لاكن هعمل في حبك ايه وفي الوحشة الي بتجيلي .. وحشتيني 💔

بحبك رغم ادراكي ، بإني برتكب غلطه💕

لكني برضو متأكد بأنك مش هتبقيلي لكن هعمل في حبك اي وفي الوحشه اللي بتجيلي 🥀

يارتني كنت مش موجود ف ساعه لما شوفتيني 🥲

ومشاعرنا بتتبع ارض في ناس غيرنا هترويهاا 🫠

روائع الشاعر عمرو حسن

هيبتا .. عمرو حسن

ابوس  ايديكي قبل أي كلام 
فرض احترام 
وحق حُب ف يوم من الأيام 
كان هو أجمل حاجه ف حياتي 
واتلو السلام كالرجال أوقات مابيفارقوا 
اديكي حقك عليا ف الغياب تقدير 
انا شفت منك برضه حلو كتير 
والله فرق كبير بين اختلاف وخلاف 
احنا اختلفنا ويجوز مابقاش ما بيننا نصيب 
لكن ما بيننا سنين كملها رب حسيب 
والراجل اللي يعيب ناقص مالوش ذمه 
باسم الحاجات المهمه 
باسمك ف بدأ القول 
وباسم كل عزيز كان له مكان بينّا 
ماتزوديش اللي بيننا بجرح هـيدينّا
خلى الحاجات طيبة 
ووشوشنا مترتبة 
والصورة متركبة مطرح ما سيبناها
وبلاش يكون حُبنا موجه ركبناها 
لا كلامنا كان عادي 
ولا كنا زي الخلق 
من يومنا متخانقين 
من يومنا جوز مجانين ومشينا على كيفنا 
مانكونش ليه على كيفنا واحنا متفارقين !
مانكرش فيه أوقات بيكون شيطاننا صديق 
وساعات بنرمي كلام مايكونش كله بريء 
وساعات بنتوعد بحاجات مانعملهاش 
بس احنا جوانا ماشيين وماكرهناش 
عن نفسي مش كاره 
أنا باحكي عن نفسي 
وبرضه عن نفسي باتمنى وادعيلك
كل الهنا يجيلك 
يارب منديلك مايشوفش عمره دموع 
وتكون ليالي الرضا بالسبعه ف الأسبوع 
يشهد عليا اللي خلاني اشوفك احن 
اني حزين مع إن 
ده قرارنا واخترناه
بس الوجع منطقي وان كنا فضلنّاه 
فياريت تقولي غلط 
لكن أكيد ماقصدش 
وان يسألوني هاقول أهو ربنا ما أرادش 
هي جميلة قوي
ومنظمة وطيبة 
وذكية وجريئة 
وقوية وبريئة 
لكن مافيش رابط 
طلقة فراق صابت 
والعلة ف المتصاب 
وعشان مابيننا صحاب 
وبيننا ناس عارفين ان احنا كنا اتنين 
بس بخيال واحد 
خلينا متفقين نقول كلام واحد 
قسمة ونصيب وخلاص 
وهتفضلي ع الراس مهما السنين مرت 
مهما الخيوط كرت والعمر فات بيّا 
هتفضلي الملهمه والبنت ف النية 
المخرَج اللي لقيته ف دايرة مقفولة 
وأول ظهور فعلي 
للسيدة الأولى 
شمس الغرام البكر 
أول دفا بيمر ف سقعة الأيام 
وهتفضلي الدبدبة من زهوة البدايات 
ريحة حنين لحاجات 
يسألني عنك قلبي قبل النوم 
تسألني عنك ياقة قميص أزرق 
أو كرسي عطفتي مرة عليه وسندتي ايدك 
يسألني عازف ايقاع عن صوت مرورك جنبي ف الشارع 
ويسألني الغياب 
يؤسفني أفتح باب لا تجلسي خلفه 
وانتي الكلام كله من ياءه إلي ألفُه 
هنعمل ايه ف اتنين اتفقوا ف اختلفوا 
كل الحلول اللي كانت ممكنه اتعملت
معادلة واكتملت 
وربنا الغالب 
سالب وجعنا في موجب التفاصيل 
بتساوي صبر جميل على ذكرى بالسالب
سيبيني افضفض بقا 
دول كلمتين يعني 
كان جرح ووجعني وقولت ما بدالي 
وانتي ف جرح قديم قولتي مابدالك 
هابوس ايديكي احترام ان جيتي على بالي 
وانتي اسمحيلي ابوسها ان جيت على بالك 
دول برضه مش ساعتين 
دول عمر والله 
ده انا كنت علشانك بازعل مع العالم 
باتحدى كل الناس 
كنت ان تحوم سيرتك 
اضحك ويلقوني باصبح خفيف الوزن 
كنت ان يغيب اسمك يمُر فيا الحزن ويمد ف جزوره 
نتلاقي زي عليل لقى حد بيزوره 
وسط التعب والهم 
لو جيتي كنت أهتم واضغط على ألمي علشان مايوجعكيش 
وكنتي قبلة حياة تديني فرصه أعيش 
لولا شوية بُعد اتسللوا بالغلط 
وكبروا بغيابنا 
واتحولوا للبلاب ملفوف على بابنا 
لولا اللي نقلوا كلام وانسحبوا بالأيام 
ولولا تركيبتك 
ولولا تركيبتي 
لا كنت انا سيبتك 
ولا كنتي يوم سيبتي 
البعد ياحبيبتي كان حل ماله بديل 
غاب النهار واستنيناه ميت ليل
والوضع ده أحسن 
انا ناسي كل جراح مرت بايد منك 
انسيلي كل هموم عدت عليكي ف يوم 
قولي ده واد طيب 
بس الزمن جه عليه 
واداني ياما ايديه وسندت وأنا صافيه 
وهاقول دي ست النسا 
الطيبة الدافية 
بلاش نكون ف السوق ، سوق الكلام المر 
الحرة حبت حُر 
واتفارقوا بالأيام 
وابوس ايديكي بعد كل كلام 
يتقال عليكي او يكون عنك 
ماتزعليش وخلاص 
ولا يتزعل منك 
يا اللي انتي بيكي نسيت كل اللي كان بيغُمّ
يا طفلة ساعة اللقا أسميتها دوم دوم 
وقلبي من وقتها اتعلم الطيران 
واتعلمت تنورة تبتدي الدوران
أنعم وأكرم لقا 
لما الفراق بيطيب 
خليني ف التجربة 
أب وصديق وحبيب 
وقولي سيبنا وبس 
مش شرط مين بيسيب 
ماتفرجيش الناس على جرحنا المستور 
ولا كسرنا المجبور 
وصدقي حكمتي أو لوعة المكسور
اللي اتزرع ف الضل 
بيموت ف أول نور 
https://www.youtube.com/watch?v=l2h_NxD1GMs

