‏عليك شقاوة تكفي حي

حفلة بساقية الصاوي 
٢٠٢١/٧/١٨

يناير قبل قطع البث من حفلة ساقية الصاوي

قالت : أنا الغريب حس بيا ، وإنت حتي مبتحاولش !! 

voice note مش هتوصل ..


كلمات: محمد عصام
https://www.facebook.com/M7mdess16?mibextid=ZbWKwL
موسيقى وهندسة صوتية: يوسف محمد
https://www.facebook.com/yousefdark960?mibextid=ZbWKwL

الكلمات:
في حاجات ماتنفعش قفش..
زي تبطيل السجاير
ونسيانها
زي العياط من بعد نُضج..
على الحاجات اللي كان لازم..
ماتتأثَّرش علشانها
والوداع لو لسَّة في حلول متقالتش
الوقوع في الشر
والوقوع م الخير
الخروج من دايرة الناس الأهم
والدخول في علاقة قبل ما تستخير
شرح الحقيقة لـ الشخص الأصم
الحكم قبل ما تظهر الصورة
اللقطَة قبل ما تعدل الصورة
والكلام كله..
حتى لو ما قل ودل
المشي في الطرق اللي بتبان الأكيدة
نهاية الفيلم
ونهاية القصيدة
وحاجات ماتنفعش بالتدريج.. 
الحضن في الوقت اللي ماسك فيه نفسك
والسب في الشخص اللي كاتم على نفَسَك
والوداع لو كان في واحد بس باقي
العياط في السر
العياط في الموت
الشكوة لو واصل لـ يأس من السكوت
الوقوف في الشدة جنب اللي فاضل
والإعتراف بالجَميل
والإعتراف بالجِميل
وحاجات ماتنفعش الوسط.. 
زيي!
وحاجات خسارتها مكسب
وحاجات ماتنفعش يتقال عنَّها بناقص
وحاجات ماتنفعش تبقى متعلَّقة
وحاجات ماتنفعش تستنَّى مكانها
وحاجات ماتنفعش تبقى للتجربة
وحاجات ماتنفعش من قبل أوانها
وحاجات ماتنفعش!

حاجات ماتنفعش - محمد عصام

هندسة صوتية: احمد سعيد بكير

https://www.facebook.com/ahmedsaid14?mibextid=LQQJ4d

كلمات: محمد عصام

https://www.facebook.com/M7mdess16?mibextid=LQQJ4d
 
الكلمات:

