"سلم على اخواتك"
سلم على اخواتك ولف الشال
 والبندقية تخصك، حسها إيدك
 الزرع طارح ذخيرة وبرتقان وعيال
 والشمس قادت بصوتك قبل م تقيدك
فجأة ثبت الجميع،
 كل الطيور سكتت، كل البحار هديت، كل الشجر ثابت
 حتى الهوا لم يرتكب هزة 
وحدها بس السُحب، اتحركت بهدوء جنازة
 موكب سُحب رايح يعيط في اتجاه غزة
 المؤكد إن كل الكون ساعتها التفت
 الكاميرا باصة من بعيد
 الكل ثابت وساكت قلبه... ومركز
 غزة بتعلن نفسها في العيد
 غزة بتفرض نفسها مركز
 لكن دعونا نقرب حبتين أكتر
 الصورة جوة البيت:
 شاب انتهى حالا من شد أجزاء البندقية واستعد
 بنوتة قاعدة بمهارة بتعمل لاختها ضفيرة
واختها بنفس المهارة بتملا ازازة المولوتوف
عيل صغير بيجري.
 عفواً .. راجل صغير بيجري
 وف إيديه نبلة
 والأم بتغزل شال وبتغني:

 على ها الطريق المتفرع 
من حِس عيالك يا فلسطين
 تتلاقى الشمس مع العالم
 من بعد سنين وسنين ناطرين

 خلونا نرجع حبتين تاني
 الصورة برة البيت 
شاب انتهى حالا من شد أجزاء البندقية واستعد
 بنوتة قاعدة بمهارة بتعمل لاختها ضفيرة
 واختها بنفس المهارة بتملا إزازة المولوتوف
راجل صغير بيجري وف إيديه نبلة
 والكون بيعزف غنوته: 
 يا هل ترى يا هل ؟
 صوت البنادق هل
على قلبنا الملهوف 
يروي ولاد العطش
 الخارجين م الخوف
 طالبين وصال السما
 والذاهبين جرياً لبداية الملحمة
 والمعروفين مجموع
 والمفُردين بينما 
الجمع كان خاين
 يا جمع شَلّ الحِما
 يا كتير ومش باين
 صوت الرصاص أحلى
 من دوشة المكْلَمة
 والعفو للقادر
 فمتدَعوش مرحمة 
وإحنا طبيعي نميل
 يا مُفردين ميلوا
 القلب إن مال .. حَمى

سلم على اخواتك

وقف الشريط في وضع ثابت
دلوقتي نقدر نفحص المنظر
مافيش و لا تفصيلة غابت
وكل شي بيقول وبيعبر
من غير كلام ولاصوت
أول ما ضغط الموت
على الزر في الملكوت
بخفة و بجبروت
في يوم أغبر
وقف الشريط في وضع ثابت
دالوقتي نقدر نفحص الصورة
انظر تلاقي الراية منشورة
متمزعة لكن مازالت فوق
بتصارع الريح اللي مسعورة
انظر تلاقي البلاد
أجيال ورى اجيال
رافعاها بإستبسال
ونزيف دمى سيال على الجبهة
وفي عنفوان النضال
وقف الشريط في وضع ثابت
خلي المكنجي يرجع المشهد
عايز اشوف نفسي زمان وانا شاب
داخل في رهط الثورة وانا غضبان
مش عاجبني لاجن ولا انسان
قالي المكنجي غور ما فيش
عيش طول ما فيك انفاس تعيش
بص شوف ركن الشباب في الف مليون شاب
ومش عاجبهم لا وصي ولا اب انظر إليهم و انت تتذكر
ليه ضربة صابت وضربة خابت
وضربة وقفت بالشريط في وضع ثابت
انظر وشوف عالمهل بالرّاحة
الشمس وسط القبة قدّاحة
والقدس واقعة و الحرم منداس
صوت الجرس والاذان على قلبها حرّاس
وآدي بطلها هل في الساحة
قلب الحجر في الأيد بيغلي حماس
قالي المكانجي بلوم وانا مكلوم
قال المكانجي والشريط شغال
مالكش تسأل سؤال
انظر و شوف الحق لما إنهان
انظر و شوف الآن
بكره بقى إمبارح في حضن زمان
وبعد بكرة فوق همومك فات
مافيش شريط مأجور و لا خوّان
ولا شريط له ثبات

