ahmed elnajjar

احمد النجار - ديوان كاموفلاج

شِعر ..!

شعر

Ahmed alngar

عمار

آشعار

playlist

لو كنتى استنيتى شويه

لا تتعجَّب إنها إرادة الله :D

كلمات : محمد هشام رجب 
موسيقى : مش عارف الصراحه

---------------------------------------
و ماتحبّيش فـ يوم شاعر
هيبني البيت من الكلمات 
و عفشِك شعر متزوّق 
لا يوم هـ يفِن فـ المطبخ 
ولا للشقه هـ يروّق 
هيعمل للعتاب قافيه 
فـ يوم ماتكوني سايبه البيت 
يصالحِك بالكلام عادي 
ما بلنسبالُه أمر بسيط 
هيكدب كدب يتصدق 
هيلعَب بالمشاعر لعِب 
هيوعِد وعد متحقق 
يخلي السهل أصعب صعب 
مفلس صعب يغنيكي 
كلامو كتير ما بيكفِش 
غداكي هيبقى تفعيله 
و مرضِك بيه ما بيخفِش 
كلامُه بيسحِر الساحر 
يا ريت تنتبهي مـ الإدمان 
بيبقى بعيد أوي عنِك 
و بيبانلِك فـ كُل مكان 
هيكتِب فيكي شعر كتير
بنات غيرِك كتب فيهُم 
 ولو حبّاه عشان شاعر 
يا ريت أشعارُه تنسيهُم 
فـ يا تحبيه عشان حبِّك
يا إما بلاش تعيشي عذاب 
عشان الشعر من أصلُه 
مكوّن من كلام كدّاب  
-------------------------------------
My Page : https://www.facebook.com/MohamedHeshamRagab
Account : https://www.facebook.com/lllHlll
-----------------------------------
لو عجبَك " أعمل شير " و إدعم العمل :)

إدمان - محمد هشام رجب

رومانسية الموت 
كلمات و إلقاء : محمد هشام رجب 
موسيقى : موجه حاره 

و حشتني بجد جداً 
و حشتني ونفسي ترجع 
الدنيا معاكي حلوه 
و فـ بُعدِك شئ بيوجع 
أصل أنتي مش حبيبه 
أو بنت من البنات 
أنتي اللي عشان أضحّي 
و يقولوا عشانها مات 
أنتي اللي بتفهميني 
أنتي اللي بتحضنيني 
أنتي لو كُلُه سابني 
والله ماهتسيبيني 

Mohamed Account : https://www.facebook.com/lllHlll
Mohamed Page : https://www.facebook.com/MohamedHeshamRagab

وحشتني بجد جداً - محمد هشام رجب

أنا تايه - على باب الله 

كلمات و القاء : احمد النجار

أنا تايه - على باب الله - احمد النجار

قصيدة وأغنيه مسارح وسيما للشاعر أحمد النجار

الشاعر أحمد النجار و عمدان النور - مسارح وسيما

أحمد الطحان

مرمغت وشي ف التراب
و سبته تحت
و رفعت إيدي
_دا مش ابتهال_
دا الوضع اللي عايزينا عليه
ف عصر الاحتلال 
برفع إيديا للسما
و عينيا تحت
ياللي رسمت الملحمة
انهي الجدال
اثبت وجودك
فوق وشوش كل العيال
شيل التراب
و اعلن .. مثقال ذرة من وجود
.. مثقال
..
_حبيبتي من ضفايرها
طل الرصاص
و بين شفايفها
دم البنات
ضحكتها عهر
ف عيون الغفر
و حنانها ف الزنازين
حبس احتياط
حبيبتي بتعلمني
إني أنحني
من حبي فيها
حياتي كفر و هروب
و الحب ف الدنيادي
زاد الطغاه
لولاه مكانش الخزي عشش قلوب
يا توهة يا بلدنا .. من غير دليل
ف حبك انتي سكنا ليل ف شقوق
لو الزمن ليل .. يزورنا القتيل
نظرة عينيه تقتلنا شوق
للضلمة قلب كبير بينشع سواد
و عجز و إهانة و كفر و غليل
الموت و الاستشهاد عشانها حياد
و صمت دايم ف ضحكة التماثيل

***

أنا مش هناك 
بس إنتي بردوا مش هنا 
معنى الهزيمة بيختلف من وسطنا 
مش بلزمك
كل التجارب و الظروف و عقلي المريض .. هزموني
فلقيتني من غير قصد 
_و الله من غير قصد_
بهزمك 