مش كنا خلصنا من السيرة!!
في إيه تاني!؟
قال وانا فَكَّرت الجرح فـ قلبي عالجته ولمّ
وان انا دلوقتي بقيت أحسن
بقا انام وانا فاكر نفسي نسيت..
أصحى والاقي..
جرحِك في القلب منقَّط دم!!
بقا كلمة في كلمة تفكرني!! 
أو تفتح باب قلبي على الريح..
من بعد ما كنت شهور سَدُّه
إبيَضِّت عين يعقوب م الحزن.. ارتد بصير
وانا قلبي اِسوَدّ من الأحزان..
مين هيردُّه؟
هتشوفي الناس عمارات حَيَّة..
بيخش ويخرُج ناس منهم
تلاقيني مابينهم بيت مهدوم!!
فكَّري بمحايدة ده مين هَدُّه!؟
بقا بعد ما كنت..
لا فاكر إمتى بقينا سوا
ولا فاكر يطلع إسمك إيه!
وفراقنا ده ذنبك أو ذنبي
في مجرد ثانية لاقيتني بقول..
دلوقتي بقالك تقريبا..
ألف و 100 يوم
وساعات..
ودقايق..
مش جنبي!
شايفة النقلة؟..
من فاقد ذاكرة.. لـ مُؤَرِّخ!
شايفة جروحِك ودِّتني لفين! 
الدنيا تجيبك من غير قصدك توجعني
وانا بعتبرك..
جَيَّالي عشان تسألي عنِّي
الواحد لو ماجَبَرش بخاطره.. هيجبر مين؟
كنت بستغرب شعوري فـ كل مرة..
فيها باغلط في الكتابة..
وقت ما اطمن واقولك:"هاملة إيه؟"
وانتي بتردي بروتين عادي ورتابة
كنت مش فاهم ساعتها إيه الإشارة
واتضح لي بعد فترة..
إن انا كنت الإجابة!
كنت باتعكز عليكي وانتي مايلة
سيبتي إيدي تتوه سنين.. رغم المحايلة
كنتي قايلة..
إني مطرح ما ابقى كنتي.. هتِبقِي جنبي
وهو إيه مفروض يزَعَّل..
قد إنِّك كنتي قايلَة!!
كل ما اغلط وافتكر..
تِغمَق الأيام السودة 
تعرَق إيدي فـ أيام باردة
بتموت وردة..
وبتكبر صبارة فـ قلبي
وتزيد الطرق المسدودة  
وتبوخ أشياء..
كان المفروض افرح بيها
أو كل ما اقابل.. 
ذكرى مابينَّا فـ أي مكان اهرب منها
متخيلة بهرب.. من ذكرى!
دي الدرجة الكام م الضعف اللي انا واصل ليها!
ويجيلي فضول دايمًا أسأل..
جيت حتى وَلَو مرَّة فـ بالِك؟
بالصدفة فـ أي طريق مثلًا
ويا بختِك حتى لاقيتي طريق!
أنا لسَّة بترفُضني الطُرقات
واشمعنا انا بس اللي الأيام بتفَكَّرني؟
وانتي الأيام وخداكي بأحضان النسيان!
وكأن مفيش..
لون احمر عندِك في الإشارات!
مش عدل ان انا بس اللي اخسَر!
هو انا كنت لوحدي اللي باحب؟
وان كان ده حقيقة.. - وده الواضح-..
ليه علَّقتيني بإن وجودِك شئ دايم؟
ليه تمحي هزايم.. لمَّا انتي هتِبقِي هزايم؟
ليه شيلنا خيار "انِّك تمشي"..
من ضمن جميع الإختيارات!؟ 
أنا أثَّر فيَّا فراقنا لإني مانيش زَيِّك
أنا باملُك قلب!
وكنت ضحيَّة لـ تهديدك
وان شوفتي فراقنا ده شئ عادي
ده عشان بس اختارتي بـ إيدِك! 
أمَّا انا علشان بس انساكي..
كانت بتدوس فوقي الأيام..
لو مهما راضيتها ومهما عملت
ومكانش في غير.. باب قدَّامي
ورا مِنُّه النار اللي انا دلوقتي بقيت فيها
زقِّتني الدنيا.. لاقيتني دخلت
اه ياما فارقني بشر لكن.. كنتي خلافهم
وجعِك مش زي حاجات عدِّت وأثرها بسيط
الطلقة فـ قلب ازاي تشبِه.. جلطِة أسفلت!
إن جينا وحبينا نقارن..
كنت افتكرك أيام وشهور.. وانسى دقايق
وانتي تفكَّري فيا دقايق.. وبتنسي سنين
كات صفحة بسيطة وسهل ايامك تقلبها!
إنتي الأيام ضحكت ليكي.. جابتلك دبلة
وانا لسة بابيع..
في خيالي الدبلة اللي المفروض كنت هجيبها!
إنتي بتحسبي بالنسبالك..
كام مَرّة كتب ليكي "بحبك"
وانا بحسب كام مرة قصيدة..
علشانك كنت باعَذِّبها!
واضحك مكسور.. لو جيت اسمع..
"لست وحدَك حبيبها"
وبرغم انها واجعة.. باسيبها
وبرد واقول لـ حليم غلطان
كان المفروض تقسَى عليا..
وتعدل نص الأغنية.. 
وتقول وانت مشاور ليا..
"ولا عمرَك كنت انت حبيبها" 
أنا اه مش أحسن من بعدِك
لكن أحسنلي ان انتي بعيد!
وان كنت اتخانت وانا معاكي
صعب اني اتخان وانا شخص وحيد! 
داين وتدان واهو ده العادي
نقطف في الورد عشان نهاديه للناس يدبل
تقطفنا الأيام بإيديها..
وفـ حالتي لاقيتك إنتي الإيد!
مبقاش ينفع تاني افتكرك
ولا ينفع اقول ذكرى وعَدِّت..
وانا نبرِة صوتي تبان باردة
في حد يبات في النار أيام.. يخرج مبلول؟
عجَلة أيامي يادوب كانت لسة هتمشي
أفتكرك تاني ألاقي ان الجنزير مفصول! 
مبقاش ينفع أبقى طبيعي فـ وسط ده كله
ومافيش ولا حاجة عملتيها تخليني اغفر..
صعب ان القاتل يتصالح ويَّا المقتول!
خليني انساكي..
ويبقى أخدتي ثواب انِّك خرَّجتي سجين
واديني ضمان زي الشركات..
إنِّك ماتجيش تاني فـ بالي
واني ارجع اعيش زي عوايدي
وان كان الحل..
مقايضة شئ قدَّام الشئ..
فكَّري فيها.. 
خليني انساكي ويبقى عملتي جِميل فيَّا
وانا وعد أسيبك مرتاحة فـ قبر قصايدي!

