hawees

شعر

الود كبر

body

حاتم

مزيج الاشعار

hishaam algakh

جمال عبدالناصر .. عبدالرحمن الأبنودي

هذا الحلم الأحد الصمد الساكن فيّا

مازالت وبرغم الثورة تحكمني حكما ملكيّا

 

نانا البت الدوشة الظيطة

المغرب تنزل في الاستاد

انا كنت دهل صغير لسه

بسرح شعري من الضهرية

 

وشايف شعرها نازل يدلع على خدها

المكوة البايظه كأنها عارفه معادي معاها اشتغلت وحدها

 

فرحت بيا سلالم بيتنا وانا نازل بتنطط فرحة

قلعت عنها حجاب الطرحة وقعدت تدعي

شم المدخل ريحتي عرفني

غمزلي بعينه عرفته كشفني كسفني

ضربته في عينه وطرت

زعق فيا وقالي هتفضل برضه صغير مهما كبرت

 

مدخل بيتنا اللي مربيني كان دايما عايش ويانا

كان يسهر في الامتحانات ويوصلنا لغاية اللجنة ويستنانا

والمره دي قالي أمانه

أمانه يارايح لتسلم على نانا

 

أصحابي عايزني اوصفها

وانا مش لاقي في وصفها زي

شعرها اسود.. لا مش اسود

شعرها ناعم.. لا مش ناعم

شعرها زي اللي ملوش زي

اسمها نانا وساكنه وريدي

بس الناس بيقولوا عليها

ساكنه معانا في نفس الحي

مشيها زي غرير المي

رمشها زي جدايل ضي

جدها من النوع الوحداني اللي ملوش خي

 

نانا كانت لما بتضحك يحلا في عيني العمر الجي

كانت لما بتجرح قلبي تحلى لقلبي قولة اي

قال وصحابي بيقولوا اوصفها

طب والله نفسي اوصفها

بس هاتولي في وصفها زي

هشام الجخ - نانا

إتدلّعي واتبغدَدِي واتفاخري واتباهي

قولي لكل الناس .. ده عشقني والله

لِـمِّي العيال حواليا زِفُّـوني

ظاظوا عليّا وحَدِّفُوني طوب

ما انا اللي سِبْت عنيكي لَفُّوني

وانا اللي استاهل كل يوم مركوب

 

فاتدلعي واتبغددي واتفاخري واتباهي

آدي ضَحِيَّة كمان فِدا رِمشك الساهي

موت الضحايا جَزَايَـا ما انا اللي وَدِّيـتِـك

و لْـحَدْ حَدْ ما وَدِّتُـوش ولا حَدْ وَدِّيـتـك

و قلعت كل سنيني على خَصْرِك

ضَفَّرْت شَعْرِك عشّ جُوَّايا

بايَـعْت حُكمِك وابتديت عصرِك

ووقَفْت ورا عرشِك ومَسَكْت هـوَّاية

 

موت الضحايا جَزَايَـا وكُلَّها ضحايا

مين اللي قال الحب آخره عَمَار

الحب آخره نهاية في رحَاية

القسوة طاحنة والحجر دوَّار

 

فاتدلعي واتبغددي واتفاخري واتباهي

واستنكري من عزتي واستهتري بـجاهي

خَلِّيني مضرب مَثَل من بعد هيبة و وزن

كُبَّي المرار في العسل واملي الفرح بالحزن

 

يعني انتي أولهم ولا انتي اول همّ

ولّا انتي اول سهم إتْسَنْ لي واتسمّ

لو تكشفي ضهري تلقي السهام علامات

وانا زي زرع ف هوا وَطَّى حِيِـي وعَلا مات

 

موت العلالي شرف بس اسمها موتة

مش عدل تبقي ف ترف وانا باطفح الكوتة

ما يا إمَّا نَقْسَمْهُم وَخْزَة قصاد وخزة

يا إمَّا لا مواخذة توتة يا حدوتة

 

وابقِي اكدبي براحتِك واتدلعي براحتِك

طعم الهزيمة جِزَا للي يزور ساحتِك

وانا قلبي يا ما غلب.. مش عيب يبات مغلوب

اهو برضه فِدْتينا وكَفَّـرنا بيكي ذنوب

ولَـحَسْـنا من شَهْدِك وشرِبْـنا من رِيقِك

وسْكِرْنا من كاسِك وكَسَرْنا إبريقِك

وطْعِمْنَا من حُسْنِك وشْبِعنا بِـبَـريقِك

 

ومْشِينا في طَريقِك ورجِعْنا مَـلْـوِ اليَدّ

جَرْحِي قُصَاد جَرْحِك ولا حد ظالم حد

 

ولا انتي فاكرانا رجالة خيبانه

نبكي على النسوان ونْسِحّ في بكانا

كنتي اسألي نانا

اللي اسمها نانا

يا دوب زِعِلْنا يومين واهي دنيا لاهْيَانا

 

ما تكدبيش ع الناس.. الناس دي عارفاني

قلبي خشب لو غطس بِيْقِب من تاني

فماتحرجيش روحِك وتقولي ده عشقني

بدال ما صاحباتك يقولك آدي دقني

 

حِبِّي على قَدِّك واحكي على قدك

وان جت سيرتنا ف يوم ابقي الزَمِي حَدِّك

 

تتدلعي ماشي .. تتبغددي ماشي

وتقولي حبني موت برضه ما يـجراشي

بس انتي من جوا فاهمة ان زمنك مات

وبقيتي زي اميرة قلبها شحات

 

لِفِّي على صحابي .. سِبِّـيني في غيابي

قولي ان عمرك يوم ما وقفتي على بابي

لا كَوِيتي قمصاني و لا جِيتِي زُرتيني

و لا تعرفي مكاني و لا تعرفي تـجيني

 

واني يا دوب واحد دايب ف دباديبك

عامل كما عَيِّل شابط في جلاليبك

وانتي يا عيني أُف زهقانة مني خلاص

عملتي زار بالدُّف وسُقْتِي كل الناس

وانا برضه لازِقلك

معلش حظك كدة ربك ورازِقلِـك

 

