ايه يخاف منه اللي خسران كل شيء

وبطول خساير من مكاني بدون ما اشب❤️

حتى لو غيري اللي وصله ياسطى

حربف ولكن ف الخساره الله♥️

كل يوم معرفش هبقى بدوس خطاوي 
ولا حاجة أنا نفسي فيها ...

عمري ما مشيت في الطريق وعرفت اخره 
بجري دايماً للنهاية والنهاية تجري مني 
والطريق مشكوك في أصله..

كلمات: محمد عصام
https://www.facebook.com/M7mdess16?mibextid=ZbWKwL
موسيقى وهندسة صوتية: يوسف محمد
https://www.facebook.com/yousefdark960?mibextid=ZbWKwL

الكلمات:

"هلعب مع الخسران يا رزق"
الفوز له ناسه
واحنا يبقالنا الخسارة وأولى بيها
كل يوم ماعرفش هبقى..
بدوس خطاوي..
ولا حاجة انا نفسي فيها
بدوس وزي ما تيجي.. تيجي
بدون ما اخاف اخسر حاجات
إيه يخاف منُّه اللي خسران كل شئ!!
إيه هيفرق شرخ في البيت اللي مهدوم من زمان!
إيه يهز الدمعة في عيون اللي مفطور م العياط!!
اللي زيي..
يقلقه الفوز واللي ممكن ييجي بعدُه
ودماغه لو سقف الطموح مش تحت رجله
وعينيه إذا بَصِّت لحاجة بعيدة عنها
والعشم في الحاجة لو هيعدِّي حَدُّه
مش من الناس اللي تمشي طرق صحيحة
أو تدوس خطوات مريحة
عمري ما مشيت في الطريق وعرفت اخره
بجري دايما للنهاية والنهاية بتجري مِنِّي
والطريق مشكوك في أصله
نفسي اشوف خط النهاية
حتى لو كان من بعيد..
حتى لو غيري اللي وصَلُه!!
بسعى طول الوقت.. ماعرفش الوصول 
ولا بعرف انول
والدنيا بيني وبينها شئ غير القبول!
عمري ما اختارت الحاجات..
غير واختارتني حاجات بدالها
دايما اللي مابين قوسين..
مش شبهي..
ولا زي امَّا احب
وباشِب مش طايل حاجات كان نفسي فيها
وبطول خساير من مكاني بدون ما اشب
شاطر في بذل الجهد صح..
في السكة الغلط
في السكة اللي مافيهاش أي حظ
والدنيا فيها حاجات أهم من الشطارة
حريف في خلق الفرصة وتضيع من إيديا
مش بكسب ف شئ
حريف ولكن..
في الخسارة

١٠ سبتمبر ٢٠٢٢

هلعب مع الخسران يا رزق - محمد عصام


كلمات: محمد عصام
https://www.facebook.com/M7mdess16?mibextid=ZbWKwL
موسيقى وهندسة صوتية: يوسف محمد
https://www.facebook.com/yousefdark960?mibextid=ZbWKwL

الكلمات:
في حاجات ماتنفعش قفش..
زي تبطيل السجاير
ونسيانها
زي العياط من بعد نُضج..
على الحاجات اللي كان لازم..
ماتتأثَّرش علشانها
والوداع لو لسَّة في حلول متقالتش
الوقوع في الشر
والوقوع م الخير
الخروج من دايرة الناس الأهم
والدخول في علاقة قبل ما تستخير
شرح الحقيقة لـ الشخص الأصم
الحكم قبل ما تظهر الصورة
اللقطَة قبل ما تعدل الصورة
والكلام كله..
حتى لو ما قل ودل
المشي في الطرق اللي بتبان الأكيدة
نهاية الفيلم
ونهاية القصيدة
وحاجات ماتنفعش بالتدريج.. 
الحضن في الوقت اللي ماسك فيه نفسك
والسب في الشخص اللي كاتم على نفَسَك
والوداع لو كان في واحد بس باقي
العياط في السر
العياط في الموت
الشكوة لو واصل لـ يأس من السكوت
الوقوف في الشدة جنب اللي فاضل
والإعتراف بالجَميل
والإعتراف بالجِميل
وحاجات ماتنفعش الوسط.. 
زيي!
وحاجات خسارتها مكسب
وحاجات ماتنفعش يتقال عنَّها بناقص
وحاجات ماتنفعش تبقى متعلَّقة
وحاجات ماتنفعش تستنَّى مكانها
وحاجات ماتنفعش تبقى للتجربة
وحاجات ماتنفعش من قبل أوانها
وحاجات ماتنفعش!

