Mstdfr Show 2019

وهذي أول حلقة لسنة ٢٠١٩ ونطلقها اليوم مع ضيف جديد وصديق من الإمارات وبودكاستر كمان… الرائع سعيد الشامسي
(@SaeedAlshamsi_)
من بودكاست روت كويست واللي أتكلمنا معاه على الألعاب الإلكترونية وأنواعها المختلفة من الجديد للقديم. وأتكلمنا على لعبة فورتنايت إللي غزت العالم وعقول الكبار والصغار، واتكلمنا عن مدى تأثير ألعاب الكمبيوتر علينا بشكل سلبي أو إيجابي. وممكن تقرأوا أكثر عن تأثيرات الألعاب في كتاب بعنوان سوبر بتر
(Superbetter)
للكاتبة جين مكجونيجال
(https://www.amazon.com/SuperBetter-Living-Gamefully-Jane-McGonigal/dp/0143109774).

وكالعادة دخلنا وخرجنا في مواضيع مختلفة وأضطرينا إننا نوقف تسجيل لأن لو أستمرينا كان صار طول الحلقة خمسة ساعات! وممكن تتابعوا أعمال قناة روت كويست هنا
(@rootquest)

وممكن تسمعوا بودكاست روت كويست هنا
(www.rootquest.net)

The MSTDFR Show

#117: ألعب حوت أزرق ولا تقتل نفسك

أتكلمنا اليوم عن كم موضوع ومن أهمها كان موضوع التحرش الجنسي في مجتمعنا واللي هو شيء نادراً ما أحد يتكلم عنه في مجتمعنا… فحبينا نسلط شوية ضوء عليه.

والموضوع الثاني المهم اللي أخذ أغلب وقتنا كان الزواج… سبب قلق كل أب وأم في العالم العربي… وهاجس المجتمع الأول! ”متى نفرح فيك؟“ أكثر سؤال يسمعه كل عازب وعزباء، لكن سؤالنا هو ليش الناس رابطين فرحهم بزواج غيرهم؟ وللناس اللي تحب تسأل السؤال هذا… ياخي ايش دخلكم؟ يمكن العزاب فرحانين لحالهم؟ مالكم صلاح!

وللمعلومية… أخواننا وأخواتنا العزاب… ترا اللقافة المجتمعية ما توقف بعد الزواج، من أول صباحية بعد الزواج حيجيكم السؤال الثاني… ”ها متى حتخلفوا؟“ لا وكمان حتى لو خلفتوا يجيكم السؤال ”متى حتجيبوا طفل ثاني؟“ ترا مافي فكة!

الموضوع مو انه الشباب والشابات ما يبغوا يتزوجوا، بس الناس تعبت من اللقافة والتدخل في الحياة الشخصية. وعشان نتكلم عن الموضوع هذا بشكل أوسع شاركنا ثلاثة عزاب في حلقة اليوم… أصدقاء البرنامج فاطمة المهيري و نفلة الزعابي وعبدالله رافعة.

تحذير: مواضيع الحلقة يمكن ما تكون مناسبة للأطفال في بعض العوائل بسبب نوع المواضيع وبعض الألفاظ… وترا الحلقة طولها ساعتين، أتحمسنا شوية بس كان الحوار شيق وما كنا نبغى نوقف.

#118: لـيـش أولادكـم مـا يـبغـوا زواج؟

حلقتنا اليوم حلقة مميزة وشاركنا فيها إثنين من خريجي برنامج الزمالة قمم لتمكين القيادات الواعدة من الجامعيين والجامعيِّات في السعودية، دالية القرني و سمو الخضير.

وكالعادة عمار ورامي أتكلموا مع ضيوفنا عن مجوعة كبيرة من المواضيع اللي تنوعت من الدراسة للمرحلة الجامعية والأبحاث العلمية وتدريب الطلاب ومساعدتهم في فهمها وكيف ممكن الطلبة عندهم القدرة على الشرح وتسهيل الصعوبات لزملائهم. وتطرقوا لموضوع الطاقة البديلة والخلايا الشمسية والدراسات القائمة عليها في المملكة.

