حط الغمام ع الجزيرة .. بدّل هواها وطباعها
دار ع النفوس الفقيرة .. بالذل والخوف طبعها
وبدر مابين الخلق سيرة .. مين ضدها ومين تبعها
وقت اما تعمى البصاير .. ماحيلتنا غير البصيرة
...........
 البحر طرحه عكار وقف .. ع المىّ ماجراشى
حدف غريب ع البحر يحكى .. كلام ماجراشى
يابحر فيك مننا صياد .. وفيك غرقان
ومهما دار الزمان .. مسيرك تصفى ماجراشى
حط الغمام ع الجزيرة .. بدّل هواها وطباعها
دار ع النفوس الفقيرة .. بالذل والخوف طبعها
............
البحر ده كان جبل .. نزل عليه الحب
والصخر لان وانحنى..  من عطفه ع المجاريح
ياناس قلوبكم حجر .. واللا انتوا من غير قلب
كنا تلاتة رفاقة .. واتفرقوا فى الريح
وحدانى بيتى الخلا .. والقلب مالهوش حد
غيرك حبيبتى اللى وحدك .. ساكنة فى حواشيه
لا سقف عندى يحوش عنى لظى أو برد
ولا عندى باب توحشه .. دقة إيديكى عليه
حط الغمام ع الجزيرة .. بدّل هواها وطباعها
دار ع النفوس الفقيرة .. بالذل والخوف طبعها

تتر مسلسل جزيرة غمام - علي الحجار

Heba Muhamed Ali