ماشي و مش راجع كامله -محمد عبد الفتاح

.انا عمري م هبكي عليكي -محمد عبد الفتاح

اللي جاي زي اللي فات -محمدعبدالفتاح

اول فصول الروايه ..
"مشهد حزين"
كل الجموع مستغربين
من واد بيقوله شاعر
كل شعره كلام حزين
و دموع و كبت
وهي بنت بنوت
بتحبه لكن حب مشروط
 حب حزين -مبسوط
عارف احساس الفرحان
و طول الوقت قالبها كآبه و بيعيط
ده يا اما عبيط يا بيستعبط
نفس الاحساس كان موجود
و عشان تنجح اي علاقه
لازم احساس الحزن يسود
فِهم الجميع ليه الألم
لكن في شئ كان الاهم 
يمكن اهم سطور قصتك 
ان سر سعادتي 
ضحكتك 
وان سر بكايا و بكاهم 
كلمتك 
خلينا اخوات ..
اخر فصول الروايه الحزينه
فصل السموم من فم المَلاك
ف اخر حي ف المدينه
و اول اجزاء الهلاك
كان البطل مش بطل
حارب بكل م اوتي من كَسل
أصبح بطل
"بطل العالم ف البكاه خلف الاسوار "
حارب ب قلمه "احلي بنت "
من معشر الاشرار
 ف اصعب مراحل قصته
معرفش ياخد اسهل قرار
كان البعاد اسهل طريق
صمم يكمل
مرمي ف بحورها زي غريق
و برضو متحمل
لساه بيكتب ليها شعر
لساه بيتامل
ف كل تفصيله من روحها
ازاي تقولو عليه دبحها
وهو ميت الف مره
وهي مره واحده بس
يشهد عليه كل الحاجات
رغم القساوه ف المعامله
كان يحس .. بانها
ضلعه اللي ناقص
كان يحس ب انها
كل النواقص اللي يوم هتكمله
والحلم هي وهي قادره تجمله
لو كان كابوس 
"مشهد ختام"
وسط الزحام 
كان نفسه وسط الحرب يحضنك 
و تنتهكو حرمه المسافات 
من غير حسابات للتبعيات 
الحرب مابين اتنين حابين 
وجيوش من افكار و مشاعر 
و انت اكيد خسران فيها 
مين قالك تدخلها يا شاعر 
اركع و اعلن الاستسلام 
منتش قد الحرب مش قد الحب 
فمتحبش
 و تطلع بلاويك ف قصايد
لو دايما مسكوك مستصاط 
ف المره الجايه تكون صايد 
لو عايز تلعب ب البنت 
صدق كل كلامها الاهبل 
لما تشوفك استسلمت 
اعمل زي م هي بتعمل 
ف هترجعلك و يكون ردك
انا اسف جدا يا عزيزتي..
مش قادر اكمل...