حاجات ماتنفعش - محمد عصام

هندسة صوتية: احمد سعيد بكير

https://www.facebook.com/ahmedsaid14?mibextid=LQQJ4d

كلمات: محمد عصام

https://www.facebook.com/M7mdess16?mibextid=LQQJ4d
 
الكلمات:

مش كنا خلصنا من السيرة!!
في إيه تاني!؟
قال وانا فَكَّرت الجرح فـ قلبي عالجته ولمّ
وان انا دلوقتي بقيت أحسن
بقا انام وانا فاكر نفسي نسيت..
أصحى والاقي..
جرحِك في القلب منقَّط دم!!
بقا كلمة في كلمة تفكرني!! 
أو تفتح باب قلبي على الريح..
من بعد ما كنت شهور سَدُّه
إبيَضِّت عين يعقوب م الحزن.. ارتد بصير
وانا قلبي اِسوَدّ من الأحزان..
مين هيردُّه؟
هتشوفي الناس عمارات حَيَّة..
بيخش ويخرُج ناس منهم
تلاقيني مابينهم بيت مهدوم!!
فكَّري بمحايدة ده مين هَدُّه!؟
بقا بعد ما كنت..
لا فاكر إمتى بقينا سوا
ولا فاكر يطلع إسمك إيه!
وفراقنا ده ذنبك أو ذنبي
في مجرد ثانية لاقيتني بقول..
دلوقتي بقالك تقريبا..
ألف و 100 يوم
وساعات..
ودقايق..
مش جنبي!
شايفة النقلة؟..
من فاقد ذاكرة.. لـ مُؤَرِّخ!
شايفة جروحِك ودِّتني لفين! 
الدنيا تجيبك من غير قصدك توجعني
وانا بعتبرك..
جَيَّالي عشان تسألي عنِّي
الواحد لو ماجَبَرش بخاطره.. هيجبر مين؟
كنت بستغرب شعوري فـ كل مرة..
فيها باغلط في الكتابة..
وقت ما اطمن واقولك:"هاملة إيه؟"
وانتي بتردي بروتين عادي ورتابة
كنت مش فاهم ساعتها إيه الإشارة
واتضح لي بعد فترة..
إن انا كنت الإجابة!
كنت باتعكز عليكي وانتي مايلة
سيبتي إيدي تتوه سنين.. رغم المحايلة
كنتي قايلة..
إني مطرح ما ابقى كنتي.. هتِبقِي جنبي
وهو إيه مفروض يزَعَّل..
قد إنِّك كنتي قايلَة!!
كل ما اغلط وافتكر..
تِغمَق الأيام السودة 
تعرَق إيدي فـ أيام باردة
بتموت وردة..
وبتكبر صبارة فـ قلبي
وتزيد الطرق المسدودة  
وتبوخ أشياء..
كان المفروض افرح بيها
أو كل ما اقابل.. 
ذكرى مابينَّا فـ أي مكان اهرب منها
متخيلة بهرب.. من ذكرى!
دي الدرجة الكام م الضعف اللي انا واصل ليها!
ويجيلي فضول دايمًا أسأل..
جيت حتى وَلَو مرَّة فـ بالِك؟
بالصدفة فـ أي طريق مثلًا
ويا بختِك حتى لاقيتي طريق!
أنا لسَّة بترفُضني الطُرقات
واشمعنا انا بس اللي الأيام بتفَكَّرني؟
وانتي الأيام وخداكي بأحضان النسيان!
وكأن مفيش..
لون احمر عندِك في الإشارات!
مش عدل ان انا بس اللي اخسَر!
