
الليل ملاح
تايه سواح
لا يبوصل شط
الليل مشحون أسرار وشجون
وألم ونغم
وكاسات ونايات ودموع وآهات
وعبر وحكم
***
ومشيت في الليل
خجلان مكسوف
إكمن الليل عريان مكشوف
أفراح الناس
وجراح الناس
على صدر الليل عناقيد وصفوف
وعيون الليل والضلمة جبال
فاردين على وش السما غربال
ألماظ مبدور
في كاسات بنور
يفرش للنور ع الأرض خيال
***
ويشق سكون الكون
أرغول
ونغم فنان ثاير مخبول
وعليل على فرشه بيتقلب
ويحايل جرحه المداري
ويقول
يا طبيب قلبك طيب
إسمعني
ح أقولك أسراري
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
أنا دقت الجرح وخدت عليه
يسقيني المر
وبرضه اسقيه
من بحر الصبر اللي ف قلبي
ح تقوللي بتشكي امال من إيه؟
ولا من أوجاع
ولا شوق ملتاع
دنا عمري إن ضاع
مش ابكي عليه
أبدا يا طبيب
يا طبيب دنا جرحي ملوعني
وساقيني الحنضل من كاسي
والنار في ضلوعي بتلسعني
وأنا لسه صغار
والعيا قاسي
ولا عمر الليل مرة سمعني
عليت الآه على أنفاسي
أبدا يا طبيب
لكن يا طبيب أنا بابكي صحيح
وباقول الآه
زي المجاريح
ودموعي في عيني بتتألم
وبتتكلم
على قلب جريح
مسكين
كان أمله يحب سنين
ويلم الحب ف عشه اتنين
واتهنى معاه
وإن قال الآه
أنا اقول له يا روح القلب
آهين
بس أنا لا بيدي
ولا بودي
دا قدر مقسوم
قدر لحبيبي يعيش بعدي
في الهوى محروم
أهودا اللي وجعني
وخلاني
حطيت الشكوى على لساني
إنما وحياة اللي قاسيته
وحياة الأمل اللي بنيته
وحياة اللي جرحته
ولا فرحت معاه
ولا هنيته
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب؟
***
وينام الصوت
والكون حواليه
ساكن نعسان
وكأنه مات
رمي تقله عليه
سكت العيان
***
الكاس له ناس
والليل مجالات
والحان مليان والناس مزاجات
 ومجال الكاس
أشكال أجناس
مليان حواديت
مليان رويات
***
ونزور في الليل دنيا الخمار
ونلاقي الكاس
ع الناس دوّار
ويموت الليل على باب الحان
حيخش ازاي والدنيا نهار
ونفوس وقلوب كده ع المكشوف
عريانه تمام
وتعالي نشوف
***
شوف دا اللي هناك
قدامه كاسين
مع إنه لوحده
ما هوش اتنين
والناس بيبصوا
ومش فاهمين الكاس دا لمين
والكاس دا لمين
أهودا اللي بنظرة عين
شبكوه
وفاتوله كاس مليان
وفاتوه
وحكايته طويلة
وهمه تقيل
وح اقول لك إيه وأعيد لك إيه
رايح يملا عيونه بحلم جميل
بياع السهد ملا له عينه
***
وترن ف جوالحان
ألحان
نشوانه تخلي المولد هس
وغزاله بتتغزل ف حصان
بتقول له
إحبك أنت وبس
ويفز هنا سيدنا المنظور
ويطب الكاس ف إديه
مكسور
ويقول غشاشه
حتلعب بيك