وقف الشريط فى وضع ثابت

محمود الجندى...الشمس صنعتها تشمس


- إنت .. تعالى هنا .. أيوة إنت , مش مركّز و قاعد تنشزلي هنا !
_ أنا يا مايسترو !
- أبوة إنت يا بتاع مترو الأنفاق , أنا شُفتك بعينيا إنت و البيه اللي هناك ده .. يا خسارة يا زين قاعدين تقعوا واحد ورا التاني ..
_ يا خسارة يا مايسترو إنك ما تفهمنيش و تحس بيا , أنا خلاص يا مايسترو مش طايق نفسي بالشكل ده , مجرد نفر , واحد من ضمن خمسين واحد , أنا فنان برضُه يا مايسترو من حقي أتعرف و أشتهر , من حقي أغني و ألاقي حد يسمعني يعني ..
- في مترو الأنفاق !
_ أهو أحسن يا مايسترو من الملاهي الليلية و الضحك على السكرانين .. ولا إيه يا نونو !
- مالكش دعوة بسي زفت كلمني انا هنا ..
_ ما هو التليفزيون عايز فيديو كليب و عايز حد يقف ورا ضهرك و يسندك و عاوز جرنان أو مجلة تشاور عليك و تحط صورتك و بتوع الكاسيت مش عايزين أغاني كويسة , عايزين كوز المحبّة إتخرم و سيادتك سيد العارفين يعني .. و حتى يا مايسترو لو ما بعرفش أغني يعني , كفاية إن أنا بحب الغُنا , كفاية إني أفكر الناس باللحن الجميل و الكلام الجميل , و الأغاني اللي تخلي الناس تحب الدنيا و تموت فيها .. أنا ما وقعتش يا مايسترو .. أنا عايز أوصل للناس في الشارع من غير واسطة و من غير ضهر .
- و الأفراح يا زين , و وقوفك بالليل ورا العوالم , برضُه علشان توصل للناس !
_ لا ده بقى علشان المم يا مايسترو , علشان الفول و الطعمية و العيش , و ساعات الواحد بيبقى عايز ورك فرخة و شوية رز يعني ما هو أنا بني آدم بجوع 3 مرات في اليوم برضُه .. و ساعات ببقى عايز يعني في الأوكازيون أجيب قميص و بنطلون و جزمة .. بني آدم يا مايسترو , بني آدم , ولا قالولك عليا إن أنا بطل العالم في الجوع يعني ..

مشهد من فيلم هستيريا _ أحمد زكي

  تلت سنين والرابعه
اكيد الرايعه كبيسه
جنب الشغل عماره
ورا العماره منيسه
وانا قاعد مش مرتاح
انا باب ديته مفتاح
كان نفسي اكون سفاح
بس مجبتش مجموع
وانا كل ما بمشي بلاقي
يافطه الوقوف ممنوع


تحت البيت كوافير 
قصاده محل هدوم
صاحبه دايما ملخوم
قلبه صاله بلياردو
وغرس نخله قدامه 
النخل بيحضن ارضه
كل ما تطول ايامه


ازاي الخوف وصلني
لدرجه اني مخفش
ياللي فرقتوا الحب
انا قلبي بجد مخدش
ولا يمكن اكون شحات
اصل كرامتي بتوجعني
وانا كل ما اقول التوبه
ملقاش راجل يمنعني


الجامع فاضي ولكن
دايما حاسه مليان
فوقي ساكن دكتور
شكله علي طول عيان
وجراج الاوبرا اتهد
انا ليه خايف ع السد
وازاي بضحك من قلبي 
وانا واخدها بجد


انا كوبــري قصر النيل
وعشــــره عمــري اسود
انا كوكــب ماشــي لوحــده
ومـافـيـــش للوحــده حـدود
وهـــاسيب تليفوني يرن
انا اصــلا مش موجــود

عمر طاهر | الخريطة | Omer Taher | Al kharita

"مُر يا خال ع بيت الحبايب.. والنبي تمر"- هستيريا

قول لنور تسامحنى من فيلم هى فوضى

حديث الصباح والمساء _ سنية هانم .. الوراق .. انتي طالق

سيد درويش : السقايين

اغنية عم سالم
من البوم ناقص حته ل وجيه عزيز

كلمات: مجدى نجيب

كلمات الاغنية 

شارب قهر الغناوى 
خايب يا طبيب مداوى 
قلبى عاللى جرا له 
حبى ايه اللى قاله 

احنا فى قلبونا رحمه 
لكن الدنيا زحمه 
احنا ضيعنا فى عالم 
و احنا ما حد سالم 
غيرك يا عم سالم 