روحي يا شاطرة هناك انضمي للالبوم

انا كل عشرتي بيكي 22 يوم

عملتي نفسك حكاية

ومحبة فيَّـاضة ومَخَدَّة بَكِّاية

وسهر وسُهْد وويل وبكا و غنا و مواويل

في 22 ليل

 

على أي حال شكرا وشكرا

ثم شكرا للقصيدة

قَلَّما تأتيني امرأةٌ بأفكارٍ جديدة

هشام الجخ - 24 شارع الحجاز

وضعوا على وجهي مساحيقَ النساءْ
الآنَ اكتبْ ما تشاءْ
كن شاعرا .. كن كاتبا
كن ماجنا.. كن ما تشاءْ
الآنَ أنتَ مُهَيَّأٌ كي تصعدَ الزفْراتُ منكَ الى السماءْ
ما دمتَ في زيِّ النساءْ
فاصرخْ وناهِضْ ما تشاءْ
وارعِدْ وهدِّدْ مَنْ تشاءْ
وسَنَرْتَضِي منكَ الضجيجَ ونرتضي منك السُّبابَ
لأن هذا ما نشاء..
 
واتمدَّدوا في أرضي
ما تقولي يا أرضي
مين شَيَّلِك بالطين ؟
مين حَبَّلِك غيري ؟
طب كنت انا ف "حطين" ؟
ولا كان صلاح غيري ؟؟
 
رافض أقولك يا وطن شعر وقصايد
رافض أصوغك يا وطن سطرين أدب
ما بَقِتْش قادر ع الأدب
يا بلادى يا (رحبه)
هى يا دوب سحبه فوقى و بزياده
بقى هما رجاله
و احنا اللى حبة نتى عليهم العاده
 
خمسين سنة !!! ( القصيدة كُتبت عام 1998 )
عُقبال يوبيلك الماسي
وابقى "هشام" صهيون
يبقوا اليهود ناسي
ولما حتجوز ويجيني صهيوني
راح اجَوِّزُه بنتي
ما انا خوفي لآدِّيها لعربي يسرِّحها !!
ما غارش على بلده .. حيغير على بنتي!!
 
السادةُ العربُ الموقرُ جمعُهم
الامةُ العربيةُ عروسٌ أنتم لم تصونوها عروسْ
هجَّ الجرادُ إليها .. فهربتم
واختبأتم في المساجدِ والكنائسِ
قاتلتموهم بالصلاةِ .. وبالبخورِ
وبالدعاءِ رُكَّعا وجُلُوسْ
عجبا لِهَا تلكَ الطقوسْ
لا جُرمَ عليكِ فلسطينُ
لا وزر على امرأةٍ تزني
ما دامَ الزوجُ الأصلُ ديوثْ
 
يا سادةَ حكامِ الامةِ الغفلةُ ليستْ للحكامْ
علَّمَنِي ( أكتوبرُ ) درسا كيفَ يكونُ هناك سلامْ
أولادي بَصَقُوا في وجهي .. كتبوا لي في الغرفةِ سطرا
إنْ ماتَ الابُّ فِدا وطنٍ .. ما أحلى عيشَ الايتامْ
يا وطني لا يمكنُ أبدا أن يرحلَ عربيٌ مِنَّا للغربِ بدونِ استعلامْ
فلماذا تفتحُ أبوابا وتُنَكِّسُ رأسا وظهورا
وتُسَلِّمُ بِكْرَ عروبتِنا  كي ترفعَ ساقيها سَفْحا
وتصفقُ للذَّكَرِ الأقوى وتَكَلُّ من التصفيقِ تنامْ
سبحانَ إرادةِ (أُنكِل سام)
 
وطني
يا وطنَ الموبوئين ووطنَ المهزومين
ووطنَ الحبَّاكين ووطنَ النَّفْطِيِّين ووطنَ الـ ..........
 
أنا والشعرُ مهزومانِ .. منفِيَّانِ .. مُعتَقَلان فيك
إذا ما استنجدَتْكَ القُدْسُ مَنْ سيغيثْ
يا وطني شكِّلْني رجلا
صنِّفْني عندَكَ في بَنْدٍ لا يحملُ تاءَ التأنيثْ
إن دبَّ الخوفُ بأطرافِكَ قَطِّعْ أطرافَكَ يا وطني فالمرضُ خبيثْ
 
كيف اقولِّك بحبِّك
وانا اللي فعلا بحبك بس مش طايق
تبقي انتي ويّايا ف سفينة حبنا الطارح ورق اخضر
وريحة البحر الوحيدة اللي تدوّخ رِقِتِك
تنزل عنيكي من الكسوف
خايفة لاشوف في عنيكي حاجة من اللي جوّا
وإيدك المرمر على رجلك ليِتْشَاقَى الهوا
من فرحته يخطف طراطيف الجونلّة
بضحكة هالّلة محمّلة براكين وشوق
ومخطّية كل الشقوق ويادوب افوق
القى السفينة بتمشي بينا تهزنا والقاني مش سايق
فارجع كما الأول.. نفسي اقولك بحبك بس مش طايق
 
الأربع اللي فات صِحْيِت حيطان البيت م الفجر صَحِّتْني
كان القمر كسلان والصبح معرفنيش
عيِّل ماليه الطيش بجري على ميعادك
وانا جاي في قلبي حكاوي
ولما تمشي بلاوي ف جِتِّتي قايدة
حاولت احاول اقولها رجعت بلا فايدة
حسيت بإيدِك ونفسِك وصدرِك غيَّروا لوني
نعسان يا جِفْنِك كما شلال
وكوم حبال دَلُّوني وعَلّوني
لِسَّاني شَعري اسود ودراعي قادر يشِيلك
بس العِلَل في الوطن هما اللي علُّوني
 