El Sakia TV Concerts

كلام ماتقالش في جوابى الاخير - عمرو حسن

مثلا - عمرو حسن

عمرو حسن - الشتا

مابتحبكش عمرو حسن & صلاح بجاتو من حفله الساقيه 2017

عمرو حسن - اشبعي بيهم

عمرو حسن انا الشيطان اسف

والمطر اللي بينزل دلوقت 
مش شبه اللي المطر اللي انا شُفته أول ما بدأت 
الشارع مش هو الشارع 
مش بس عشان طلعت عُمارات 
انما علشان ماتت حَضارات 
ماتت نظرات كانت عن حق 
ضاعت سلامات مخلوطه بأحلام ومحاولات 
والأمر الواقع بقى مش أكتر من اسمه 
الواحد بيعاين جسمه 
زي مابيفتّش محفظته 
بيدوّر على أجزاء منه ، فتحِت مواضيع
خبطت ف كراسي وف مشاعر وخريف وربيع 
وكإن الواحد بيسلِّم 
على شيء هيضيع قبل مابيضيع
--

القطر اللي بييجي برُكّاب 
مش زي القطر اللي بيمّشي محمِّل 
والناقص مضطر يكمل 

--
لم شفايفي من ع المجات واحسب 
عدد المرات اللي انا جرّبت حاجات فيها مع ناس مشيّت 
ارفع بصماتي من الأبواب وانت هتعرف 
ان انا ماتركتش باب إلا وجرّبت 
كل ما اقول قرّبت 
اتفرج على نفسي لوحدي
مزروع ف الأوضه اللي انا باقلع فها همومي 
بتأمل ناس لابس هدومي وعايشه مكاني
باتفرج على مشاريع أطفال
اتفق الشُركا يفضّوها
وبيوت كل ما ييجي العمال يبنوا حيطانها 
ييجوا ناس تانيين غير العُمال ويهدّوها 

--

مين المفروض دلوقتي يصبّر مين؟
الناس فاكره الطبطبه بالإيد 
واللي انا عاوزُه / ناقص ف السوق 
محتاج خمره تخلّيني أفوق
أو بِنج يحرّك أوجاعي
انما باجي ف أوقات وباقول مالهاش داعي 
الناس فيها اللي مكفّيها
مش هاتسوّل شلة أصحاب 
يطلبوا مشاريب وامشي آخرهم 
ولا ناوي أعكر صفو حاجات بحاجات غيرهم 
يكفيني أشيل بُرج إداري ، واغرس شجرة
ارفع عمدان من مطرحها ، وازرع أهلي 
اتبع خطوات ع السجادة وابني مكانها معارفي السابقين
مين المفروض دلوقتي يواسي ف مين

