يعني كيفن ما بريدك!!
ما براك شايفاهُ ريدك ...
في سلامي... وفي كلامي ...
وفي قليبي الشايلاه إيدك ...
***
كل كلمة أدور أقولا ...
تبقى قاسية وقت أجيكِ ...
وأنسى كل الداير أقولو ...
من عينيَّ تشوف عينيك ...
وإنتِ عارفة البيَّ كلو ...
وبرضو زي الماعاليك ...
يا حليل قلبي البريدك ...
***
إنت عارفه كل الفي قليبي ...
إلا بس يا حلوة أحكي ...
إنتِ ماليَّ المقاسمه ...
لما أفرح ولا أبكي ...
كم سنين من عمري عدو ؟!!
ولسه في دنياي أشكي ...
ما خلاص دوبني ريدك ...
***
قلت للأيام أسيبك ...
يا سحابة الشوق تمري ...
وقلبك الناسيني ديمه ...
يمكن الأيام تطري ...
إلا شايفه بعادك انتِ ...
ناوي ياخد باقي عمري ...
واصطفيت يا حلوة ريدك ...
***
عايني في عيني بتلقي ...
ألف دمعة تقول بريدك ...
حتى إيدي يوم تسالمك ...
فيها ريد بتعرفو إيدك ...
***
الله يدي الفرحة عمرك ...
وإنتِ في الأفراح يزيدك ...
ويبقى لي يا حلوة ريدك ...

خوجلي عثمان - يعني كيفن ما بريدك

Majdy A. Bisadah