***

"و أنا بلف أدور على ضحكتك ف وشوش الخلق
جعت                                                     
وقفت عند أول محل فول
و كلت
شوف يا أخي القذارة
رغم كل الحزن دا
لسا الغريزة بتنتصر ل روحها
ف ناكل
و ننام
و نقابل بنت حلوة ف نبتسم
و ننساك
رغم كل الحزن دا
بنكمل"                           
"فدا مين يا فوزي حبستك ف أوضة ضلمة
و أمك بتبكي تحن للضمة
كسيرة القلب
فدا دولة حاكمينها ولاد الكلب
فدا شعب
بيعرص بطبعه لأي حاكم مهما كانت ملته
فدا عواجيز على القهوة 
رغم إنها مش لاقية سرير ف المستشفى
بتدعي للحكومة و ل وزير الصحة
أحا
ما تنطق
قدا مين يلا
فدا ستات بيوت محيلتهمش غير الولولة
و العياط
و الفرجة على عهر لميس الحديدي و أماني الخياط
فدا دولة الظباط
فدا مستقبل ف عين عيال ف وشها الإحباط
و على ضهرها شنط المدرسة
كتب تقيلة بجهلها و كراسات
فدا مين يا فوزي
الشعب لما مش هيلاقي ياكل
هيبقى يخرج
يرموله كام لقمة .. ف يرجع        
و عمر العساكر الثكنات

***

أحمد النجّار

مين من دولا ، و مين من دولا ..
مين من دولا ، ومين من دول ..
لبِّس كل الشعب طاقية ..
لبِّس كل الناس أفارول ..
مين من دولا ، و مين من دول ..

أحمد الطحان 

ركّع كل الشعب ف قصرك 
شرّع شرّح قسّم مصرك
عكسر عصرك - عصرك عسكر
تصلب فوق بنادقها رسول
مين من دولا ، و مين من دول 

مزيج الشارع - أحمد الطحان ، أحمد النجار

الشاعر : محمد هشام رجب 
موسيقى الراحل : عمار الشريعي

أنا كويس و عادي و فل 
ماتتخضوش مالوش لزمه 
أكيد يعني أنا مش شئ 
هيعمل فـ الغياب أزمه 
أنا مش حاجه فـ عنيكوا 
أنا اللي بكدبكو مجروح 
دعيتو عليا أغيب ما أجي 
أديني فهمت عادي هروح 

Mohamed's Account : https://www.facebook.com/lllHlll
FB Page: https://www.facebook.com/MohamedHeshamRagab

Download from Nogomi : http://www.nogomistars.com/downloads.asp?ID=25352

أنا كويس - محمد هشام رجب

الوصايا العَشْر - أحمد النجّار

بلاد التراراللي- احمد النجار

آداء صوتي :

الفنانة : أمنية حسن
الفنان : محمد عادل 
الفنان : علي حدوتة
الفنان : محمد علي الدين
الفنان : سعد بتاع العود
الشاعر : أحمد الراوي 
الشاعر : عبدالله طنطاوي
العبدلله

الهندسة الصوتية :
م . خالد واكد
تم التسجيل بإستوديو Digital Sound

إخراج :

خالد المهدي

كاموفلاج
قريباً .. بمعرض القاهرة الدولي للكتاب 2015
يصدر عن دار دوّن للنشر و التوزيع
الغلاف .. للفنان : كريم آدم

الصفحة الرسمية للعبد لله 
https://www.facebook.com/NaGGaAaAaR
الصفحة الشخصية
https://www.facebook.com/NaGGaAaR

كاموفلاج - أحمد النجّار

عِشت راضي، ومُتّ راضي...
إمتى سَجِّلتي إعتراضي؟! 
هوّ لو عصفوري زقزق.. يعدموه ف ميدان يا قاضي؟!

خدت إيه م الفرْح غيرِك، خدتي إيه م الحُزن غيري - جيت أجيب فُستان فَرَحنا.. جبت لِك زنزانة ميري!!

قُلت كوني البيت وكُنتي.. كُنتي لي غربة ف بلادي..
قُلت أكون لِك بيت مَا كُنتِش.. كُنت لِك حَبس انفرادي..

قُلت:
إنتي...
ثم إنتي - ثم إنتي - ثم نفسي..
يوم ما قولتي: 
نفسي - نفسي 

كان ممكن اكون لِك ناس - بس انتي اختارتي الناس، وقفلتي ف وشي الباب - بالضبّة وبالترباس... 
كان ممكن اكون لِك خِلّ - يعشق ولا عُمره يكِلّ - بس انتي اختارتي الشمس، وأنا من أبناء الضِلّ..

صَعبان عليا قلوب - بيصدقوا المكتوب.. لو يقروا أشعارنا..
والشعر كدب ف كدب، واحنا كدبنا الكدب / صدقنا / قشعرنا!!

