(وحداني في اللمّة)

من نظرتي للجاي بحدد وِحدتي
وبقابل اللمّة على إنّي مش منهم
كان كل شيء واضح وباين شِدتي
مع إنّي والله كان نِفسي أقابِلهم

كان نِفسي أعيش لمّا
كانت هِناك لمّة
ولمّا كانوا هِناك
أنا كنت واقِف هِنا
ويسألوني اللمّة: إنت ليه لوحدك؟
ولا إنت مش زيّنا؟

ملقيتش رد ساعتها يكفي إنّي أقنعهم
غير إنّي واقِف هِنا ومُحاط بشيء مـ الهَم
يمكن فيه شيء مُختلف خلاني مش بينهم
زي إختلاف الألف عن أي حرف سِواه
أو زي مثلاً مُخدّر بيجري جوّة الدَم
خلاني وَحداني وبحِس بالمُعاناة
وهي دي المأساة..

إنّك تكون وَحدك مع إن حواليك
فيه خَلق بيحبّوك
وإن إنت تِنساهم ، وهمّ فاكرينك
أو بس يفتكروك أول ما بيقابلوك

مَلعون أبوك يا حُزن خليتني
أكرَه سِنين العِز في شَبابي
مَلعون أبوك يا حُزن ذليتني
هو إنت مش لاقي مكان
غير عند بابي؟

سيب إكتئابي في حالُه مش ناقِص
والوِحدة دي خُدها مش عاوزها
الوِحدة خلتني أعيش ناقِص
واللمّة أهي بعيدة ، وأنا مش شايفها

وبمشي في إتجاه اللا إتجاه وأنا تايه
ومستني الطريق هو اللي يلقاني
وكإني بقنع نَفسِي إن أنا لمّة
مع إنّي كنت ساعِتها وحداني

والوِحدة كانت واضحة من صوتي
أو بردو ممكن تشوفها في خطوتي
والوِحدة ليها جزء في سكوتي
وهي عامِل أساسي في إنتهاك قوتي

واللمّة كانت سُكّر قهوتي
ف القهوة صَبَحِت سادة كالعادة
وأديني قاعد وَحدي بتألم
يقاطعني صوت جرسون بيتكلم
ويقولي: تشرب إيه؟
ف أنسى إن أنا لوَحدي
وأقوله: أكيد قهوة
خليها قهوة زيادة
مع إن وِحدتي بتتلخّص
في قهوتي السادة

وأديني يا سادة بكتبلكوا لأنّي
كان نِفسي أعيش وِسطكم لكنّي
عايش مابين الوِحدة وإتعوّدت
مستنيين إبداع إيه منّي؟
وأنا كل ما أكتب نَص ألاقيني فيه جوّدت
لكنّي إتعودت..
ومابقاش بيفرق شيء
ولا حتى مستني طريق
ولا حتى مستني صديق
والوِحدة عادي يعني شارياني

لكنّي تاني للأسف بكدب
ده لأن أنا حقيقي بعاني
ولهذا السبب قررت إنّي أكتب
إنّ الوِحدة قاتلاني
وإنّ الوِحدة بايعاني
وإن الوِحدة خلتني
أعيش بينكم ووحداني
وسلبت كل شيء منّي
وخلتني حزين جداً
وحتى الحُزن ده عماني