كان نفسي اقولك بحبك
خفت اكون كداب يا ام الهوى حقايق
كان نفسي اقولك بحبك بيروت رقصت في قلبي
لَقِتْني مش طايق
 
تمثالُ "سليمانَ" سيزحفُ ويجرُّ الجُندَ الى الاقصى
والنملُ العربيُّ مُطيعٌ عجبا لِغُزَاة لا تُعصَى
لن يُصْرَمَ شعبُكَ يا وطني فرجالُكَ كالفِيَلَة بطْشا
وذكورُ الفيلةِ لا تُخصَى
قاتلْهم يا نخلَ الوادي
قاتلْهم يا رملَ الوادي
إن قطعوا نخلَكَ يا وادي
ستظلُّ رمالُكَ لا تُحْصَى
 
سامحيني يا وحدِك بستسمحك وحدِك
انا اللي عمري ما اشتكيت هجرِك ولا بُعدِك
ولا اشتكيت من وجع صدك ولا ردك
بستسمحك وحدك
 
خايف عليكي من القصايد تدهنك أسود بلوني
كل كوني قِيلة .. كوني ف كوني ضِلّة
خايف عليكي من الكلام .. اصل الكلام في بلادنا عِلَّة
تحت البيوت عسكر جوا البيوت عسكر
فوق اللسان عسكر بين الضلوع عسكر
طب كيف اقولّك بحبك وضلوعي مُحتلّة
إنتي اللي من يومِك طريقي
وريقك السيّال كما شلال يا دوبك بلّ ريقي
الليلة بتمرد على ريقي وطريقي وبرفض البلّة
 
سامحيني يا وحدك
بكرة اما اجيب ارضي حِمْلاها ليكي طيوب
مقدرش اسيب حبي بذرة ف وطن مسلوب

هشام الجخ - آخر ما حرف في التوراة

منطقى لما يبقى يتيم و أمى ويبقى سيد العالمين

منطقى الحُسَّاد هتكتر و العدا و الكارهين

و اللى هيقولك ده شاعر

و اللى هيقولك دا ساحر

و اللى هيقولك دا كافر

واللى يكتب و اللى يرسم

و اللى يكدب و اللى يشتم

منطقى

 

هى غيره

زى غيرة الوليد بن المغيره

مش كان هيسلم؟!

بس حاجه فى نفسه حَكِّتْ

كبره خلَّى نفسه شَكِّتْ

أصل داء الكبر ده أكبر خطر

بس يعنى الجَنَّه تِعْمَرْ وحدها؟!

حَبَّه فى الجنه و نعيمها وحَبَّه فى سقر

منطقى

 

و منطقى لما يبقوا المسلمين حالهم كدا

تطلع ضوافر للعِدا

مادمت مش زارع بإيدك غلتك

و الجوع قرص على معدتك

فا ذَلِّتَك

مادمت متشتت و تايه فى الكلام

فين الودان اللى هتسمع شكوتك؟!

و منين يجيلك و ش تحمق ولَّا تغضب

ولَّا ترفع كلمتك؟!

 

هما مش قاصدين يهينوا المصطفى بحبة صور

هما عارفين إن سَيِّدنا النبى سيد البشر

هما قاصدينك و قاصدينِّى و قاصدين كل جيلنا

و طول ما بِنْكَسِّلْ و نتفرَّق و بندارى الحقايق

لسه ياما راح يجيلنا

أما سيدنا النبى ربه كافيه

يستهزقوا مِنِّينا إحنا

أما هو رَبُّه صاينه و مصطفيه

 

لو كانوا حضروه كانوا عرفوا يرسموه

كانوا هيسموه بعدله و بسماحته و بهدوءه

كانوا شافوا إن الصحابه بتلحق الميه اللى نازله من وضوه

لو كانوا لحقوه كانوا عرفوا يرسموه

 

إحنا ما رسمناش نبينا فى العيون

إحنا فهمناهم إن الدين بتاعنا لا فيه علوم ولا فيه عمل

ولا فيه أدب ولا فيه فنون

اتلهينا باحنا كنا و احنا كنا

و نمنا فى اللى راح يكون

 

بس احنا فقنا

بجد أسفينلك و راجعينلك

شعبك نشيط عامل و صافى و تقى

زيك يا سيدنا النبى يابو قلب طاهر نقى

أما اللى واكلاهم غيرتهم فا ده منطقى

هشام الجخ - منطقي

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

 

إنك تبيع قلبك وجسمك

وإنك تبيع قلمك وإسمك

ما يجيبوش حق الرغيف

 

سألوا جحا عن سر ضحكه

قالك أصل اتنين وشبكو

اللى كان من تحت ميت

واللى كان من فوق كفيف

دا شعور سخيف

 

وشعور سخيف

إنك تكون رمز الشحاتة

تبنى مبنى للشحاتة

تعمل وزراة للشحاتة

 

يا ساقية دورى عدى فوقى ودوسى

نصبوا عليا وشحتونى فلوسى

ربطونى فيكى .. حتى ما اتغميت

هما اللى فرحوا ووحدى أنا اتغميت

 

أنا اللى صاحب البيت

عايش بدون لازمة

ولما مرة شكيت

إدونى بالجزمة

 

مش لاقى تطفح اديك

هاتولنا و جيبولنا و ادونا ودونا

هنجيب منين نديك

طافح يا بلدى غدايا و لوعتى غدايا

و آدى الأحبه التفوا و اتجمعوا عدايا

 

أنا اللى زارعك دهب

بتأكلينى سباخ

إن كان دة تقل ودلع

بزيادة دلعك باخ

 

لا شفت فيكى هنا

ولا شفت فيكى ترف

كل اللى فيكى قرف

 

كرامتنا متهانة

واللقمة بإهانة

بتخلفينا ليه

لما انتى كارهانا

 

يعنى ايه تبقى إنتى هبة النيل يا بوبه

وكل يوم المية تقطع

يعنى ايه لما اشتكى غلو الفاتورة

يقولو تشكى بس تدفع

 

