إلى ملك رشاد عبد الله أمي ❤️
------------------------
كلمات : مصطفى إبراهيم
ألحان وتوزيع : شادي مؤنس
ميكس وماستر : اسامة كمال
 
------------------------

انتي حلوة ف كل وقت
بابتسامتك م الكسوف
و سيبني افكر لما اشوف
و التمانية اللي ف حواجبك 
لما برقد م العيا
و انتي بتقولي ضنايا
او تعالى شيل معايا
حتى يا قليل الرباية
و حتى يا قليل الحيا
 كل مادا لما بكبر
او اتوه ف الدنيا عنك
بفهمك أكتر و بفهم
حتى نرفزتك و زّنك
كل يوم ف البعد عنك و ف غيابك يوم عليا
و كل ايد بلمسها بعدك ايد غريبة عن ايديا
من يوم ما فتحتي ف عنيا
 يا حبيبتي و اتولدت
بتفضلي انتى الوحيدة
اللي حلوة ف كل وقت

انتي حلوة في كل وقت - مدحت صالح

-----------------------------------------------
الوقت بيعدي اسرع كتير دلوقت
والذكريات..
زي يمكن كل حاجة..
ما بقتش زي زمان
بقت سريعة التحضير
ما بقتش محتاجة لسنين كتير علشان..
تبعد وقلبك يطب لما تفتكرها
امبارح مش بعيد يمكن
بس زحمة النهارده..
هي اللي بتخليني اشوفه..
وكأنه كان..
من زمان..
زمان..
زمان
-----------------------------------------------

إمبارح - مصطفى إبراهيم

Music by : Samer Ashraf

-----------------

مين اللي كان موجود
قبل أول دقة في الساعة
قبل أول نور بأول لون
ما يقطع سكتة ف الكون؟
قبل أول بذرة
وقبل أول دود
وأول واحد ينتهي ويعود
وقبل والد المولود اللي خلى الدنيا في جماعة
مين اللي كان موجود
قبل أول دقة ف الساعة؟
كان الزمان واقف ما فتحش حنفيته؟
ما جرتش حواديته؟
زي مجرى النهر..
اللي اتفتح فجأة ع الفضاء البور
لا سور ولا سقف
يبني الثواني فوق بعض زي الطوب
يبني السنين فوق بعض يبقم تاريخ
الأرض اللي كانت تحبي جوَّه الكهف
النهارده دراعها واصل المريخ
والزمان
ماشي لوحده ف ضلمة الأكوان
ماشي يقول سبحاني
كلها أكواني
يا كل شيء تاني
بأي شيء غير الثواني نشأت
إديني وقت..
وكل شيء ف الدنيا يتحقق
وكل شيء مش مصدَّق
آخرته يصدَّق
ف الجاذبية والزمن والنور
وكل حتة صخر مرمية
ف الفضا الخالي
بيعدي فيها الزمن زينا وبتدور
مرمية فيه زي السمك ف البحر
مرمية زي السمك في حوض كريستالي
الدنيا باينة واسعة من جوَّاه
الدنيا واسعة صحيح.. لاكن نظر مش لمس
زيك بتسأل هيَّ ليه جت هنا
ودي شهادتنا عن الحياة
ولا شهادتها عننا
زيك بتسأل ع الحقيقة
والسراب
والذاكرة
والانفجار الضخم
في السنين الغابرة..
قبل الوجود
مين اللي كان موجود
قبل أول دقة ف الساعة
وقبل أول نور يتولد للشمس؟
------------


الساعة - مصطفى إبراهيم

الشارع انسان
زيي بيغلط بس معندوش زيي دموع
أوقات بيموّت ناس م البرد وناس م الجوع
وساعات بيطاطي رقاب
وساعات بيجمّع أحباب
وساعات بيقطّع قلب كلاب
وقطط
 على خلفة اكيد ما تهمش حد 
مرمية جثثهم جنب رصيف 
وساعات بيهادي الناس أفراح
وساعات بيهادي حد رغيف
وساعات بيعشّم ناس م الريف 
حاسين انها هنا هتزقزق
وساعات بيحاصر حد ضعيف
 مش حمل يقف ف لجان ولا يتهزق
الشارع رزق
والصاحب رزق
بس ساعات بتشوف الشارع
وتحس بذنب رهيب
وتحس انك لما صاحبته
كنت بتتعلق بسراب
وان انت مصاحب قاتل..
ملهوش أصحاب
........
photo credit: kero mathio 
https://instagram.com/kero_mathio?utm_medium=copy_link

الشارع - مصطفى إبراهيم

الشعر إيه؟
ايدين بتخش ف الضلمة ..وتطلع منها بحكاية
عيون بتبص ع الدنيا وعين بتبص جوايا
كلام على طرف كل الناس محدش منها بيقوله
سحاب
دخان
سراب لمكان
 مفيش انسان ما يعرفهوش
وواحد فيه شبه م الكل
برغم وشوش ما يتشابهوش
ومركب فيها واحد بس
بتتهادى بدون مقاديف
أمل صادق ويأس مخيف
ربيع وخريف بيتصاحبوا
جنون 
وظنون 
وكن فيكون
وقلب يساع حدود الكون
 ومش قادر يساع صاحبه
معاني وشوشها مكشوفة
وايد مكسوفة ما بتخطفش
ومسّ بيكوي ما يلطّفش
و واحد غيّر العالم
لكن بعنيه..
الشعر إيه..
الشعر إيه..
معرفش

