جميل جداً التراك.. الموسيقي المصاحبة مناسبة يا شاعرنا المحترم..🌹🌹

ما شاء الله عليك.. ربنا يحفظك ويحميك.. بجد كلماتك بتروي أرواحنا

جميلة جدا  اول مرة اسمعلك حاجة صوت 👍👌

ايه الجمال دا يا أستاذنا الغالي

@nadia-abdalla-611641698 بعض ما عندكم

عجباك فكرة تعبان بتموت؟
مستني سؤال من ناس حابوك؟
طب ابني التُربه وحضّرها.!
عجباك نفسك وقت ما بتميل؟
طب عاجبك قلقك طول الليل؟
طب فكَّر فيها وعبّرها.
اصلك مُش عاوز تنساها !
عجباك فكرة انك هتموت
وفاكرها هتغرَق فـ بُكاها،
هتموت وهيبقي الكُل غياب
وياريتك تقدر تحضرلك
فـ التُربه مفيش ولا حد معاك
ولا حتي عزاك فيه هَتقرب،
صورتك وقصايدك علي فيسك
وكلامك كان جارح حَبّه
هيشدّو الخط علي الصوره
وهيقولوا ده مات مين هيصدّق!
وهينسوا مع الوقت وعادي
لكن انت فـ تُربه بتتعذب
وبتحسب فـ الوقت كأنك
هتقَضي الفتره وهتعدي!
لاء فوق دلوقتي من الاول
واحسب خطواتك واتعلم
علشان الناس يوم هتفوتك
هتلاقي حياتك تتحول
من شمس ونور لـ تراب وعذاب!
المشهد يتحوِل لغياب
والناس تدعيلك وقت الدفن
الكل يسَلِم ويغادر
ما يضَل حزين غير هما الاهل
بتحب فـ ناس يشبهوا للكهف
تندههُم / يرجعلك صوتك!
مَيِّت بيحب فـ شخص جريح
والجرح عميق زي سكوتك
ويفوتك حُبك ويَّا حياه!

القَبر فـ سقفُه شريط الوان
يعرضلك كام فيديو فـ ثانيه
مشهد سنه اولي فـ حُبك / او حُبك فـ مراحل تانيه
الدُنيا سنين لكن فانيه!
والفن فـِ شِعرك اكبر عيب!
هيفيدك شِعرك يعني بإيه
وبإيه بتفيد الناس بالشِعر؟
كل الـ بيكتب كان كداب
امّا الـ بيسمع  
زَود سِعر لشِعر بيوصف اكاذيبُه!
 الموت يتحَوِل لـ صديقُه
وصَديقُه حقيقه لابد تكون!
_
وبحب الموت جدً لكن
مبحبش حد فـ حُزنُه يطول!
الموت / مش شر 
ومش ساكن
الموت كان صاحب بيت مهجور 
مكتوب علي كل الـ بيدخل 
يحلم بـ الدنيا وبالاحياء!
الموت لو كان شر لا يُمكن
كان يُكتب علي كل العالم
وان كنت حقيقي بتتخيل
فـ بلاش تتنيل وانسي الناس
الحُب فـ عقلك كان وسواس!
خلاك تستعجل علي موتك
وان كُنت صحيح سَميتُه الحُب
فـ كمل حُبك وسكوتك
وسقوطك منك بسببها !
عجباك فكرة تعبان بتموت
مستني سؤال من ناس حَبوك
طب ابني التُربه وحضرها !
#يوسف_الصياد

عجباك فكرة تعبان بتموت #يوسف_الصياد

بالطو أبيض كلمات والقاء محمد صالح تيكو

facebook.com/ahmedsaid14

20 أكتوبر من عام الحزن المِتخربش
كات 7 الصبح ومش طالع للشارع صوت
سكّينة في إيد أختي الغالية وغرزتها في صدري
- جايلنا مكالمة من الدكتور ، إلحقنا بسرعة أبوك بيموت.

لأول مرة
ماتمناش اقوم مـ النوم وافتَّح عين
لأول مرة الناس بتتكلم ومش سامع صوت
لأول مرة اشوف وِش الألم بالظبط

ظنّيت بإن اليوم نهاية ودي القيامة
وماردّنيش عن ظنّي غير إلّا
فجأة افتكرت ان النهاردة السبت.

حسيت الدم بيتسحّب من جسمي بعيد
رجليّا حقيقي المرّادي ، مش لامسة الأرض
وإيديّا خيوط من بَكَر الحزن المِتبلِّل
الدَمع يا ابويا اهو اتسلِّل
والضَهر كُسور وباينّي هاكمل بيه مَحني
انا كنت بقول ان انا خرسان وطلعت ضعيف
جِه موتك أكِّد وفضحني.

بالذمة إزاي قررت تفارق وتسيبنا ؟
مش كنت قايلّي "تخلص جيش وهتتجوز" ؟
مش كنت معايا بتستنَّى الأيام تمشي
عشان اجي البيت ؟
إدّيتني مُسكِّن للأحزان وانا صدّقتك
وآديك بتخالف في وعودك ،
وانت اللي مشيت.

آخر يومين
عدّوا علينا في يوليو
وأغسطس
وسبتمبر
وفي اكتوبر..
عدّوا تُقال
وكإننا أطفال في حضَّانة
بيبدلوا الألبان بسجاير السوبر.