محمد عبد الفتاح - خلينا  اخوات

نظرة عنيكي ليا اثناء الوفاه
كانت كفيله ل عوده الروح للحياه
ونسيان المرض
ساعتها القلب دق فوق حدود المفترض
مكنتش دقه و السلام
ده كان ايقاع
يشبه ل موسيقي ال jazz و ال rock
"دوم دوم تك"
اجمل ايقاع ف الدنيا ممكن تسمعه
البكاه مقدرش حتي يمنعه
الجسم ميت و الروح بترقص
فرحانه بيكي يا طيبه
و السما بتمطر اغانيا
و الشمس تشوف المشهد تتضحك
معرفش عليكي ولا عليا
و ازاي اصلا شمس بتتضحك
و ازاي صوتك بقي زي انغام
رغم انه نشاز
حب ايقاع ال jazz ف احلو
الجو البرد ف حضنك كان اجمل جو
و النور المرسل م الشمس لعينيك
انعاكسه جه ف قلبي زود الدقات
تاه وسط لغبطه المشاعر
مش مصدق انه مات
الجو برّد في الشتا
والرصيف عريان محتاج جثث
محتاج غطا
الشتا محتاج نهار شمسك
طلي عليا ب ضحكتك
خليني ادوق شهدك
انعكاس روحك ف روحي
خلي طعم الفرقه اكتر من وجع
ازاي روحين يتفارقو و هما اصلا روح
ازاي يا دنيا بتخدي فينا الجدع
و بتحدفينا ل الف سكه و 100 طريق
و احنا اللي فاكرينك براح
و انتي مقبره الجثث بتحاربي ف الارواح
من غير سلاح
 الضحكه مِن مَن عشقو الرصيف
ساكنين ف حضنه  هتوجعك
و الحلم ف عيون الغلابه هيمنعك
اسمعي مَن عاش حياته يسمعك
انا واحد عاش ميت بالوحده
و مفيش ف العالم ولا وحده
بتحب وحيد ف الوحده تزيد
و مفيش الاها اللي خدتني من دنيا الهم
شوفت ف عينها بواقي الحلم
شوفت ازاي ف ملاك ع الارض
بيحول العاشقين ل كمنجات
كل كلامهم بينو سكات
صوتها يرقص روحي و روح كل الاموات
روحها الطاهره ف اخر السهره
غنت مووايل و اغاني
لساني يا بنت القلب شاركي
اياكي تعيطي علشاني
بخاف منك و من دمعك
بخاف اقولك بحبك يزيد الحب عن حده 
و اغرق جوه بحرك و انا اصلا منيش قده 
بخاف ضحكتها توجعني ف اموت خايف لتنساني 
ولما تشوفني متكفن تموت هي فاموت تاني

محمد عبد الفتاح "بخاف"

القهوة خانت مجّها المكسور 
نزلت بتبكي فِ مَج تاني ملوش أساس
تعبت من التنهيد مع كل لمسة ايد
مع كل بق يزيد وجعها
مع كل بعد تزيد حلاوة طعهمها
حياتنا سنارة قهوتنا كانت طعمها
زي حزمه من الورق
مربوطه بحبال الجزم
وكاني مخلوق  بس علشان اتهزم
وكاني ورده بتترسم بايدين صبي
ف جنينه مستهلكه و ورودها دبلانه
كل يوم الشمس تتطلع زعلانه
يمكن عشان شافت ايدين الوله
بترتعش ف وقت الرسم 
يمكن لو شافت قلبي و هو بيرسمك جواه 
هتصب لعنتها يمكن كمان تبعد اوي عن بيتها 
و تقرب اوي للارض و تركز الاشعاع
علينا في وسط الحرب و الاحداث 
و كل الناس بتهرب م الحراره المفرطه
و انا بهرب جوة قلبك بيتي اللي مدخلتوش
مع اني استاهل ابقي فيه 
انا كل مره بفتكر الحلو بينا 
يجي الوجع يمحيه
قلبك مداين زحمه جوه منه حياه
قلبي الغريق شايفه اول طريق النجاه
قلبك لمح طيفه قاله البعيد ينساه !
شعرك طويل جدا بيسر نظر العين
يا حلوة يا ام الدفاير و الورد عالخدين
حبك كطير طاير معرفش رايح فين 
ماشي الخطاه ع الله 
ماشي الخطاه بشويش  
الحصن و الضمه 
و القعده عالكورنيش
و القرب م المولي 
و الطيش كمان الطيش
فاكرك و منستكيش 
فاكرك و منستكيش 
لسه فاكر كل حاجه
مش سذاجه اني احبك
قلبي كان رافض يسامحك
ع الغياب دق باب الحزن دقه
قام بيبكي مش عليكي بس شفقه
ع الروح الحزينه المحبطه
صدري اللي مليان بالغياب
قلبي اللي مليان بالعتاب
لساه غبي مستني فرصه
تنجي روحه من البعاد
معرفش قلبي ان البعاد
كل اما زاد طعم الوجع يحلي
زي ما يكون قلبي عاشق حزنه
قلبك كما البركان قلبي اترمي ف حضنه
استسلم للنيران و حاسسها نار للدفي
معقول القلب حبك من بعد لما اكتفي.
 بعد م قلتليه بتقولي متأسفه
متاسفه علي ايه
انا كنت بفرح لما اقابلك
دلوقتي هفرح ليه
م الحزن طعمه جميل
و القلب لما يميل
بيميل عشان جاهل 
حقيقي القلب يستاهل
يعيش مكسور 
عشان الكل قال ضلمه
و شافك نور
م هو القلب مش مجبور
عشان يعشق و مش مرتاح 
في طير في الدنيا بيرفرف
و ناقصه جناح...!
خلاص هبعد
و هرجع تاني للقهوة 
و اللمه و الصحاب
في كتاب حياتي هذكرك 
#سطرين_غياب