ويرد التاني عليه بفتور:
طب وانت مزعل نفسك ليه
حشري وسخيف
وح قولك إيه
ومانولي يقول
” موش أندك خق”
والسامر يضحك لما يطق
ويحط الحشري عنيه
في الأرض
وكأنه لحن في الدين
والفرض
ويقوم
يطوح مرة يمين
ويميل زي البخت شمال
وف جوف الليل
يغرق مسكين
لا يغير حال
ولا يشغل بال
***
 الحظ حمار
من غير حمار فقد التمييز
زي المجانين
هجر البساتين سكن الدهاليز
والحظ بطبع غباوته عنيد
ودماغه حديد
لو يعند حتى على الغزلان
ينسخطوا معيز
ونسيب دهليز
نخش في باب
ونعدي الباب ندخل سرداب
ونلاقي ضحايا الليل واقفين
والحظ بيلعب بالأعصاب
ترابيزة عليها نمر بنظام
من واحد يمكن لما لألف
والدنيا بزي ما هي تمام
على هيئة كورة
تدور وتلف
وشنب مفتول
يصرخ ويقول
 اللقمة بتنده أكالها
والرزق نصيب
والدنيا دايرة
ف احولها
زي المجاذيب
 الصبح معاك
والضهر عليك
والحظ لو ادى
ما بينقيش
جربها
ويمكن لو تديك
من جودك برضه
ما تحرمنش
قرب قرب
جرب جرب
ودي لعبة حظ
ما فيش تبكيش
***
والكورة تدور
زي المقدور
تحرن على ناس
وتجامل ناس
والشيخ سلمون شعبان مندور
واقف على أعصابه ومتحاس
يعلب ع الستة
الخمسة تصيب
ينقل ع الخمسة
الخمسة
تخيب
وخلاص الحظ اداله قفاه
والحظ أن ولى
بيبقى عجيب
كلها ساعتين
وصريخ
سلمون لعلع مقامات
نهاوند ورست وسيكا وصبا
وحجاز وبيات
يا فلوس الناس
يا خراب البيت
يا نهار مشوم
طب المسكين من طوله ورفص
يظهر مات
والناس ملهيه ف أحوالها
بيدوسوا عليه
وبتاع الكورة مشغلها
ح يبطل ليه
واللقمة بتنده أكلها
طب ودا كل إيه؟
***
الشارع نايم تحت جناح الليل همدان
وعيون النور
تعبانه بتنعس ع العمدان
والكون ملفوف
بعباية
نسجها الليل بالخوف
وف بحر الضلمة رأيت على بعد
شبح
حققت بعيني
لقتها يمامة وكاسرة الطوق
كرابيج الليل
ناقشينها جراح
من تحت لفوق
والأسى ف عينها
مصحي الشكوى تقول حواديت
حواديت
ما لهاش علاقات بالشوق
وليالي الشوق
مسيت
ورميت على الحلو سلام
قالت سلامين
أنا قلت لوحدك ليه يا حمام
ووليفك فين
مالك بالليل وجبال الرعب
خليك يا حمام
عيش للحب
شالت بجناح
حطت بجناح
ورتني جراح
تحت الجناحين
وقالت لي
زمان الحب ما راح
وبقي لنا سنين في الليل ضايعين
خد مني الليل
واداني الليل
ورميت له الغالي بسعر زهيد
وسقاني الشهد ودقت الويل
وكساني حرير ولبست حديد
وعرفت الناس من الراس للديل
وآمنت بأن الكل عبيد
وقالتها وطارت في ثواني
وانا شارد وخيالي يصور
وغمزني الفجر وصحاني
ولقيت الكون بادي ينور
وصحيت من غفوة سرحاني
 على صوت بيقول
 الله أكبر