-- 

الناس ف الشارع ماشيه بناس مش حابّينهم 
عايشين ف أماكن مش مِنهُم 
واللي مصدّق ف الناس دلوقت 
بُكره يدينهُم 
انما بارجع أوقات وباقول : 
أنانيه ان انا افكّر بس ف نفسي 
لو كنت نجحت ف كل اللي انا دبّرتُه زمان 
كنت هاشرّد عشرين أسرة
هامنع رزق عن السينمات واكشاك الورد 
هامنع أطفال ييجوا العالم من باب غلطي 
واقطع بخيالي اللي انا ماملُكش سواه 
هافصل بين إيد واحد ماشي 
وبين الإيد اللي بتمشي معاه
وكإن المُخرِج مختارني أسلِّم لبديل
شغال عن الحظ مُجرَّد مندوب توصيل 
عقلي يقول لي : 
بإيديك قررت 
ومافيش حاجة اسمها مش عايز بعد امّا اخترتْ
اتفرج على فيلمك بحياد 
قلبي يقول لي :
لو كُنت ف يوم مازعلت هديت
لو كُنت ف يوم ما وقِفْت مشيت 
لو كنت نسيت 
كنت هاتبقى ف مطرح أحسن
بدل التواريخ ماتشيّد دنيا على كتافك 
ملعونه التواريخ اللي بتطلع على أكتافك 
لو كان فيهم واحد شافك زي ماتقصُد / مش زي ماقُلت
لو كان واحد فعلاً حسّك زي امّا بقيت / مش زي ماكُنت 
كان ممكن يبقى الفيلم جميل 
نهايات أسعد 
أعصاب أجمد 
وبيوت فيها ناس مش مهجورة
أحسن ما انت قُصاد الصورة 
بتبُص على الفيلم بحسره 
ولا منّك بتحقّق ايرادات 
ولا منك خارج بـ جوايز 

-- 

في الدنيا اللي بتحرِم محتاج 
وبتدّي لواحد مش عايز.

#الفيلم_اللي_ماخدش_جوايز

قصيدة الفيلم اللي ماخدش جوايز " عمرو حسن "

قصيدة بحبك رغم ادراكي  - عمرو حسن

ماحبِتش غيرها 
برغم السنين اللي فاتت عليا 
بيفضل حنين مني ليها ف عنيا 
وتفضل كإن البنات بعد منها 
نسخ باهتة منها 
وكل الشموس اللي تبعت غيابها 
بتنعي انسحابها 
كإن الشوارع عجين لما مرت 
فنحتت اثرها 
وحفظت كلامها وخوفها وهزارها 
ومشيت جماعه مامشيتش مفرد 
عشان غاب معاها مِساها ونهارها
بتسألني عنها برودة ايديا 
ورعشة سلامي 
ويسألني عنها سكوتي وكلامي 
وحتى كلاب الشوارع بتسأل
وجندي الإشارة 
ويسألني قلبي وكلبي ومرايتي 
وتسألني ساعتي ف معاد الزيارة 
بتوحشني زي العيال ف المدارس لعين امهاتهم 
وتوحشني زي ارتباط الملابس بايد شماعاتهم 
وسايباني زي اللي ماتوا وفضلوا بيمشوا ف حياتهم
تشم القلوب كل يوم زهر فايح 
وتتبقى وردة ويفضل عبيرها 

ماحبتش غيرها 
وليها مكانه مخليّه قلبي بيسلك دروبها  
خدتني لدرجة تخليني اشوف المزايا ف عيوبها 
وصوتها 
وايه زي صوتها 
نزول المطر فوق خشب بيت قديم 
نعومة نجاة وبحة حليم 
وضحكتها تشبه دخول النسيم 
على ارض طالها الخريف من زمن 
ف يوم ما اتقابلنا 
ماكنتش باشوف الحياه ليها معنى 
وحسيت كإني عارفها لزمن 
كإن النصيب كان بعَدنا وجمعنا
وسددت تمنه وقبضت التمن
بسلم عليها كإني سايبها ف غربة ورجعت 
وسكتت ف لحظتها لكن سِمعت 
وغمضت عيني عشان املى روحي
قمر غاب ف ليلكم ونوّر سطوحي
وصالحتني كل السنين اللي فاتت
مجرد ماعدّت 
وقفنا ف مكاننا وخطاوينا مدِّت 
وفجأة انفجر سيل طويل م الأغاني 
كل ده كان ليه 
ياللي بتسأل عن الحياة 
بعيد عنك 
وسيرة الحب 
كبر الغرام 
بهواك 
حيرت قلبي معاك 
وقولت هاقدر ايوم انساك
وكل ما انساها افتكرها 
ماحبتش غيرها 

