vvvv

شعر

Facebook profile:
https://www.facebook.com/M7mdess16
lyrics:-
اخِر جواب
كان فيه بَوادِر الإنسحاب
لَجل الخروج م الإكتئاب
...بالفضفضه.
اخِر جواب مش مِن فَضَا
ومهوش عِتاب.
ده عَشان اكَمِل راضي مُجمَل سِكِّتي
مقصُدش منه إنى ناوي نكون سَوا
بالعكس تأثيرِك فَلَت من جتِّتي...
زي الهَوا.
مَبَقِتش بسرَح ف اللي فات مِن عُمرِنا
مَبَقِتش بزعل او بخاف او بَرتِجِف
شكل الحياه راح م المؤكَد يِختلف
والراحة دايما تِتحسم حَسَب الدوا
حتي الورق..
مبقاش يزورني ف وِحدتي
علشان اسيبلِك فيه حَصِيلة كام سنه
وان الفُراق خلَّاني نُسخَه لمُنحني
او حَتي اقولِك إني مفضِلتش انا!
لَجلَن ترُدي وتكتبي...
فياريت بلاش تِستَعجِبي!
لو قولت إنِك بس هاجِس ع الوَرَق
وإنِك مُجرَّد شوق َوخَدني لمُفتَرَق
وإن إنتى قَش ساعدني لكن ع الغَرَق
ده لإن عُذرِك ف البعاد كان مُختَلَق
وإن إنتى كُنتي بتكدبي!
مبقِتش بسهَر ف الشتا تحت المَطَر
ولا حتي احِب الوقفه تحت البَلَكونات
مبقتش اصَبَر بيكي قلبي اللي انفطر
مبقاش فاضِلي ف ضِلي شئ م المُمكنات
جواباتِك اللي شالِتها عِيني ف نِنَّها
خوفاً عليها مِن التَلَف او م الضَياع
كَلِماتها كانِت أُكسُجيني لَكِنَّها
دابِت مِن الخوف اللي غيَّر الإنطباع
اسفَلت شارعِك اللي خَد علي خَطوتي
مبقاش يدوقها صُدفه مِن يوم بُعدَها
اسفَلت شارعي اللي إبتسم علي ضِحكتِك
مَعَدش يضحك تانى ليه مِن بَعدها
ضَمِّة إيديكي اللي إتعزمت ل حُضنَها
مَبَقِتش تِفتَحلي امَّا أخَبَط واطلُبه
مَبَقِتش تسمحلي ب عياط علي كِتفَها
مَعَدِتش تِتصدَر ل حُزني ف تِغلِبه
سَبَب الكَلام...شَرْح ل هلاوِس مُزعِجَه
مِش مِن دَواعي المسأله والإحتياج
ومَهوش جَرَس دقُّه الحَنين بالمَطرَقه
أنا بَحمي روحي مِن مَشاكِل الإزدواج
وعَشان مخُشِش ف إكتِئَاب ويهِّدِني
ويُدُوب هَوَس روح الهروب لو شَدِّني
وابقي ف طابور عرض الأمل ف يعدِّني
كان لازِم أبعَت وقتها أخِر جواب.

آخر جواب - محمد عصام

ديوان - جوابات حراجي القط لزوجته فاطنة احمد عبدالغفار في جبالاية الفار
موسيقي فيلم الارهابي لعمر خيرت