سطرين غياب - محمد عبدالفتاح

علي مركب من خشب الزان - محمد عبد الفتاح

"بحب بجد" لمحمد عبد الفتاح أداء "محمود طعمه "

امي 
حيطان البيت اللي ساندانا 
و كل جميل هنا معانا 
و اول خانه في طريقي 
و احلي و اغلي انسانه 
بحلفلك بانك في الخياه نعمه 
بصيص النور في كون ضلمه 
بحبك لو انها كلمه 
و لكن ليكي تسوي كتير 
يا منبع خير ملوش اخر 
يا طير عشش و لو سافر و راح لبعيد 
هروح وياه 
يا اول من نطق فمي 
يا اول واحدة بتضمي 
كلامي جزء من خيرك 
و من غيرك تغور العيشه يا امي 
عشانك اي حاجه تهون 
يا طعم و ريحه شكل و لون 
و هكتب ايه انا يعني
و انتي المعني و المضمون 
و سالو الناس كتير عنك 
و صعب الوصف 
كل م تقرب اليها تلقي نقطة ضعف 
في عنيها كل الكتب و رميتها ليه ع الرف
و قريت كتب بالكوم و كتابها كان مفتوح 
كان الغلاف مجروح و المحتوي جيد 
ضحكتي الصافيه من قلبها الطيب
علشان كده هي 
نفسي اللي ملقتهاش 
ورده في مكان متحاش 
عن كافة المخاليق 
و ساعات تحس بضيق 
فتخلي عينها طريق مفيهوش ولا قشه 
نلجا تملي اليه لما الحياه تقسي 
و اما الحياه تعاند 
كل الزعل وارد الا الزعل منها 
اول ما بس تهل 
الفرحة بتجيلنا 
اول كلام قولته 
كان اسمها هي 
اول طريق بمشيه 
من حضنها لروحي 
كات تسقي من روحها 
بذرة حنان روحي 
و في وسط ارضي البور 
ازهارها مرميه 
كل الحاجات هي 
و هي حياة روحي 
هي نفسي بعد نفسي 
و مين يسامح زيها 
حافظه عني كل حاجه
 و كل حاجه بحبها
هي لما تغيب بتحضر 
و بحس داما باشتياق 
امي جنة ربنا 
اوهبها ليا من السماء 
امي الحاجات الطيبه 
و انا كنت غلطتها الوحيدة 
كل حاجه تصير بتضحك 
لما هي تكون سعيده 
بس اكتر شيء يزعل لما تزعل 
و تلاقي روحها بقت وحيدة 
زي كمان يعزف موسيقي للاصم 
و الاهم ان الاصم ده واد مفتح 
شاف الكمانجا بتخدمه ايام 
و هو قلبه رخام 
غاوي يكسرها 
هيحس قيمة الوجع 
اول ما يخسرها 
فبلاش تكونوا الصم 
هتدوقوا طعم الندم 
قبل اما عنكوا تغيب 
كونوا لها ك الخدم 
هي الصديق و الحبيب 
هي البعيد و القريب 
و هي كل النعم 
#m7md_3ftah