ماحستش عمري باحساس مشابه تجاه أي واحدة
كإن الغرام اللي مكتوبلي كامل 
خرج غصب عني وعلى دفعه واحدة 
كبر فيا معنى 
وصار بيننا لعنه 
بدأت معانا ف يوم ما اجتمعنا
وانا كنت اصغر سنين من كده 
ماكنتش مأمِّن ليغدر زماني  
وعايش مآمن وواقف مكاني 
وشارد ف لون الحياة البرتقاني 
وتارِك بيبان الغياب مفتوحين 
ففاجئتني ضربة على غفله مني 
وسلمت راية ف أول كمين
وفاتت سنين 
واديني كإن اللقا من ثواني
لكني بقيت للأسف حد تاني 
خانتني الظروف واتسجنت ف غيابها 
ولسّاني ايد ع الاكر عند بابها
وبعد اما كنا شباب ف البداية 
كبرنا سنين جوه شرح الروايه 
واصبح مابيننا جبال من جليد 
بلادها بعيد 
وارضي ملاها الحداد والحديد 
وتجاعيدي مرت شقوق الغيطان جوه طمي الوريد 
وأصبحت اكبر 
وأصبحت اعدي الطريق ف الإشارة 
باتقل هدومي وبلبس كوفيّه 
واحس بجروحكوا واوجاعكوا فيّا 
وأصبحت اعقل 
واهدى وأتقل 
وهي كمان حاجه انطفت 
وعاشت ظروف متعبه واختفِت 
لكن لسه نفس الصبيه الجميله 
وصاحبة ليالي الغرام الطويلة 
ولسه عيون ممكنه مستحيله 
وست البنات كلهن ف عنيا 
ومهما ايدين ناعمه مسكت ايديا 
ومهما عيوني ثبتتني ف مكاني 
هتفضل رجولتي وطفولتي عشانها 
مايملاش مكانها ف يوم حد تاني 
ولا واحدة تربط مصيري بمصيرها 
ماحبتش غيرها 

ومايأسش ابداً 
ولو حتى قالوا الحكايه ف اخرها 
ولو صوت صحابي ف وداني محاصرني 
ولو طول غيابها خانقني وعاصرني 
ولو حتى عدت سنين تانية بيننا 
هاقول انه وارد 
وجايز وممكن 
وامنّي خيالي باجمل نهاية 
وهي معايا 
وجايه تعوضني لحظة بكاها بلحظة بكايا
وراجعة بكل الورود اللي دبلت 
والاقيها قبلت تكمل معايا 
ولو ساعه واحدة 
ولو حتى نظرة 
هاحس اني مرة مشيت وانتصرت 
واني جنيت قد لما انتظرت 
فسايب مساحة ف بيتي لخيالها 
وسايب مساحة ف قلبي لعيالها
وسايب اوضتنا ترتبها هي 
وسايب مخدة زيادة وكوفيه 
ومختار اضاءة تلائم عنيها 
وعامل حسابي عليا وعليها 
واقول بكره اجمل وهاقدر وهاكسب 
رهاني ف حاجات كان خيالي خسرها 

ماحبِتش وافخر بكونها ف حياتي 
واني ف حياتي ماحبتش غيرها

محبتش غيرها | عمرو حسن Amr Hassan

باودّعكم 
وانا معكُم
وبطلب تسمعوا شوية
 انا طول عمري باسمعكم 
بقلب يجوز يزعّلكم 
لكن عمره ما يخدعكم 
بودّعكم 
واودّع كل ما بيننا 
وكافة ما رأت عيني 
فمن كان منّكم ضدي 
وعاش معاديني وآذيني 
فماتمناش يودعّني ولا ببكاه يصدّعكم
ومن كان له ف قلبي نصيب
فهذا حبيب 
وحاوطوا دعاه بأسماعكم 

وأما بعد 

فهذا ما رأيت اليوم
ف ساعة نوم 
صحيت منها بعين أوسع وبال مرتاح 
أنا هاخرج من المشهد بنفس دخولي وانا عريان 
وأكبر حلم حققته مروري ف الغابات انسان 
لا يدّي كسّرت شباك 
ولا قدمي ف يوم خطت على جثه 
دخلت المدرسة الدنيا وخدت نصيبي م الحصه 
وقد الفهم والتحصيل 
قد ماكنت وغد جميل 
وديب طيّب 
بحُط دماغي آخر اليوم 
وانا مظلوم ومش ظالم 
ولو فيه حد كدّبني فيعلم ربنا العالِم 
ف عن مالي ماخدتش شيء
وعن بالي ماسيبتش شيء
وعن وقتي 
فانا ولحد دلوقتي مخلص مُجمله ع الناس 
زهدت ف كل شيء فيها 
وعشت حياتي بلاغيها 
واصاحب كل بلاويها وأقول معلش 
مانابنيش من بياض القلب 
غير تجاعيد نَمِت ع الوش 
ودُقت ف دربها الضدين 
من الكافيار لحد المش 
وعدِت رجلي ف دروبها 
خفيفه وقابله مكتوبها 
ومرت روحي جواها متاهة تودي لمتاهة 
وأقول دنيا ومتكلمش 
نهاية الدنيا ابسط من وقوع الرمش 
وكل اللي اتحكى عني كلام باطل 
انا دلوقتي ف مساحة ملفش فيها ولا اماطل 
كلامي زي ماهو بدون تذويق
واي كلام ماقولتوش يعتبر تلفيق

ف أوصيكم 
تمر جنازتي من ناحية ما انا مرّيت 
وترمولي السلام ع البيت 
وماتخلوش صحابي يتعبوا ف المشي 
كفاية سيبتهم هما هناك ومشيت
وأما الدمع لو ليّن 
ف هيّن واتركوه ينساب 
واما لو بُكا عالي فحاسبوا وسطكم كدّاب 
وعلى قبري دقيقة صمت 
وتدعولي بأن يشفعلي ما أصلحت لما أجرمت 
تلاتة يمشوا ف وداعي بقلب سليم 
يزيدوا عن الاف يمشوا بكدب عظيم 
وراعوا وسطكم واحدة ف شالها ريحتي وغيابي 
وشاوروا لأمي على بابي وقولوا البار 
وحاوطوا القبر بالياسمين مش الصبّار 
ومروا في هدوء بيليق على المشهد 