" التسجيل من حلقة الصحبجية في برنامج ممكن مع خيري رمضان "

عِشت راضي - كاموفلاج - أحمد النجّار

وحشتيني 
ولو كل اللي عارفينك قالولك اني مانفعكيش 
ولو كل اللي عارفينني قالولي بكره تنسيني 
وحشتيني 
ولو كل البشر قالوا ان انا عاصي 
واني غلطت ف حياتي غلط ياما 
ده واد تلفان وكل يومين معاه واحدة 
وحتى فلان زعل وياه عشان واحدة 
انا أصلا مانيش يوسف 
ولو زوجة العزيز همت 
وقالت هيت لك ياجميل 
يجوز راح اميل 
وممكن اضمها جهراً
يسيل من ضحكها نهراً 
تدوب الاغنيات ف النيل 
لكن مهما هاشوف وهاطوف ومهما قابلت ناس وظروف 
هتبقي لوحدك القشة اللي جيت علشان تنجيني 
وحشتيني
مافيش انسان مالوش ماضي 
مافيش راجل مالوش أخطاء 
لكن دايماً ف نقطة ضعف 
ونقطة ضعفي هي انتي 
وطول الوقت كنت باقول 
انا مابقتش عاوز شيء سواكي انتي 
باحس معاكي اني مسيح 
براءتك عاملة زي الريح 
بتكنس ف الغلط بهدوء
وبابقي ف ضحكتك سكران 
ومش عاوز لا انام ولا افوق 
وكان فيه حل والله 
وكان ممكن اكون بالوقت زوج صالح 
ماليش ف المسئولية ساعات 
ساعات طايش 
لكن بالوقت كان ممكن اكون احسن 
تسامحيني ف غلط فالت
وهاحلفلك بإني هاصلح العدلة التي مالت 
بلاش تمثيل عشان أصلاً 
صياعتي وفشلي من غيرهم
ماكانش يجوز تحبيني 
وحشتيني
ف كل مكان ف ذكرى معاكي متسابة 
ايديا ف ايدك الطفلة باعدي معاك ف الشارع 
ملامحك وانتي بتسمعي فيروز 
نهارك وانتي بتواجهيه بشاي بحليب 
وحكاياتك على صحابك 
فلانة بتكرهك جداً 
فلانة قالتلي ماتشوفيهوش 
كلام قولتيه وكان لازم 
ف وقت الجرح ماتقوليهوش 
اكيد دلوقتي بتقولي 
زمانه مولع الدنيا 
بيغلط كل يوم عادي 
خلاص فاكك بقا ومرتاح 
وانا والله ف قيودك 
كطير من كتر ما اتقيد 
طلعله جناح 
انا ف البعد متحاوط بطيف ريحتك 
ولسه لحد هذا الوقت فاكر شكل تسريحتك 
وتنهيدك 
وشكل الساعة علي ايدك 
طريقتك وانت بتغني 
بعيد عنك حياتي عذاب 
حياتك ايه بعيد عني 
يا دنيا عرفتها فجأة 
وارض لمستها بشويش 
يا أطهر من رقم فلكي 
ف عداد اسمه أكل العيش 
بتحكمي ليه على غيابي 
وف حضوري بتنسيني 
رفضتي ان انتي تتسابي 
وفجأة انتي اللي سيبتيني 
وحشتيني

وحشتيني

هند

طبطب على كتفي و غنّالي - يا أبو كف رقي ..
الدُنيا مَيتَم و جنازة ، و الكاس بيجٌرَك لـ إزازة ...
- جَوِّزني يا عم أحمد بنتَك ..
* طب "يبنى و دي تبقى جوازة !!

رفضوني يا صاحبي عشان جيبي - مليان إخرام ..
*أنا عايز شقة - يا حبيبي - بـ سِتّين حمام ..

كَتبولي الطلبات بسخافة - من أوضة النوم للشطافة - للنيش و الحاجة المتشافة ، و قالولي التنجيد دا عليا - إسم الله عليا و حواليا - مقدرتش أصلب رجليا ، و أنا أصلاً خام ..
لمؤاخذة يا حاجّة ، و طلباتك - تؤمُري يا مدام ..

* المهر أساتك و سبايك م الدهب الخالص ..
- يا حَلولّي ..
* و الشَقّة أقولك تفصيلاً ..
- لاء شكراً .. ماهو جوزك قالي - محسوبك لسّاه متخرّج ..
* و هتُخطُب ..
- لاء .. جاي أهرّج ..
* و المهنة ؟
- بيّاع متجول ..
* الواد دا حلانجي من الأول ..
- مُش عيب على سِنّك يا حمايا ، و نضارتك كعب الكوبّاية - تشتمني قبل ما أتضايف - أما إنتَ صحيح راجل هايف ..