الأبنودي - جوابات الأسطى حراجي القط  - كاملة

احمد الطحان || كانت عيني واجعاني

follow Mohamed abdelfatah on Facebook :
 https://m.facebook.com/mohmad.abdelfatah.35?ref=bookmarks
---------------------------------------------------------
اول مكان القلب يرتحاله
الساعه واحدة بعد نص الليل
سهران بيكتب للحنين جوابات
ساب القلم و اتكتم و اخرّس
كل الشوارع لفه روحه في جبس
حس الشجر ببرود يديه لكن
ريحة الاماكن عايشه جوه النص
خرج من روحه في الشارع بدأ الحوار
اتنين في واحد يبقي كله تمام
كيفك يا صاحبي قولي عامل ايه
وازاي بتكتم صمت جوه كلام
و ازاي تنام في البرد مش لابس
ازاي ايديك تلجت و مازلت مش حاسس
افتحلي قلبك قولي ما تشاء
و مقالش غير "ادمنت يا صاحبي الفراق"
و بكيت في حضن القطن مقدرتش
احبس دموعي فيا طول الوقت
الورد خاني يا صديق الورد
بالوقت ايقنت الوجع مش سهل
و الحل ممكن يبقي اتفه شئ
غافلينه عمدا او بقصد الجهل
تعبان يا صاحبي بس ليه تعبان
غرقان في سد العشمانين غرقان
و ازاي يا صاحبي العشم
هيعدي بيا السد
انا مش حراجي القط
اكتبلها الجوابات
و استني يجي الرد
وضع العلاقه وضيع
كات فاكرة اني هبيع
كل اللي فات مني
علشان اراضيها
معزوره ممش فاهمه 
ان اللي فات مني 
و الله ميسواش
غير دمعتين منها
غير ضحكتين مني 
و الضحك مش ببلاش
" سطر الغياب في النص ممكن يطول عادي "
بكفايه بُعد الكفه مش ناقصه
كل الحكاية تنتهي برقصه
و بيت و اهل و شِعر خام
و خيال رخام يستحمل التكرار
و يشد اوتار السعادة باختصار
الحب مش محتاج يا عالم غير قرار
و احنا فيها و لا اقولك" انهي الحوار "
صدت في روحه روحه من تاني
اتمشي وحده بدون نقاش مع حد
لسه الاماكن ساكنه جوه النص
هذا المكان مثلا
يمكن يكون فاكره
الكرسي ده عـ النيل
شاهد علي التفاصيل
و البياعين عارفين
الشاي و حمص شام
و بتاع الدرة عارف
اتنين درة مشوي
بتنين جنيه وقتها
حتي الدرة حبها
و تقولي انسي و اعيش
ربك لبالمرصاد
و الصبر منغير صاد
البر وحده كفيل
ننهي العلاقه بدون
حاجه لبكا ومناديل
المجروحين فاهمين
ان العياط مش شفا
سابِك و قال بالشفا
سابت و قالت طُز
المجروحين كالرز
و انا كنت حبايه
من فدانين مجاريح
مستغرب اني صريح
انا برضو لسه هقول
عن بنت "بنت اصول"
انا اللي كان واطي
ازاي تقولي هسيب
و مقولش غير عادي
و ازاي تسيب واسكت
مكتبش حتي حنين 
مش عايزه حتي اسرد
قصتنا عـ الدواوين
الصمت كله انين
عارفين يا مستمعين
الشعر ده مخلوق
زي البشر من طين
بيحس بالتفاصيل
عيل في روحه جميل
و في وحدته كاتب
مكتوب عليه يدفع
لو غيره هيحاسب
و انا زي زي كتير
بالليل بنام في سرير
و بدفي روحي بشعر
عايش كاني كتاب
ملهوش غلاف خالص
عايش علي الذكري
رغم الامل ناقص
حلفتها بحبي
تديني رد اخير
بعتتلي ورق ابيض
كتر يا حلوة الخير
انا الغريب معلش
البنت لما تقش
يقف الولد ساكت
و انا خلاص هسكت
بطلت اغني حتي للطرقات 
بطلت اكتب للحنين جوابات .