هو انا كنت لوحدي اللي باحب؟
وان كان ده حقيقة.. - وده الواضح-..
ليه علَّقتيني بإن وجودِك شئ دايم؟
ليه تمحي هزايم.. لمَّا انتي هتِبقِي هزايم؟
ليه شيلنا خيار "انِّك تمشي"..
من ضمن جميع الإختيارات!؟ 
أنا أثَّر فيَّا فراقنا لإني مانيش زَيِّك
أنا باملُك قلب!
وكنت ضحيَّة لـ تهديدك
وان شوفتي فراقنا ده شئ عادي
ده عشان بس اختارتي بـ إيدِك! 
أمَّا انا علشان بس انساكي..
كانت بتدوس فوقي الأيام..
لو مهما راضيتها ومهما عملت
ومكانش في غير.. باب قدَّامي
ورا مِنُّه النار اللي انا دلوقتي بقيت فيها
زقِّتني الدنيا.. لاقيتني دخلت
اه ياما فارقني بشر لكن.. كنتي خلافهم
وجعِك مش زي حاجات عدِّت وأثرها بسيط
الطلقة فـ قلب ازاي تشبِه.. جلطِة أسفلت!
إن جينا وحبينا نقارن..
كنت افتكرك أيام وشهور.. وانسى دقايق
وانتي تفكَّري فيا دقايق.. وبتنسي سنين
كات صفحة بسيطة وسهل ايامك تقلبها!
إنتي الأيام ضحكت ليكي.. جابتلك دبلة
وانا لسة بابيع..
في خيالي الدبلة اللي المفروض كنت هجيبها!
إنتي بتحسبي بالنسبالك..
كام مَرّة كتب ليكي "بحبك"
وانا بحسب كام مرة قصيدة..
علشانك كنت باعَذِّبها!
واضحك مكسور.. لو جيت اسمع..
"لست وحدَك حبيبها"
وبرغم انها واجعة.. باسيبها
وبرد واقول لـ حليم غلطان
كان المفروض تقسَى عليا..
وتعدل نص الأغنية.. 
وتقول وانت مشاور ليا..
"ولا عمرَك كنت انت حبيبها" 
أنا اه مش أحسن من بعدِك
لكن أحسنلي ان انتي بعيد!
وان كنت اتخانت وانا معاكي
صعب اني اتخان وانا شخص وحيد! 
داين وتدان واهو ده العادي
نقطف في الورد عشان نهاديه للناس يدبل
تقطفنا الأيام بإيديها..
وفـ حالتي لاقيتك إنتي الإيد!
مبقاش ينفع تاني افتكرك
ولا ينفع اقول ذكرى وعَدِّت..
وانا نبرِة صوتي تبان باردة
في حد يبات في النار أيام.. يخرج مبلول؟
عجَلة أيامي يادوب كانت لسة هتمشي
أفتكرك تاني ألاقي ان الجنزير مفصول! 
مبقاش ينفع أبقى طبيعي فـ وسط ده كله
ومافيش ولا حاجة عملتيها تخليني اغفر..
صعب ان القاتل يتصالح ويَّا المقتول!
خليني انساكي..
ويبقى أخدتي ثواب انِّك خرَّجتي سجين
واديني ضمان زي الشركات..
إنِّك ماتجيش تاني فـ بالي
واني ارجع اعيش زي عوايدي
وان كان الحل..
مقايضة شئ قدَّام الشئ..
فكَّري فيها.. 
خليني انساكي ويبقى عملتي جِميل فيَّا
وانا وعد أسيبك مرتاحة فـ قبر قصايدي!

