؛)(

بدر عازم - bader azem
تراك " يا من "

Bader Azem Ya Mn - بدر عازم يا من

12 دقيقة ⬛️

{كورس}
عزيزي الإنسان 
نفسي اموّت الناموسة اللي مش بتخليك تنام    
عزيزي الإنسان
نفسي بجد اسعدك مش عارف اعملها ازاي

{فيرس 1}
كلامهم عنك غلط، مش لأن كذابين 
مش فاهمين، أصل اللي زيك عن جيلهم متقدمين
مش فاهمين اللي زيك من تفكيرهم متعذبين
كنت سايق في الضلمة، لقيتك بتتمشى على اليمين 
 
ركبت جنبي زي أيام زمان، أنا وانت على الطريق 
بالصدفة في اليوم دا كنت قاعد بافكر فيك
كنت في منطقتك وحاسس اني هاشوفك 
الدنيا خلتنا نتقابل وسط جهنم 

جهنم ليك، جنة جديدة ليا 
اللي مخليك تتعذب فيها انها في يوم كانت جنة ليك
بُص لي، ولائي ليك، لازم تتأكد
موبايلي رن تاني، هاقفله، مش عايز اتشتت  

بمناسبة الكلمة اللي قلتها لي أول ما ركبت 
إعرف ان استحالة اني أخونك، انت اخويا
بقى لي فترة عايز اعاتبك، شفتك وافتكرت 
عمري ما هتضايق منك عشان عمرك ما قصرت 

{كورس}
عزيزي الإنسان 
نفسي اموت الناموسة اللي مش بتخليك تنام    
عزيزي الإنسان
نفسي بجد اسعدك، مش عارف اعملها ازاي

{فيرس 2}
سألتك إيه الأخبار؟ قلت لي: مش تمام خالص 
فترة الاكتئاب طوّلت، راحت راحة البال، طارت
في آخر فترة قلّ الكلام بيننا
ولأسباب تافهة كنت زعلان منك

كلام سريع قبل ما توصل مكان ما انت رايح
بتوصف لي الطريق، في نفس الوقت بتديني في نصايح
كإنك بتقول اتعود على وجودي قليل
كأنك بتقول فيه شيء هيتغير قريب 

مدخل دماغك فين؟
دايما بتخلي الكلام عليّا، مش عليك 
صاحبنا التالت خايف عليك اكتر مني 
ولو حصل لك حاجة هايتجنن
حاجة حسيتها من غير ما يتكلم

يمكن قليل الناس اللي بيفهموك بجد
وبالأغنية دي مش باحاول اقول لك اني منهم
كل اللي حصل اني شفتك وافتكرت 
اني مش متضايق منك، عشان عمرك ما قصرت 

{كورس}
عزيزي الإنسان 
نفسي اموت الناموسة اللي مش بتخليك تنام    
عزيزي الإنسان
نفسي بجد اسعدك مش عارف اعملها ازاي

{فيرس 3}
ليلة غريبة.. حبينا نقف وما لقيتش الركنة
عربيات يمين وشمال مدية انطباع الزحمة
في نص الجملة لاقيتك نزلت فجأة
اتفرجت عليك وانت داخل المبنى 

وقولت لنفسي يا رب تلاقي اللي انت محتاجه عشان تكمل
من كام شهر سألتك ليه دماغي ساعات بتنمل 
فاكر ردك: واثق في الإجابة
قلت دماغك لو منملة حاليا دا احتياجك 
 
كانوا حوالي 12 دقيقة 
لما صادفتك في جهنم
ماعرفتش اعبر لك عن اللي داير في دماغي 
يمكن أفكاري توصل لو اتقالت في أغاني 

جمايلك عليا استحالة الدنيا تنسّيها لي
إحساسي عنك كان صح ودي الخبرة بتأكدها لي
كنت ناسي ولما شفتك وافتكرت 
إنت عمرك ما قصرت