سهران بيكتب للحنين جوابات | محمد عبد الفتاح

إهداء للفترة من " يوليو 2017 " إلى " سبتمبر 2018 "

كلمات : محمد عصام
https://www.facebook.com/M7mdess16

هندسَة صوتية وتوزيع : مصطفى الملواني
https://www.facebook.com/MustafaElMallawaniacc

الكلمات :
https://www.facebook.com/M7mdess16/posts/484955941985832?comment_id=485914351889991&notif_id=1537659983557617&notif_t=feed_comment

سالب ميم ( طلوع الروح ) - محمد عصام

ورجعت وحيد 
على حطة ايد اللي سابوني وحيد قبليكي

كدبة 2018 - الشاعر مصطفى ناصر

زي البيوت في الصِيف
ما عادش لقلبي حُرمة ..
وبقيت مَشاع ..
أتشاف بنور العين
ونور الصحبة
وخطوة العابر !
تفضحني نسمة شوق
تطير منها الستاير ..
وان غابت النسمة اللي بتبرد غيابهم
أغرق في عرق الغيبة .. تخاصمني السَّراير !
يشويني ليلي ع الملاية من القلق
والشوق ينغص عيشتي لو جفني اتقفَل
ما بقتش بسأل نفسي ( كيف بدأ الخلق ؟!)
دلوقتي بسأل نفسي امتى هينتهي ؟!
عقلي لما بيترمي في حجر المخدة بيتحرق
ما بقاش بيسأل ع الوجود .. أو ع العدم
بقى يبكي زي عيال حارتنا يوم شِتا
والأرض عكّاها المطر .. وما فيش نزول
وكأني ضايع وسط كوم إجابات !
قشّة في كومة إِبَر !
وما فيش سؤال لايق لأي إجابة ..
أنا كل حاجة عارفها حصلت امتى وازاي وبذنب مين !
لكن ما فيش صيغة سؤال ..
تقدر تقولك قلبي بيفكّر في إيه ؟
في نحس أكتر من كدا ؟!
أكتب قصيدة عشان ابوح ما القاش حروف ترضي اللي نفسي استنطقه !
جوايا ناس كلبشتهم لما اتقابلنا
عشمني فيهم ضيّهم وحلفت اصونهم
واكمني طيب عمري ما اديتهم خوانة
اديتهم المفاتيح ..
دلوقتي هم مكلبشين جوايا مش متكلبشين !
ورجعت بسأل نفسي ..
مين اللي محبوس جوا مين ؟!
طول عمري
باهراني اللمض .. الضوء خطفني
وكل نور بيشدني !
ما اعرفش أكتم قلبي بين اربع حيطان..
بالوقت
أدركت ان انا
رايح لموتي بقوة الدبان
وفضولي ألمس لمبة الصاعق !
..
على كل حال
القلب مفروط ع البلاط
والضهر مفرود للسما
وان كان دا قلبي ..
بس عمري ما اوطي اجيبه
زي كل اللي اتفرط على سكتي
دلوقتي
مش عارف انام !
والقلب بايت زي نص رغيف قديم ..
ما استطعموش غير اللي مالقاش اللي صَابح
وبقيت كبير
وشي مكرمش
قلبي ضافر بنت بيخربش في صدري !
كل اللي بينبهني على فرصة فاتتني
ما بقتش باعرف اقوله : "لسه بدري "
قلبي نغزني ..
قُلت ايه ؟!
عجّزت
جسمي اترعش
على وحدتي اتعكزت !
شَعري وِقع
وبقيت ببان أكبر ما انا
بتجيني فكرة موتي تعمل هرجلة
جوايا خوف محبوس ومتعلم شراسه
لو يوم طلقته
مش هيهجم غير عَليَّا !
مش عارف أبكِي
مش عندي وقت أضيعه
علشان أنزل مايه زايدة فـ نن عيني
سيبهم ووقت ما يقفوا على باب المهابة
هيكسروه
وهتبكي قدام البشر
زي العِيال !

-عبدالرحمن الدمياطي -

زى العيال - عبدالرحمن الدمياطي

لاسباب متعددة كتبت القصيدة و بدون سبب سجلتها و بدون سبب او تبرير ارجوك تسمعها ..