١٨ يوليو ٢٠٢٠

ألف و ١٠٠ يوم - محمد عصام

قصيدة / شارع الوحدة - مصطفى ناصر

هندسة صوتية: أحمد سعيد بكير
https://www.facebook.com/ahmedsaid14
الكلمات:
شافني من بعد الفراق..
مكسور..
زي اللي واقع من حداشر دور..
على قلبُه
وجسمُه سليم
حزين..
زي اللي جاتله الأزمَة في الصحرا
ملقاش إيدين 
قلقان..
زيي في وقت ما يبقى بيننا معاد
واخاف ماتجيش..
تعايرني كل العقارب وقت تأخيرِك
وحيد..
ومش علشان لوحدي
علشان مكانش مشاركني حد في روحي.. غيرِك
تايه..
زي بعد ما غيبتي ونسيت اسألِك..
أستنى ولا امشي؟
ساعتها بس عرِفت تأثيرِك!
في حاجة فيا كل ما اقتلها
تيجي عينيها في ذكرى تحييها
قولتلها اقابلِك صدفة.. ترتبكي
ودي فرصَة ممكن ارجَّعِك فيها!
سألِتني عن معنى الألم؟
-بصيت لها وسكِت
سألِتني عن معنى الأمل؟
-بصيت لها وضحكت
سألِتني عنِّي؟
-بصيت لها!
وفِضِلت اراقِب كل شئ فيها
كإني آخر مرَّة هقابلها
بعديها قولت:
"لو عيني غِفْلِت.. قلبي هيعاكسِك"
قالتلي: "روحَك جميلَة"
قولتها: "مغرورَة..
بتمدحي في نفسِك!"
انتي اللي ممكن تحسمي الموقف
وانتي اللي عارفَة حنيني وعلاجُه
مِشْيِت.. كإنِّي بمشي وياها
مشلول وسابُه الكرسي.. محتاجه
ساعتها كنتي واثقَة في قرارِك
إزاي تقولي بحبَّك وانتي مترددة؟
وتودَّعيني الليلة ب ثبات واندفاع
إيه اللي أصدَق من عينيكي لو قالِت "بحبَّك"
غير عينيكي وهي بتقولِّي "الوداع"!
لو جينا قيسنا حنيني وحنينِك
قد الفروق فيما بين..
السنتي والكيلو
الغربَة برَّة البلد.. والوقفة برة البيت
الوقفة جوَّة الغريق..
والقعدة فوق الشط
عياطي مرة وحيدة..
وعياطِك الغالب
لو جينا قيسنا حنيني وحنينِك
يشبِه حنيني بس بالسالِب!
وتعالي نتبادل...
قلبك وقلبي والزمن يرجَع
وابعِد واسيبِك والسبب "مجهول"
شوفي ساعتها الجرح يبقى ازاي؟
وهتفهمي دلوقتي..
ليه مقتول!
أنا كنت وحيد..
بعدين جيتي
ومشيتي.. رجعت وحيد أكتر
بفقِد يومياً أي سبب بيه ممكن اعيش
واكسب يوميا حزن اكبر
تعايرني ب بُعدِك كل الأشياء حواليا
من بعد ما طَلَّعت لساني..
للدنيا بحالها عشان جنبِك
ترميني الذكرى ل ذكرى أحَنّ.. تفَكَّرني
تفتح صِدري وتاخد قلبِك..
ومعانداني
فكَّرت اِنِّك..