لما قش الرز ثروة بتتحرق

وأما نفط الأمة ثروة بتتسرق

وأما جلادك على ولادك بيبطش

وأما علمك ما يلاقيش يآكل فيطفش

 

يعنى ايه نرفع ايدينا بالسلام لجل الغزاه

ويعنى ايه لما ابقى ماشى فى حالى اتشد اشتباه

يعنى ايه لما اتحبس أربع سنين حبس احتياطى

حبس اعتباطى

يعنى ايه مش حاسة بالعمر وغلاوته

بتصبى مر العمر ليه

دة انا كنت ح اوهب لك حلاوته

 

أنا عمرى ما أتأمرت ولا حطيت شروطى

ومكان ما ترسى مركبك بابنى شطوطى

أنا كنت جيشك لما مماليلك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

 

دة انا كل شبر فى أرضك اتمرمغت فيه

وكل يوم عشتيه أنا اتغذبت بيه

 

على صوت أدانك جرس فى الشدة صاحينلك

من امتى كانوا الحرس هما اللى باقينلك

بعتينى علشانهم وعنيكى معصوبة

ياهل ترى خاينة ولا زيى مغصوبة

 

كل الكلام اتقال و الشعر بقى ماسخ

و الصبر علو جبال والظلم شئ راسخ

وطن وغرقان فى النطاعه

كل شئ ريحته نطاعه

علمونا بالعصاية

ورضعونا الخوف رضاعة

 

علمونا فى المدارس يعنى ايه كلمة قيام

علمونا نخاف من الناظر فيتمنع الكلام

علمونا ازاى نخاف وازاى نكش

بس نسيوا يعلمونا الاحترام

فماتزعلوش لما ابقى مش باسمع كلامكم

وماتزعلوش لما ابقى خارج عن النظام

 

مستنى ايه من طفل ربوه بالزعاق غير المشاكل والخناق

كل اللى بيقولك بحبك دول نفاق

أنا لما قلت لك بحبك كان نفاق

 

الحب يعنى اتين بيدّوا

مش ايد بتبنى وستميت تيت تيت يهدوا

الحب حالة

الحب مش شعر وقوالة

الحب يعنى براح فى قلب العاشقين للمعشوقين

يعنى الغلابة يناموا فى الليل دفيانين

الحب يعنى جواب لكل المسجونين

هما ليه بقوا مسجونين

 

يعنى أعيش علشان هدف علشان رسالة

يعنى احس بقيمتى فيكى إنى مش عايش عوالة

يعنى لما اعرق تكافئيى بعدالة

الحب حالة الحب

مش شعر وقوالة

الحب حاجة ما تتوجدش فى وسط ناس

بتجيب غداها من صناديق الزبالة

الحب جواكى استحاله

 

بَارَت مَرَاعِينا والبِئر قَد جَف

وَالْجُوْع يِكْوِينَا وَالْصَّبْرُ مَا كَفّى

وَالْقَلْب لَا يَهْدَا وَالْجُرْح لَا يُشْفَى

وَلِأَنَّنَا طَوْع زِنِّا لَهُم خفّا

جَاءُوَا بِمَوكَبِهم.. واشتغلت الزفة

 

الدفة مظبوطة وأصلا مافيش دفة

والكفة مش مايلة علشان مافيش كفة

و جحا اللى جاى بالليل لساه بيتخفى

 

شايف ديدان الغيط سارحة وما راحماشى

من جبنه شاف الدود سابه وراح ماشى

ولا اتكسف للناس ولا حس على طوله

الناس عشمها كبير جريوا بيشكوله

ضحك جحا ضحكة مواشى

مادام بعيد عن طينى ... ماشى

 

الدود قاعد لك يا جحا ولابد فى طينك

بعد ما يمص فى دمانا مش هيحلاله الا طينك

احنا اهلك احنا رجالتك عمادك

إحنا وقت الشدة سندك إحنا زادك

يا جحا احمى ولادك لو كنت عايز تحمى طينك

 

سوف أرحل ربما يلقانى من ارجو لقاه

هامشى ويا الشحاتين وابكى على حلمى اللى تاه

بس مش هاشحت رغيف

هاشحت وطن لله

هشام الجخ - جحا

كرهـتك قد ما ضحكتى على شقايا

كرهــتك قد ما امى تحب رؤيـايـا

و قد رعشة ايدى وانا بكتب

أول قصيده أكتبهالك

 

آخر قصيده أكتبهالك

و آخر قصه فى كتابك

و آخر كلب فى كلابك

و آخر طيف يبات الليل على بابك

 

دا انا اللى كسّرت السهر

و رَقَصْت ويا الليل و رَقَّصت القمر

 

أنا اللى فَضّيت بِكر نجمه فى السما بَكّيت نجوم

و طلقت ايدى فى صدر نسمه اتلخبطت بين الغيوم

أنا الجخ و سامعه عنى و عارفه انى كل يوم

كنت قبلك ويا واحده و يمكن ويا اتنين فى يوم

 

تكسرينى؟! ... لا يا عينى

انتى واحده من ألوف

و ياما وانا عايش هشوف

انتى مجموعة قصايد بالمحبه بتبتدى

وهى دى

آخر قصيده أكتبهالك

و كان بودى اسمعهالك

 

نبرة الحزن فى كلامى مش ندم

ما أنا خدت منك كل حاجه وسبتلك حبة ألم

أنا خدت منك كل شئ

و فضلت قدامك برئ

 

كل ما فى الأمر إنى لسه ماشبعتش خيانه

تعرفى يا نانا الخيانه؟

مش خيانه تحبى غيرى .. يا خى حبى غيرى

همشى مع واحده تشوفيها و زى ما هغير انتى غيرى

مش خيانه

 

بس تبقى خيانه عظمى

يوم ما يبقى الحب كلمه

يوم ما تبقِى م البدايه

حاطه للقصه نهايه

 