وأوصيكم 
عيون كلبي ماتدمعشي
وعصافيري ماتسمعشي كلام عن موت 
وأوصيكم توطّوا الصوت ف وقت الحزن 
وتسقوا زرعة النعناع لحد الريحة ماتحاوط نواحي البيت
وحاجتي تتقسم بالعدل ع الأصحاب 
موبايلي يتكسر ف وجود تلاتة شهود 
ومش عاوز ف يوم حفلة بكا وتأبين 
هتلقوا فيه ناس ومش عارفين بينعوا ف مين
وهتلاقوا اللي قتلوني بيبكوني على الشاشة
ف شاوروا ع اللي كان منّي وقولوا ده حق
وشاوروا ع اللي جاي يكدب وقولوا ده لأ
أنا جيت الحياة لوحدي 
وماشي منها لوحدي 
وأصحابي اللي عاشروني يادوب كام فرد 
فمش هبلع كمان الكدب تحت الأرض
وف عزايا اذا حبيتوا تتقابلوا 
فياخد دمعتي صاحبي ف بدء الصف 
وهتحسّوه لوحديكم ف بسط الكف 
وهتبصوا ف عنيه تلاقوه بيسند نفسه م الوقعه 
وقلبه السخن هيخلي ايديه ساقعه
ف مروا عليه وبصوا ف عينه تلاقوني 

وأوصيكم 
ف ساعة ماتركتوني تقولوا سلام 
ما احبش ف الختام اترك دموع والآم
وتنقلوا اسفي للناس اللي طيبة قلبي جرحتهم 
وتعتذروا لادويتي اللي ايدي بعنف فتحتهم 
وتضحكوا وقت ما اجيلكم ف يوم ع البال 
انا فايت ورايا خيال يساع الأرض ويساعكم 
باودّعكم

سلام ياصحاب 
سلام يابيوت
ياخطاوي 
معدتش اضايق العالم بازعاجي 
ورايح يعني مش هاجي
ومش هاخلف معاد مع حد بمزاجي 
ومش هاقضي الحياه تبرير ف شيء ماحصلش 
ومش هدوش جيراني بصوت اغانيّا 
ومش هازعج مسايا بطول لياليّا
ومش هاهلك جزم تانيه ولا قمصان 
ومش هاخرج وانا مبسوط 
ومش هارجع وانا قرفان 
اديني رحمتكم مني 
ومن زّني
ياريت وانتوا بعيد عني تحسوا بفرق للأحسن 
وانا احسن 
ومرتاح ف الغياب وسعيد 
لكن يوجعني ان فيه ناس هتبقى بعيد 
واخر القول 
باوصيّكم 
بلاش تفترضوا سوء الظن مع غيري 
يجوز غيري بسيط زيي 
وحاصرينه ف دور شرير وهو بجد أجدعكم
بلاش نفس الغلط تاني 
أذاكم حلّى موتي عن الحياة معكم 

وخلاني وانا بينكم أودعكم 

بوّدعكم

#الوصية

قصيدة الوصيه عمرو حسن لاول مرة

عمرو حسن | بيعلق غلطاته على الحب لأول مرة

عمرو حسن | بيعلق غلطاته على الحب

"غريبة القلب وعمايله 
ده انا لو كنت بعاديني ماكنتش هامشي ناحيتها 
ولو جوايا بكرهني ماكنتش برضه حبيتها 
مافيش عندي سبب واحد يبرر نظرتي ليها 
رسمت سيناريو جوايا وصدقته 
وقولت لنفسي بتحبك وعينها عليك 
ياواد قرّب 
ياواد جرّب
دي لسه ف دنيتك داخله ولسه خيالها متغّرب 
لحد ما مرت الأيام وانا بخسر ف كل قرار
وعشت حياتي بـ اتنازل وتغلط والتمس اعذار 
وكنت حمار 
مفكّر ان لجل الحب نفرّط عادي ف كرامة  
اشوف نمرتها ف موبايلي 
احس شعور غريب جايلي 
وصوتي يتقلب اهدى واطوّل ف الكلام وارغي
وكل كلامها كان منهج مذاكره حتى بالملغي 
وشايف انها كوني وشمسي وضلتي وناسي 
وبتأسف لاكون غلطان ف حاجه عملتها وناسي 
اكلمها عن الحاضر وعن بكره 
وعن بيتنا 
وباخد رأيها دايماً ف علاقتنا 
وهي كلامها كان اخره خلاص وتمام 
صباح الخير 
مساء الخير 
ويلا سلام 
بطلّع منها الكلمة بطلوع الروح 
وكنت باقول وايه يعني في ناس بتحس مش بتبوح 
لقيت افعالها زي كلامها بالواحدة
وبمشي ليها ميت خطوة 
ماتمشيش ليا ولا واحدة 
انا زعلان على نفسي 
عشان شكّيت كده ف نَفسي
ودوست عليا بالجامد عشان واحدة "