حقي اللي الدنيا اديتهولي ومتشال ليا
وطلعتي سلَف.. حبَّة ويترد
هل ينفع أستِلفِك تاني؟
كنت عارف..
طرق كتير للإنتحار
وفي يوم ما غيبتي..
خلِّيتي قلبي.. ينتحر بالغصب
وعرفت ترجمة الوداع في العين
وسحب الروح مع الإيد في السلام
كان في كلام جوَّايا كان لازم أقوله
بس تأثير الغياب.. خلِّاني أخرس!
ويأسي نسَّاني الكلام
من بعدها..
مافيش منديل مسكته الا..
وبتخَيِّل عليه ذكرى
يجوز روچِك
يجوز دمعِك
يجوز كحلِك
كلام لما فارقتيني
١٠ مناديل مافيش فيهم..
واحد فاضي
عشان امسح دموع عيني!
مكانتش أول مرَّة افارِق..
بس اول مرَّة اعيَّط!
مكانتش أول مرَّة تمشي..
بس أول مرَّة تِمشي!
كنتي جنبي وانتي مش جنبي
واللي كان قلبي.. ماهوش فيا
مش عوايدي أعيشها من غيرِك
مش عوايدِك تبقِي مش ليا!
اللي قالك تمشي كان قلبك
واللي تَبِّت فيكي كان عيني
مدِّي عينِك هتلاقيني هناك
سيبي قلبِك هتلاقيني هنا
واربي بابِك هَوحَشِك.. تيجي
راجعَة ليا وفْ إيديكي "أنا"
تاخدي مني شوقي وحنيني 
ليه بتمشي لما اقول " لأَّه"
واما اقول انا همشي.. بتصُدِّي
ليه وليه ؟.. ب إجابة ممسوحَة
إنتي فين؟..
مش كنتي بتردي!
كل شئ في الدنيا مش عاوز رجوعنا
وانتي كنتي كل شئ
والأماكن حتى رافضَة نروحها تاني
إلا لو كان كل واحد..
ناوي يبقى يروح لوحدُه
والأغاني..
مِنْها كام كوبليه.. معاكي
وكل شئ ناقص كتير.. زي الأغاني
كات بتوجَع قلبي ثانية..
لو مقَضِّيتهاش معاكي
شوفي وَجَعِت قلبي كام مرة الثواني!
كل حاجة عليها ريحِة البُعد بيننا
زي ختم برفض تأشيرِة سفر
أو نهايِة كل حلم مابوصَلوش
وكإننا في إنترفيو لـ علاقة ناجحة
بس قالوا ماينفعوش!
كل شئ في الدنيا مش عاوز رجوعنا
تخيَّلي!
حتى القدر..
شل القدر إيدي في فراقنا عشان..
لو جيت حضنتك هقنعك تفضلي!
دلوقتي وانتي بتبعدي عنِّي
مع كل خطوَة حاجات كتير هتموت
خطوَة!
مسكِة إيديكي واحنا بنعَدِّي الطريق
خطوَة!
كلمِة بحِبِّك بعد أي خصام بريئ
خطوة!
فرحِة عينيا لما بتشوفِك
خطوة!
كل شئ بقا حلو فيا
خطوَة!
والشعور بالراحَة وبطعم الحياة
خطوَة!
أثر الحاجات الحلوة طول الوقت
خطوة!
وانا برضو من ضمن الحاجات ديَّا
في خطوة هتخليني اموت دلوقت!