Photo by : معتز زكي

الشعر إيه؟ - مصطفى إبراهيم

برغم إنه ما كانش بيكره العالم
لكنه كان اوقات كتير بيتمنى
كل العالم يموت.. 
او حتى يختفي
دقيقة واحدة بس
دقيقة..
يقدر يصرّخ فيها 
مرة في حياته بعلو صوته بجد
من غير ما يخاف يضايق..
او يخوّف حد

ما كانش بيكره العالم - مصطفى إبراهيم


"ينقذ في سلاحف بحرية...
يقتل حيوانات بشرية"
- تلك قضية وتلك قضية 

كيف تكون ملاكا أبيض ؟
يبقى ضميرك نص ضمير
تنصف حركات الحرية
وتنسف حركات التحرير
وتوزع عطفك وحنانك
ع المقتول حسب الجنسية
وتلك قضية وتلك قضية

كيف تكون إنساناً راقي
ومطابق للإشتراطات
كل كلامك لابس واقي
وبتحضن كل الشجرات
بتقول ع البواب الحارس
وجنبك جيش بيهد مدارس 
واما بتقفش نفسك لابس
دم.. تقول الكل ضحية
 وتلك قضية وتلك قضية 

كيف أصدق هذا العالم
لما بيحكي عن الإنسان؟
شايف أم بتبكي ضناها
علشان مات في الغارة جعان 
ويساوي المقتول بالقاتل
بشرف ونزاهة وحيادية 
 وتلك قضية وتلك قضية

كيف أنامَ قريرَ العينِ
وأضع سدادة أذنين
والعيلة المدفونة ف بيتها
ممنوع حد يخش يغيتها
وكأن الارض اللي فوقيهم
مش تبع الكورة الأرضية 
وتلك قضية وتلك قضية 

كيف تعيش في سجنٍ واسع
زنازينه من نار ورماد
وتقوم من تحت الأنقاض
تتشعلق ف رقاب القاتل
تجمع اشلائك وتقاتل
وتوري الدنيا الكدابة
كيف يسير قانون الغابة
من اين طريق الحرية 
ومن أين تؤتى الدبابة
مش فارقة العالم يتكلم
موت حر وما تعيشٌ مسلّم
تلهم جيل ورا جيل يتعلم
كيف يعيش ويموت لقضية

بننادي على عالم مين
علشان يستنكر ويدين
دن كما شئت فأي إدانة
لما يجري جوا السلخانة
مش هتخف بارود الدانة
ولا قادرة ترجع له صباح
تلك قضية 
وهذا كفاح


#تلك_قضية

تلك قضية - مصطفى إبراهيم

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
 يدوسه عَجَل الميكروباص
 النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
 مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
 "العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
 القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
 أبو طلق من غير صوت
فيه الجيوش ما بقوش
 لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
 ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
 و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا



www.facebook.com/Mostfa.Ibrahim

هندسة صوتية : رفيق عدلى
One Take Studio

البنكنوت - مصطفى إبراهيم

ما عملش حاجة تستحق الذكر
موظف عادي في هيئة حكومية
إجمالي ما يحصل عليه
الف  تلتمية و حاجة جنية
لا يعول
 و غير مسؤول الا عن نفسه
لا يبوح للأصدقاء العابرين عن أمله او يأسه
كان عادي جدا مضموناً و شكل
مش شرير و مش طيب
مش موهوب و مش غبي 
مش مجذوب و مش نبي
و لا حتى عاش قصة كفاح ع اللقمة في بلد أجنبي
تِلهم بتوع السيما يحوّلوها لفيلم
او حتى يوحش حد ساعة الأكل
م النوع اللي تستغرب لو جه لحد ف حلم
بس النهارده ف المنام جالي
واقف على الشعرة اللي بين الوجود و العدم.. 
فاتح عينيه
ماشي ف شارعهم المليان تراب
خطاويه ما بتعلّمش ورا منه
و كأنه من غير قدم... ع الأرض و كأنه
كان ماشي بس الزمن هوّ اللي ما بيمشيش
كان ماشي و احنا متسمّرين حواليه
لحد ما بلعه الضباب بشويش
يشبه بطل أسطوري و خيالي
ما عملش حاجة تستحق الذكر
غير إنه واقف لسه على رجليه


ما عَمَلش حاجة تستحق الذِكر - مصطفى إبراهيم

الشكّ عمره أطول م الحقيقة
بيموت ف بيتولد غيره ف نفس الدقيقة
و الحقيقة
أجمد م الرخام
الشكّ بيرتوي بالوقت
و الحقيقة بتغرق شبر شبر ف الأيام
الشكّ شاب زهقان م الطريق السهل
مستني يطلع بره بيت الأهل
و الحقّ أب عجوز بيمشي خطوته على مهل
الشك يمكن و الحقيقة بجد
لكن محدش فيهم بيغلب حد
زي النهار و الليل
و الصخرة اللي نحتها السيل
و النهارده اللي بيشرح امس
في البدء كان الظلام 
قبل أمّا تبقى الشمس
و سلاسل الزمن تتفك
كأن من بدء الخليقة
في البدء ما كانتش الحقيقة
و في البدء كان الشك ..

