Nikon D4 Shutter

محاولة التعايش مع الغربة علمني حاجة مكنتش متخيل إني هنجح فيها: الهروب
إنك تهرب من واقعك لعوالم افتراضية، مرات عشان تقاوم الحزن، ومرات عشان تستسلم له.
وكانت الموسيقى هي جنة الهروب المثالية في الحالتين
معرفش إن كان ده - ع المدى البعيد، وعلى المستوى الشخصي - سلبي واللا إيجابي، لكن اكتشافي إن الموسيقى الجيدة زي الخمر، كلما تقادمت أينعت وشعشعت وتأثيرها كان أفدح، حاجة مريحة بالنسبة لي.
وما زلت أسمع موسيقى وأتخيل ملامح ناس سمعوها قبلي، وشكل حياتهم وظروفهم ومواجعهم وأفراحهم. وبالتالي بحسّ بروعة الإنسانية كفكرة
اسمع موسيقى، عشان تحب اللي متعرفهمش
سماع الموسيقى جزء من إعادة إبداعها وشحنها بالمزيد من المشاعر
الموسيقى اللي بتسمعها، فيها جزء من مشاعر آلاف، أو ربما ملايين، سمعوها قبلك
إنت ربما مش بتدرك ده، لكن الموسيقى نفسها مدركة
وكل ما تسمع مقطوعة موسيقية، هي بتاخد حاجة من روحك، هي بتتشحن من مشاعرك زيادة زي إنت ما بتتشحن منها. وهييجي اللي بعدك يلقط ده، من غير ما يعرف إنه إنت.
الموسيقى تختزن صور العابرين، وتطبعها في أرواح العابرين من بعدهم
خلّد مشاعرك بسماع الموسيقى
انضمّ للبوتقة الأجمل اللي بينصهر فيها الكون: الموسيقى
اغرق في الموسيقى وخلاص
إنه الغرق الذي يرفعك لسقف العالم

Nikon D4 Shutter

Hesham Tawfiq Osman