(1) 
بارفع إيديا لـ الكريم بشويش 
وابدا صلاتي بركعتين لله 
الفجر أذّن بس أكل العيش
بيلم ناسه و شقيانينه معاه 
بابدأ وضوئي بدون ما اطلع صوت ..
يصعب عليا ان قمتي تتخضي
الفضه ممكن تتحفظ لكن 
بيجيلها حتما وقت وتصدّي 
والذكري دايماً كل يوم بالليل
تفتح مجالها لقلبي وتفضي
بادخل عنيكي وقلبي كله ذنوب 
والقاني خارج منها متوضي 
وكإن فيكي براءه م الاخطاء
او ان عينك مش مجرد عين
بتاخدني منك ليكي مش عارف
من فين تاخدني ورايحه بيا لفين
باسند عليكي وباسندك اوقات 
وبرغم ضعفك بس برضه ساعات
بتكوني حيطه وضهر مش مايل 
عايزاني اقولك اني عاشق ليه 
عاشق ولكن برضه مش قايل 
***********

( 2 )
مالك مسهم !! 
لا مفيش حاجه ..
شكلك منمتش من زمان جداً 
او نمت لكن نمت نوم زايف
عارف بقالي كتير بابان تايه
وافتح عنيا وببقي مش شايف
وبخاف اكمل في الطريق لكن 
بمشيه وبعمل نفسي مش خايف
وبسيب وبمسك في البشر اوقات
من غير مناسبه ودون وجود داعي
كان ليا شخص الدنيا طمعت فيه 
مسكت خناقه في وقت حاجتي اليه
ودموعه سابت حفره في دراعي

***********
flash back 

( 3 )

سرحان وعينك رغرغت بهدوء
غمضت نزلت دمعه مكسورة 
اللمة كانت واخده حد غياب
والصورة كانت خاليه م الصوره
ركزت جامد حبه في التفاصيل
فضحكت جداً بس لسه حزين 
غضمت تاني صحيت لقيت انك
قررت ترجع فجأه ست سنين 
" جرسون وشايل بين ايديه مشاريب / فنجان محوج جنبه شاي بحليب / واحد بيكره حد مش موجود / وحبيب بيعمل نفسه لسه حبيب " 

كل اللي فاكرة من المكان يومها
مسكة ايديكي الدافيه .. للحلبه 
من غير ما احس الدبلتين خرجوا
من بين ايدينا وبقيوا في العلبة
ازاي حصل او متي مش عارف
الدنيا وقفت دون سبب واضح
وكأن طوبه اتوجهت نحوي 
من غير ما احدد هي جاتني منين
والدمعه لما بتتحبس جواك 
قلبك بيبعت امدادات للعين
اتنين وعاشوا الدنيا شي واحد
دلوقتي رجعوا يكملوها اتنين
والناس بتدفع للكاشير حكايات
و بياخدوا دايماً وصل بالباقي 
يظهر بانه في وسط كوتشينتي
كان حد كاشف نص اوراقي 
وبيمشي سايب فيا شئ غامض
بالبعد يوسع والسنين متساعش
كل اللي مشيوا في سكتك رجعوا
وفضلت وحدك بس مبترجعش ..
والسكه لازم يبقي فيها فراق
عشان يكمل في الطريق تانيين
قضينا وقت كبير نودع ناس
ونسينا نفتح بابنا للجايين 
والدنيا تبدأ تسرد الاحداث 
وترد دايماً ع الوفاء بالغدر
اول ما تخرج ضحكتك للنور
تلقي المصور سابها بره الكادر
والدنيا تقلب فجاه ذكر وزار 
وروايه فيها ان البطل ممكن 
ينضم تاني لكفة الاشرار
والموت يوزع ورد ع العايشين
والجنه ترحم ذعر اهل النار
ونعيش جميعا دور محبه وسلم
وتفوق فتلقي ان اللي فات تخاريف
وان اللي شوفته يادوب مجرد حلم
خلوك تمثل دور بطل لكن ..
حتي البطل بيموت في اخر الفيلم
*****
( 4 ) ه
معظم مشاهد قصتك كانت .. 
تبدأ بـ هي و هي مش حاضره
درويش بيمسك سبحته وعشمان ..
يلقي اللي ضايع منه في الحضره 
عايش تدور عنها وسط الناس 
فازاي هتقدر تبقي ملك الغير 
الطير بيهرب م القفص علشان 
يثبت لنفسه بإنه فعلاً طير 
وانت اللي عاشق سجنها وزعلان
علشان بتسجن جوه منها سواك 
ف ازاي تقولي انك بقيت وحدك 
وفي كل حاجه بتبقي لسه معاك
فيه بنات تسيبك تبقي عادي تمام 
وبنات بتعرف تبقي نقطة ضعف
صرفت حزنك بس تعمل ايه
لو إن حزنك غير متاح للصرف
********

( 5 ) 

كل السكك كانت بتوصلك ليها 
ازاي هتنساها وانت اللي لو حبيت
كل البنات بعدها هيفكروك بيها 
وتلاقي لسه خطوط لايديها جوا ايديك
وريحتها بتغلف كل اللي بتشمه
شكلك سليم انما للحق من جواك
كسرت في قلبك شئ ما زالت بتلمه 
ومازلت مش قادر من يوم فراقها تعيش
هددت نفسك كل يوم بالموت 
وطلعت فالح بس في التهويش
درويش بيهرب م البشر للخوف 
ويخاف فيكره انه كان درويش

مصطفى عبدالرحمن
https://m.facebook.com/mostafaaboelaala?ref=bookmarks&refid=12

قصيدة درويش للشاعر مصطفى عبدالرحمن / إلقاء هاجر عبدالمنعم

شاعرة
علك تلاقي نفسي هنا .. أو جوا سطر مكمِلش عمره ومات 
هنا ..
عشان بحب هنا وأتمنى تحبوه
وَمُرُورُ يَـوْمِـي يُزِيدُنِي عِـِشْـقَـَـاً... لَكّ إِلَـهـِـِي وَمَنْ غَيـْرُگ أَحَـَق؟!
__________________
- ツ الشاعرة هاجر عبدالمنعم ツ ღ
https://www.facebook.com/hagerabdelmonem.97

قصيدة درويش للشاعر مصطفى عبدالرحمن / إلقاء هاجر عبدالمنعم

hager_abdelmonem