الشكّ - مصطفى إبراهيم

زي ما يكون الزمن له صوت
بيطلع جوا كل الناس بعد عمر طويل
يقول ان كل الحاجات تحتمل تأويل
و كل شيء وجهة نظر حتى الجنون
و الغلط و الصح 
أكتر من إنهم يكونوا اتنين
و الرمادي هو اقدم لون
و احنا حبة رمل مرمية ف صحاري الكون
عرفت تعيش أكتر
قدرت تصمم أجهزة
تقدر تشوف العالم الأصغر
و العالم الأكبر
و إن حتى المعجزة
حبة حبة هتتكسّر
و توب الطمأنينة الجميل
حبة حبة هيبقى مليان بالرقع
فيه كل يوم تمثال قصادي ف الدنيا بيقع
كل يوم بتأكد إننا ضايعين سوا
شاكّين لكن ماشيين
ورا المتأكدين بنقول
جايز شراعهم المقفول.. 
هوّ اللي هيلاقي الهوا
المتأكدين مش أغبيا
على الأقل ماشيين ف إتجاه
المتأكدين
ناس ما ينفعش تسمعنا
المتأكدين
هما اللي بيمشّوا تروس الحياة
و احنا لسه بندوّر على المعنى

المتأكدين - مصطفى إبراهيم

انا مش هبيع الأمل للناس
ولا هقدر أبيع اليأس
ولا هقدر أبيع فكرة 
ممكن تتقلب بكره و تبقى العكس
ولا هقدر
أسكّت صوتي في دماغي و أقول له خلاص
ما عادتش مستاهلة
الدنيا صعبة ..إلعب السهلة
انت اللي بس مكبر الموضوع
بلاش تكرر خيبتي و غبائي
بطّل تصدّق و انت هتلاقي
عينيك الغرقانين من بكره قاطعين الدموع
بطّل كتابة
و بطّل كآبة
و بطّل تقول عالعبط إخلاص
مش كل صاحب حلم يبقى صاحب حق
....
بس تفضل حتة فيا تقول لي لأ
قلت مش زي ما قلتش
مش كل طرح الدنيا كلام
ولا كلنا ولاد النسيان
لازم هتفضل
ف الدنيا حاجة نقطفها 
بحاول اوصفها
كأني بوصف لواحد أعمى ايه الألوان 
نهنهات الامهات من آخر الطرقة في المستشفيات بالليل
ريحة الطبيخ على السلّم  و ريحة اللب جوه الفصل
عرض جوي لخمسمية حمامة في السما من غير ما يتفقوا
 صوت اليمام في المناور ويّا اول خيط نهار
ريحة كولونيات الغلابة في المواصلة الصبح
صرفيات الاكسوجين لمعلبات المترو مع كل فتحة باب
اول ظهور للملح في طريق المصيف
فرحتك بالنفق و انتا عيّل صغير
و فرحتك بالنوم و انت عيّل كبير
مش كل حاجة بنعرف نحط كلمة مطرحها
الدنيا لسه فيها حاجات ما بنعرفش نشرحها
طول ما موجودة.. الدنيا ما اتهدتش
ما يصحّش آجي للدنيا كأني ماجتش
فيه شفرة جوانا لسه ما اتفكتش
و قدامها لسه كتير

لسه كتير - مصطفى إبراهيم

ف الأيام الصعبة ونا شحط
بفتكر الأيام الصعبة ونا عيّل
و بقول عديتهم و انت قليّل
مش هتعديهم دلوقت؟
و لو الأيام غير الأيام..
و الدنيا غير الدنيا..
انتا كمان دلوقتي زمانك واحد تاني..
او واحد تالت
انا بكبر..
و العالم بيقول لي أكبر ونا ساكت
بيقول لي كل ده عادي
و ان انا بكبر ف معادي
و مفيش شيء يستدعي الأزمة
و الحزن الفاضي ملوش لازمة
و بص لغيرك..
حطّيت نفسي ف جزمة غيري
بس لقيتني ف نفس الجزمة
و لقيتني بنفس القلب
و لقيت العالم كله بيجري حواليا من نفس الكلب
و لقيتني ف بحر الخايفين
تايه و وحيد
مش لاحق اراجع مع نفسي انا مين
خايف من بكره و خايف أتغيّر
.....
انا الزبون الدائم للمطاعم اللي بيسهروا لمتأخر
صديق كلاب المنطقة من غير أسامي
شهواني و ملول 
و عدو الناس اللي بتتكلم علطول
تلميذ خيبات الأمل المتتالية
و من أنصار الباب المقفول
بعرف اقول معرفش
و بعرف اقول شكراً
و بعرف اقول للشعب العامل دُمتُم ذخراً
و بقول للشعب العطلان معلش..
انا حاسس بيك
بتمنى الدنيا تدّيني و تدّيك
بتمنى الدنيا تفهمنا واحد واحد
أو تستنانا لحد ما أحزاننا تفارقنا
بحلم زيّٙك أعيش مرتاح..
و أعيش إنسان
و بحلم يوم ما نلاقي طريقنا
تفضل حاجة ما بيننا
إحنا كمان
مش للبيع..
ولا للنسيان