من بعد الفراق - محمد عصام

الساعة ماشية بسرعة بتخمك
و اليوم بيخلص بعد كام ثانية
العمر أسوأ فترة من عمرك
و الدنيا أسوا حاجة في الدنيا 
و اليأس أرحم من امل وسواس
روحك جواري و الزمن نخاس
ولا عدت قادر تتسند وحدك

ولا عدت قادر تتسند ع الناس 
و احتاجت ايد ممدودة بتطبطب
و عبنبن تشوف اللي في عينيك جوة
و احتاجت ودن بتسمع الشكوى
فلقيت لسان بيسمعك هو 
وحدك لوحدك غير وحيد بينهم
الم عَرض اهون كتير م الداء
فرّق ما بين الاكتئاب و الحزن 
الحزن شيء و الاكتئاب أشياء
و انا مش حزين انا مكتئب دايما
انا نص عمري ف السرير نايم 
نظرا لان مفيش لقا دايم
نظرا لان الفرقة في الاخر
مابقتش عايز حد يشتقالي
ببعد مسافة كبيرة و أتأخر 
و الهم صمم بردو يلزقلي
الدنيا عاملة عقلها بعقلي
و الزحمة موت و الانعزال قاتل
و الحق باطل لسه بيكابر 
انا قلبي عابر و المساكن هو
مع اني طيب بس ليا عدو
نظراً لإني بصدّق الاشكال
و ماعادش عندي قدرة ع التمييز
نظراً لأني ماعادش عندي عزيز
فبقيت لوحدي أغلب الاوقات
و بقيت حمامة و مستكين ف العش
مؤمن بعجزي فبكتفي بمعلش
تايه مشوّش منتظر فرقان
نضارة تلحق نظري ليسافر 
انا كل املي اني اعيش في سلام
او اموت ولكن مايقولوش كافر
انا كفّي اضعف من حديد سجّان
فبقيت مسالم ملتزم خاضع
و السِلم رادع للي شاف الحرب 
انا جسمي ازرق من آثار الضرب
و الدرب أضيَق من محيط صدري
فبكُح ناس علشان افوت و اجري
و اوصل في اسرع وقت للاخر
انا كنت سكر و الجميع داقني
و الدنيا خضة و شيبت دقني
و شافتني بجري عليها زقتني
و انا كنت جاي احضنها صدّقني 
العمر سلّم لمبته بترعش
و انا نظري اصلا في الطبيعي ضعيف
الحبكة سكّا و السيناريو سخيف
و القفلة واحدة و البقاء لله
انا بس شايل هم حزن امي
و الدمع يخرج برا باب عيلتي
انا ضيف خفيف ع الدنيا يا دنيا
فرجاء اخير ماتقّليش شيلتي