هي نفسي - محمد عبد الفتاح

فنان كلاسيكي - محمد عبد الفتاح

عن الوحده - محمد عبدالفتاح

#تنورة_الحاوي 

إنّ الذي خلَق الهوا
أصابَ قلبي محبةَ
ليتَ الهوا سهمُ
يقتلُ من أصابهُ
مازلتُ حيُ يرزقُ
فيا تنورة الحاوي
و يا ضحكة السكران
انا عشمان
و لاجل م اتوب من العصيان
شليني في قلبك الطاهر
عشان خاطر
نبينا الطيب العدنّان 
مليش غيرك 
أسمعلُه أيات الذكر 
يا حلمي البكر
و صوت الحق فـ الطُغيان
ده لو كَان القَمر سُلطان
فـَ انا عَرشُه
و لو كان الجميل حيران 
ف انا عِشّه 
انا مِش زي بقَيت الناس
لا بيشوفوا ولا يحسُّوا 
انا الزار اللي متزارشِ
عشان في الحضرة مستني
بخور معجون برقتها
فاصير دخان بريحة فل متعطر
و اصير مانيكان بيتحسر
عشان ملقاش في عينها مكان 
تشوفه و تحفظ المنظر
طرحت السيره عـ الملكوت
و لا خايف عذاب الموت
ما داقه القلب مية مره
من جوه و من بره
منا صوفي
و شايل همي في كفوفي
تجيلي في شكل جن جميل
فيضحك منها خوفي
و بتوضي بضفايرها
و اصليلي و اصليلها
يطول ليلي و بدعيلها
تكونلي العذره ف الانجيل
و اكون يوسف و زيه جميل
و اكون ايوب ع البلا صابر
في بطن الحوت منيش يونس
انا صابر و لا املك من جمال يوسف
سوي رمشين 
و حافظ منها جزئين
و حافظ جزء م القرأن
و حافظ سورة الانسان
و لا اخترت الهوا بايدي
 انا اخترت العذاب و سكرت
و لما شربت من ريقها
وقعت ف حب لذتها
نسيت اسمي و لا نسيتها 
كـ عابد لسه مستني صراط يمشيه
عشان يوصل لجنة ربنا و بيتها
كانك صورة مـ الجنة
كانك جنة في عنيا 
منيش ماشي علي السنه
و صورتك و شم في عنيا
و طبع الحسن في جبينك
بيخطف روحي من الدنيا
يا معني الطهر و العفه
يا نور من نبع نور صافي
بتوه في عنيكي و اللفه
في قلبك زي دوا شافي
لكل عليل و انا مرضان
و عالجوا فيا بالقرأن
و لا يشفي مريض بالعشق
غير عاشقه
و شهقه في نَفَسُه لو مقطوع
كأني يسوع
خديني في قلبك المصلوب
هتوب و اذكر ايات الله
و اصلي ركعتين 
و القبله بعنيكي
انا كل الل راح في حياتي مش ليا 
و كل الجاي من عمري 
خلاص ليكي.