انا بكبر - مصطفى إبراهيم

الناس اللي أيامها بتشبه بعضها 
وحياتها حاجة بين المسلسل المتعاد
والكوميديا الفارص ..
مزيج بين الأمل و الصبر
حاجة ما بين السواقة 
و بين ركوب القطر
بين المعافرة و التسليم
خلطة مابين آمال بكرة 
علي أماني عودة إمبارح
علي محاولات إنك تعدي من النهاردة سليم
حاجة بتخليهم يقوموا كل يوم الصبح
يقاوحوا في الدنيا لمدة يوم كمان
ويقولوا يمكن
النهارده..
الدنيا تلمحنا
الناس دي هم احنا
في فيلم طويل 
..أبطاله كلهم كومبارس

-----------------------
لينك فيديو
https://goo.gl/UPoESJ

فيلم طويل - مصطفى إبراهيم

أول ما ذي بدءٍ بدأ
كان الضلام أكبر مني
عنيا مش سايعة الحدقة
وقلبي مش سايع سني
كأني خايف اتشاهد
قبل اما اكون بالعين شاهد
الأصل ف الأشياء واحد
و الحياة ماشية برجلين ل
مش شرط يبقى الشيء والعكس
كل ابن ماء ف الأصل اتنين
كأن حتى الزين والشين
مش عكس بعض لكن وشين
الشيء ما كانش لولاه ضده
بيخلقه مش بيهدُّه
زي الضلام ما بيضوي الشمس
والغد يبقى حفيد الأمس
الضد مش ضدك بالظبط
الدنيا دايرة حل وربط
فصين ما يتقلعوش من بعض
بيدوروا في نفس الحلقة
من يوم ما ذي بدءٍ بدأ

التوحيد - مصطفى إبراهيم

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



المانيفستو - مصطفى إبراهيم

تأليف موسيقي : أحمد مصطفى صالح
شكر خاص لـياسر نعيم

الكلمات :

يمكن عينيه زاغوا
أو رجع خطوة
أو بلع ريقه
قبل ما ينط في طريقه
من فوق سطوح مبناهم العالي
للشارع الخالي
طاير وقلبه بيدق ف ودانه
ويرد ف وداني
كأني سامع كل شيء
بيقوله ف دماغه
في رحلة الأربع ثواني
في مشوار السقوط الحر
جايز تكون الذاكرة
فجأة هتتفرد قدامه
ويقدر يشوف
كل اللي كان مش شايفه أيامه
من بين جفونه في لحظة واحدة يمر
مختل؟
يمكن يكون مختل
كئيب؟
مش شرط يبقى كئيب
جايز يكون زهقان
م الليالي اللي تشبه بعضها
ومن كل شيء متعاد
م الكلام والناس والعقل والمعقول
قرر ف لحظة يقلب العدَّاد
وينط في المجهول
جايز يكون بيقول
يا عم يا متأكد.. سيبني براحتي أظن
خليني أغيب
خليني أشوف الدنيا بعيون الغريب
خليني أغيب
خليني أشوف الدُّنـ...

الدُنـ.. - مصطفى إبراهيم

كأي يوم عادي
وغير مصيري
بدأته ونا لسه ف سريري
بالدخول ع المواقع الزرقا
لقيت تلاتاشر طلب صداقة جديد
ولقيت صحابي
وصحاب صحابي
عندهم حالات وفاة
كاتبين أماكن العزا وتحتها المواعيد
ولقيت أعياد ميلاد كتيرة
لناس صحابي من بعيد
وزمايلي ف مجلس الدنيا
بيتناقشوا بنفس الحماس
 يوميًّا 
في آخر الأحداث
وبيشتموا البُعدا
وناس كتيرة «دايمًا »
طالعين في الصور سُعدا
- إزاي صورهم أجمل من العالم كده؟ -
وواحد ما اعرفوش بيحذَّر
من ضرر قلي البطاطس
اللي بتسبب كذا
وناس بتلفت نظري للأذى الواقع على أقليات الهند
من فضلك اعمل send لكل زملائك
وناس بتخرج م الحياة لأن تليفونها اتسرق
وناس بيدعوا ربنا ع الملأ
يمكن هيسمعهم هنا
حتى الجرايد
برضه سابت الورق
ودايرة على الشاشة بتشحت ناس
وناس بتشتم كلها الستات
وناس بتشتم كلها الرجالة
والآلة قدامك بتتأكد ان انتا مش آلة
ونا لسه بعماصي
بشوف قصص وبشوف مآسي
أكتر مما اتحمِّل
لاكن صباعي لوحده بيكمِّل
لأن الوحدة بتخوِّف
ونا مش وحيد
وامَّا يجد جديد
هكون في انتظاره هنا
أنا
وولادي
وولاد ولادي
على المواقع الزرقا
علشان نعلَّق
ونبرَّق عنينا
ونعرف قد إيه الدنيا حلوة
وفاضية
ومليانة
ومش فارقة
علشان هنا
بنحزن كلنا مع بعض
وبنضحك كلنا مع بعض
واللي بيخرج م القطيع
بنسيبه ورانا
أو ندوسه تحتنا
هنا
أخيرًا
مش هنبقى لوحدنا....