قصيدة الليل .. أحمد فؤاد نجم

إلى سمر..
مرآتي الصافية.

برواز قديم - مزيج

كلمات عمرو حسن 
الحان يحيي نديم 
22-3-2014 حفلة الساقية 
تسجيل : خالد أبو بكر

كان بلياتشو متخصص
يموت -قدامها تضحكله
و كان عارف بيبنى إزاى
ملامح ضحكة على شكله
وقف على كرسى قدامها
و شد المشنقة بايديه
و هو لأنه بلياتشو
مقالشى هو نفسه ف إيه
دا كان لما يشوف دمعة
يروح و يشيلها ف المونتاج
و كان لو يوم يعوز ضحكة
يروح يرسمها بالمكياج
وقف على كرسى قدامها
و شد المشنقة بايديه
و جه واحد وقال وقّف
و ضحكوا الناس على الإفيه
فضل يضحك على نفسه
و مش عارف بيضحك ليه !!
دا كان بلياتشو متخصص
يموت قدامها تضحكله
و كان عارف بيبنى إزاى
ملامح ضحكة على شكله
وقف على كرسى قدامها
و شد المشنقة بايديه
دخل بدماغه ف الحلَقة
و شدوا الكرسى من تحتيه
وهو لأنه بلياتشو
مقالشى هو نفسه ف إيه
و ف المرة دى تحديداً
مجاش واحد كما العادة
ف آخر لحظة قال وقّف
و بص ف عينها وقت الموت
تخيل وقتها شاف إيه ؟
لقاها واقفة بتصقف
مع الجمهور على الإفيه
و راح مع دوشة السوكسيه !!!!!


بلياتشو - عمدان نور Gazaga

كلمات وأداء : مايكل عادل
ألحان وتوزيع : شادي مؤنس
غناء : دياب أبو زياد وشادي مؤنس

العازفين
احمد عبد الستار - كمان
جون - ناي
ايمن صدقي - ايقاعات
حسام ناهد - تشيللو
شادي مؤنس - عود

الكلمات

قبل الكلام ما بيتكتب وبيتشطب
قبل اختراعهم للدقيقة بكام دقيقة
قبل اختراع الكدب والسكك الغلط
قبل أمّا أصلا نكتشف إيه الحقيقة
قبل اكتشاف ان الحنان شبه العَبَط
وان الطريق المستقيم بين نقطتين أصعب طريق
كان اللي باقي في الحياه أبسط كتير
من إن ضحكة تتسرق تصبح مفيش
أو إن غيرك يقتلك علشان يعيش
علشان نعيش..
لازم نكون وقت اللقا
فاكرين معاد الافتراق
لازم تراعي فـ وحدتك أمَل اللقاء
لازم تراعي في الزحام
عدم الدوام
واعرف بإن الاشتياق قد لا يدوم
وانك في اخر التجربة
لازم تقوم..
علشان تعيش..

.. علشان تعيش
بطّل تفكّر في الخلود
أعصر في أوقات الفَرَح
والابتسام وقت الأمَل
فكّر في إن اللي بيمشي
لن يعود
أعصر في أوقات الحنين قبل اللقا
فكّر في إن أكيد فيه ناس متشوّقة..
علشان تعيش..

علشان تعيش..
قابل جنونك بابتسام
قابل معاركك في الحياة من غير سلام
علشان تعيش..
اعرف بإن قضيتك ليها تمن
وهاتدفعه
مهما يطول بيك الزمن
علشان تعيش..

علشان تعيش..
إنزل على الأسفلت وامسح دمعتك
والمس دماء سالت عشان حريّتك
واحجز مكانك في الصفوف
حدد ملامس كف إيدك في الكفوف
يحرم عليك تلمس كفوف الخائنين
حافظ على الفكرة اللي عاشت من سنين
حافظ وعدّي الاختبار
علشان تعيش..
علشان الدنيا بتقلب فجأة بدون إنذار..

"علشان الدنيا بتقلب فجأة بدون إنذار
وعشان الناس علشان الجنة
جابولنا النار
ولأن العالم فجأة بيفضى وتبقى وحيد
وعشان الضلمة وشيل الهم
ولإنك لو هتروح للشارع
تغرق دم
والزحمة هتخلص من حواليك
من غير أعذار
والناس لو شايفينك طيّب
هايقولوا حمار
ولعدة أسباب اتقالت..
هتروح لبعيد
بالتالي هتبدأ م الأول..
فأكيد مشوارك هايطوّل..
وحنينك لحمارك ياخدك
على هَمّ جديد..