أخدتني الحلوة البلكونة - و سقتني القهوة الموزونة - و إديتني بوسة على جبيني - و البوسة طلعت من عيني - رَوّقت رجِعنا على الصالة - إدوني كلمة رجّالة ؟ !!
ف أبوها قاللي .. طلباتي ؟
من غير الشبشب يا حماتي - بقى واد سنكوح زي حالاتي - هيجب لها شبكة بألوفات ؟!
اللعنة عليكوا يا حماوات ..

أنا ماشي و فيه كلمة ف زوري - مضطر أقولها يا جماعة ..
لو بنتك فُندق يا حمايا - أجّرلي الأوضة بالساعة

Ahmed El Naggar_احمد النجار "عريس الغفلة "

الفتحتين تنوين .. الكسرتين تنوين .. الضمتين تهوين ، و محتاجين شَدّة ...
و الشِدّة يوم و تزول - إن كان حبيبك غول .. إنده له صاغ أو صول .. هيشدُه كام شَدّة ...
القلب في التحقيق - بيعتّقوه تعتيق .. و الحُب أكتر شيء .. يحلو بالمُدّة ...
كُل أمّا عشقك طال .. كُل أمّا قلبك قال .. دين المحبة حلال .. مش كُفر و لا ردّة .

Ahmed El Naggar_احمد النجار"-كاموفلاج -الفتحتين تنوين"

هى- على خطا الحلاج-الشيخ والبحر 

اول لقانا .. حضن اللى راجعين م السفر..
على قد ما الشوق هدهم .. كان اللقا بنا..
يا حته م الجنه..
انا شايفك .. تفاح لبنان, وشفايفك .. قشر الرمان- محبوبه .. يا ام
الفستان- انا عاشق, وعيونى دليل ..
فضحونى.. غنيت عريان, قفشونى ..جابوا السلطان – كتفنى ..بفيونكه
ستان- على بابك .. زى المساطيل..
انا عارفك.. من قبل ما اشوفك, انا حافظك..من قبل ما اصم ,وحروفى
بتدوب ف حروفك , وكفوفى علطول بتضم..
غنيتك, ومانيش كروان – حبيتك .. من اول لمحه – ضميتك, والكون
غيران..ولقيتك .. راضيه ومسامحه..
لمحاونا .. عفاريت م الجان – حسدونا ..ف قريت قران – من حسنك تاب
الشيطان , بكا .. ادم ناوله المنديل ..
مش عودك .. العود دا كمان , وخدودك .. ريشه والوان – انفاسك.. اجمل
برفان – بيصحى .. اجدعها قتيل ..
راح اطولك .. لو فيها لومان , واتعلم عشق التفاصيل..

شعرك تسابيح- سبتيه للريح- اصبح اذكار...
"الله- الله- الله"
والصبح جريح- عمال بيصيح- على سقف الدار..
انا حى ف حى- انا حى ف حى – انا حى ف حى – ماليه الكفار..
" الله- الله- الله"
امام- بيسبح فوق خصلات شعرك تسعه وتسعين..
ويتم الميه على خدك..
بيفصل ملكوت ف خياله – يطلع بالمللى على قدك ..
الليل ملاك نازل عليه بالوحى, والوحى شعر , والشعر ف وجودك-
يربط حزام للشمس – ترقص على عودك..
بين الشجر والحجر – توهنا, ولا عارفين..
احنا اللى كنا الحجر, ولا الحجر احنا- يخضر ورق الشجر- تدبل
ملامحنا!
اول طلب بطلبه- ساعه ما احضر جن...
اديكى من عمرى , ومتكبريش فى السن.
انا وانتى – دنيا ودين
حبه قصايد.. قصايد- مارشيين على رجلين
بتحسدنا الشوارع – بالتراب ,ويحسدنا التراب – بالعين!
لو نشترى بعضنا – بتعيط الفتارين!!
رقيتك بالغنا مرات , وبالضحكه سبع مرات , رقيتك من ولاد وبنات-
من الحساد, وم الشياطين..
رقيتك من عيون الكون , من العاقل , وم المجنون, وم الحراس – وم
الفرعون , وم الاحرار , وم المساجين...
حصوه ف عيون الولى – ياللى انتى عشقك ورد...
حصوه ف عيون البشر, حصوه ف عيون القرد...
حصوه ف نورهم, حصوه ف عيون ليلهم...
حصوه ف عيون الناس ,وعيونى اولهم!