المواقع الزرقا - مصطفى إبراهيم

مفروض الواحد يعمل ايه
لو مش مندمج بالكامل
مع العالم و لا الأحداث
ولا كلام الناس
و ماشي جنب الدنيا
لا بيقرّبوا من بعض
هوّ أو هيّ 
ولا بيتباعدوا
و النصايح..
المستمرة المخلصة 
م الأصدقاء و الأهل
بكل الحب ف الدنيا و كل الجهل
بضرورة الإبتعاد عن الفكر الزيادة
و خطورة الإعتماد على حبوب السعادة
و ضرورة إكتشاف الخلل
المؤدي للإكتئاب و الملل 
و محفوظات الرضا و البطر	
و الدعاء اثناء نزول المطر 
و كل الكلام الجميل المكرر ده ..للأسف
مش قادر يساعده
أن يندمج..
 و ينهمك..
و ينزل الملعب بقلبه  و بروحه و اعصابه
يعمل ايه ؟
و هوّ مش قادر يكدّب اللي حاسس بيه
زي اللي شاف الفيلم مية مرة
و داخله تاني..
مجاملة لصحابه

الإندماج - مصطفى إبراهيم

قل لم ولن تعلم
ماذا يدور
ف الدنيا اللي طالَّة زي السِّحر م البلُّور
إلا إذا فتَّحت.. عيونك الاتنين ف وش النور
ورأيت سنين البشر وهيَّ بتتبني وتتهد
يا هل ترى الدنيا دي بجد ولّا انا بحلم؟
قل لم ولن تعلم يا أسير الزمن
الدنيا هيَّ الشروة ولّا هيَّ التمن
كل اللي صدقناه كان كدب ولّا بجد
الذاكرة..
هيَّ البشر والسنين العابرة ولّا روح الحد
السنين المُرة تمن الإرادة الحُرة..
ولّا ده تهريج؟ 
ولّا بلعنا القصة اللي ألِّفناها بالتدريج؟ 
ولّا اترمينا ف فيلمنا وماشيين معاه؟ 
تهرب لفين يا ابن الحياة م الزمان الأب؟
تعرف منين..
ده عقاب..
ولّا تسلسل منطقي..
ولّا امتحان الرب؟
الحق واحد ولّا مليون حق؟ 
ليه القمر بطَّل من زمان ينشق؟
المعجزات؟
 -خلصوا
والمؤمنين
-ورثوا
قول لكل زمايلك الشكَّاكة لابد يحترسوا
الحياة رهان كبير
والعدم رهان خطر
لازم تصدَّق في كلام الأثر
وف قلب الإنسانية اللي اتعصر علشان..
يوصفلك الجنة والصراط والنار
يوصفلك البير اللي ملُهش قرار
معنى الوجود ومعنى الخير
والجنة اللي بحسن السير
منين نجيبلك معجزة من غير
ما الكاميرا تقفشنا
واحنا بنلفّق.. حكاية للمجهول
وكأننا خايفين نقول
إن الأمل
اللي بيعيشنا لما نتألم
هوَّ الوحيد اللي كان وما زال
له حق يتكلم..
..
حبايبنا مش ف قبورهم
حبايبنا في مكان ما مستنينا نزورهم
جايز هنبدأ من جديد تاني
جايز يكونوا ابتدوا قبلنا
نحكيلهم ع اللي فاتهم هنا
ويحكولنا ع اللي فاتنا هناك
جايز يكون الموت..
مش أكتر
من الشبَّاك

----------------------------------------------

تأليف موسيقي : أحمد مصطفى صالح

ماذا يدور - مصطفى إبراهيم

يا هل ترى كانت اللغة قاصدة
وهيَّ بترص القوافي للكلام وترتّبه
وكل كلمة يبقالها أخت في القافية
بتجرجر الشعرا وراها لنفس المعنى بالعافية؟
قاصدة تحط كلمة حق جنب كلمة لأ؟
وكلمة أرض جنب كلمة فرض جنب كلمة عرض؟
كلمة شهيد أخت كلمة نشيد بعيد وسعيد؟
كلمة أمل أخت كلمة عمل
كلمة شوف أخت كلمة خوف
كلمة صبر جنب كلمة قبر
كلمة زمن أخت كلمة تمن
كلمة طريق أخت كلمة صديق
كلمة نور أخت كلمة سور
وكلمة أب أخت كلمة رب
اللغة هيَّ اتفاقنا من قبل السنين؟
ولَّا صوتنا سوا..
اللي ما بنعرفش ده صوت مين؟
ولَّا اللغة كائن تاني..
بعقل مفصول جوّاني؟
ولَّا ببساطة المزيكا..
هيَّ اللي بتملّي الاتنين؟
---------------------------------------
موسيقى : أحمد مصطفى صالح