يا ترى لساكى فاكره؟

فاكره يوم ما رميتى قلبى بنظرتك

قلبى اتجرح

كان فرح

أنا لسه فاكر.. كان فرح

كانت الرقاصه بتزِفّلِى حُبك

قلت احبك يمكن الحب يداوينى

وادى ادينى

 

بكره اليوم اللى شفتك

بكره الشارع بكره الليل اللى ضمك

بكره القمره اللى بتفكرنى بيكى

و بكره اسمى اكمنه اسمك

 

بكره انى ابتسم.. حتى اترسم

حتى اتدفن

بكره البحر اللى زغزغ صدرك السقعان فى حضنه

جيتى حضنى

حتى حضنى بكرهه لما اتّسعلك

بكره الشعر اللى خللانى ابقى نعلك

بكره القلب اللى سابلك صولجانه و بكرهك

واللى زانك طول سنين جه الليلادى و شوهك

 

لا انتى ناعسه ولا انتى عبله ولا انتى شملوله الخجوله

اتكسر جوايه صوتك واتكسر جواكى عمر

بس عمرك هو عمرى

كان بودى أسيب فى قلبك ميت أتون من طين و جمر

بس قلبك هو شعرى

 

بكرهك ياللى ابتسامتك فرحتنى

و مرجحتنى و زحزحتنى و كبرت الله اكبر

من كلامك من غرامك من عينيكى السودا ليل

قلبك المكسور بيعلن لانتصارى ميت دليل

 

و انتصارى مال على ودانى وهمسلى

قاللى "أوزوَلد" البرئ ما بقاش برئ

قاللى إن "سيزيف" دا زيف

و ان قولة آه بتطلع م الصعايده فين و فين

قاللى أنساكى فى مساكى

و اما اشوف قلبك عساكى تفوقى من وجع البنات

قالى بالرغم انه عارف انى حبيتك.. هجيتك

و انه شافك كاتبه اسمى بخط نونو تحت بيتك

قاللى شافك ع المرايه بتكشفى صدرك لصدرى

قاللى صبرك.. يا دى صبرى

 

اياك فاكرنى من حجر

اللى قاسَى فى حب نانا لو حجر...كان انفجر

 

كنا زى اتنين فى صحرا

ما فى ناس ما فى عيب مافى خوف ما فى بكره

كنا خيل وليل و مهره

كنا سكر و كنا فجر و كنا سهره

كنا نتواعد بكلمه و كنا نتصالح بنظره

 

كنا لما تسافرى أو اسافر يصير الليل مالوش آخر

أكن عيونك النعسانه مجافيينك

و أكلم نفسى طول الليل و أقول فينك

و كان قلبى بوسع البحر..لملم موجُه فى سفينك

و نفس البحر دلوقتى لعنلك ميت سلسفينك

لا عاد موجه بيهواكى و حتى نجومه فى سماكى

رموكى بعد ما رماكى و كانوا فى ليلة زفّينك

 

و كانو يناموا فوق مريلتك الكحلى

ينقولك هدومك يوم ما نكون هنتقابل

أنا و نانا فى طول أيامنا ما كنا بنتقابل

ما كل الناس عتتقابل

احنا كنا..

احنا كنا..

والله ناسى كيف ما كنا ..بس كنا

 

يمكن الحلم اتقتل بس الجبل

لو هده ريح أو حتى مال برضك جبل

و انا مش جبل من طين وقش

ولا عضمى هش

إن كان على القلب اللى حبك آخره نعش

و انصِبله بدل الخمسه ألف و يبقى مات ولا اتخدعش

 

كنتي كيف السّبيه بيّه

و كنت ليكى عبد طايع

صرت ورقه و حبر ضايع

وقت فات ولا جابش عايد

مش بقولك.. انتى مجموعة قصايد

 

لمى ورقاتك خلاص الحبر جف

و احكى للجيل اللى طالع بكره يضحك

قولى لابنك فيه زمان واد عقله خف

اوعَى لتصيدك بِنَيّه و زى فرحه يولّى فرحَك

 

شيلى عمرك باللى فيه

خدت منك كام قصيده سامحى فيهم

حق كُرسيين معسل مش حكايه

خدت من عمرك بُكايه

و ابتسامتى سيبتهالك

يكفى إنى لسه مالك نفسى و بخبى البُكا

شوفى شاعر غيرى يوصفلك جمالك

 

أما ع القلم اللى فى ايدى

شاريه من دكان صعيدى

راسه ألفين دومه نَيّه لانسى حبك من أساسه

عشتى طبعا فى الصعيد و عرفتى ناسه

 

يبقى أسهل شى عليا

أنسى حبك و انسى حالك

وانى اقول ع القصيده ديا

آخر قصيده أكتبهالك

هشام الجخ - آخر قصيدة أكتبهالك

أشعار .. أحمد فؤاد نجم
أداء .. الظابط : الشيخ امام
المتهم : أحمد فؤاد نجم

إنت شيوعي

أنا مصراوي

إنتو مصايب إنتو بلاوي

ممكن أعرف مين الأول بيكلمني

إحنا نيابة أمن الدولة

طب فهمني دولة مين؟

دولة مصر

مصر العشه ولا القصر

أيوه حنبدي ندور ونلف حاجه تنرفز خالص إف

مالك ... شايل طاجن خالك

لم لسانك ما تخرّفش

أنا ما اقصدش اهانتك طبعا

أيوه استعبط

لا ما اعرفش

إيه رأيك فـ سفارة كوريا

إيه رأيك في قضية مصر

مصر فـ وحده هى وسوريا وليبيا ولازم ييجي النصر

ييجي منين وازاى و لمين

آدى كلام الشيوعيين

أنا من حقي

حق فـ عينك

أنا بتكلم بيني وبينك

يعني كلام برّا التحقيق

إذا كانش يسببلك ضيق

طيب قول

مين مسئول ؟

مين مسئول عن إيه يا أخينا

ع إللي جرى لنا فـ غزه وسينا

أنت شيوعي أكيد و طاوعني فضّي دماغك من دي قضيه

شعبنا جاهل مهما تقول له مش حيآمن بالشيوعية

؟ما الشيوعية فـ فيتنام .. إيه رأيك فيهم يا همّام

مش بطال مش بطال

لكن إحنا .. ورانا عيال

طب ما نحارب لجل عيالنا يطلعوا أسعد من أجيالنا

إنت الظاهر مخك فاضي و هتدوشني معاك ع الفاضي وأنا بحبحت معاك بكفايه إبقي اتفلسف عند القاضي