ياللى انتى نعمه ربنا – انتى البريئه الفاتنه, والمستحيله الممكنه – من 
نسل ادم زينا , ولا انتى مين؟
حور...
قلب اتخلق من نور!
ياواضعى الدستور – حبى مالهوش قوانين..
فى العشق لو مجاذيب...
ف انا اول المجانين.
ابين زين..
ابين زين...
واغنيلك بدال الغنوه – غنوايتين , وارقص بيكى, واصلى..
ولو زغلل عينيكى الشمس ..
اضمك- تمشى فى ضلى .

Ahmed El Naggar_احمد النجار -كاموفلاج- ياللى انتى نعمه ربنا

من شبه ميت...
للي يهمه الامر... 
(1)
متقولش مات الولد وهوه غمض شاف...
قول لما مات اتولد - كن التراب شفاف والدنيا بنت صغيرة
لكننا عواجيز...
الموت يجوز طيب - لكن ملوش عزيز ..
متقولش ل امى - انى مع الاموات...
امى دى لو تبكى - هتزلزل السماوات – خلى الملايكة يبلغوها بلين...
وبدل ما تبكى دموع - تضحك فتحى الطين..
(2)
بلغ سلامى للغريب القريب..
و القريب الغريب..
واليمام والحمام والهيمانين فى الفضا والعشمانين فى الزحام...
وان يسالوك عنى - قولهم سافر...
سافر بعيد مشدود - واقف على حيله الغربة مسكت عود – غنت تراتيله...
(3)
ما تتعشمش نتقابل – يجوز الجنة ما تساعناش..
يجوز كفة ميزان اعمالنا ما تطبش...
يجوز بنحب فى الجنة...
يجوز الجنة متحبش...
ما تتعشمش نتقابل – حاجات ياما..ما تضمنهاش...
قلوبنا لو تموت بيضا – ساعتها النا ما تلسعاش...
(4)
زرعى اليتيم...
كل اما بيشوف السما...بيخاف...
وهو اللى كان...
بيملى للشمس النهار – فتصدره للخلق...
الارض...
الارض امه للى مات وهى فيه في الطلق...
ومتنزلش دموع.. من يوم ما فاته ابوه...
زرعى اليتيم يا رفاق...
متبطلوش تسقوه...
عطشان يا ورد؟
اشرب..
رد بوجع: لاااا...
زهر البنفسج مات...
من حزنه على السقا...
(5) 
انا والحمام والبرج - من فترة – كنا صحاب...
لو واحد فين انجرح – كان كلنا نتصاب...
فرق ما بينا الزمن ومسبب الاسباب – طرحت قلوبنا اسات – 
واتفرفط اللبلاب...
فارضى بحكم القدر....
ارضى بحكم الاقدر – نارك تصير جنة...
واحد هينزل دم والتانى يتحنى...
(6)
اصلب على قبري – كل اللى عدوا ع السطور..ضحكوا..
وبلاش تطبطب ع البنات...بالحرف..
معظم بنات حوا – اضعف من الكلمة...
لو ناوي تمشى صحيح – سيب للبنات ذكرى – غير الجراح فى القلب...
لو صعب تفضل وفى!!
يبقى اشتريلهم "كلب"..
(7)
الشعر قلب اخضر راديو بلا تشويش..
واللى يقول الشعر – يلقى الدهب فى الخيش..
اياك...
اياك تكون مهنة...
وفر فتاوى الشيوخ...
ما اغنى الشعر فتوى وما كسب...
كلنا فى الاساس فاسدين – رغم اختلاف النسب...
(8)
متاولوش الشعر للارقام...
ومتسالوش الشعر...
ليه؟!!
وبكام؟!!
الشعر دنيا للي عايش فيه...
الشعر حلم المدمنين..احلام..
(9)
الوصية الاخيرة..
ليها وللناس..
انا اضعف من ورق التوت..
فبلاش تظنوا ف الفراق السوء..
كل الحكاية انى..
انى تعبت هنا..
فطلعت اجرب ف الحياة.. من فوق..
(10)
ادعولى بالرحمة.
ادعولى بالرحمة.

Ahmed El Naggar_احمد النجار "-كاموفلاج-الوصايا العشر"

كدب اللى قال..
العين..لا يمكن –تعلى على الحاجب..