وبطلب منكوا يا لمّة
تخلوني أكون بينكم
لأن الوِحدة دي لمّا
تزيد ع الحد أنا بعاني

لأن الوِحدة دي (لمّة)
(زادت) ع الحد وأنا بعاني

#مؤمن_بسيوني

(وحداني في اللمّة) - مؤمن بسيوني

اليوم بدأ
والناس بتصحي تروح لأشغالها
و أنا روحي لسه بتسعي بالفطرة مبسوط بترحالها
بتنفس الأشياء مش أكسجين خالص
بتنفسك / صورك / او كل شئ ايدك
خبطت بخفه عليه
بتنفسك و اشتاق
مريض بنفس الداء
دايما بميل للوحدة مش قاصد
و في وسط أصحابي العيل الفاسد
اللي اترمي في القهر من صغره
متكتريش وجعي و تقولي مكتوبله
عارفه الزمان قاسي
بيعلم الانسان
طب ليه مبتعلمش
كل اما كنت العب في الحارة بالاحجار
و ارميها عني بعيد
دايما بروح و اتعب علشان الاقيها
دلوقتي لما كبرت
بقيت بعيط ليه علي حاجة برميها
صاحبي اللي ياما سألني عن قرارات
دايما باخدها في عز من انا خايف
قالي النهاردة عن الفراق حكمه
"قالي النصيب أعمي انت اللـ مش شايف "
انت الغريب فينا
مش كنت قولت زمان
ان البكا للناس والحزن مش لينا
دلوقتي كل الناس شايفه الوجع فينا
الوقت سكينه و مكتفه دراعي
كل الوجع في الناس
من بعض اوجاعي
كان نفسي افضفضلك
و احكيلك المعاناه
من وجعي بكتبلك
كل اللـ بتمناه
ياللي انتي ساكنة العين
و مجمله جفوني
حطيت عياط قلبي
رنات لتليفوني
كل اما حد يرن
بيزيد في قلبي الشوق
صوتي اللي زي الجرس
بقي زي شريط خلصان
و بقيت بحن عشان
مقدرش اعيش دونك
ليه الدموع المربكة
بتحلو في عيونك 
ازاي فارقتي بدون
تنهيدة في وداعنا
و اصحابك الاندال
بيغنوا لـ وجعنا
قربتي ليه من ناس
حالفين ما يجمعنا 
لو حتي حضن مجاز

البيت حيطانه ازاز
متحدفوش الظلط 
صدقنا ليه الغلط
كدبنا ليه الصح
متكدبيش علشان 
انا و انتي مش عايشين
بنموت بنفس الجرح 
مبلومش غير نفسي
ازاي اخون واببرر الاخطاء
و ازاي رميتي في حضني برفانك
انا جوه مني حاجات حبيت اقولهالك
بس انتي مش فاضيه
خدتي اللي فاضل بينا و مشيتي
خدتي الحاجات الحلوة من بيتي
كان نفسي بس احضنك
و اقسم معاكي الهوا
اقصد نفس خدتيه
بعد الفراق سيبتيه
و انا خدته في الرئتين
لكن بفعل الوقت
والحرق في الاعصاب
مبقاش نفس في الرئه
بقي دمع نوعه تقيل
ينفعني وقت البكا
مبلومش غير نفسي
كل اما تيجي
فـ لحظة علي بالي
بستني يوم ينتهي
وأبدأ في ترحالي
وأتنفسك وأشتاق
مزيكا اه مـ الفراق
هي اللي باقيالي
كان نفسي تبقي
زي ما اتمنيت
"ام لعيالي"
كام نفسي لكن منطقي
مش اي شئ نتمني انه يكون
يكون
ولا اي طير اتكسر
يقدر يعيش مسجون
انا زي هذا الطير
مكسور و مستني
تليفوني لما يرن
مكتوب عليه اسمك
يمكن ساعتها افوق
دلوقتي رايح انام
بتمني من ربنا
نتلاقي من تاني
لو حتي ف الاحلام ..

مبلومش غير نفسي | محمد عبدالفتاح

انها - en7a

مش عمرو حسن - محمد خالد (ميجو)

بعد الغروب - B3DELGROP

انا مش حزين | محمد عبدالفتاح

علي حسن | عشوائي

زي النهارده من سنين

follow Mohamed abdelfatah on Facebook : 
 https://m.facebook.com/mohmad.abdelfatah.35?ref=bookmarks


محمد عبد الفتاح | السنين السلف - Mohamed abdelfatah | elsenin elsalaf

مهواش سند لـ ( تولين ادم )

قصيدة ريم - أحمد حكم

facebook account 
https://www.facebook.com/mohmad.abdelfatah.35

محمد عبد الفتاح | السنين السلف - Mohamed abdelfatah | elsenin elsalaf

Mohamed Abdelftah l محمد عبدالفتاح