ودخلوا كمان على الناحية الإجتماعية وشبكات التواصل وكيف حياتنا صارت معتمدة بشكل كبير على هذه البرامج وكيف بعض الناس زي رامي قدروا يتخلوا عن هذه البرامج، ودردشوا شوية عن التأمل والتفكر وكيف ممكن نوصل للسلام الداخلي في أعمق نقطة في عقلنا الباطن وكيف ممكن نلاقي هذا السلام عن طريق الصلاة اليومية وكيف ممكن تساعدنا في تصفية الذهن والوصول للسكون العقلي والراحة النفسية.

وإذا تبغوا تعرفوا أكثر عن ضيوفنا ممكن تتابعوهم على:

دالية القرني dalyaQ@

سمو الخضير healthyst_@

وإذا تبغوا تعرفوا أكثر عن برنامج قمم ممكن تزوروا موقعهم على الرابط www.qimam.com

#119: عفواً... أين أنت؟ تكلم حتى أراك

مين فيكم يحب البر؟ والطبيعة؟ والتطعيس؟ كثير ناس يحبوا الإستكشاف والمغامرة… ومن وسائل الإستمتاع بهذا النوع من الترفيه السيارات الرياضية ذات الدفع الرباعي. ومن السيارات اللي خلقت لنفسها مجتمعها الخاص لأكثر من سبعين سنة هي سيارات الجيب اللي تنتجها شركة دوج.

ورامي وعمار الإثنين من محبي هذه الفئة من السيارات وأستضافوا اليوم شخص آخر من محبي الجيب وهو صديقهم الأستاذ عبدالرحمن شاكر إللي عنده خبرة كبيرة في هذا النوع من السيارات الرياضية.

وشاركهم كمان صديق البرنامج ساري صبان وأتكلموا عن عدة مواضيع من ضمنها وعي الأطفال في الجيل الجديد، مواقف فقدان أو تضييع ممتلكاتنا الخاصة في سيارات الأجرة، واتكلموا كمان عن المناطق الطبيعية الخلابة في المملكة واستخدام الكاميرات الأمنية في السيارات إللي في موقف معين حصل مع عبدالحمن كشف عن هوية مجرمين قاموا بعملية اختطاف.

#120: جيب من جيبي مفتاح الجيب

حلقة اليوم مميزة لأنه زارتنا واحدة من مستمعينا الأوفياء من مدينة الطائف مخصوص عشان تسجل معانا… أختنا مرام الغامدي طالبة التسويق من جامعة الطائف اللي تحب تقرأ روايات كثير. واللي ميز اليوم أكثر إنه صديقتنا خيرة بندقجي إللي لها فترة ما زارتنا أخيراً أتكرمت علينا وشاركت في الحلقة.

وأتكلمنا اليوم عن مناهج الجامعات الإنجليزية… هل هي مشكلة؟ أم شيء إيجابي يساعد الطلبة والطالبات على دخول سوق العمل؟ وهل دراسة الجامعة بتأهل الخريج بالخبرة اللازمة للقيام بعمله؟ أو الخبرة العملية هي اللي بتأهل الخريج؟ وكيف نعرف شغفنا؟ وإيش هو سر النجاح؟

وأهم سؤال ناقشناه في تاريخ مستدفر… إيش هو ”الفلوبي ديسك“؟

#121: هل المشكلة لغة المنهج؟

مو كل شي في الدنيا حيكون على هوانا… ومع ذلك في كثير أشياء لازم نتقبل أي شيء خارج عن إرادتنا، لكن هذا لا يعني إننا ما نحاول اننا نغيره إذا أتيحت لنا الفرصة أو إننا نبعد عنه تماماً لنتفاداه إذا نقدر نعيش من غيره.