محكمه...
سيدى القاضى-حضرات المستشارين
الاعتذار زى العزا..واجب
ناسف
احنا اللى راضيين بالعيوب-وياريته كان عاجب !
الدفاع؟
-حاضر..
الشهود؟
-حاضرين..
البسمه جوه القفص-زادت يا متهمين
س:.....
انتو مين؟
احنا المساجين-المتفائلين-ارباب الدوله واركانها..
السم الراشق ف بدننا,والعسل السايح ف بدنها..
مالناش ف الضرب,وف القسمه,وزوايا الميل..
الجيل الصايع-الضايع-ابو حلم قتيل..
على قد ما شاف احزان فيها,ولا باعها,ولاجرب خانها                                                                          
احنا المساجين-المتفائلين-ارباب الدوله واركانها,والسلع البايره ف ارضيها..
الزرع الميت بالصدفه-الحزن المتبعتر فيها.             
لمتنا كتير!!
فرحتنا كتير!!
اموات سايبن للسبوره-ضحك الطباشير.
النيابه تتفضل ...
نادى على الشاهد ...
الشاهد الاول
-تعرفيهم؟
ادينى فرصه..امعن التفكير..
-فكرت؟
مين اللى قال ان القلم – اصبح اداه تفجير!!
-اكفرت بالدوله؟
بالعكس..امنت بالتغيير.
الدفاع..(صوت جماعى)
زاد البكا-غنيت,وبنيتف ارضك بيت-على قد ما كرهتينى-على قد ما حبيت!
بعد المداوله..
والمقاوله..
تاكد لهئيه المحكمه-ان الحروف الغام!
لذا...قررت المحكمه حضوريا- الحكم بالاعدام!!

رفعت الجلسه.

Ahmed El Naggar_احمد النجار"كاموفلاج - المحاكمة"


زي مج كاكاو قديم على رف بارد م الرخام 
زي سرب من الحمام فقد الديار 
زي المطر ف ازاز فيميه 
أو زي سهم بينطلق ناحية هدف 
ماعرِفْش هو اللي اتحدف 
ولا بإرادته اختار مابين أحلام بديلة 
زي باندا ،،،
أو أقل قليلا
ابدأ نهاري بضحكتي لله 
واحشد مشاعري كلها للفرح 
أمسك واتبّت ف اللي لسه معاه
واعمل كإني قد شُفيت م الجرح
أختار مابين لبسي اللي يناسبني 
واحط سهواً ف الجيوب ذكرى 
أمي بتغسل كل شيء جوه الجاكت 
عشرين جنيه مادفعتهاش ولا خدت بالي منها 
وَصلْ الايجار ، كارت شحن قديم خدشته ومارميتوش 
لكنها ،،،
بتنسى دايماً إنها 
تغسل ريحتها م القماش 
لو هي كانت دوّرت ، كانت هتلقى ف الجيوب أغنيتي 
هتلاقي بنت ف جيب قصاد القلب 
طلقة رصاص أثر الفراق المشترك 
بس احتراماً للشَرَك 
كان لازم أمي تسيبها للذكرى 
وتسيب لبكره ذكرى مانسيتهاش
زي باندا ،، 
كل شيء ليها انقرض 
إلا السجاير .. والمرض .. بالبرد والخوف والزحام 
باصحى وانام 
وكإني دوبلير حد تاني بالتمام 
وكإني باصحى عشان انام 
زي باندا بامُر وحدي ف الشوارع
باسمع موسيقى تردني ليها 
واهرب إليها تردني ليا 
كلمت صاحبي الصبح وعزمته 