محبتنيش - عمرو حسن | Amr Hassan - Mahbtnish

قولتلها احكي 
قالت حبيت
كنت مراهنه عليه بحياتي 
شايفاه الرايح والآتي 
كنت بقول للي يعارضه
فيه حاجات حلوه وطيبه برضو 
يقولولي انما مش مضطره 
تستاهلي اللي يصونك اكتر منه بمليون مره 
وان جه في بالك اننا ظالمينه اسألي بره 
واعرفي سيرته
وانا كنت بقول ان انا شايفاه اكتر منهم 
حتي بقلقه وصمته وغيرته
حتي بطبعه الصلب القاسي 
شايفاه ناسي
حباه بعيونه وقابلاها
في حته منوره مش باينه انما شايفاها
وهيتغير لو قابل واحدة تكون بيته
اه حبيته
والعقل ملوش في الحب نصيب 
كان مالي عنيا بشكل غريب 
ومسكت ايديه ومشيت وبدأت 
قولت المايل نعدله بالوقت
قولت المكسور يتصلح حب وحنيه 
كنت بجيب الغلطه عليا 
كنت مصوّبه يمه عنيا 
كنت مرتبه عمري بحاله لعنيه ولوقته واشغاله
كنت في دنيا ملوش فيها صحاب 
الصاحبه الحلوه الباقياله
انما 
قالت انما 
بعدها سكتت وافتكرت حاجه انا معرفهاش 
قولتلها احكي 
قالت ماراعاش
ولا شئ من اللي انا عاملاه حسّه 
اول ماوصل له اني بحبه في شئ مسّه 
اول ماضمني اتغير للناحيه التانية 
واتقلبت احواله الأولي لأحوال تانيه 
وفي ظرف مفيش 
ظهر الي داريته عن العالم 
كل الي عملت اني مشفتوش 
بان في طباعه 
وعنيه اللي بانولي غزاله
صبحوا ضباعه 
وبدل مااصبح تاج علي راسه 
خلاني الخاتم في صباعه
لا حوار بيتم مابينا بود 
ولا ضحكه بتطلع بسهولة
وبقيت مش عارفه اوصل آخره 
ولا ارده علي الحاله الأولي 
وبقيت بسكت واسرح لساعات
وبقيت مش فاكره اهتماماتي
انهي اهتمامات !؟
شكلي اتغير 
خلقي مع الوقت بقي قصير 
واصحابي الي جبرني انساهم
مش لقياهم 
ولله بقيت مستنيه 
يشكر فيا 
قولت اذا ضحكلي وخد حسّي 
هضحك واطمن وانساله
كنت بدور علي حاجه بسيطه احسبهاله
انما 
ده البحر ودي نهايته
ومفيش في الحب حاجات بالغصب 
بعدين البحر ازاي بالوقت هيصبح عذب سكتت حبه 
كأنها غابت 
ولقيت في عنيها كلام جواها ومش قايلاه
قولتلها احكي 
قالت كارهاه 
ابقي مع الخوف والموت حتي 
انما مقبلش ان ابقي معاه
انا آخر نور في حياتي لحقته كان هيضيع 
ازاي كان قلبي كئيب وحزين 
انا كنت بصلح ايه وفي مين 
وان كنت هصلح حاجه ، اتنين 
عشرين خمسين 
انما واحد مفيهوش شئ حلو اتعلق بيه 
ايه المفروض يتصلح فيه 
صوته العالي 
شكله الدايم 
وزعيقه اذا قاعد أو قايم 
وشه المقلوب ، وقته الضايع 
ودنه الي بتسمع كل العالم الا كلامي 
طب انا لو صلحت عيوبه
عمري اللي هضيعه وياه ويرجعلي ازاي 
شكلي الي اتغير 
قلبي الي أتألم 
يرجعلي منين قلبي الفرحان 
او مين يضمن لي مسائل تانيه ماليها ضمان
ده انا ريحته بقيت بقلق منها 
اسمه علي موبايلي بقا يكركب كل مشاعري 
الاكره اللي بيفتحها بإيده
بتبانلي عقارب صمت بتمشي في ساعة شك 
وزعيقه مدافع علي ارض ملاها الخوف والدك 
سكتت فجاءه
ودموعها اتسحبت من عينها وسالت شلال 
كانت بتعيط من جواها علي الكلمه الي بتتقال 
بصيت 
كأني بكلم شجرة فاجأها خريف في بداية العمر 
والكحل ستاير فحم بتنزل من منجم علوي
وايديها الرعشة اللي مصاحبة ارامل خايفين 
من بطش الذكري ومن وحدة تشرين 
سيبتها تبكي 
بعدين هديت 
شربت حبة ماية من الكاس اللي علي الترابيزة 
لمعت عينها 
شفايفها ابتسموا بشكل بسيط 
وابتدت التجاعيد تتقفل
ويعود جلدها انعم بكتير 
وابتدت الدمعات ع الخد تقل 
قلبي اطمن 
قولت اكيد في شئ جواها ارتاح 
واكيد افتكرت شئ وياه
ممكن يغفرله ويشفعله 
قولتلها احكي 
قالت لو اخر راجل في العالم 
مش هرجعله 
#طلاق
#عمرو_حسن