والدي اللي خانُه الحظ من أول سبيل
مَن علَّم الألوان رَسْم الجمال بالروح
مَن كرَّم الأعوام وبشكل موضوعي
أُهدي إليكَ إنكساري وغُلبي ودموعي
أُهدي إليكَ السلام والنظرة والأحضان
فأما بعد بترجاك لو تيجي كل يومين
ونتكلم بدون ما يكون ما بينّا خلاف
من غير ما حد يخاف
وإيه الخوف قصاد انك بعيد عنّي؟
وإيه الموت ما دام واخد حتت منّى؟
جميل الموت ما دام هالمح حبيبي هناك
عِشت السنين مخطوف ومِقرر اني انساك
عِشت السنين بَلغيك وبسِد فِ وداني
أهرب من التوجيه فـَ تجيلي ازوغ تاني
وادي السنين لطشتني فوق وشي
وادي الزهايمر جِه يجيب حقك
قرر تكون فاكر كل اللي كانوا معاك
وتنساني!

سامحني يا والدي واللهِ الأمور بتسُوء
بنزل لتحت ورجلي طالعة معاك لفوق
بحضُن شجر مجزوع ومَشوفتلوش ضِلَّة
والدي الجميل اللي اتولد من باطن المِلَّة
يُسعدني أقولك من زمان اني بحبّك
يُؤسفني أقولها الآن بعد أما فات القطر
بعد أما جانا خريف خلَّى الزهور نطِّت
كل الحاجات مطرح إيديك حطِّت
لكن إيديك هىّ المِسافرة بعيد
أمي اللي كنت تحب تنشكها بكلامك
من يوم غيابك كل أما تِغرِف أكل بتنادي
- يلّلا الغدا يا سعيد!
صبحت كورال بيعيَّط الموّال مع كل عصر
وعينيها صبحت نجمتين
مابيظهروش إلا لجمالك في الصور
وبقينا مركِب من قماش ويتيمِة المقاديف ..
غمَّضت عيني يا والدي مدهون بالخطايا
وصحيت لقيت منك رسالة :
"هتيجي ضيف .. وهتمشي ضيف"

يا قلِة صبر طالب صبر مِتفتِّت ومِتكسَّر
يا حسرِة كل دخانك وألوانك وفنجان شايَك السادة
ببص لقيت حتى العامود في الشارع إتأثَّر
مبقاش ينوَّر بانتظام ومكهرب اتنين او تلاتة
لو كان بإيدي آخد رصاصِة المرض
كنت خدت
لو كان بإيدي أهزم جيوش السُكَّر الكافر
كنت احارب ..
بس المرض ملعون
إختارَك انت عشان تخوض كل التجارب
لو كان بإيدي 
ألبس تي شيرتات الزمالك وانزل ألعب
آكل نجيلِة الأرض لَجل يفوز فـَ تضحك
كنت هلعب كل ماتش ..
لو كان بإيدي أكون نفس الطبيب اللي
بلّغنا موتك يومها ببرودُه العجيب
كنت هاخرج أقول لاخويا أبوك مَماتش
لو كان بإيدي اعمل حاجات مش قد إيدي
علشان تطوِّل في القعاد وتكون معانا
كنت هاعمل كل شئ واللهِ يابا
كنت هافتح أي أوكرة على البيبان

لكن هيعمل إيه ضعيف زيّي
قليل الحيلة والحيل والحظوظ
قُدام قسَاوِة بُؤرِة السرطان؟!

يصعب عليا
كل شئ لسّه ف بدايته
جِه موتك موّتني وهَدُّه
وان ابني هييجي ويتكلم
ولسانه مايندهش يا جدّو
والفترة اللي هعيشها بدونك
ولحد ما أجيلك وتشوفني
وهاروح اتقدِّم يوم وحدي
من غيرك جنبي تشرفني
هاتفرج ع الماتش لوحدي
وان خدنا الدوري افرح وحدي
وامي تزعقلي انا لوحدي
علشان شمّت ريحِة الدخان
يصعب عليا الحزن والكتمان
ولمين هتكلم وهقاوح وهَرُد و اثور

يصعب عليا
كل يوم عدّيته من غير مابقى جنبك
من يوم ولادتي
ولحد آخر جُملة مـِ الدكتور.

متخافش عليهم
انا راجل
هاثبتلك كل اللي نَفِيتُه
هاثبتلك إن الأب ساعات
بيموت مِتطمن على راجل هيشيل الفاضل من بيته
هيصون السُمعة وتربيته
متخافش عليهم
بس ابقَى متقطعش العادة
هتمر علينا ظروف وكروب
نحتاج طبطبتك بزيادة
نحتاج الضحكة اللي بتفتح ابواب الرّاح
مانتَ المفتاح
وانت التفاح اللي بيجبر كل العابرين لجمال قَطْفَك
انا عارف ان الموت خاطْفَك
لكن متأكد بشعورك وبإنك حاسس ومعايا
وبإن الجنّة أكيد هىَّ اللي هتبقَى نصيبك وتساعَك

وده كوبري يا والدي في يوم راح اموت وأعدي عليه
وهاشوفك واقف على آخره
بتشاور وفاتحلي دراعك.

إنت اللي مشيت - إهداء لـ أبويا - أحمد سعيد بكير

انا كنت بحِن فـ راح سايب و فـ مرة بعدت و قربلي !!

إبن نوح/المستشار.محمد عمر

ألمستشار. محمد عمر

Recent comments

رانيا عبد الرازق

Zainab Abualnoor

Hanan Maher

Amr Rabie Khallaf

Related tracks