تفريغات الصندوق الاسود

قصيدة " من اسبوعين " للشاعر مصطفي عبدالرحمن 
من حفل ساقية الصاوي 10 يونيو 2019

البروفايل الشخصي  https://www.facebook.com/mostafaaboelaala

من اسبوعين - مصطفي عبدالرحمن

هندسة صوتية: احمد سعيد بكير
https://www.facebook.com/ahmedsaid14
الكلمات:
كنت أكبر منَّها بجروح كتيرة..
وفقد ياما
وييجي أكتر من وداع.. ومع السلامة
بذكريات ملهاش نهاية
بوحدَة مع تأنيب ضمير.. حزن وملامة
في انتصار كل الآلام ع الإبتسامة
وفهم قرارت الفراق..
أول ما تبقى يادوب علامة
كنت أكبر مِنَّها في فِهمِي لـ "بحبك"
كنت طفل كبير وانا بَخلِص لَها
وبقيت عجوز دلوقتي في شعور الندامة!

كل شئ كان مختلف وانتي معايا
كنت باصص للحياة بعينيكي.. ف بتظهر جميلة
كنت بضحَك سهل.. لمَّا بتضحكي
واحب شَعرِك يبقى سايب..
لمَّا كنتي بتنقليه.. بإيديكي كله لـ جنب واحد
كنت بعرف فيكي إيه من نُص كِلمَة
كنتي لما تنامي بسهر..
لجل اكون جنبِك إذا صادِف قِلِقتي
كات عينيكي جميلَة.. مش سكينَة تِلمَة
كات إيديكي رقيقَة.. مش متعاصَة دَمِّي
كانت الكلمات بتطلع ناعمَة.. مش مبرَد لـ قلبي
كنا شركاء في الشعور.. حزنُه وفرحُه
كنتي جَنبي..
معنى كل ما فيه جميل من قبل شرحُه
كانت الأيام مواصلَة.. آخِرها ليكي
كنت بدفع أُجرتين صبر ومعافرة
كنت برتاح لمَّا بتطمن عليكي
قبل لما الراحَة تبقى.. بيا كافرة
كنتي أول بنت أبقى.. مش خايف معاها
أبقى مش مكسوف وانا إيدي في إيديها
كل كلمَة بسيطَة كانت.. ليها تأثيرها الجميل
كل شئ كان حلو جدا.. قبل ما انتي تودعيني
قالوا إن البوسة لو في العين تفَرَّق
وانتي كنتي للأسف.. بتبوسي عيني!

مرِّت الأيام عليَّا ازاي كدة؟
كنت مسجون السنين دي كلها.. وخرجت منِّك
قاموا باركولي النهاردة عشان نسيتِك
كنتي لما بتوحشيني..
بكتب اللي انا عايزه ليكي في أي ورقة..
واقوم قاطعها لألف حتَّة
خدتي كشاكيل "100" مِنِّي.. في "وحشتيني" بس
شوفي هقْطَع قد إيه علشان بعاني!
وانتي هتدوسي في طريقِك..
أي حِتِّة ورقة فيها بـ خَطِّ إيدي.. يجوز "بحبِّك"
قصَدِت الأيام تعيد تاني اللي بيننا.. بشكل تاني!
شوفت فستان حلو جدا كان عليكي
قولت بالقسوة اللي متعلِّمها منِّك.. مش جميل
زي ما اتعَوِّدت اداري حاجات كتيرة
وزي ما اتعودت.. سيرتِك بتضايقني
هي أو سيرة النصيب
كنتْ أقرب ليا بكتير وانتي جنبي
شيلتي من كلمة "محمد"..
كل "ميم" ف بقيت غريب!
كان فراقك..
زي سَحْب الروح على فترات بعيدة
كل يوم بتِنقص حتَّة مِنِّي.. تزيدي إنتي
كنت عامل.. زي فاقد ذاكرة تايه في غُربَة
حد مقتول خد حياتي..
وعاش مكاني في الحكاية
كنت بصعب..
كل يوم على نفسي قدام المراية
لما اشوف واحد قصادي معرفهوش.. معايا
كنتي قولتي.. لو حصل وبعدتي عني
إننا هنندم إذا ماحضنتكيش
أديني اهو بندم لوحدي
كنتي تدعي.. ربنا يخلينا ومانبعدش ثانية
ربنا بَعدِك وخلَّاكي في مكان.. وبقيت لوحدي
ده اسمه تأثير الفراق.. من طَرَف واحد!