◼️12 دقيقة

سيريتها جات بظروفها تاني
عايز ارجع اشوفها تاني
اعمل نفس الغلطة تاني 
تلم هدومها في شنطة تاني 

تاني… 
تاني تاني تاني تاني 
تاني… 
تاني تاني…

مكالمة لحد الصبح تاني 
معاملة القطب الشمالي 
مبعزقلها في اهتمامي 
لو ماردتش ارن تاني 

تاني…
تاني تاني تاني
تاني… 
تاني تاني… 

قولت إفكسي الحصة وإطلعيلي
حسيت ان في حاجة في مودك
يومها كان شكلك مش طبيعي
ماعرفتش إني مش هاشوفك

تاني
تاني تاني تاني تاني
تاني… 
تاني تاني… 

جات على جرح وبتدوس
بنلخبط بعض وبندوخ
العيب تحت قلوبنا متداري
بنتخانق وبنتصالح تاني 

وبنرجع نكره بعض تاني 
وبسرعة نشد الشعر تاني
بنخلي سهل صعب تاني 
شرار وبرق ورعد تاني 

تاني
تاني تاني تاني تاني
تاني… 
تاني تاني… 
 
سيريتها جات بظروفها تاني
عايز ارجع اشوفها تاني
اعمل نفس الغلطة تاني 
تلم هدومها في شنطة تاني

فيرس 2
إنتي الاساس
الباقيين مش نفس المقاس
كل السنين اللي فاتت
ماحدش اخد مكانك 

ولا يمينك ولا شمالك
ماعرفتش ابينهالك
سمحت لمشاعري تتصدر
بس لسه في الجمارك

دلوقتي بردان ماباقيتش متدفي من الحضن
صعب اسيب نفسي للحب
صباح ومسى انا لميت الاسى حطيته في نفسيتي اللي اتهرت من الحزن

لازم احاول انساكي
في بشر جوايا وجواكي
بنغرقهم على هواكي
صعب اني ارجع استناكي 

تاني
تاني تاني تاني تاني
تاني… 
تاني تاني

في الوحدة بتوحشيني بس نشوف بعض بنتوتر
لما بافتكرك ساعات بسرح وأقعد افكر
 كنت اعمى وماكنتش بعرف اقدر
نفسي اقول لك بس معاكي صعب اعبر

🌙تاني

أعوز اذاكر... افتح الدراسات واسيب الجبر
أعوز أريّح، فأتمدد على قضيب القطر
على السوشال، يا إما تعمل سندباد
يا إما تعلن إكتئاب
 
أبتدي بالإسم، ولا الحرف ولا الفعل 
كلم السمسار، صاحب البيت، غلّى السعر 
وهنا كل حاجة بتغلى إلا كلمة الشرف 
ولما الحاجة بتبقى دوغري نحب نيجيلها من ورا 

بس الانجاز قد كدا، لازم نقيس بالمسطرة 
ولازم الميستر أجبرك 
لازم الميس تكدرك 
طب وانا؟ رحت للمصير وقلت له: ها بقى
قال لي: هو انت لسه شفت حاجة؟

يا عم فهمنا،
خلاص بقى اتنيلنا 
هنقعد نتكتم اشرح لنا، انت كبيرنا
مش فاهم انت عايز مني إيه 
مش مهم اني اتأخرت، المهم اني جيت 

وانا في ابتدائي كنت بسأل نفسي: ازاي؟ 
وانا في اعدادي كنت بسأل نفسي: امتي؟
وانا في الجامعة بدأت اسأل نفسي: ليه؟ 
دلوقتي بسأل جوجل فين الأجزخانة

ومش باعرف اخد أوامر وابقى ماشي بخط سير
قصدك ايه؟ نفسية طالعة نازلة في اسانسير
فبتغابى وببقى الشخص اللي يقفلها ليلة الافتتاح
مش عايز الاقي عقدي بتبعدني ع النجاح