١٨ يوليو ٢٠٢٠

ألف و ١٠٠ يوم - محمد عصام

Mostafa ibrahim - m3ml4 7aga   معملش حاجه تستحق الذكر - مصطفى ابراهيم

قصيدة زينب - الشاعر احمد الطحان
ريمكس وهندسة صوتية جديدة .. كمانجا مكس
Mustafa El-Mallawani

زينب - أحمد الطحان [مكس كمانجا Prod. Mustafa El-Mallawani]

كومة قش.. Alaa Ashraf

قصيدة ل عبد الله الشرقاوي - إلقاء مصعب عبد النعيم

إهداء لـ تُقى طارق

حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

رامي وفا | بورتريه مهزومة منصورة

تلاتين تلاته(30/3)

هندسة صوتية:
https://www.facebook.com/ahmedsaid14

الكلمات:
أنا والليالي بنربط الحلقة
أنا والليالي بننصب النَصبَة
انا والليالي بنقلب الكرسي
الحكايَة في وقت ويعَدِّي
روح وعند الإنتحار ترسِي
أنا والليالي ! ..
لأ أنا لوحدي
…
ودَّة عيني تشوفِك الليلة
ودَّعيني يا "ذكرى" يا جميلَة
صدَّعيني بـ صوت أخير مرَّة
صَدَّة عيني مسافَة مضطرَّة
تبقى بيننا.. يارب تبديلَة
رجَّة عيني دموعي هَتنَدَّع
رجَّعيني لـ دُنيا بتوَدَّع ..
الجروح - التُقل - في الشيلَة
إلتقيت بـ اصحابي من فترَة
أرسِم الأوجاع قصاد عينهم
يرسموا الأوجاع قصاد عيني
يخلَص الاسكيتش عَدا ورقَة
أرسمِك بـ إيدين..
تهِدِّيني
هي حرب أخِرها في هزيمة
في هزيمَة بتنتهي بموتَة
في هزيمَة بتنتهي بـ كسرَة
في هزيمَة وانتي عرفاها
قصدي يعني لما تنسيني
قالوا صابني سهم كان طايش
سهم إيه! ..
دبابيس في شراييني
قد ميلي لـ عينِك الحِلوَة
قدِّميلي الذكريات خِلوَة
عُزلَة راحَة في عالَم الزحمَة
إختميلي نصوصي بـ عينيكي
واختميلي فُراقنا بـ إيديكي
لمس إيدِك في الوداع رحمَة
الشتا قارس ومش حاسِس
الفراق قارص وبتوجَّع
النصيب قارص في رَمياتُه
والخسارَة نصيبي .. بَتوَقَّع
الصَدَف وشوشتها تقولِّك
والصُدَف حَلِّفتها تئول لِك
لو تخطي الدُنيا هتقولي
الشوارِع عارفَة عِنواني
" هذه " لأ " تِلكَ "..
بتخَيِّل!!
ولِّدتني م اللي فات.. عيل
عرَّفِتني الدُنيا بـ عينيها
رجعتني لـ اللي فات تاني
إعذُريني عشان قليل حيلَة
كل شئ في الدُنيا بالحيلَة
بس انا ساذِج.. مفكَّرتِش
في الحلول الصح..
فهماني؟
في العلن ويايا .. مخفية
بذكُرِك بالخير في حكاويا
سامعَة؟ ..
لسة بقول غزل فيكي
" رجعوني عينيكي لـ عينيكي "
إختلاف أذواق في أُغنية
بحضُنِك من غير حساب يمكن
وانتي عارفَة حدودنا.. 
حفظاها
ده دليل لـ غبائي وذكائِك
كل مرَّة باعود جروحي تزيد
ببقى غرَضي اني احضُنِك.. وانسى
إن بيننا في سلك كان شائِك
قلِّديني في إني بتمَسِّك
قل ديني بقيت شيطان .. مَسِّك
إستعيذي يجوز تفارقيني
وَدَّة عيني تشوفِك الليلَة
ودَّعيني ثُمَّ ..
واعديني!

13 نوفمبر 2017

ودَّة عيني - محمد عصام

أكونت الفيس:
https://www.facebook.com/M7mdess16
الكلمات:
في جروح تبانلَك سهلَة وتعَدِّي
لَكِن في نظَري .. صَعب تتخَيَّط
صاحبي اللي قاللي : " ماتستاهلش عياط "
سَلِّفتُه روحي .. لاقيتُه بيعَيَّط!
…
أبرز صفات النصيب .. اِنُّه نافِذ
مافيهوش جدال ولا حد هيعارضُه
مات الشهيد جنبي على الأسفلت
سلِّفتُه روحي .. مات شهيد برضُه!
…
في إيديه وإيدي مُسَدَّسين مِتعَمَّرين
والشر ساكِن قلبه قَوَّاه ع العِناد
يادوب هانَزِّل إيدي .. وهاسَلِّم عليه
سلِّفني روحُه .. فجأة، دوست على الزناد!
…
صِعِب عليا عجوز في مترو زحام
قُمت وبادِلتُه مكاني يُقعُد فيه
فـَ قاللي : " ياااه ، لو يوم شبابي يعود"
سلِّفتُه جِسمي .. ماصعِبتِش عليه!
…
في شارعنا أكتر من عامود قايد
والضلمَة رفَضِت وضعُه .. بتصارِع
عامود إنارَة النور قَطَع عَنُّه
سلِّفتُه روحي .. فَـ ضَلِّم الشارع!
…
حسيت بـ مَلَك الموت هنا معايا
مكتوب معاد لـ زيارتُه .. لسَّة ماجاش
شوفت اِن أُمي عينيها .. مابَطَّلِتش عياط
سلِّفتها روحي .. علشان ماتِوحَشهاش!

سلفت روحي - محمد عصام

Facebook profile:-
https://www.facebook.com/M7mdess16

هلعب مع الخسران يا رزق - محمد عصام

Muhamed Essam - محمد عصام ✪

Recent comments

Eman Muhamad

قـبَـس

قـبَـس

LALLY🎵🦋🦚

Related tracks