تنورة الحاوي

اربع حروف اسمي 
و السن في العشرين 
معرفش بني ادمين 
و اعرف كتير شياطين
ماسكين عليا ذلة الايام
شادين لجام الفرقه ليه
مشنوق بحبل الذكريات
ان مات مين بس يبكي عليه
عشرين سنة بتساق
و بروح لحد مجاش
صاحبت ناس اوباش
و صاحبت ناس بتحس
الصحبة كوم القش
والصاحب اللي بجد
هو اللـ زي إبره
تلضمها فـ وريدك
و تخيطوا الايام
وتكروا فـ الاحلام
وتقصقصوا الذكري
انا كل هذا الوقت
برسم الفكره
عشرين سنة برسم
و خت ايه
غير كرسي ليا فـ ميكروباص
ومكان فـ قهوة قُرب قصر النيل
انا كنت حد جميل لحد وقتٍ ما
عيل في قلبه حياه
و اغاني و كمنجات
عود قرنفل خام
بيحلي بيه الايام
و يزود الكنكه
من بُن عم امين
و يغني للتانين
ولا يسمع الغنوة
يكتب نصوص الشعر
و يبيعها بارخص سعر
بيألف الحكايات
و يموت تملي
في النهاية
و صورته عـ الأفيش
كان قلبه خيط تريكوه
متقولش واد درويش. ! 
بيـبانلكم كعجوز و القلب لسّه بيحبي
اوقات يكون أراجوز من نفسه متخبي
بكتب من الاشعار ما يذكره قلبي 
بضحك كتير علشان المسأله تعدي
بشرحلكم نفسي معرفش ليه و علي ايه
لا انا هبقي يوم انتم كل اللـ جاي منكمُ
في الاصل من عندي..!
انا عندي عشرين مـ السنين
الفين من الخبرات
و كتير من الجمرات 
هرميها يوم عـ الكُل
و هتبقي زي الفُ
بالضحكة هتعدي
هشحتها من وشكم
لو هي مش عندي
دلوقتي هكتب م السنين عشرين
في خانة السن المهمه
فـ استمارة شغل او هِجرة
دلوقت هقدر اعيش منغير حجج فارغه
و هقول نفسي كبرت
علي لم اجرة ميكروباص
علشان تعاكس بنت فـ الباقي
علي رسم قلب كبير علي كل اوراقي
علي شاي تقيل سكر زيادة
و هشرب القهوة بتأني
مش بارتجاف
ولا اخاف من الضلمة
و هفصص الكلمة
و هأكل العصافير
واسمع اغاني كتير
يمكن ترجعني
للذكريات الهَش
علي كل حيط
فـ الكون
هكتبلكم "معلش"
علشان اراضيكم
كات فين اراضيكم
وقت العزال و التهلكة
عن ناس تموت فـ الفَبركه
و اللعب عـ المكشوف
القلب شافكم كعبته
و فـ حصنكم بيطوف
رميتوا ليه الجمرات
عشرين سنة عمري
وانا و القصيدة اخوات
روحي و جسمي اللي ماتوا
مش صعبانين علي حد
عايزنّي اعبش ازاي؟! 
و انا كل يوم بتهد
طب تصبحوا علي شئ
ينفع لـ باقي السَرد
بيني و بينكم سد
و بحبكم مغصوب
عشرين سنة مغلوب
علي امري و لا عمري
اختارت شئ غير وقت
كل اما بيعدي
بيخدني وياه للحياه
ويسيبني تايه ف الطريق
الوقت اوفي صديق
بس الحياه صَعبه
لسه بشوف نفسي
العيل المحتاس
من وحش فـ اللعبه
من فخ في العلبه 
عشرين سنه يكفوا
اني اكون الوحش
و انتوا اللي في العلبه …

Mohmad Abdelftah - عشرين سنه

facebook
https://www.facebook.com/mohmad.abdelfatah.35

وداع كمنجه - محمد عبدالفتاح

"المشهد الاول "
الشاي اللي يوماتي جارتنا 
بتصبح بيه عـ الشارع
حببني في بنت بتاخد 
بلكونة قلبي هناك 
فيشوف العالم اوسع 
من اوضته و مـ الشباك 
البنت اللي انا بوصفها
 تشبه جدا لملاك 
نبدا من حيث العين 
ورد وفتح عـ الدنيا
تقدر بعنيها تكون 
فترينة و فاظه ورد
فـ طبيعي الكون هيضيق 
لو غابت عني فـ يوم
وفـ يوم كان برد شديد 
و الكون متعبي غيوم
الشاي قرر يتحول 
فنجان و البن تقيل
والبن الخام اتحول 
في ايديها لكام منديل
و عيونها الورد بتدبل 
و بتنزف دمع شديد 
وكان في حد جديد 
بقي ياخد دور بطولتها 
فـ روايتي اللـ انا بكتبها 
كل اما تمر قصادي
والقلم الجاف مش راضي
 يكتب ولا سطر كمان
شِربت هي الفنجان 
و سابتني في عز البرد
تايه من كُتر السرد 
و خيالي الخام اتشل
فـ ربطت بايدي الحبل
 و كتبت جواب مجهول
قولتها يا بنت الناس 
الكون غضبان علشانك 
الكاتب عنده فضول
 و فصول لسه مكملتش
المشهد ناقص منك
 ضحكات لسه مخرجتش 
و رميت الحبل اياه 
ناحية هذا البلكون
طلت هي بفستان 
احمر فـ رمادي اللون
بَصّت في الاتجاهين 
ومحدش كان موجود
الكاتب كان محسود 
ملحقش يقص الحَبل 
بالاحري مكنش يجوز 
واكيد هيلاقي الحل

"المشهد التاني"