الطلاق - عمرو حسن | Amr Hassan

انا عندي ايمان ان كلامهم صح ومظبوط 
واني وانا بعيد عنِك ميّت 
واني وانا ف قربك مش مبسوط 
بيني وبينك مسافات أبعد من أي اتنين 
كل اختياراتي اللي بدونك أفضل بكتير 
لكن من امتى الحب بيبقى علاج 
من امتى بياخد م الفايض يدي المحتاج 
من بين اربعه مليار واحدة اخترتك 
حبّيتك وكمان قدّرتك 
والكلمه اللي بتخرج منك 
اجمل من أي كلام مسموع 
اشبع لو شفتك يوم صدفه 
وان غبتي ليالي بموت م الجوع 
قصر الموضوع انك لعنه 
وان انا ملعون 
وان وجودك على قد ما طيّب مش مضمون
وان مكاسبي معاكي مجرد تمهيد لبعادك وخسارتي 
لحظة ما الناس آمنت بيا انتي كفّرتي 
وبدال ماتكوني امان م الناس 
ومكان يفضالي ويسمعني
قررتي تكون زيادة خوف 
ودراعي اللي تملي واجعني 
وبقيتي العين اللي بتخدعني وبتبُص طشاش 
انا بتعاقب ليه على حبك 
ديه حاجه الواحد ماخترهاش 
ملعون أبو قلبي اللي ندالك 
واختار من دنيته وادالك
ملعون تركيزي ف تفاصيلك 
والظن اللي بييجي ف بالك 
ملعونة شوارع بتفّكر 
ملعونة صوابع بتسكّر 
ملعون الروح اللي تبكّر وتقوم م النوم تحلم بيكي 
اقتلك ازاي ؟
افصلك ازاي عن خطواتي وظني وشكلي 
حبيتك ليه وانتي مشاكلي وضربتي ف الضهر 
اديتك كل اللي مسبب فرحك 
سيبتيلي اللي يحسس بالقهر 
حبيتك ليه ؟ 
وبشوفك مصدر احلامي وفرحتي على ايه ؟
ومصدق ليه انك دنيا 
وبفكر ليه ف دخولي عليكي ف بيت واحد
انا اكبر احلامي وجودك
والنبي شوفتي غباء ف غباءي ؟
اكبر احلامي افتّح عيني على حضورك 
ياخي ابوه ده الحب اللي يخلي حضورك كل امالي 
انا زينة الناس 
عم الرجالة ف عين الكل 
اجمل ستات ف الدنيا اتمنوا سلام بالإيد 
زيك خمسين مره احتاروا يخشولي منين 
على ايه بلاقيكي انتي جميعهم ؟
باشتري فيكي يوماتي وابيعهم 
وافردلك قلبي تمُري عليه 
حبيتك ليه 
ليكي حق تزيدي عليا دلال 
وتحسي بروحك فايقه جمال 
وتزيدي ف غلطك ميت مره 
مش مضطره صحيح تراضيني مش مضطره 
ولا مضطره تقدمي كرامات للي ف قلبك 
الغلطه على التايه جوايا عشان حبك 
ويا افوق 
يا اهلَك