" صاحبي اللي فاضل ف الحاجات الملح " 
اقسم معاه دخان سجاير ربما 
يعمل سما واعمل مراكب من ورق 
احكيله عن عمر اتسرق 
يشتمني بيا وبالوجع 
" لساك وسخ ، انا كلب أصلا اني جيت .. مانا كنت قاعد باشا مبسوط ف الكافيه ، رديت عليك علشان تنكد ع اللي جابني بشكوتك ؟ اشرب يا زفت ف قهوتك وتعالى نعمل شيء جديد " 
صاحبي اللي فاضل ف الوريد 
ظهر النهاردة ف صورة الدم بكثافة 
ضحك الطبيب وكتبلي حقنة مسكنة 
أنا ليا مين غير الصحاب والأمكنة ؟!
رتب صحابك ع الورق حسب الوجود وقت الألم 
واعمل خطوط تحت اللي فاضل منهم 
تحت اللي لسه بيفهمك ويكلمك 
تحت اللي لما بتنسى هو يفكرك 
تحت اللي غاوي يقدرك 
وان كنت عاجز .. يحضنك ككمنجة قابلت لحنها 
يولع كلامكم جنب حاجة بحبها 
انا كل ما اجي وافُك جسمي واعلقه 
ما قابلش جزء بصدقه الا الكفوف ف الضهر 
الا الضوافر وقت حضن مابعد شوق 
وكإني غيمة ومطرت على فوق 
وكإني باندا كل شيء ليها انقرض ولا زلت عايش لجل اكون عبره 
بما اني خبره ف أغنيات فيروز 
ولإني جداً أو لإني يجوز 
ولإني فعلاً م الفراق ادمنت 
أنا خُنت نفسي لما كنت اتخَنْت 
وحرقت بنزين رحلتي على ايه ؟
واحدة ف يناير ماشية ف الشارع 
خليتني ليه بصتلها 
ركبت ناس مركبتي ليه ؟ 
الكل عامل نفسه نوح ورماني وحدي للطوفان 
طيب عبيط صدقتهم من امتى كان الموج ضمان ؟؟
هو انتوا مين ؟
ومليتوا ليه كل الصور لما انتوا هتبيعوا ببلاش 
الكادر صادق ناحيتي والغلطة جاية من الفلاش 
هو انتوا مين ؟؟ وانا ليه حزين على ترككم ؟؟
انا ليه لقيتني باحبكم 
أو ليه لقيتكم م الاساس !
أنا باندا تعبت م الخسارة المفرطة 
بدلّت كل الراحلين بأغاني كانت زيهم 
القهوة فن اللاشفاء من حُب خلق كرهتهم
والروج بتاع البنت لساه ع الجاكت 
غنيت وصوتي ف المدى لاصوت :
خماره جسمك ضحكتك بيره 
يا اللي انتي ذكرى صغيّرة كبيرة 
مريّت عليكي كرسي مش مليان 
وشربت فنجانك يا ست الأوليا
كان السحاب القطن ممزوج بالنزيف 
سمّوه غروب وطاوعتهم ف التسمية 
وانا من ساعتها اتنين ف واحد باشربك 
باستغربك ...
ولقيتني باندا مهددة بالانقراض 
على افتراض انك بجد على افتراض 
وعلى افتراض اني بجد 
مابقيتش بتفائل بحد 
مابقيتش بتقرّب لحد 
عايش مجرد تكملة لشريط قديم 
مستني باندا ف عصر ما 
تؤمن بتوزيع الحياة 
وتكون كمثلي مهددة بالانقراض 
نقسم سوا الفنجان ف دهشة من البشر
دبّين ف عالم خالي الا من حجر 
وساعتها يمكن تبتسم فيروز 
والقهوة تبقى قهوتين بالوقت 
أنا كنت باندا بس صرت تمام 
أو هابقى باندا بس مش دلوقت .