هى قضيه ؟

لأ ملوخية

أمال فاهم إيه آمال هيّ الدولة دي لعب عيال

ممكن أعرف أنا هنا ليه

 ؟أيوا هتعرف ، أمال إيه . يوم خمسه وعشرين الماضي إيه مشاك عند التحرير

تحرير إيه يا جناب القاضي

أنا مش قاضي

بكرا تصير

بطل غلبه وجاوب دوغري

أنا غلباوي كدا من صغري

كل الشيوعيين أمثالك آخر غلبه وقله ذوق يحصل إيه لو تمشي فـ حالك فاكر نفسك  مين ، ما تفوق

لو راح افوق مش من مصلحتك

أنا معجب جدا بصراحتك

إيه رأيك فـ حكاية الطلبه

حاجه عظيمه بشرة خير

إنت دماغك ينفع جزمه

وانت لسانك ينفع سير

إخرس قطع لسانك سافل

كتر خيرك

مخك قافل ، مين وداك بقي عند الطلبه رايح ضمن المندسين

رحت أناقشهم واسمع منهم

تسمع منهم إيه يا سي طين دول عايزين الدنيا تولع علشان أصلا مش فاهمين

هيّ الحرب يا عالم لعبه دى بتتكلف بالملايين

وأنت هتدفع إيه من جيبك

امال هـ ادفع من جيب مين إنت حمار وخدوك فـ مشمّك رحت هناك زى الباقيين ، عاملين لجنه وقال وطنيه مش ممكن دول وطنيين ، وجماعة أنصار الثورة و فلسطين وهباب الطين . ما نخلينا يا سيدي في حالنا مالنا ومال الفدائين
هو إحنا اللي نهبنا بلدهم دول عالم صيع فاقدين ، قتلوا الراجل عند الشيراتون وإحنا إللي طلعنا القاتلين

وصفي التل دا كلب وخاين

اهو كل العالم خاينين ، واحد صاحبي مراته مرافقه وهو مرافق ييجي عشرين . أمريكا بتزعل وبتحرن .. هو إحنا يا عالم ناقصين ، مش نستعبر مـ إللي جرالنا ونعيش بقي زي   !العايشين
دي عيال عُملا للشيوعيه وإحنا عدو الشيوعيين

روّق دمك بس شوية . مين مساعدكو بقالكو سنين

بيساعدونا صحيح يا سي بعجر علشان دول عالم مجانين إحنا حيلتنا منين نديهم ونسددهم بالملايين

همّا شافوها قضية مبدأ

مبدأ مين وزكايب مين ، هي دى عالم تعرف مبدأ . دولا بقول لك ناس مجانين . عملو السد العالي علشان نبقي اشتراكيين ، إشتراكيه هناك فـ بلدهم وإحنا ف بيتنا نعيش حُرّين 
عايزين الفلاح الجاهل يتساوى بالمحترمين ! وكمان قال تحديد ملكيه أبو ألفين يدّوه  خمسين شغل ملاحده وعالم كفره ومخالفين أحكام الدين والعُمّال رخرين اسم الله فاكرين روحهم بني آدمين .. ناس عايزين الحرق بولعه دا كله من الشيوعيين نشروا لنا الأفكار السوده أولاد الكلب الملاعين ، مين وداك بقي عند الطلبه
انطق قول
اتكلم مين

هما إيه مطالبهم ؟

انت حتستجوبني يا شاطر

لأ مش قصدى بس أنا باسأل كانوا طالبين كراريس ومساطر ولا مطالب ميه الميه كل الشعب مآمن بيها

دول طالبين حرب وشعبيه . مين مجنون بقي حيمشيها . عايزين يدوا الرتش سلاح عشان تحصل فيها مجازر أنا لو أشوف حلوف فلاح شايل شومه لازم اهاجر

لازم بينه وبينك دم

دم فـ عينك هُس اتلم .. ثم نحارب ليه و بـ إيه ؟ بسلاح ما يموتش بعوضه

روّق دمك بس يا بيه الحرب ضروره و مفروضه
و اهو نفس سلاحنا المظلوم فـ فيتنام دابح أمريكا

دي طبيعه أرض يا بني آدم

بطلوا بقي كدب وبولوتيكا ، طب ما الهند بنفس سلاحنا فـ باكستان بعزقت الغرب

!رأيك يعني ضروري ان إحنا و حتمـًا يعني نخش الحرب
طيب حاضر
فين المخبر
هتغير رأيك
بالضرب
هتغير رأيك بالضرب

ورقة من ملف القضية - الشيخ امام و احمد فؤاد نجم

الشاعر جمال بخيت -مش باقي مني

حـظَــك كـــــــده

 

 

 

 

مكتوب عليكى تحبى واحد قلبه صدى

لا الفرحه تقدر تنعشه ولا حزن يقدر يرعشه

ولا نكته حتى تفرفشه ولا حتى خضّه

مع ان قلبك من دهب

مكتوب عليكى تحبى واحد قلبه فضه

حظك كده

 

كل البنات اللى فى حياتى قبلك

أستنونى نمت وغدروا بيا

عِدِّى جوابات الغرام اللى فى دولابى

شوفى كام مره اتغابيت وفتحت بابى

مره بيضه ومره سمره

دى طويله ودى تخينه

وأردنيه ومغربيه وفى الروسيه

وفى العجوزة ..وفى الصبيه

وفى النهايه الكل بردك غدروا بيا

أحتمال العجز فيا

 