اللغة - مصطفى إبراهيم

انتا مش مجنون
ولا كلّ ما بتسرح شويّة بيكون اكتئاب
أو لما بتهلفط لوحدك وانتا في الأوضة وقافل عليك الباب
او تضحك على حاجة في دماغك وانتا وسط الناس
او تزغلل عينيك وتشوف وشوش بشر جوا السحاب
وكلاب بتجري في نقش البلاط وطيور
او عيون جوا البريق باصّالك
وانتا اللي مش قادر تشوف م النور
كل اللعب في الدنيا بلعبها في دماغي
لحد اما تبقى كل حاجة جميلة
او العالم بتقله يمر
عالم..
ما فاضلش جوّاه اي حاجة تثبتلي اني حر
غير الثواني القليلة
اللي بسيب جوّاهم
ّخيط دماغي يكر

----------------------------------------
موسيقى : أحمد مصطفى صالح

الشرود - مصطفى إبراهيم

انا مش هبيع الأمل للناس
ولا هقدر أبيع اليأس
ولا هقدر أبيع فكرة 
ممكن تتقلب بكره و تبقى العكس
ولا هقدر
أسكّت صوتي في دماغي و أقول له خلاص
ما عادتش مستاهلة
الدنيا صعبة ..إلعب السهلة
انت اللي بس مكبر الموضوع
بلاش تكرر خيبتي و غبائي
بطّل تصدّق و انت هتلاقي
عينيك الغرقانين من بكره قاطعين الدموع
بطّل كتابة
و بطّل كآبة
و بطّل تقول عالعبط إخلاص
مش كل صاحب حلم يبقى صاحب حق
....
بس تفضل حتة فيا تقول لي لأ
قلت مش زي ما قلتش
مش كل طرح الدنيا كلام
ولا كلنا ولاد النسيان
لازم هتفضل
ف الدنيا حاجة نقطفها 
بحاول اوصفها
كأني بوصف لواحد أعمى ايه الألوان 
نهنهات الامهات من آخر الطرقة في المستشفيات بالليل
ريحة الطبيخ على السلّم  و ريحة اللب جوه الفصل
عرض جوي لخمسمية حمامة في السما من غير ما يتفقوا
 صوت اليمام في المناور ويّا اول خيط نهار
ريحة كولونيات الغلابة في المواصلة الصبح
صرفيات الاكسوجين لمعلبات المترو مع كل فتحة باب
اول ظهور للملح في طريق المصيف
فرحتك بالنفق و انتا عيّل صغير
و فرحتك بالنوم و انت عيّل كبير
مش كل حاجة بنعرف نحط كلمة مطرحها
الدنيا لسه فيها حاجات ما بنعرفش نشرحها
طول ما موجودة.. الدنيا ما اتهدتش
ما يصحّش آجي للدنيا كأني ماجتش
فيه شفرة جوانا لسه ما اتفكتش
و قدامها لسه كتير
--------------------------------------
موسيقى :أحمد مصطفى صالح

لسه كتير - مصطفى إبراهيم (HQ)

الإله الذي يَعبُد
----------------
للشاعر الكولومبي الراحل راؤول جوميز خاتين
ترجمة عن الإسبانية : أحمد محسن
ترجمة للمصرية : مصطفى إبراهيم


أنا إله في قريتي وواديّ
ليس لأنهم يعبدونني، بل لأنني أنا أفعل ذلك
لأنني أنحني أمام من يمنحني
بعض الرُمَّانات أو بسمة من إقطاعيّته
أو لأنني أذهب إلى حيث سكان القرية الأقوياء
لأتسوّل عملة أو قميصًا فيعطوني
لأنني أراقب السماء بعينيْ طائرٍ
وأسميها في أبياتي
لأنني وحيد
لأنني نمت ستة أشهر على كرسي متأرجح
وخمسةً على أرصفة المدينة
لأنني أنظر إلى الثروة نظرةً جانبية
لكن بلا كره
لأنني أحب من يحبني
لأنني أعرف أن أزرع البرتقال والخضروات
حتى في أشدّ الحرّ
لأن لي عرّابًا
عمّدتُ كل أبنائه 
لأنني لست طيبا بطريقة معروفة
لأنني أحب الطيور والمطر وطقسه غير المستقر
الذي يغسل روحي
لأنني وُلِدتُ في مايو
لأن أمي هجرتني حين كنت في أشد الحاجة إليها
لأنني حين أمرض
أذهب إلى المستشفى الخيري
لأنني فوق كل شيء
لا أحترم سوى من يحترمني
الذي يكسب كل يوم خبزًا مُرًّا ووحيدًا ومُتنازعًا عليه
كأبياتي هذه التي أسرقها من الموت.