سالم يا عم سالم 
سالم مين اللى ظالم 
غيرك يا عم سالم 
عفوا الله و اعلم 
شكرا يا عم سالم 

تعبى معرفش لونه 
صاحبى غامض جنونه 
سائل ولا حد سائل 
بينا كانت رسائل 

بكره الشمس تطلع 
حره تزعل ما تطلع 
بكره ما حد سالم 
غيرك يا عم سالم 

مالى همى ف دفاتر 
حالى فرحى مهاجر 
صاحبى سامع و اه 
حبى غيره دواه 

راسى ولا فيش مراسى 
ناسى ولا حد سالم 
غيرك يا عم سالم


عم سالم - وجيه عزيز

ستفتش عنها يا ولدى فى كل مكان"

صدقنى هتموت م التعب 
واللمعه فى عيونك هتدبل
الناس بتفرح بالوصول لو بعد جهد 
والرحله ممكن تبقى احيانا لطيفة 
طب وانت فى مكانك كده من اربع سنين 
لا بلغت نشوة لانتصار زى اللى وصلوا
ولا رحلتك ضافت لعمرك تجربه
واقف على الاعراف فى حيرة ومندهش
نفسك تجرب ..تنطلق ..تلعب ..... تحب !
لكن قلبك زى اطلال القمر لو شمسه غابت
مطفى ..وموحش ..وابتسامتك ميته
مين اللى يكسب لو حاربت ؟
الدنيا ولا انت ؟ 
نَفَسك يجارى السكه والحمل التقيل ؟
تقدر تنام ؟
ياخى دا انت حتى فشلت فى اجابة السؤال
الجملة واضحة
(ستفتش عنها يا ولدى ..فى كل مكان)
طب هى ايه ؟؟ 
وازاى هفتش عن حاجات معرفش كونها ؟
وازاى هقابل الدنيا عريان الامل عاوز احارب
وانا وانت الناس كلها عارفين بأنى وللأسف دايما زبونها
عارف !
دايماً بشوفك واخد القرعة الغلط 
كل ماتشاتك على ارض المنافس 
وكأن علشان تمشى خطوه فى تصفيات الدنيا محتاج كام جريمة
دلوقتى هقدر اسألك
 تقدر تقول تعريف مناسب للهزيمة ؟
 سواء حاربت بخبث او حتى بشرف.
 اعتقد ان الطريقه الوقتى ملهاش اى قيمة 
 زى اللى صارع الموج عشان ينقذ حبيبته 
 وطلع من الميه التقاها بتحضن الشخص الغريب وتقوله اسفه . 
 زى لما الشعر يغرز وبغباء سيف الشعور الحي فى 
قلوب الفلاسفة 
زى ما تكون انطلقت باقصى سرعه فى سكه صعبه 
تقوم ..تقع .. تضرب ..تزق ..تدوس على دماغك كعوب المشكلات ...تكسب أخيراً
تكتشف انك بتجرى دا كله فى سباق مش سباقك 
وانك خسرت 
وانك بقالك ييجى ستاشر سنه بتدعم قضيه اقل من حجم انتمائك
وان المعانى اللى انت بتدرسها للاطفال غلط 
وحبيبتك اتعشت بقلبك 
وان اللى عامله عشانها ميكفيش تدوق طعم اشتياقك
صدقنى هتموت م التعب 
ولسانك المربوط بأستك صمت مش هيقول قصيدتك
وخطاوى عمرك مهما كانت واثقه متداريش غبائك
 
"وسترجع يوماً يا ولدي ..مهزوماً مكسور الوجدان
وستعرف بعد رحيل العمر .. بأنك كنت تطارد خيط دخان"

اهى دى الهزيمة الحق يا ابنى 
ونزار مبيهزرش خد بالك 
وان كنت عاوز الحسبه كامله مكمله
فانت الصراحه فى عمر عداد الهزايم متساويش اصلا ثوانى 
فبلاش تمثل ان خساراتك فريده 
فكر بعمق ازاى هتتقبل حياتك كل يوم خسارات جديدة
ومتفتكرش انك كده عايش فى بؤس وحزن خام
لسه الليالى الكحل جايه بالانتقام
فاصبر بقا وبطل قلق
او اقولك الافضل كتير عن كل دا !
اقفل نزار واجمد كده وحاول تنام 

محمود عبد الناصر
١٣_١٢_٢٠٢٠

حديث الصباح والمساء _ سنية هانم .. الوراق .. انتي طالق

Mahmoud Mostafa

Related tracks