اه ياقلب ياكلب يا شاري سراب 
ومضيّع ف قلوب تستاهلك

#بيعلق_غلطاته_على_الحُب

بيعلق غلطاته على الحب - عمرو حسن | Amr Hassan

#بعد_السكران_ما_يفوق #عمرو_حسن 
الحلوة قالت
ماله ده
فارد جناحه في الفضا وراسم خطاه
اما اعرفه
وازرع جناينه واخطفه وأطلب رضاه
تسليه برضو ومعرفه
رسم وصفه
بكره هيلحس الارصفة علشان أخلي ال " لأ " آه.. 
الواد بسيط
ولا جاش في باله
شادد رحاله ومكنش بيأمن وراه
شارد في عينها اللي اكتشف منها البكا
طايح في حضن معلقه وجارح صباه
امنتها
ومقام نبينا المصطفي
حلفتها
بحق نور اللي اصطفاه
تضم قلبي اللي اتأذى
وتصون لقانا وليل صفاه
قتلتني وفي ليلة العزا
قالت ومتصلوش وراه
على ايه يا ست
على ايه وليه
هو احنا داخلين معركة؟ 
أممت طين الباشا والدك وانتي جايه ترديهالي
بيني وبينك دم يعني ولا تار؟ 
مش يوم ماشوفتيني ابتسمتي وقيدتي نار
مش ده صباعك اللي شاور؟ 
مش ده خيالك اللي ناور؟
مش ده لسانك اللي حاور لاجل خلق وناس كتار؟ 
طب ايه بقى؟ 
ولا انتي اكل وبحلقة
عجباكي حاجة يا تشتريها يا روّحي
عماله ليه تتطوحي
ولا انتي متربية تاخدي وتشطحي 
وترمي
ودادي يجيب جديد
أنزفك شعر وقصايد واحكي للناس غنوتك
امدح بصوتي محبتك وافرد في توبك
بتحدى نوري بضلمتك واستر عيوبك
وانتي التهم متجهزة صفين طوال
خاين
وكذا وكذا وكذا وصفين طوال 
خاين وضيع
وكذا وكذا وسفيه وضال
وانتي الامان والاحترام
وانتي التمام والـ ما يرام
انتي اللي صلحتي الترام
وانا اللي وقفت النضال
على ايه يا ست
مانفضها
بفرط مناهدة نرولها وشكراً سلام
من غير كلام
من غير ما نهري في مين غلط او مين تمام
دلوقتي فعلاً مستعد اني امسحك
مسحة عظيمة تريحك من ذكرياتي
سكران وفوقت
وخمرتي كانت وجودك يا حياتي
ياللي جايبالي الكلام والغمر واللمز السخيف
وان كان على لحس الرصيف
اديه بقى صف مرايات
وان كان على الحزن اللطيف
دول مش صوابعي
دول نايات
وانا بعترفلك بالصواب في كل شئ
انتي الاماكن والطريق
انتي الطريق الدولي والفرعي البطئ
انتي علامة النصر
صوت الحب
سيدة الغناء العربي والوجه الرقيق
وانا زكي رستم
هتلر
موسوليني
تشرشل
متعالي
فضولي
أناني
ومش مظبوط وبذئ
عادي
وانتي بتقولي لصحابك قد ايه انا شخص قاسي
وطبعي في غاية السآلة
ابقي قولي ان انا سبب البطالة
سبب انخفاض منسوب مياه النيل
وان وقتك ضاع في تخفيف دمي التقيل
وان ذوقي كله ذوقك
واني بتمرمغ في شوقك بس جاحد
اشتميني تعلّي مني
ذمي فيا هتمدحيني
طلعي الطبع اللي فيكي وفرحيني
دول كاسين منقوعهم ايه اللي يجيبوني
ارمي عمري بين ايديكي واقول يادوب
خمرة ايه اللي تاخدني لواحدة بتكسر قلوب
كنت بستحمل مصايب
مش ببين
كنت رغم الشدة لين
عشت اقول عالغلطة وردة
كنت اشوف الشوكة وردة
واوضف القاسي انه هين
سُكر بين
هانج اوڤر
كنتي ليه في هدومي رقعه وقلبي معمولك بلوڤر
كنت مش بصعب عليكي وانتي بتلمي السيناريو وتنشريه
كل شيئ من قلبي عامله تكدبيه
ده انتي شككتيني فيا لدرجة اني
قولت كتر خيرها واخدة بالها مني
وانتي ابعد واحدة عني
اللي عاش بيبوس ايديكي عشان تضلّي
جاي يبوسها عشان توريه التخلّي
اللي طول العمر بيقولك هينفع
جاي يقولك مش هينفع
السنين اللي اترمو في الارض حتى مش هتشفع
قولي ان انتي اللي سايبه
وان انا مصاص دماء
وانتي غلبانة بغباء
وعبيطة خايبة
واني جبتك بالطريقة
ان اغراضي دنيئه
وان خطواتي بطيئة
والحبال في الوصل دايبة
اللي عاوزاه يتعمل
يتعمل
وتحلي عني
عاوز ارجع للي راح في الزحمة مني
عاوز اكسر وحدتي واخرج بـ راسي
عاوز اوهب مركبي لغير المراسي
ارمي للايام شراعي
واتركه للناس تراعي
القى منهم كلمة تفرح
حد م الناس اللي خسرانهم عشانك
يجي ويحل في مكانك
يبتسملي ويملى عيني
عاوز اسمع حد بيقول اني طيب
واني لسه قلبي صافي
حد يمشي في روحي حافي
وهو آمن
واحدة تحلفلي ان ممكن يجي بكره
انتي مش غلطانه فيا
كله غلطي
كله كان زرعي وحصادي
قلبي بعد سنين معشش
صاحي فاضي
واتكسر كاسك في ايدي
وخمرُه طار
النهاردة انا خدت بالي م النهار
خدت بالي من ملامحي
ثغري باسم
لوني قمحي
قلبي عيل
النهاردة
التئم جوايا جرح مكنش هين او قليل
فوقت بعد ما وقت فات
بس فوقت
بالسلامة 
سايبة فيا علامة عادي فيها ايه ما تسيب علامة
بس سابت بعد منها 
حد أطيب من سنينها 
حد مش هتشوفه عينها
من هنا ليوم القيامة ❤️

قصيدة بحبك رغم ادراكي - عمرو حسن

Mohamed Saad

Recent comments

Sheriff Alsaman

Sayed Shafek

Omnia

Omnia

Related tracks