اليوم حلقتنا حتكون مختلفة لأنها حتكون مكونة من جزئين، الجزء الأول حتسمعوه الآن لكن الجزء الثاني حيكون على بودكاست آخر… بودكاست أوف كويست التابع لبودكاست رووت كويست من دولة الإمارات. وأحد ضيوفنا اليوم هو مؤسس رووت كويست صديقنا سعيد الشامسي، ويشاركه في الحلقة أصدقاء البرنامج المبدعة فاطمة المهيري والفنان عمرو ضياء. 

وممكن تسمعوا الجزء الثاني من الحلقة على قناة رووت كويست على الرابط: http://traffic.libsyn.com/groute101/OQ16.mp3

#122: مشكلتي مع الإعلام هي...

تبغوا تسمعوا نكتة؟ مرة كان في ثلاث كتاب كوميديين… ممثل أصوات… ومحب للتاريخ والسياسة… قاعدين مع بعض في شقة… واحد فيهم قال إيش رأيكم نسجل بودكاست؟ وافق الباقيين وشغلوا التسجيل… وقعدوا الخمسة يتجادلوا لمدة ساعتين. والناتج كان حلقة جديدة مليانة فلسفة وشوية نكت. وكان معانا في الحلقة الكوميديان شاكر الشريف و الكوميديان خالد عمر وأصدقاء البرنامج مهاد كاشف و عبدالله رافعة.

وأتكلمنا في الحلقة عن سوء فهم الكثير في مجتمعنا لعالم الكوميديا، وأتكلمنا عن العنصرية وهل هو مقبول لبعض الكوميديين إنهم يستخدموا بعض النكت اللي تعتبر عنصرية؟ وهل كل نكتة نعتبرها عنصرية هي فعلاً عنصرية؟ أو إحنا بس بنتدلع؟

#123: ليش معصب؟ ترا والله نكتة

كثير ناس حول العالم يؤيد فكرة المساواة… والمساواة كويسة في حال طبقت بالشكل الصحيح وفي المكان الصحيح. لأنه المساواة مو دائماً تكون عادلة، ومن أكثر القضايا اللي بتطلب فيها المساواة في زمننا الحاضر هي المساواة بين الرجال والنساء. وهو شيء طبيعي بالذات انه أغلب المجتمعات ذكورية وفي كثير من المواقف حقوق المرأة لم تعطى لها على أكمل وجه، لكن أحياناً هذه المطالبة ممكن تأثر على المجتمع بشكل سلبي… والزيادة في المطالبة ممكن تكون عنصرية تجاه المرأة بحد ذاتها. 

صديق البرنامج عمر حسين نزل مقطع على قناته في اليوتوب يناقش هذا الموضوع في برنامجه ”ثلاثة دقائق أسبوعية“، ولكن حس إن  الموضوع يحتاج أكثر من ثلاثة دقائق! وعشان كدة عدّى علينا في مستدفر وناقشنا الموضوع بشكل مفصل. ومع ذلك ما قدرنا نغطي كل الجوانب!

والأهم من ذلك كنا نتمنى مشاركة بعض النساء في هذه الحلقة عشان نسمع من الطرفين بس ما زبطت، فبإذن الله حنسوي حلقة ثانية مفصلة أكثر ويكون فيها مشاركة من الفريقين.

ممكن تشوفوا حلقة عمر على اليوتوب هنا: https://youtu.be/VOZDY8g5S6o

#124: هل المساواة حقاً منصفة؟

إحساس مرة غريب انكم تروحوا السينما عشان تشوفوا فيلم يكون متصور في مدينتكم… في هذه الحالة جدة… وتقريباً كل الممثلين على الشاشة أصحابكم ومعارفكم! وهذا اللي صارلنا لمن رحنا نتفرج على فيلم ”رولم“ السعودي (من كتابة ياسر حماد وعبدالإله القرشي) واللي بينعرض الآن في السينما السعودية. وبعد ما شفنا الفيلم قررنا اننا نتكلم عنه وعن الإنتاج السينمائي في المملكة، وعشان الفيلم من كتابة واخراج وتمثيل شباب وشابات الوطن قلنا أفضل من يتكلم عنه هم الناس اللي انتجوه.

