من شبه ميت...
للي يهمه الامر... 
(1)
متقولش مات الولد وهوه غمض شاف...
قول لما مات اتولد - كن التراب شفاف والدنيا بنت صغيرة
لكننا عواجيز...
الموت يجوز طيب - لكن ملوش عزيز ..
متقولش ل امى - انى مع الاموات...
امى دى لو تبكى - هتزلزل السماوات – خلى الملايكة يبلغوها بلين...
وبدل ما تبكى دموع - تضحك فتحى الطين..
(2)
بلغ سلامى للغريب القريب..
و القريب الغريب..
واليمام والحمام والهيمانين فى الفضا والعشمانين فى الزحام...
وان يسالوك عنى - قولهم سافر...
سافر بعيد مشدود - واقف على حيله الغربة مسكت عود – غنت تراتيله...
(3)
ما تتعشمش نتقابل – يجوز الجنة ما تساعناش..
يجوز كفة ميزان اعمالنا ما تطبش...
يجوز بنحب فى الجنة...
يجوز الجنة متحبش...
ما تتعشمش نتقابل – حاجات ياما..ما تضمنهاش...
قلوبنا لو تموت بيضا – ساعتها النا ما تلسعاش...
(4)
زرعى اليتيم...
كل اما بيشوف السما...بيخاف...
وهو اللى كان...
بيملى للشمس النهار – فتصدره للخلق...
الارض...
الارض امه للى مات وهى فيه في الطلق...
ومتنزلش دموع.. من يوم ما فاته ابوه...
زرعى اليتيم يا رفاق...
متبطلوش تسقوه...
عطشان يا ورد؟
اشرب..
رد بوجع: لاااا...
زهر البنفسج مات...
من حزنه على السقا...
(5) 
انا والحمام والبرج - من فترة – كنا صحاب...
لو واحد فين انجرح – كان كلنا نتصاب...
فرق ما بينا الزمن ومسبب الاسباب – طرحت قلوبنا اسات – 
واتفرفط اللبلاب...
فارضى بحكم القدر....
ارضى بحكم الاقدر – نارك تصير جنة...
واحد هينزل دم والتانى يتحنى...
(6)
اصلب على قبري – كل اللى عدوا ع السطور..ضحكوا..
وبلاش تطبطب ع البنات...بالحرف..
معظم بنات حوا – اضعف من الكلمة...
لو ناوي تمشى صحيح – سيب للبنات ذكرى – غير الجراح فى القلب...
لو صعب تفضل وفى!!
يبقى اشتريلهم "كلب"..
(7)
الشعر قلب اخضر راديو بلا تشويش..
واللى يقول الشعر – يلقى الدهب فى الخيش..
اياك...
اياك تكون مهنة...
وفر فتاوى الشيوخ...
ما اغنى الشعر فتوى وما كسب...
كلنا فى الاساس فاسدين – رغم اختلاف النسب...
(8)
متاولوش الشعر للارقام...
ومتسالوش الشعر...
ليه؟!!
وبكام؟!!
الشعر دنيا للي عايش فيه...
الشعر حلم المدمنين..احلام..
(9)
الوصية الاخيرة..
ليها وللناس..
انا اضعف من ورق التوت..
فبلاش تظنوا ف الفراق السوء..
كل الحكاية انى..
انى تعبت هنا..
فطلعت اجرب ف الحياة.. من فوق..
(10)
ادعولى بالرحمة.
ادعولى بالرحمة.

Ahmed El Naggar_احمد النجار "-كاموفلاج-الوصايا العشر"

كن حيث الغناء ،، فالاشرار لايغنون وكذلك لايعرفون العزف والموسيقى


” فى البدء كانت الموسيقى ”

Ahmed El Naggar_احمد النجار "-كاموفلاج-الوصايا العشر"

Mohamed Elsayed 88