علشان تعيش - مايكل عادل وشادي مؤنس

Black Theama-كل مرة بدق باب

الشاعر أحمد النجار و أحمد الطحان .. مونولوج.MP3

شفطة بن

سيد: حاسس اني صغير اوي اني سايب ماما تفتكر اننا مابنخلفش بسبب شاهندا مش بسببي انا, بس والله اكتر من مرة حاولت اقولها ان العيب من عندي, بس شاهندا منعتني, شاهندا مش عايزاني اتكلم!

سنية: شاهندا أصيلة يا سيد .. مارضيتش تحرجك!

سيد: يعني هو الاحراج  اللي هيغير الحقيقة؟!

سنية: شاهندا استحملت كتير .. ولسة .. صدقني أنا ..

سيد: مصدقك .. انا اناني! كل كلمة كانت ترميها ماما لشاهندا تضايقها .. كانت تصعب عليا .. هي مستحملة حاجة مش فيها .. والاقي نظرة في عينيها اني انا اللي صعبان عليها .. انا كان نفسي في عيل منها برضه .. كان هيضيق المسافة اللي عمالة توسع بينا كل يوم!

سنية: يا خسارة يا سيد! خسارة سيد وشاهندا بتوع زمان .. يا خسارة الحب اللي كان بينكوا!

سيد: كان؟!! انتي شايفة انه "كان"؟! ولا هي شايفة انه "كان"؟! ولا للدرجة دي باين انه خلاص؟!

سنية: يا سيد انتوا اتبدلتوا .. بقيتوا سيد وشاهندا تانيين ..

سيد: شاهندا اتغيرت!

سنية: مش شاهندا بس .. انت كمان اتغيرت ..

سيد: بقيت اوحش؟!

سنية: .......

سيد: انتي الوحيدة اللي ممكن تقوللي الحقيقة .. انا بقيت اوحش؟!

سنية: دوَّر على سيد اللي حب شاهندا وهي حبته ..

سيد: يوووه .. تفتكري هعرف؟! هعرف ألاقي سيد وسط الزحمة دي؟! أنــا جــوايــا زحــمـة! زحمة خنقاني, وعشان مغرقش في الزحمة دي .. كان لازم اقف فوق كل حاجة .. عشان كدة الكُل شافني فرعون! ومــين مــش فرعــون؟! امي فرعون ماسكة عصاية الامومة .. وسعد فرعون ماسك عصاية الدين .. حتى نبيل .. ماسك عصاية الحرية!

سنية: وانت ماسك عصاية ايه يا سيد؟!

سيد: السُلطة! .. مش عارف .. ماكنتش عايز امسك حاجة .. كل دة كان غصب عني ..

سنية: لأ مش غصب عنك .. انت اللي اخترت!

سيد: ........


مشهد من مسلسل موجة حارة _ انا جوايا زحمة .. مين مش فرعون؟

Youssra El Hawary , Concert in Alginina theater Friday  November 2 

يسرا الهواري| مناظر| Youssra El Hawary |Manazer

يبكي ويضحك لا حزناً ولا فرحاً كعاشقّ خطّ سطراً في الهوى ومحا 

قلبٌ تمرّس باللذات وهو فتاً كبرعم لمسته الريح فانفتح 

Yabky W Yadhak - Zein Mahmoud يبكى و يضحك - زين محمود

الاغانى 
ام كلثوم .. سلاماً شباب النيل
ابكى انزف اموت
محمد اسامه .. انا بابا يله
REV .. يا ثوره قومى

مشاهد
محمد الفراج وحسن الرداد .. مسلسل الجماعه
 اشرف عبد الباقى .. ايس كريم فى جليم

شعر 
احمد فؤاد نجم .. قصيدة العنبر
شريف حفناوى .. اللامرئى
ست البنات

#محمد_طلعت

Yabky W Yadhak - Zein Mahmoud يبكى و يضحك - زين محمود

Mohammed Aazab