تالي نهار وعاتق الشمس مذبوح
 والوقت لو تدرين للوقت ذباح

كن السما صوتٍ من الذعر مبحوح
والليل خيلٍ سود .. للضي تجتاح

وسحايبٍ فوق الشفق كنها قروح
على جبينٍ ما شكى كثر ما طاح

لاذت عصافير المسا في ذرى الدوح
 وتنفس سراج الوهن بين الألواح

حبيبتي ضاق الفضى وين بروح؟! 
وإن رحت ظلم النفس للنفس ما راح

مجروح ماهو هم لو قلت مجروح
يالله عسى ما اصير في قلبك جراح

تبسّمي.. برقٍ على ثغرك يلوح
‏بأشدّ له ما دام في العمر مرواح

غزيت وجه الصبّح من غير مصلوح 
وانكفت دون الشمس هقوات ورماح


—البدر.

"تبسّمي.. برقٍ على ثغرك يلوح ‏بأشدّ له ما دام في العمر مرواح."

تِذْكار