المهم انى خلاص ما بقتش قادر أحب تانى

جسمى نحس من السهر والانتظار ومن الاغانى

 

انتى أجمل واحده حبتنى فى حياتى

رقه الكلمه فى شفايفك

الخيال اللى محاوطنى

ومحاصرنى وانتى غايبه كأنى شايفك

العيون المعجزات اللى بخاف أرفع عينيه

يغضب المولى عليه

والله ما أنا عارفلى خوف

أنا ببقى خايف ربّى ولا ببقى خايفك

 

إنتى بِكْر كل

حاجه فيكى بِكْر

الشوارع والمدرج والأمانى

جوه منك لسه بِكْر

أما أنا جيش مالحريم استهلكونى

يا ما رقدوا و يا ما لعبوا ويا ما سكنوا

فيه إيجار وفيه اللى ملك وفيه خدتنى وضع يد

صبحت حكر

وانتى بكر

طب هاينفع؟

 

عارف أنها مش خطيئتك

إنى عيشتى معقده

بس اعمل ايه

حظك كده

 

هشام الجخ - حظك كده

كف صعيدي. ربيع البركة . علي مين ياقلبي اللومة علي مين

اغنية عبد الباسط حمودة - يابن ادم - كاملة - من فيلم ظرف صحى.MP3

كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مـآمن يمشي فين



كلمتين يا مصر يمكن هما أخر كلمتين - بصوت احمد فؤاد نجم

قصيده كأنك مفيش - أحمد فؤاد نجم

. جروب مزيكاتي ع الفيس بوك .. شرفونا هتنبسطوا 

https://www.facebook.com/groups/1471030076464570/

Mixed By : ♫ ♪ Mo.Hassan ♫ ♪
..
@mo-hassan2

والله وشبت يا عبد الرُّحمان ..
عجّزت يا واد .؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان.
عشت كتير.
عشت لحد ماشفتك عجّزت يا عبد الرحمان.
وقالولي قال خَلَّفت
وانت عجوز خلَّفت يا اخوي؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمان.
أهو عشنا وطلنا منك بصة وشمة.
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان

حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!

ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.

طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!

كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب

أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.

الورث تراب
وحيطان الأيام طين
وعيالك بيك مش بيك عايشين..!!

يو.ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.

مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!

بناتي رضية ونجية ماتوا وراحوا
وأنا اللي قعدت.
طيِّب يا زمان..!!
إ
إوعى تعيش يوم واحد بعد عيالك
إوعى يا عبد الرحمان.

في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.

ساعتها بس ..
حاتعرف إيه هوّه الموت.!!

أول مايجي لك .. نط

لسه بتحكي لهم بحرى حكاية
فاطنة وحراجي القط..؟

آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.

زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب..!!

قِدِم البيت.
اتهدت قبله بيوت وبيوت.
وأصيل هوه..
مستنيني لما أموت..!!

حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟

حاجي ياعمة وجيت..
لالقيت يامنة ولا البيت ..

الخال


العمه يامنه - مزج - الابنودي

محمد رحيم حبيبة حبيبك -

لن أعيش فى جلباب أبى

Exclusive Only From Ҳ̸Ҳ̸ҳ Musicana Hawana ҳ̸Ҳ̸ҳ

By ....:::: DjAyman ManooStars ::::....

https://www.facebook.com/MusicanaHawana

تتر مسلسل مع سبق الإصرار - إليسا

الشاعر هشام الجخ 
قصيده متزعليش

هشام الجخ - متزعليش.

قصيدة مش باقي مني للشاعر جمال بخيت

مش باقي مني - جمال بخيت

ف الزمالك من سنين

و ف حمى النيل القديم

قصر من عصر اليمن

ملك واحدة من الحريم

 

صيتها أكتر م الأدان

يسمعوه المسلمين

و التتر

و التركمان

و الهنود

و المنبودين

 

ست فاقت ع الرجال

ف المقام و الاحترام

صيت و شهرة

و تل مال

يعني في غاية التمام

 

قصره يعني هي كلمة

ليها كلمة ف الحكومة

بس ربك لجل حكمة

قام حرمها م الأمومة

و الأمومة طبع ثابت

جوه حوا من زمان

تعمل ايه الست

جابت فوكس رومي و له وان

 

فوكس دا عقبال إملتك

عنده دستية خدامين

يعني مش موجود ف عيلتك

شخص زيه يا اسماعين

 

و اسماعين دا يبقى واحد

م الجماعة الغلبانين

اللي داخو ف المعاهد

و المدارس من سنين

 

حب يعمل واد فكاكه

و يمشي حبه ف الزمالك

و القيامة و الفتاكة

يرموا طبعا ع المهالك

غم سمعه من قيامته

حب يعمل فيها فله

بعد ما ألوط بيجامته

اشترى حتة مجله

 

قول مش بيقراف حكاية

من حكايات الغرام

و اندماجه ف القرايه

خلا مشيه مش تمام

 

ع اليمين يحدف بعيد

خطوتين

و تروح شمال

لمحه فوكس من الحديد

قال دا صيد

سهل و حلال

 

هب نط ف كرشه دوغري

جاب بيجامته لحد ديلها

اسماعين بدال ما يجري

قال يا رجلي

رجلي مالها

 

بص شاف الدم سايح

من عاليها و من واطيها

و ياللي جاري

و ياللي رايح

المجلة مش لاقيها

 

حبه و تلمو الظنايا

اللي هما البوابين

و الهكايه و الروايه

قال لهم دا كلب مين ؟

كلب مين

ما كلب مينشي

سمعه لبخ حبتين

قال له واحد فيهم امشي

اللي جابك انده مين

 

قال دا شارع يا مواشي

للجميع

راكب و ماشي

 

كلمة من دا

و كلمة من دا

ظاطو و انقلبت فضيحة

قول نهايته و القصد من دا

اسماعين شرب الطريحة

 

