جمب الصينية تحديداً..
و يخش آخر كادر فى القصة على غفلة ..
فيد إن ..على الكريشيندو والقفلة .
أصوات هتاف ..
و بتقطعوا أصوات بعيدة لسراين الإسعاف ..
و ساعات قريبة لضرب نار ..
الكاميرا بتزووم ع الهدوم الكاكى ..
الكادر فجأة فيه بشر ظهروا ..
صفين عساكر جيش مترصصين بالعرض ..
و بلاط رصيف الحى مخلوع و متكسر ..
و الراوى يبدأ حكايته .. وصوته متأثر

أمسِك"محمد مصطفى" ع الأرض ..
و أبكى و أنا بقلبه من كتفه على ضهره ..
و نشيله جرى فأشيله من باطه
و صوابعى حاسة بقلبه بيدقدق ..
مع كل نبضة تخف نبضاته ..
كان قلبه مش بينقّط ..
قلبه بيدلدق..
قالوا الدكاترة بعدها ..
اللى اتقطع شريان مهم..
المهم .. لفّينا وِسطه بشال
و عقبال ما جرينا للشارع ..
و لقينا عربية ..
و لحد مستشفى الهلال ..
و لحد ما استلموه طقم النبطشية..
كان هوّه متبرع بنص دمه للطريق ..
و عرفنا بعديها بيومين ..
إنه إتبرع بروحه للقضية ..
و إنه ساب لإصحابه ف هدومه وصية ..
الكاميرا جايبة شاب بيغرّق إيديه بالدم ..
و جايبه صاحبه معدى جمبه بيدمّع ..
بيقول كلام و يعيد كأنه بيسمّع ..
شيّع صحابك من معركة بِالليل..
و الصبح فرَّج دمهم للخلق
و لأتوبيسات الناس الرايحة للأشغال..
زعّق بصوت رايح.. و بحشرجة فى الحلق
و اسكت عشان مبقاش فاضل كلام يتقال

الكاميرا ماشية بالبطئ جمب الصينية ..
الكاميرا ماشية بالبطئ فوق الطريق الأحمر
يتودّع الواقفين فى الكادر و بتطلع ..
و أصحاب محمد لسة بيحاوطوا الأمل بالطوب..
زى ما يحاوطوا قَدَر الشهيد المحتمل ع الأرض..
أفتح وصيته وأقرا إيه مكتوب
الكاميرا طايرة ع الميدان من فوق ..
و الصوت يرن لوحده فى سما المنظر ..

إنى رأيت اليوم...الصورة من برة
و قلت الحسين لسة ....حيموت كمان مرة
إنى رأيت اليوم ....فيما يرى الثائر
ان الحسين ملموم ...فوق جثته عساكر
بيدغدغوه بالشوم
كل أما ييجى يقوم
و ان البشر واقفة
تبكى بدال ما تحوش
و ان العلم مصفاه
م السونكى و الخرطوش
و ان الطريق مفروش...بالدم للآخر...
إنى رأيت اليوم...
الدم ع الآيش....
و إن الحسين إحنا....
و مهما اتقتل عايش 

إني رأيت اليوم | من ديوان المانيفستو "مصطفى ابراهيم"

مجموعة قصائد مختلفة للشاعر الفلسطينى محمود درويش 

محمود درويش - هو الحب كذبتنا الصادقة

The background music: http://www.youtube.com/watch?v=eam9v9FsLw4 

أمل دنقل - كلمات سبارتاكوس الأخيرة

قصيد عين شمس - من ديوان أيام العجب والموت بصوت فؤاد حدّاد
Ain Shams (Heliopolis) - Fouad Haddad

عين شمس - بصوت فؤاد حدّاد

حى معاى الخطوات
حى مصر الفلاحين
تولد مصر الأسطوات

يا فجر الأيام الهادى
يا شرفى وحبى وجهادى
يا ولدى ياضى ولادى
يا واقف فى الخط الأول
لليوم اللى يتم الآيه
وحياة المجرى اللى اتحول
وحياة الحق اللى معايا
حى معاى الخطوات
حى مصر الفلاحين
تولد مصر الأسطوات

يا ورد مفتّح فى صوانى
يا زندى وعندى وصوانى
يا قلب الطين الأسوانى
حى معايا الخطوات‏..‏

يا قايم على راس فدانه
والقمح يضفر له عيدانه
والنسمه توشوش فى ودانه
حى معايا الخطوات‏..‏

يا نجفى ومديت أسلاكه
يا شعبى وحاكم أملاكه
يا ولادنا بكره ما احلاكو
حى معايا الخطوات‏..


حىّ معايا الخطوات - فؤاد حدّاد - سيّد مكّاوى

انا والد الشعراء ..فؤاد حداد
أيوه...
انا الوالد ...
و ياما ولاد.. !!

شَرع التسالي- بصوت فؤاد حداد

Foad Haddad