باكره ان انا طيب، 
باكره إني باكره ان انا طيب
مزاجي زفت ومش عارف إفادة حب الناس
نفسي انسى 2016 من غير ما اصب كاس

بادخل جحر الحزن اشوف بس مين اللي هيسأل
وبتخيل لو اختفيت، ايه اللي هيحصل  
"طب لما ارجع هايتبسطوا ان انا جيت؟"
بنسى إن الاهتمام عمره ما اشترى بيت

في حوار مع واحد ما بيسمعش، فمليت 
من المسؤلية استخبيت
بس ان حد يعاتبني، لا دا عيب
مش مهم اني اتأخرت، المهم اني خفيت

وانا في ابتدائي كنت بسأل نفسي: ازاي؟ 
وانا في اعدادي كنت بسأل نفسي: امتي؟
وانا في الجامعة بدأت اسأل نفسي: ليه؟ 
دلوقتي بسأل جوجل فين الأجزخانة

دا... طريق اللانهاية
مسك الخريطة هيخليك شغال قراية
موتوري عطل، تانك الديزل قال كفاية 
وسط جبال لو جابت ليل حتى الجريء محتاج حماية

بس النقطة السودة بارزة 
ولا نقطة بتبُقى شاربة 
جت بالصُدفة التوبة خارجة من بقها..
الكلمة سلعة.. في السموات تتباع
باهاجم الحياة ...بألوان الدفاع

قلقان جت حوادث
شعبان لعند مارس 
تعبان ماعادش حاسس
زهقت وصوتي قافش 
وطلعت الدور الهامش

نومي عسل... وانا بتاع معاكسة 
شبعت منه جاب احلام بطعم النكسة
مغمض عيني... جت أفاعي 
برضو رافض... ابقى واعي

في العصر الفضي نتاجر في الحروف ونغش بعض
بقيت ب-كاش... طلع دفع القسط صعب
اكل العيش امر من المر
والنسيان أضر من الشرب 

الخبث مزة، فباحب الاحترام
أمل مشيت لسه في حتة الخصام
ماشي سالانسيه.. برعاية قشر البيض
رجعت في يوم لاقيت حاجتها مش في البيت 

في الفصل كنت غاااااايب... مستقبلي في رقبتي 
افتكروني خااااايب، بس علمت نفسي 

وداني القطر، لمحافظة التعالي 
رجعني الزمن، لمحطة المعادي  
مغمّي عيني، بادور على القرار
أفكار ممنوعة، صوّرها الرادار

قلت لأعصابي: هابدلك لو تعبتي في الخمسة وستين
القدر ما بينهز شباكه حتى لو كان مين
الشفقة مصابة بالشيخوخة
متجهة بالراحة للغيبوبة

- يا اسطى ليه بتفتكر لنفسك وتنسى ليا؟
- عشان جدار الاحتياج حايش الانسانية
واكتشفت ... بعد تفتيش ماضيا
- اني زي محامي في الفاكانس ماعنديش قضية

وانا في ابتدائي كنت بسأل نفسي: ازاي؟ 
وانا في عدادي كنت بسأل نفسي: امتي؟
وانا في الجامعة بدأت اسأل نفسي: ليه؟ 
دلوقتي بسأل جوجل فين الأجزخانة
+
خوفي الوحيد  هو خوفي مني
الصبر مر بس اليأس موتي وسمي
قولت لها: في عز ما انتي همجية بتترددي
حلاوة العالم انه مش منطقي
مثلاً...
اتشال الطبق من قدامي ولسه باكل 
مش فاهم التفاهة في التفاؤل
مش عايز ضلمة، فتحت اللمبة
اخرتنا اتنين متر ونص تحت الرملة

طموحي بيتسرع ويتوه
فقلت أمنياتي لنجمة بتطلع في الروح
عايز اشوف العيلة كل سنة أعلى
عايز اعيش ومش هادوّر على معنى  

وانا في ابتدائي كنت بسأل نفسي: ازاي؟ 
وانا في اعدادي كنت بسأل نفسي: امتي؟
وانا في الجامعة بدأت اسأل نفسي: ليه؟

🌡أجزخانة

شهر اتنين
[كوبليه ١]
نفسي بس في حاجة جديدة 
تصحّيني من النوم بضحكة
عقلي ضايع في غابة بعيدة 
ما تطلعي معايا رحلة! 