راحو اسم الشرطة جمعا

و النيابة كفيلة بيهم

و اترموا ف الحجر طبعا

لما ييجي الدور عليهم

شاف بلاوي ما تنحكيش

م الهفايا المحبوسين

قال يا عالم

يا شاويش

يا نيابة .. يا مسؤلين

 

خلصوه بعد المناهدة

جثه

من جحر الديابه

هي يمكن ساعة واحدة

كان ف مكتب النيابة

 

قال له ـ مالك يا اسماعين

قال له ـ زي البمب مالي

قال له ـ عضك فوكس فين

قال له ـ سيبني أروح لحالي

انت شوف سي فوكس يمكن

خد تسمم غصب عني

الوكيل قال برضه ممكن

و الشاويش قعد يغني

هييص يا كلب الست هيص

لك مجامك ف البوليس

بكرة تتولف وزارة

للكلاب

ياخدوك رئيس

 

انت توى ف النيابة

تسعمية من الغلابة

طب يا ريت يا فوكس كنا

و لا تربطنا الجرابة

 

انت فين و الكلب فين

انت كده يا اسماعين

طب دا كلب الست يا ابني

و انت تطلع ابن مين

 

بشرى لصاحب الديول

ولــللي له أربع رجول

بشرى لسيادنا البهايم

من جمايس أوعجول

اللي صاحبه يا جماعة

له أغاني ف الاذاعة

راح يدوس فوق الغلابة

و النيابة

بالتباعة

هيص يا كلب الست هيص

هيص يا كلب الست هيص

كلب الست - أحمد فؤاد نجم

ومن الذي لا يحب فاطمة  مسلسل درامي مصري من إنتاج اتحاد الإذاعة والتليفزيون عام 1993 عن قصة أنيس منصور وإخراج أحمد صقر ومن بطولة أحمد عبد العزيز وشيرين سيف النصر ....
كلمات الاغنية للشاعر سيد حجاب - الحان ميشيل المصري - غناء محمد ثروت

ومن الذي لا يحب فاطمة

هشام الجخ - ايزيس ♥♥

وانا مالي انا مالي انا مالي

ادي عيني خدني عيني وتعالي

عايز اقولك كلمه انتي وبس النجمه 

نورك غطى نور قمر الليله

كنت بقول لو يعني قلبك لو يسمعني

مين غيرك ياخد كام بوسه جميله 

عقدك و المشاء الله زايناهم يا مشاء الله

دا اللي انا شايفه نور زغلل عيني

مهو من الحلقات السته واكلين منك حته

مين والله ما فاكر كام عمر سنيني 

بالملي حبيبتي عارفك سكر شفايفك

دلوقتي بينا عادي 

انا لما شاورت ليكي فرحت عنيكي

ادي الي نابنا آدي

وانا مالي انا مالي انا مالي

ادي عيني خدني عيني وتعالي

وسمعتك بتغني طلعت غصبن عني 

آه مني لأني نورمال وطبيعي

وصحيح دمك شرباته بس عليكي الاته 

مين لو وصلك كام كلمه تبيعي

بس مش ممكن الوانك يخرب بيت فستانك 

دا اللي يشوفو نور الصبح طلعلو 

اخضر لونو فروزي يسحر لما تعوزي 

مين قولي ده جوزي كام يوم وارجعلو

بالملي حبيبتي عارفك سكر شفايفك

دلوقتي بينا عادي 

انا لما شاورت ليكي فرحت عنيكي

ادي الي نابنا آدي

وانا مالي انا مالي انا مالي

ادي عيني خدني عيني وتعالي

حبك جن جنوني احلى من البونبوني 

لخبطتلي كياني توهني انا مني 

وادي قصتنا اهي آدي ..سيرة اهل بلدي

قال سامعين صوتك كل ما اغني

بالمللي حبيبتي عرفك سكر شفيفك

دلوقتي بيننا 

لما شاورت ليكي فرحت عنيكي 

ادي الي بينناااااا

بالمللي حبيبتي عارفك هاي هاي سكر شفايفك هاي هاي

دلوقتي بينا هاي هاي عادي 

انا لما شاورت ليكي باي باي فرحت عنيكي باي باي 

ادي الي نابنا باي باي آدي

محمد رحيم - وانا مالى

قصيدة الشاعر الهويس هشام الجخ - أيوة بغير - YouTube

ليا مين غيرك يا بلدى

قصيدة الواد كبر عن جمال مبارك

مبارك شعبي حبيبي فؤاد نجم - YouTube

كأنك مافيش قصيدة من الشاعر نجم إلي الدكتاتور مبارك - YouTube

أديني نجحت - قصيدة تخرج هشام الجخ من الجامعة بعد 11 سنة في الكلية

هشام الجخ - أديني نجحت Hisham Al Gakh - Adeni Naga7t


أيوه بغير
لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير
 
واللي قالولك غيرة الراجل
قِلّة ثقة او قلة فَهم
خَلْق حمير
 
غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها يبقى يا غُلْبها
 
اصلنا ناس على قد الطيبة كلنا هيبة
والنسوان في بلادنا جواهر
 
طب لو عندك حتة ماس
حتخلّيها مداس للناس؟
ولا حتقفلي اوضة عليها بميت ترباس
يمكن حتى تأجري ليها جوزين حراس
 
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل اللي لا ليه اخر ولا أول
اللي طلعت لقيتني صعيدي
 
لو كان بايدي كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟ هو انا كلب ؟
 
ثم العبرة ماهيش في اللبس
أصل المشكلة مش فى اللبس
أصل المشكلة عندك .. عندك
قلت حاسيبها وبكرة تحس
بعده تحس.. بعده تحس
ده انا لو جبس كنت زعقت
 
ماشي صداقة وماشي زمالة
بس ماجَتْش على الرجالة
ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
اني بحبك  واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير
 

قصيدة الواد كبر عن جمال مبارك

Mohamed Salah Mohamed