مسكت هي المرسال 
بدات تكتب بالنص
انا عارفه انك موجود 
والله انا لسه بحس
بتقولي بعيط ليه 
و مليت الكون احزان
اسأل هذا الدخان
 الخارج من شباكَك 
انا كنت مكانه فـ يوم 
انا كنت فـ يوم انفاسك 
لكن كونك فَضّلت 
تبقي في عالم روياتك
انا اسفه انا مش اراجوز
 خليك انت في حكياتك
ربطت مرسالها اياه 
في الحبل الواصل بينهم
بعد ما كان بيجمعهم 
احضان من صُلب الروح
دلوقتي مجرد حَبل 
ترميه و بسرعه يروح

"المشهد التالت"

فجاه الشباك اتهز 
لقه حبله جايبله جواب
قرا كل كلمها وقال 
انا راضي باي عتاب
واهو نام سايب شباكه 
مربوط فـ الحبل اياه 
و مدلدل كده عـ الشارع 
بيلملم منه حياه
شافه البواب مفهمش
قرر يسال مسكتش
قام طالع يسال عني
 فمروحتش مهتمتش 
قام جالي فـ اخر اليوم 
قررت استفهم منه 
قالي انت بتعمل ايه 
بليل بالحبل يوماتي
قولتله يا اسمك ايه
نا ببعت فيه جوباتيا
للبنت اللي انا حبيتها
 ساكنه في هذا البلكون
استغرب جدا قال
 يا باشا ده بيت مسكون 
مهجور من عمر كبير و محدش ساكن فيه 
فقفلت بسرعه الباب و بسرعه كتبت جواب
ورميته بسرعه هناك قاعد مستني الرد 
طلت من تاني هناك بعنيها السود الورد 
وكتبت جواب للكون انا عاقل مش مجنون 
و البيت لو كان مسكون ازاي بيجيلي الرد 

"المشهد الرابع"

في مصحه نفسيه و بيسالوا الدكتور
عن سر هذا الحبل و ازاي بيجي الرد 
مع انه بيت مهجور هز ف ايديه الدكتور 
اول ما شاف الخط قال الكلام بالظبط
كان يكتب الجوابات و يكتب لنفسه الرد
#m7md_3ftah