كل الأفلام اللي في السينما
والمعاني اللي في المزيكا
بيقولوا لي: فيه حاجة ناقصة
بيقولوا لي: لاقي حبيبك

كان المفروض تكوني إنتي
والمفروض الصور دي احنا 
لما تيجي قدامي سيرتك   
من جوايا في حاجة بتحزن

تاني بافِرّ في سيناريوهات 
وانا قاعد لوحدي في أوضة
عمري ما زعلت على اللي فات 
عمر نيتي ما كانت سودة

[ڤيرس 1]
عيني مزغللة ومش شايف الساعة كام
خايف أطَلّع الشوكة من الجرح بتاع زمان
لاست أوردر، مخي هيقفلوه 
صوتي رايح مني وهيمسكوه

تزعل وتخبّي وشها في تعبيرات 
رشق السهم بس معاده فات
بمشي في الضلمة ومش عايز اتوه
ذكرياتنا في شبكة عنكبوت

وسط الزحمة اشوف عينك واعرف سرحانة فين 
ماحدش كان فاهم دماغي قدِك 
لو اللي بينا كان عادي، ما كان زماني نسيت
ماحدش إداني الإحساس دا قبلك

رسايل قديمة منورة ليلتي 
أزود عليهم ولا بلاش؟
مافيش إجابة على أسئلتي
مستني بكرا، لسه مجاش

نفسي بس في حاجة جديدة
يمكن الاقي في السوق الحرة
عادي اني لسه مش ناسيها
المشكلة اني فاكر الحلوة مش المرة

واضح ان انا بس اللي مطبق
باين إرهاق وحزن في النبرة
صور قديمة عملالي صدمة
شيطان على كتفي الشمال مستغرب

عودوني، عودوني …
اه لو الكلام يقضي
طالع سليم لحُسن حظي
بس في حاجة تشبه المغص في بطني

مسجلها على الموبايل "ن"
والصورة سرحت فيها وعملت زوم
معاها بغرق مش بعوم
شوية شهور حسيتهم قرون

نفسي بس في حاجة جديدة
باصص ع السما من النجيلة
كانت في “عمري ما هسيبك”
بقت في “ليه مش بتحب غير المزيكا؟”

صور قديمة… 
زي لُوَح بيكاسو
فيه ناس جواية بيعزوا
نفسية طالعة نازلة مع الاسهم

شهر اتنين اتقابلنا
حكاية انتهت بكلمة
صورتها ورا جفني بتلزق
م الاوضة الغامقة لسه صوت كلامها بينده

هناك في لوح مرمية
هزة الموبايل ع الفجرية
رقم غريب، ما طلعتش هي
نفسي أسأل لو في حد جه بعديا

[كوبليه ١]
نفسي برضه في حاجة جديدة 
تصحيني من النوم بضحكة
عقلي ضايع في غابة بعيدة 
ما تطلعي معايا رحلة! 

كل الافلام اللي في السينما
والمعاني اللي في المزيكا
بيقولوا لي: فيه حاجة ناقصة
بيقولوا لي: لاقي حبيبك

كان المفروض تكوني إنتي
والمفروض الصور دي احنا 
لما تيجي قدامي سيرتك   
من جوايا في حاجة بتحزن

تاني بافِرّ في سيناريوهات 
وانا قاعد لوحدي في أوضة
عمري ما زعلت على اللي فات 
عمر نيتي ما كانت سودة

Bader Azem Ya Mn - بدر عازم يا من

Hasan