والله وشبت يا عبد الرُّحمن ..
عجّزت يا واد .؟
مُسْرَعْ؟
متى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمن.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية ..
وباين حاحيا كمان وكمان .
عشت كتير .
عشت لحد ماشفتك عجّزت يا عبد الرحمن.
وقالولي قال خَلَّفت
وانت عجوز خلَّفت يا اخوي ؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت ؟
وجايبهم دِلْوكْ تعمل بيهم إيه ؟
على كلٍّ ..
أهي ريحة من ريحتك ع الأرض
يونسُّوا بعض .
ماشي يا عبد الرحمن .
أهو عشنا وطلنا منك بصة وشمة .
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!


 

ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!
يو…..ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت.
طيِّب يا زمان..!!



 

إوعى تعيش يوم واحد بعد عيالك
إوعى يا عبد الرحمان.
في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.
ساعتها بس ..
حاتعرف إيه هوّه الموت.!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.
زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب ..!!
قِدِم البيت.
اتهدت قبله بيوت وبيوت.
وأصيل هوه ..
مستنيني لما أموت ..!!
حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟
حاجي ياعمة وجيت ..
لالقيت يامنة ولا البيت ..!!

قصيدةيامنة ( مع الكلمات ) -عبد الرحمن الأبنودي

اهداء للجنود الي جالهم اومر إنسحاب في حرب 67 ورفوا التنفيذ دفاعا عن تراب مصر :

إنسحبوا
كان اللاسلكي بعيد 
والعسكري مسمعش

إنسحبوا
شوفوا العجب يا ولاد
العسكري مرجعش
إنسحبوا
أطرش ده ولا صنم
إرجع يا جندي بيادة

دخل العدو العريش إرجع خلاص بزيادة
العسكري سامع
لكنه واد مجدع

شال آربيجيهه وضحك إشمعنى أنا اللي أرجع ؟
وقف الزمن مذهول ساعتين بيشاهد

الجندي قام كبر المدفع إتشاهد
الدبابات ظهرت " إرجع يا جندي نظام "


ده كان كلام القيادة 
و ده بردو وقت كلام ؟

وقف الولد ددبان
يا سادة يا سامعين

صادهم كما الدبان
محروس يا واد من العين

الدبابات صفين
إتفاجأوا وإفترقوا

على كتفه كان مدفع
وعلى الجبين عرقه

غطى العفار النار
ولا حد عاد شايف

والدبابات بتهل
وده بردو مش خايف

الضحكة على وشه
ما تقولش بيصيف

ولسه الزمن واقف
مبسوط ومتكيف

الدبابات كترت
والكترة غلابة

والقلب لو مؤمن
ولا ألف دبابة

هتقولوا مات الولد
أنا أقولكم لأ .. عاش


ما الجنة ولا فيها موت
ولا تتدخل .. ببلاش

إنسحبوا - هشام الجخ

هشام الجخ _ طبعا مصلتش العشا

كاريوكى ناس وناس 2015 ... من الفركيكووو

ا وعدى ع الأيام
بتعدّى بينا أَوام
يا وعدى ع الأيام
بتعدّى بينا أَوام
و بتدّى ما بتدّيش
ندبل و هى تعيش
غرورة .. غرورة مابيدّيش (مش بإيدى)
بضحك مع الأيام
أضحك و لو أحلام
مين؟ .. مين ؟ .. مين؟
مين أدّها الأيام؟
يا وعدى ع الأيام
يا مراكب النسيان
عدّى فى بحر اليوم
يا مراكب النسيان
عدّى فى بحر اليوم
ما كنت يوم ندمان
و لا عمرى كنت بلوم
لكنّى قلبى كتوم
بضحك مع الأيام 
أضحك و لو أحلام
مين؟ .. مين ؟ .. مين؟
مين أدّها الأيام؟
يا وعدى ع الأيام
يا وعدى ع الأيام
بندّق بابها كتير
ليلها قمر و غيام
و غريبة فى المشاوير
يا وعدى ع الأيام
بندّق بابها كتير
ليلها قمر و غيام
و غريبة فى المشاوير
و شوك فى حضن حرير
بضحك مع الأيام 
أضحك و لو أحلام
مين؟ .. مين ؟ .. مين؟
مين أدّها الأيام؟
يا وعدى ع الأيام
يا وعدى ع الأيام
بتعدّى بينا أَوام
يا وعدى ع الأيام
بتعدّى بينا أَوام
و بتدّى ما بتدّيش
ندبل و هى تعيش
غرورة .. غرورة مابيدّيش (مش بإيدى)
بضحك مع الأيام
أضحك و لو أحلام
مين؟ .. مين ؟ .. مين؟
مين أدّها الأيام؟
يا وعدى ع الأيام

أحمد منيب - يا وعدي ع الأيام -  مع كلمات الأغنية

أبو هيبة - جبل الحلال

بتشحتوا
من بعض حلم تحققوه
و تداروا فيه طول انتظاركم للدفا
و بتنحتوا
فـ الصخر تمثال تعبدوه
لكن ايديه زي العيون متكتفا

بتهربوا من جرحكم 
مـ اللى يصارحكوا بضعفكم
عايزين كلام حلو و خلاص من غير تمن
مع إنى واحد منكم        
ما أقبلش اركع زيكم
بأصرخ فـ وش الدنيا وفـ وش الزمن

ميهمنيش العمر يقصر او يطول
مادام هعيش هعيش وأنا بـ أصرخ وأقول

أنا صوت بيلعن صمتكم
و فـ كل خطوة بتسمعوه
أنا صوت بيجرى فدمكم
ومستحيل هتسكتوه
---------------------------
كلمات: أنطونيوس نبيل
ألحان: بسمة فرح
توزيع: بولس جرجس
جيتار: مصطفى أصلان
شيللو: محمود صالح
ميكس وماستر: ميشيل عبد الملك

ابتهال فكم لله من لطف خفي - بهاء سلطان 2020

Mohamed Fadel Buffon