حتى انا كنت النهاردة.. في حرب بين اتنين "أنا"
بين اقولِّك "ليه مشيتي؟"
ولَّا أقولك "جايَّة ليه؟"
بين اقول اني "بَحِبِّك"
ولا اقولِّك " حب إيه ؟"
كنت بستناكي تيجي.. لما كنتي بتوحشيني
نظرَة كات ممكن تخليني ابقى احسن
كنت بتمنى تقوليلي "ازّي حالك"
كنت جايز ابطل احزن
بعد رجلين السنين ما داسِتني بيكي
ويمكن اكتر من طريقَة
جايَّة في الحلم تقوليلي "عايزَة نرجَع"
حتى مش هاين عليكي.. تكون حقيقَة!
كنت مش عارف اشوف في عينيكي غيرِك..
وانتي ماشيَة
سايبَة إيدي بقسوَة ل "كلاب" الدقيقَة
نبرِة الصوت حتى وانتي بتقوليها..
قلبي مش عارف يوارب بابُه ليها
بتطاردني الجملَة برَّة الحلم دايما
*
-"عايزة نرجع"
صعب جدا نبقى تاني
-"عايزة نرجع"
انتي ماتعبتيش عشاني
-"عايزة نرجع"
كنتي ياما تقولي نَفسِي
وياما قلبك كان أناني
-"عايزة نرجع"
مش كفاية عذابي في سنيني الأخيرة!
طلَّعي الصوت من وداني!
*
انتي والعالم مازلتوا متفقين عليا!
لسة برضو مصرَّة.. تنقلي الأوجاع عِزالي
شوفتي صحيتي الدمار ازاي في قلبي؟
بس بمجرد ما جيتي في مرَّة بالي
لمَّا خدتي قرار بعادِك.. كنتي قاسية
قاسيَة حتى عليا بتفارقي في خيالي!
كنتي بتمدي بإيديكي تغرَّقيني..
وانتي بتقولي بتأثُّر "خلي بالك"
كنتي بتزُّقي السهام تغرز في قلبي
وتسأليني بخوف ورقة "حبيبي مالك؟"
كله كان واضح قصادي في الحقيقة
بس خوفك والتأثر غمُّوا عيني
والنهاردة..
كنت مش عارف أكسِّب مين في حربي
كل ما انسى..
تيجي في الحلم ببراءة ورقَّة زايدة
أحبِّك اكتر
واتعب اكتر
تمسكي في الحلم إيدي.. وتسيبيني
وارجع انسى..
تيجي في الحلم ببراءة ورقَّة أكتر
تضحكي.. وتفكريني
إني من غيرِك بعاني
واني بترجاكي فعلا..
ماتجيليش في الحلم تاني!

اللي بيننا بشكل تاني - محمد عصام

لينك الفيسبوك
https://www.facebook.com/mohmad.abdelfatah.35

لينك اليوتيوب 
https://youtube.com/c/Mohamedabdelfatahofficial


لينك البيدج 
https://www.facebook.com/Mohmadabdelftahfans/


لينك التيك توك
https://vm.tiktok.com/ZSTDvLoo/


لينك انستجرام
mohamd_abdelfatah_official




من غير سبب واضح - محمد عبد الفتاح | mn3'er sbb wad7 - Mohamd abdelfatah

facebook account 
https://www.facebook.com/mohmad.abdelfatah.35

من غير سبب واضح - محمد عبد الفتاح | mn3'er sbb wad7 - Mohamd abdelfatah

Mohamed Abdelftah l محمد عبدالفتاح