فاستضفنا في حلقة اليوم بعض طاقم فيلم رولم… أحد الكتاب والمخرج عبدالإله القرشي، والمنتجة ندى المجددي، وأبطال الفيلم سارة طيبة و خالد يسلم و فاطمة حسين و علي الشريف. واللي كلهم تكرموا بمشاركتنا ودردشوا معانا لأكثر من ساعة عن التمثيل والكتابة والإخراج والإنتاج وبعض المعلومات خلف الكواليس عن الفيلم.

ممكن تشوفوا اعلان الفيلم على الرابط: https://www.youtube.com/watch?v=BN2UzTvwFO8

#125: كله هنا جاهز؟ طيب يللا رولم

كان لبودكاست مستدفر الشرف في حضور منتدى الاعلام العربي وفيه حصلنا على فرصة تجاذب أطراف الحديث مع بعض كبار الإعلام العربي والتعرف عليهم على مستوى شخصي. في هذه الحلقة يحاور رامي كل من الأستاذ مصطفى الأغا والأستاذ حسين شبكشي.

Invictus Movie (https://www.imdb.com/title/tt1057500)

Ghandi Movie (1982) (https://www.imdb.com/title/tt0083987/?ref_=nm_knf_i2)

The Silkroad (https://www.bbc.co.uk/programmes/p03qb130)

God Grew Tired of Us (https://www.imdb.com/title/tt0301555)

The Hardcore History Podcast (https://www.dancarlin.com/hardcore-history-series)

Loose Change (https://www.imdb.com/title/tt1394268)

#126: منتدى الإعلام العربي [الجزء الأول] تغطية خاصة

في مجتمعنا نسمع كثير عن هوايات إما رياضية أو فنية… ونادراً ما نسمع عن هوايات تقنية، ولحسن حظنا ضيفنا اليوم صديقنا يوسف رفة حكى لنا عن هواية ينتشر محبينها حول العالم… هواية الإتصال اللاسلكي أو (Ham Radio) واكتشفنا انها هواية غير بسيطة ولها أنظم] و لوائح اللي تمكن أي شخس من ممارستها.

#127: نداء عام من هوتيل زولو وان

كان لبودكاست مستدفر الشرف في حضور منتدى الاعلام العربي وفيه حصلنا على فرصة تجاذب أطراف الحديث مع بعض كبار الإعلام العربي والتعرف عليهم على مستوى شخصي. في هذه الحلقة يحاور رامي كل من الدكتورة نورة عبدالله والدكتور علي جابر.

#128: منتدى الإعلام العربي [الجزء الثاني] تغطية خاصة

في يوم ٢٠ مارس ٢٠١٩ صديق البرنامج عمر حسين نزل مقطع على قناته في اليوتوب يناقش فيه ”هل الرجل والمرأة متساويين؟“ في برنامجه ”ثلاثة دقائق أسبوعية“ (ممكن تشوفوا حلقة عمر على اليوتوب هنا: youtu.be/VOZDY8g5S6o)، ولكن حس إن الموضوع يحتاج أكثر من ثلاثة دقائق! فقبلها بثلاث أيام أتواصل معانا واقترح اننا نسجل معاه حلقة بودكاست نناقش فيها نفس الموضوع ويشرح وجهة نظره بالتفصيل وننشر الحلقة في نفس يوم نشر حلقته اليوتوبية. فحبينا ان حلقتنا تتضمن نساء ورجال لمناقشة الموضوع بشكل منصف… لكن لأنه كان عندنا يوم واحد للتسجيل فقط كان من المستحيل اننا نلاقي أي أحد يشاركنا في التسجيل… فقررنا اننا نناقش الموضوع على ثلاثة حلقات! حلقة أولى رجالية (ممكن تسمعوا الحلقة الأولى الرجالية هنا: https://soundcloud.com/mstdfr/ep124)… وحلقة ثانية نسائية… وأخيراً حلقة ثالثة تجمع ما بين النساء والرجال لمناقشة ما سلف.