#هاني_خليفة

اكتئاب - هاني خليفة من حفل ساقية الصاوي أكتوبر ٢٠١٩

من وحي احمد حلمي | محمد العواوني

سنموت بعد قليل

انا مش شجاع
انا بس شوفت الحزن صيده
وانتي مش محور حياه
انتي مفتاح القصيده
كل الحاجات الحلوه مابتفضلش
وانتي الحاجات الحلوه البعيده
ماتقلقيش
انا زي ما انا لسا قلبي مابيغنيش
عيني اللي كانت شيش بفتحها قبل الشمس
اتحولت تربه
جوايا شخص غريب
وانا قولتلك مره مابحبش الغُربه
لسا عصبي
لسا بسكر كل يوم بحاجات عاديه
زي عادتي وزي عادتك كل عيد
(كنت بطلع ع المقابر بعد ما اديكي العيديه)
مش دراما بس بردو الحزن حزن
في حاجات اهم م الشعر تتألف
بخاف م اللمضه احيانا
واحيانا بخاف م النور 
لكن عمري ماشوفت الضلمه بتخوف
انا مش بحرض حد إنه يعيش
كله الا ارتكاب الكبائر
مش جاي احرر ارض متاخده
انا جاي زائر
بس انتي قافله حدودك السافله
وفاتحه الطريق ل السنه القرأن
والاحترام والخشى
خلينا نخرج مره في مقابلة عشا
حاولي تشوفي الجزء اللي لسا مامتش
في تحت هذا القناع
قناع لشخص ما اقتنعش
لكن هزلك راسه لما قلبه اتكسف
إنتي مع الاخلاق والاسره والمصروف
وانا لسا لحد دلوقتي مع الاسف
قلمي اتقصف ناوليني قلم الكحل
هرسملك الشمس اللي طالعه بس بالاسود
هتشوفي قلبي وهو بالاسود
ف تقولي كتر الف خيره
وتقولي اشمعنى الاسود
ف ابصلك واضحك
(وانا عندي ايه غيره)
مابحبش الضلمه انا بس برتحلها
عشان جدعه
بتداري الخطيئه
ماتعرفش المهازل والوجع اللي نازل على قلبي الحقيقه
بس عارفه إنك بريئه
علي حجاب الوحيد اللي يعرف قد ايه انا كنت طيب
علي حجاب الوحيد اللي يعرف قد ايه الوضع اختلف
على حجاب الوحيد صاحبي
او علي حجاب الوحيد إسلام خلف
مش مهم
انا صاحب الكركبه والبيوت الهاديه
بشوفك ف الاغاني كتير
طب ليه الاغاني ما الشوارع لسا فاضيه
لسا فاضل ف القلوب توابيت
لسا فاضل ف الوجع رقصه
انزلي من فوق وقابليني
ضمي قلبي بشوق وضميني
عيب اعيط والبشر باصه
ياحبيبتي
عيني مش ناقصه
عايز اعيط بس انا خايف
عايز اعيط بس مش وقته
عايز اعيط بس مش عارف
عايز اعيط بس
بس
كان في حلول غير دي تقدر تفرقنا
كان في بحور غير دي تقدر تغرقنا
كان في عيدان كبريت كات خايفه تحرقنا
ف تنطفي هي ونبص ع اللمبه
كان في حاجات بينا بس انتي نسايها
طب افكرك بيها ولا انتي مش حابه
ايه العلاقه بين علاقه  وحرب
المفروض إن إحنا بنحب بعض
ف نبتسم ونضحك ونرقص ونخبي السلاح لحد مانبدء ضرب
صدقيني الحزن مش موضه
كنت شبهك بكره الاوضه
بس خفيت واحده واحده وموت
لما دوقت الراحه في الموته
مابخافش م الضلمه او بخاف اقول بخاف م الضلمه
كل دي احزان بتفضالنا
كل دي اصحاب بتكسرنا
كل دي علاقات بتخسرنا
كل دي وكسات متتاليه
صدقيني دموعي كات غاليه بس رخصت لما خدي اتبل
لو حلولك لسا مش نافعه بصي ليا هتلقي اخر حل
سيبي حبل الود ع الغارب
دقي طبل الحزن للغايب
واشتريلي من الحياه كرامات
قلبي مش فار للتجارب
روحي سوده وكلكم صدمات
صدقيني كل ما اكدبلك
واضحكيلي كل ما هقابلك
اشتريلي ورده م الشارع
وازرعيها ف قلبي او قلبك
واللي يحصد يدي للتاني
وكل واحد فينا ياخد دور
ولو نسيتي هفكرك تاني
انا مش بخاف م الضلمه قد ما بخاف اقعد ف النور

من وحي احمد حلمي | محمد العواوني

Mohamed Elawawny

Recent comments

Hend Gamal

Nada M Hashem

Amera Rabea

Nourhan Rabei Mohamed

Related tracks