مرسال للهوي - محمدعبدالفتاح

#فيلسوفي_إبن_الأبلسه

ﻓﻴﻠﺴﻮﻑ ﺟﻮﺍﻳﺎ ﻗﺎﻟﻲ
ﺃﻧﺖ ﻣﺶ ﻣﺤﺘﺎﺝ ﺗﺼﻠﻲ
ﻷﺟﻞ ﻣﺎ ﺗﺜﺒﺖ ﻭﻻﺋﻚ
ﺍﻟﻠﻲ ﺧﻠﻘﻚ ﻋﺎﺭﻑ ﺇﻧﻚ
ﻳﻮﻡ ﻫﺘﺨﺮﺝ ﻋﻦ ﻣﺴﺎﺭﻙ
ﻟﻴﻪ ﺗﺼﻠﻲ ﻭ ﻟﻴﻪ ﺗﻌﺎﻓﺮ
ﻳﻌﻨﻲ ﻣﺆﻣﻦ ﻭﻻ ﻛﺎﻓﺮ
ﻣﻴﻦ ﻣﺤﺪﺩ ﻗﺒﻠﺘﻚ؟!
ﺗﻌﺮﻑ ﺍﻳﻪ ﻋﻦ ﺃﺧﺮﺗﻚ
ﻭ ﺃﻧﺖ ﻟﻮ ﻣﺆﻣﻦ ﻭﻓﺎﻫﻢ
ﺃﻭﺻﻒ ﺍﻟﻤﺸﻬﺪ ﺣﻘﻴﻘﻲ
ﺑﻌﺪ ﻣﻮﺗﻚ ﻟﻮ ﺑﺜﺎﻧﻴﺔ
ﻗﻮﻟﻲ ﻛﻠﻤﺔ ﺗﺒﻞ ﺭﻳﻘﻲ
ﺍﻟﻠﻲ ﻣﺎﺕ ﻫﻴﺮﻭﺡ ﻟﻔﻴﻦ
ﻫﻮ ﻣﻴﻦ ﺧﻼﻩ ﻳﻤﻮﺕ
ﻭﻗﺖ ﻛﻔﺮﻱ ﺑﻤﻤﻜﻨﺎﺗﻚ
ﻣﺴﺘﺤﻴﻠﻚ ﻟﻴﺎ ﺻﻮﺕ
ﻓﻴﻠﺴﻮﻑ ﺍﻭ ﺣﺘﻲ ﻣﻠﺤﺪ
ﻣﺶ ﻫﺘﻔﺮﻕ ﺑﺲ ﻗﻮﻟﻲ
ﻟﻤﺎ ﻛﻞ ﺍﻟﺨﻠﻖ ﺗﻌﺒﺪ
ﺍﻻﻟﻪ ﻭ ﺗﺮﻭﺡ ﺗﺼﻠﻲ
ﺃﻧﻬﻲ ﺭﺏ ﻓﻲ ﺩﻭﻝ ﺣﻘﻴﻘﻲ
ﻗﻮﻟﻲ ﻛﻠﻤﺔ ﺗﺒﻞ ﺭﻳﻘﻲ.!
....
ﻣﺮﺓ ﻭﺍﺣﺪﺓ ﺭﻭﺣﺖ ﺳﺎﻛﺖ
ﺻﻮﺕ ﻧﺪﻫﻠﻲ ﻭﻗﺎﻟﻲ ﺃﺛﺒﺖ
ﺭﺏ ﻫﺬﺍ ﺍﻟﻜﻮﻥ ﺩﻩ ﻭﺍﺣﺪ
ﻭ ﺍﻧﺖ ﺑﺘﺼﻠﻲ ﻭ ﺗﺴﺠﺪ
ﻻﺟﻞ ﻣﺎ ﺗﻜﺴﺐ ﺭﺿﺎﻩ
ﺭﺏ ﻫﺬﺍ ﺍﻟﻜﻮﻥ ﻣﻌﺎﻩ
ﻛﻞ ﻣﻔﺎﺗﻴﺢ ﺍﻟﺤﻴﺎﻩ
ﺭﻭﺡ ﻭ ﻗﻮﻝ ﻟﻠﻔﻴﻠﺴﻮﻑ
ﺍﻧﻪ ﻛﺎﻥ ﻻﺯﻡ ﻳﺸﻮﻑ
ﻓﻲ ﺍﻟﺠﺒﺎﻝ ﻭ ﺍﻟﺒﺤﺮ ﺣﻜﻤﺔ
ﻓﻲ ﺍﻟﺴﺤﺎﺏ ﻭ ﺍﻟﺸﻤﺲ ﺣﻜﻤﺔ
ﻓﻲ ﺍﻟﻨﺠﻮﻡ ﻭ ﺍﻟﻜﻮﻥ ﺑﺤﺎﻟﺔ ﻭ
ﺑﺠﻤﺎﻟﻪ ﺑﺮﺿﻮ ﺣﻜﻤﺔ

ﻓﻴﻠﺴﻮﻓﻲ ﺍﺑﻦ ﺍﻷﺑﻠﺴﻪ
ﻗﺎﻟﻲ ﺑﺮﺿﻮ ﻣﻘﻮﻟﺘﻠﻴﺶ
ﻟﻤﺎ ﻛﻠﻪ ﻋﺎﺭﻑ ﻣﺼﻴﺮﻩ
ﻛﺎﻥ ﻭﻟﻴﻪ ﻃﻴﺐ ﻧﻌﻴﺶ؟!
ﺃﺻﻠﻲ ﻋﺎﻣﻞ ﺯﻱ ﻏﺮﻳﻖ
ﻗﻮﻟﻲ ﻛﻠﻤﺔ ﺗﺒﻞ ﺭﻳﻖ

ﻧﻔﺲ ﻫﺬﺍ ﺍﻟﺼﻮﺕ ﻧﺪﻫﻠﻲ
ﻗﺎﻟﻲ ﺍﻧﻲ ﺑﻌﻴﺶ ﺣﻴﺎﺗﻲ
ﺟﻮﻩ ﺳﺎﺣﺔ ﺍﻻﺧﺘﺒﺎﺭ
ﺍﻟﺤﻴﺎﺓ ﺃﺻﻼ ﻃﺮﻳﻖ
ﺇﻣﺎ ﺟﻨﺔ - ﺇﻣﺎ ﻧﺎﺭ
ﻛﻞ ﻭﺍﺣﺪ ﻟﻴﻪ ﻣﺴﻴﺮﺗﻪ
ﻛﻞ ﻭﺍﺣﺪ ﻟﻴﻪ ﻗﺮﺍﺭ