ترجمة أحمد محسن

■ ■ ■

لو هقول الحق
فنا عندي في البلد ناقص يعملولي مقام
مش عشان يعبدوني لأ..
لكن عشان..
 بهز راسي بإبتسام...
ونا باخد الرمانة من ايد الخواجة صاحب الأطيان
انا اللي بروح لكبارات البلد اشحت فلوس
واشحت ساعات قمصان
انا اللي ما باشوفشي السما الا بعينين عصفور
طاير بعيد
راجع بيكتب عنها في قصايده
بيعبدوني عشان وحيد...
علشان قدرت انام على كرسي لشهور..
وشهور زيهم 
على رصيف الشوارع...
زيّي زيّ ايّ كلب...
بيعبدوني عشان ..
بابص للفلوس بنص عين 
وبنص قلب
او عشان بعرف احب اي حد يحبني 
و لسه جوه قلبي عمار..
او عشان بعرف ف عز الحر ازرع  برتقان وخضار
او عشان انا اللي باركت كلّ ولاد شيخي الجليل
او عشان بيشوفوني طيب ..
وما يعرفوش ازاي ف بيقولوا جميل
او عشان بحب المطرة والطير والغيوم...
بحب المطرة تغسلني جوه امواجها
او عشان اتولدت ف مايو..
لأن امي سابتني ف عز ما كنت محتاجها
او لأني بروح لعيادات الجوامع يوم ما بعيا بجد
بيعبدوني لأني فوق..
فوق كل حاجة و كل حد
او عشان قليل الذوق
ما اقدرش اقدّر غير..
 اللي يقدّرني
ما اقدرش اقدّر غير ..
اللي بيجروا ع اللقمة البعيدة
اللي بيجروا ع اللقمة الوحيدة
اللي يجيبوها من بق الأسد ..
و بدونها يبقوا على الحديدة
زي شعري..
 اللي اوقات بسرقه 
من بين سنان الموت

مصطفى إبراهيم

الإله الذي يَعبُد - راؤول جوميز خاتين - ترجمة شعرية للمصرية مصطفى ابراهيم

قصيدة "رؤى منتصف الليل" 
 للشاعر الكولومبي خوسيه أسونسيون سيلفا (1865 - 1896)

الليلة الماضية، وأنا وحدي، نصف نائم
تبدّت لي أحلامي في أزمان أخرى
أحلام الأمنيات، والأمجاد والأفراح
والسعادة التي لم تكن قطّ لي.
بدأت تقترب في مسيرات بطيئة
وتسكن زوايا الحجرة المظلمة
خيّم صمتٌ هائل على كل أنحاء الغرفة
وأمسك بندول الساعة بتلك اللحظة
تقدّم عطرٌ متردّدٌ لرائحة منسية
شبحا، وتحدّث إليّ من الماضي
رأيت وجوها أخفتها القبور منذ زمن
وسمعت أصواتًا سمعتها من قبل، لا أعلم أين
اقتربت الأحلام ورأتني نائما
فمضت مبتعدة، دون أن تثير ضجيجًا
ودون أن تطأ خيوط السجادة الحريرية،
ومضت تتلاشى، غارقة في الظلال.


ترجمة من الإسبانية - أحمد محسن


*****
 
امبارح..
 ونا ممدد لوحدي..
نص نايم  نص صاحي
الاقي فجأة ايه معدي.. الاقي مين؟
الاقي كل احلامي القدام راجعين
زي اللي راجع من زمن تاني
كل أمجادي وافراحي..
وحتى احلام الأماني..اللي ما جاتش في وقتها
وحتى السعادة اللي عمري ما دقتها
جايين مواكب داخلة اوضتي ببطء
ماليين عليا..
كل شبر ف الضلمة اللي حواليا
الصمت خيم فجأة ع المشهد
وكأن كله ف لحظة فقد النطق
والساعة وقفت فجأة قدامي
و اتقدمت من بين صفوف احلامي
بخطوة مهزوزة
ريحة حلوة قديمة منسيّة
تشبه لجنيّة طالعالي م الماضي 
ولقيت قصادي وشوش كتير سايبين وراهم قبرهم فاضي
وسمعت اصوات مش غريبة عليا
بس امتى سمعتهم او فين
وحبة حبة... 
قعدت تقرب مني احلامي
وكأنها ماشية بدون رجلين
بصت عليا لقيتني نايم 
مشيت بعيد
مشيت زي ما طبّت بدون مواعيد
مشيت بعيد من غير لا صوت ولا حس
من غير ما حتى تمس..
رجليها سجادتي الحرير
مشيت ودابت حبة حبة...
زي نور جوه الضلام بيقل
مشيت و غرقت..
حبة حبة جوه الضل...