باندا

جوابي ده الأخير ليكي 
يامعاليكي 
ياست الحسن 
ياسبب الحزن والعلة 
ياشجرة حسبتها ضله وطلعت نار 
بداية القول : مساء الفل ع الأزهار على خدودك 
مابنجرّحش 
ومابنسمحش حد يقول كلام عنك 
لذلك ثم أما بعد ،
أنا الطفل اللي كان ف عنيكي متشعبط 
يشوفك روحه تتلخبط 
وقلبه ابن الحرام يضعف ويستعبط 
كإنك زار وانا الدرويش
كإنك غار وانا الحرافيش 
كإنك كنتي قرش حشيش 
دخل رئتيني وملاني 
كإنك دار وانا اللي ماليش 
سوا الدار اللي لمّاني 
بغض الجرح مين خان مين 
ومين قصّر مع التاني 
وغض الطرفْ عن اسمك 
وطعم خروجه ف لساني 
أنا مليّت من القصة ومن لعبة خلاص لسه 
لقيتك غيمة ف حياتي حسبتك مطره قمت جريت 
وفجأة لقيت مفيش غير ليل 
سحابة ضلمة كنتي انتي
اشوفك ف الوجع بنتي 
واحسك ارضي وسفينتي 
وشمس بتملا ليلي شروق 
مافيش كام يوم لقيتني بافوق 
واشوف القاتل الفعلي 
لقيتك أرض ماتضمش سوى المطاريد 
وانا عيل بيفتح إيد يشوفك خط على كفه 
عنيا عيال اذا بصيتي يتدّفوا 
حسبتك أم بتدوّر رحى الأحضان على عيالها
لقيتك ماسكة كاتم صوت 
رصاصك فات وجع جواي
وهو ياحلوة يعني الموت
بيفرق شكله كان ازاي 
وهو الجرح للستات ومش لينا ؟ 
ما فيه رجالة بتعيّط 
وفيه رجالة بتفكّر ف عز الليل ف ناس باعوا 
وفيه راجل اذا فات ف المحيط وجعه مابيساعه
وفيه عناوين بتتلخبط 
وفيه بكره بيتشخبط 
وفيه أطفال مايتولدوش ف مستقبل ماجاش قدام 
وفيه زفة مابتقومشي 
وفيه فرحة مابتدومشي
وفيه نغزة ف صميم الروح 
ما دام ف القصة فيه دابح 
أكيد ف القصة فيه مدبوح 
ولو كان القتيل راجل 
ف دمه بيبقي مش بالسهل 
خسرتي معاه وجود الأهل 
خسرتي الضهر والضمه 
خسرتي الجمع واللمة 
وبكره هتندمي لما 
تحسي البرد من دونه 
ياريتك شوفتي ف عيونه دموع الأب 
أنا الشخص اللي كله ذنوب
لكن مليان حاجات تتحب 
ــــــــــــــــــــــــــــــــــ
عملت حاجات لأول مرة بعملها 
وكِملِت أغنيات بيكي 
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب 
عكستي المشهد المكتوب
ماكانش الفيلم دي نهايته 
كده الكاتب لعب ف النص
وفيه لزق ف حياتي وقص 
وفيه تركيب لناس تانية 
فيه مشهد خارجي مش محطوط 
أنا وانتي 
ومطرة بتغسل الشارع من الاحزان 
حضنتيني زمان ومكان 
وقولتيلي مافيش غيرك 
نزلت ف لحظة على ركبي وانا ف ايديا كام وردة 
ضحكتيلي 
وطبطبتيلي علي خدي 
كانك كنتي بتعدي على قلبي بروح حافية 
مسكت الدمعه بالعافيه وضميتك ف عز البرد 
لقيتني الفيلم بالكامل مافيش ولا لقطة ماسك ورد 
طلع فيه حاجات بتتصور 
بتتقصقص من المونتاج
وأول ما المطر لمسك 
لقيتك دوبتي ف المكياج 
عروسة حلاوة أو صورة 
ملامح فازة مكسورة ف اخر جزء ف الذكرى 
خسارة تكمّلي بكره 
يا نور ساطع بيعمي العين ما بينوّرش
انا هافضل كده عيّل ومابيكبرش 
وبكره يجوز تقابليني ف أي مكان 
هاشوفك وقتها دخان 
بقوة ست هاعشقها ف زمان تاني 
ولمسة طفل يشبهني مايشبهكيش 
انا جوايا كام ميّت وحابب اعيش
لا هاتحوّل 
ولا هارجع من الأول 
ولا هاكتب عشانك شعر 
هبيعك دون نظر للسعر 
مكانك وردة ماسقيتهاش ف دبلت من خريف موجوع 
دموعي رصيد باحوش فيه لناس مستاهلة مني دموع 
وحلمي معاكي م الأول 
خطيئة لابد اكفّرها 
رميتك طفل ببراءته 
ندم على حاجة وكسرها 
يا أسوأ حلو كان فيّا
يا أطيب شر ف النية 
كسبت حاجات تسيء ليا 
وجه الوقت اللي انا اخسرها . 

كمان : بدر مصطفى
ناي : محمد مصطفي
ايقاعات : كريم صلاح 
كيبورد : صهيب النجار
تسجيل : من حفل الساقية اكتوبر 
رؤية موسيقية الفنان محمد مصطفي 

جوابي الأخير - من حفلة الساقية 2015

الشيخ إمام - أنا أتوب عن حبك Cheikh Imam

حاجات بسيطة - سلمى صباحي

تفرانيل مصطفى ابراهيم

و حبيتك طفولة عيد..

كلمات: ابراهيم عبد الفتاح، ألحان: عطيه محمود، توزيع احمد مصطفي.

وحبيتك- علي الحجار

حين يهدى الصبح اشراق سناه
حين يهدى الصبح اشراق سناه
يسكب الطل
يسكب الطل 
يسكب الطل رحيقا من نداه
موقظا بالنور اجفان الحياة
موقظا بالنور اجفان الحياة
الضحى من نور من؟
الله
والندى من فيض من؟
الله
الضحى من نور من ؟
الله
والندى من فيض من؟
الله
سبحت لله فى العش الطيور
ترسل الانغام عطرا فى الزهور
سبحت لله فى العش الطيور
ترسل الالحان عطرا فى الزهور
تصنع العش وتسعى فى البكور
تصنع العش وتسعى فى البكور
عيشها فى رزق من؟
الله 
وهى ايضا صنع من؟
الله
عيشها فى رزق من ؟؟
الله
وهى ايضا صنع من؟؟
الله

Ahmed El Naggar_احمد النجار -كاموفلاج- ياللى انتى نعمه ربنا

Mohamed Elsayed 88