دايماً في كل فندق تدخله لازم تشوف إيه اللي جوة السرير. عايزة تطمن بس من ساعة ما سمعت مرة إنهم لقوا جثة متحللة في فندق. آه الريحة بتبقى مؤشر بس برضه.. ممكن أوي يتم إخفاء ريحة الجثة بكذا طريقة على ما تعتقد يعني.
  أول ما دخلت الأوضة وحطت هدومها. شالت الغطيان والمرتبة الكبيرة و... شافت أسمنت! دي علامة من العلامات الكبيرة. رفعت التليفون وطلبت خدمة الغرف وقالت لهم ييجوا على غرفتها 508..
  لما دخلوا طلبت منهم يا تشوف إيه اللي تحت الأسمنت يا تمشي. قالوا لها إن قالب السرير حجري بما إن استايل الفندق نفسه بدوي وإنه مش فاضي من جوة.
  اقتنعت وقعدت وهي بتبصّ حواليها عشان تتأكد من حاجة هي مش عارفة إيه هي.. خرجت وراحت للاجتماع مع الإدارة وبتلعن الإدارة اللي حجزت لها هي والتيم فندق على الاستايل دة.. مالها الإستايلات المودرن يعني؟
  خلصت الإجتماع ورجعت الأوضة عشان تنام.. أول ما حطت راسها على المخدة حست برجفة... كل حاجة في الأوضة بتتهزّ. مسكت في السرير وبعد لحظة كل حاجة سكتت. 
  زلزال؟ هي ناقصة رعب؟
  رفعت السماعة وسألت: هو دة زلزال؟
  كان الردّ: زلزال إيه يا فندم؟ مفيش حاجة!
  هي متأكدة إنه كان زلزال وصرخت فيهم إنها متأكدة بس عموماً اليوم عدّى عادي رغم نرفزتها إن كل شخص محسش بحاجة في التيم أو الإدارة بتاعتها... 
  مرّ اليوم وفي اليوم التاني كانت في المؤتمر، وأول ما خلصّوا رجعت أوضتها عشان تجهزّ حاجتها للسفر في اليوم التالي... وهي بتحضّر الشنطة حستّ بساقعة رهيبة فراحت عشان تعيد تعديل درجة حرارة التكيف.. ولسة الساقعة زي ما هي. كلمت الريسيبشن وقالت لهم عايزة حد ييجي يشوف التكييف.. فعلاً الفني جه ولكن الغريب إن الجوّ رجع لطبيعته والتكييف مفيهوش حاجة. 
  نامت وفي الصبح خدت شنطتها وعملت Check Out  وسافرت مع التيم ورجعت القاهرة.. دخلت أوضتها ونامت على سريرها اللي واحشها ولكن... الرجفة! الرجّة!
  قامت وقعدت مفزوعة ومسكت في السرير و... الجوّ ساقعة جداً. 
  صرخت صرخة مرعبة وهي بتسمع صوت جاي من جنب ودنها بيقول:
-هنا حلو أوي..
  قصتها دي هي حكتها للشرطة أول ما هربت من بيتها وراحت لقسم الشرطة. طبعاً محدش فهم حاجة بس حظها إن الظابط حكى القصة الطريفة دي والمصنفة كأغرب بلاغ في قسم الشرطة لصحفي والصحفي عجبته الفكرة ونشرها في مقال في جريدة إلكترونية وأنا بصفتي صاحب مدونة للرعب على الانترنت أخدت القصة وأعدت صياغتها مع تفسيري للي حصل..
  هي خوفها الرئيسي كان من وجود جثة في الفندق. ممكن الفندق كدبوا عليها في موضوع السرير دة... هل السرير دة جواه جثة فعلاً وهما خافينها بالاسمنت؟ هل مفيش أي جثة ولا أي أثر لخوفها من الجثث وإن الموضوع دة ليه علاقة بالجن والأشباح؟؟
  أنا أميل للتفسير الخوارقي دة والدليل إنها حتى لما رجعت للقاهرة.. فضل الموضوع دة وراها.. عارفين دة معناه إيه؟
  إن اللي سكن الغرفة 508 مسابهاش لوحدها لما مشيت.. كمان مش ملاحظين حاجة في الرقم دة؟  
-هيثم ممتاز-

٥٠٨ -هيثم ممتاز

Horror creator: writer, visual artist, and storyteller of the macabre. ☠️

٥٠٨ -هيثم ممتاز

Haitham Momtaz