ﺭﺩ ﺻﻮﺕ ﺍﻟﻔﻴﻠﺴﻮﻑ
ﺑﺲ ﻗﺎﻟﻬﺎ ﺑﻜﻞ ﺧﻮﻑ
"ﻣﻴﻦ ﻫﻴﺪﺧﻞ ﺟﻮﻩ ﻧﺎﺭﻩ"
ﻧﺎﺭ ﺟﻬﻨﻢ ﺗﺒﻘﻲ ﺩﺍﺭﻩ
ﻫﻞ ﻫﻴﺒﻘﻲ ﺑﺎﺧﺘﻴﺎﺭﻩ
ﻭ ﻻ ﻣﻤﻜﻦ ﻳﻌﻔﻮ ﻋﻨﻪ
ﻗﻮﻟﻲ ﺇﻳﻪ ﺃﺧﺮ ﺍﻟﻄﺮﻳﻖ
ﻗﻮﻟﻲ ﻛﻠﻤﺔ ﺗﺒﻞ ﺭﻳﻖ

ﺻﺎﺣﺐ ﺍﻟﺤﻜﻤﺔ ﻗﺎﻟﻲ
ﻣﺶ ﻫﻴﺪﺧﻠﻬﺎ ﺍﻻ ﻛﺎﻓﺮ
ﻭ ﺍﻟﻠﻲ ﺗﺎﺏ ﻳﺒﻘﻲ ﻑ ﺃﻣﺎﻥ
ﻟﻪ ﻣﻜﺎﻧﺔ ﻓﻲ ﺍﻟﺠﻨﺎﻥ

ﺻﻮﺕ ﺑﻴﻨﺪﻩ ﺟﻮﻩ ﻣﻨﻲ
ﺻﻮﺕ ﺑﻴﺼﺮﺥ ﺑﺎﻣﺘﻨﺎﻥ
ﻓﻴﻠﺴﻮﻓﻲ ﺃﻭﻝ ﻣﺎ ﺻﺪﻕ
ﺳﺎﺑﻨﻲ ﺃﻛﻤﻠﻪ ﺍﻟﻜﻼﻡ
ﻣﻦ ﺳﺎﻋﺘﻬﺎ ﺍﻟﻔﻴﻠﺴﻮﻑ
ﻛﻞ ﺧﻮﻓﻪ ﻣﻦ ﺍﻟﺤﺮﺍﻡ
ﻛﻞ ﻣﺮﻩ ﻛﺎﻥ ﻳﻘﻮﻟﻲ
ﻗﻮﻡ ﻭ ﺻﻠﻲ
ﻗﺒﻞ ﻣﺎ ﻳﻔﻮﺕ ﺍﻷﻭﺍﻥ
ﺭﻭﺣﺖ ﺳﺄﻟﻪ ﺑﻔﻜﺮ ﺷﺎﻋﺮ
ﻗﺪ ﺇﻳﻪ ﻛﺎﻧﺖ ﺧﺴﺎﻳﺮ
ﻗﻠﺒﻚ ﺍﻟﻤﺤﻨﻲ ﺍﻟﺒﺮﺉ
!ﺇﺣﻨﺎ ﺑﻨﻤﻮﺕ ﺑﺎﻟﺒﻄﺊ؟
ﻗﺎﻟﻲ ﺃﺳﻜﺖ ﻧﻔﺴﻲ ﻣﺮﺓ
ﺗﻘﻮﻟﻲ ﻛﻠﻤﺔ ﺗﺒﻞ ﺭﻳﻖ
#m7md_3ftah

فيلسوفي إبن الأبلسة - محمد عبد الفتاح

إحنا مين - محمد عبدالفتاح "المترو مش بجنيه "

محمد عبد الفتاح - أسطورة أنطونيوس

facebook
 https://www.facebook.com/mohmad.abdelfatah.35

Popular tracks by الشاعر محمد عبدالفتاح