ترجمة للمصرية - مصطفى ابراهيم

رؤى منتصف الليل - خوسيه أسونسيون سيلفا - ترجمة شعرية للمصرية مصطفى إبراهيم

العالم النهارده..
أسهل كتير من امبارح
والمكن حيعمل كلّ حاجة خلاص
حنبرمج الصنعة ونبرمج الإخلاص
حنبرمج..
وحننفّض ايدينا من الحياة.. 
ونقعد جنبها نتفرّج
الّا اللي لسّه عنده شيء يتقال..
من حتّة برّه الكود
من حتّة برّه الذاكرة
من حتّة بين الصفر والواحد..
لسّه فيها ارباع وفيها انصاص
آخر حصون الإنسانيّة الفنّ..
والفنّانين حرّاس
----------
ILLUSTRATION: DAVID KLEIN

الكود - مصطفى إبراهيم

واحنا ف سنين الغم والحيرة
والناس الكتيرة اللي بتسألك.. مالك؟
الناس مش ف حالها.. إنتا ليه ف حالك؟
إيه اللي جالك فجأة خلَّى لك..
حتة ف قلبك تبقى مش لينا
إزاي تسيبنا نتوه لوحدينا
اوصفلنا..
طعم الطمأنينة..
اوصفلنا الإحساس..
اوصفلنا الحب اللي مش لازم يكون للناس
اوصفلنا عالم ما بيخوفش جوَّانا
علمنا وحدة تكون
أكبر من الأحزان
طمنا انك مش زينا بردان
امسك إيدينا الكتيرة..
بكفك الدفيان
وعدينا

الإعتزال - مصطفى إبراهيم

نشيد للحب
ماريّا ميرسيدس كاررانسا (1945- 2003)

مساء ما لن تنساه أبدًا
سيأتي إلى بيتك ويجلس على المائدة
شيئا فشيئا سيكون له مكان في كل غرفة
ستنطبع بصماته على الحوائط والأثاث
سيبعثر سريرك ويحفر حفرة في وسادتك
الكتب في مكتبتك، نسيج السنوات الجميل،
ستتشكل حسب ذوقه وستشبهه
ستغيّر الصور أماكنها
ستراقب عينان أخريان عاداتك
وذهابك ومجيئك بين الحوائط والأحضان
ستختلف كل ضوضاء وكل رائحة
في مساء من المساءات لن تنساه أبدًا
ذلك الذي قلب بيتك رأسا على عقبٍ وسكن أشياءك
سيخرج من الباب دون أن يقول وداعًا.
عليك أن ترتب بيتك من جديد،
أن تعيد وضع قطع الأثاث مكانها، أن تنظّف الحوائط،
أن تغيّر الأقفال، وتكسر البراويز،
أن تكنس كل شيء وتستمر في الحياة.

---------------------------------------------
ترجمة من الإسبانية : أحمد محسن
---------------------------------------------

**********************************************
في ليلة غير كل الليالي
هتعيش فاكرها مهما قلت نسيت
هتخبّط الايد الغريبة بچنتلة ع الباب
وهيدخل الضيف الودود..
شايل ما بينكوا الكلفة و العيب والحدود..
يقعد معاك ع الأكل..
زي اللي طول عمرهم أحباب.
وحبة حبة هيبقى عنده مكان
ف كل اوضة وعنده ريحة وشكل
هتسيب ايديه علامات..
فوق الستاير والحيطان والعفش
مرة ف علامة مكان دماغه على المخدة
مرة تانية ف ريحة جوا الفرش
حتى مكتبتك حبيبتك
اللي انت دخت تلم فيها سنين 
هتبقى شبهه 
وذوقها من ذوقه
حتى الصور..
كل حيط في البيت هيغيّر البراويز..
 المتعلقين فوقه
وهتراقبك عيون تانيين
هتراقب عاداتك
و قلبات موداتك
وشكلك في المتاهة وانت هايم
 بين حيطان الدنيا وأحضانها
كل ريحة هتختلف
حتى صوت الدوشة جوه البيت
في ليلة غير كل الليالي
هتعيش فاكرها مهما قلت نسيت
اللي شقلبلك حياتك..
وقاسمك الأيام..
وقاسمك الأحلام..
وقاسمك العالم بأفراحه وأحزانه
هيمشي فجأة بدون كلام
 من غير ما حتى يقول سلام
و كأن كله كان خيال
لا عمره كان.. 
ولا الليالي عمرهم كانوا
ف الوقت ده..
لازم ترتب البيت من جديد 
وكل شيء يرجع مكانه
تنضّف الحيطة
تغير الاقفال
تكسّر البراويز
وتكسّر وياها الاماني
وتكنس كل حاجة
وتمشي زي الحياة لقدام
وتبدأ حياتك من هنا..
من جديد تاني
---------------------------------------------------
ترجمة شعرية للمصرية : مصطفى إبراهيم
---------------------------------------------------

نشيد للحب - ماريّا ميرسيدس كاررانسا - ترجمة شعرية للمصرية مصطفى إبراهيم

---------------
ماعادش نافع تناطح في طواحين الهوا لوحدك
الدنيا أكبر من ايديك دلوقت
العالم الملموم كبر..
والعالم المهموم قدر..
يبهت على وشك همومه..
ويلّبسك هدومه 
ويجري بيك ورا اللقمة زي الجميع
وانت اللي كنت زمان
بتقول على الدنيا..
مش جاية على قدك
دلوقتي بتناطح في طواحين الهوا لوحدك
---------------


#شعر #poetry #الزمن #مصطفى_ابراهيم 

Popular tracks by Mostafa Ibrahim | مصطفى إبراهيم