ولأسباب حتسمعوها في أول هذه الحلقة قررنا اننا ما نعلن خطتنا هذه إلا في الحلقة الثانية، واللي هي هذه الحلقة اللي حتسمعوها الآن… وهي النسخة النسائية من الموضوع اللي شاركنا فيها كل من رزانا البنوي و روان رضوان و لمى الزبيدي و مي. وبما أن هذه الحلقة نسائية فقط استبدلنا عمار ورامي بصديقة البرنامج ومقدمة بودكاست الزبدة خيرة بندقجي.

#129: هل المساواة حقاً منصفة؟ - النسخة النسائية

إذا كنتم من مستمعي بودكاست مستدفر حتعرفوا ان عمار عنده مشكلة عويصة مع القراءة! وهذا الموضوع نوقش أكثر من مرة على هذا البرنامج خلال السنوات ولكن من دون أي فائدة.

فاليوم أصحاب عمار وبقيادة عمير طيبة… قرروا كمحاولة أخيرة انهم يتصرفوا ويقنعوا عمار انه يبدأ يقرأ… هل تتوقعوا محاولتهم هذه حتنجح؟ أو حتفشل زي باقي المحاولات؟

ضيوف الحلقة اللي باغتوا عمار كانوا عمير طيبة، عبدالله رافعة، مهاد كاشف، فاطمة المهيري، عمرو ضياء ونفلة الزعابي… والكتاب اللي حيحاولوا يخلوا عمار يقرأه بعنوان (GRIT) وممكن تلاقوه على الرابط:

https://www.amazon.com/Grit-Passion-Perseverance-Angela-Duckworth/dp/1501111108

#130: هيا نقنع عمار يبدأ يقرأ كتب

لسبب أو آخر… عالم البودكاست في الشرق الأوسط بدأ يكبر! وكل يوم صرنا نسمع عن بودكاسد جديد بينطرح في السوق. وعشان كدة اليوم رحنا على دبي وقالبلنا صديقنا عمر التوم من دكان ميديا وبودكاست دكان، وجلسنا ندردش عن وضع البودكاست في العالم العربي اليوم ومقارنته بالإعلام التقليدي.

وناقشنا كمان بعض الدروس اللي أتعلمناها خلال الثلاث سنوات اللي مضت كصانعي ومنتجي بودكاست وايش الأشياء اللي تغيرت في برامجنا.

وطبعاً كالعادة لما بودكاسترز يقعدوا مع بعض الهرجة تطول.

#132: أرمي المايك... خلاص وصلنا

أي حلقة ينضم معانا فيها عبدالله رافعة تكون حلقة فيها الكثير من المشاعر… فما بالكم لمن يكون في الحلقة بدل الرافعة… اثنين الله يحفظهم ويخليهم! اليوم زارنا مع عبدالله أخوه الفنان والموسيقار عبدالخالق بن رافعة اللي أضاف إحساس وشجن لحلقتنا بفنه وابداعه وعوده الرنان… وكمان أضاف لنا كمية كبيرة من الحكاوي والمعلومات الموسيقية اللي ما كنا نعرف عنها. الحلقة هذه كانت من الحلقات المميزة اللي حتستمتعوا بيها على أكثر من مستوى. 

وممكن تتابعوا عبدالخالق على حساباته في تويتر وانستجرام هنا (@AK_Rafaah)
وتلاقوا عبدالله على تويتر وانستجرام هنا (@AbdullahRafa94) أو على حساب دائرة الآنيميشن على تويتر هنا(@DaeratAnimation)

وكالعادة ممكن تتابعوا رامي على تويتر هنا (@RTaibah) وعمار على تويتر وانستجرام هنا (@Sabban31)

#133: أضرب لي على الوتر الحساس

حلقة اليوم من مستدفر هي حلقة خاصة سجلناها بالتعاون مع أصدقائنا في في روت كويست و عشان تستمتع بالتجربة كاملة نتمنى تروح تسمع حلقة مستدفر رقم ١٢٢ أولاً و بعدها ترجع تكمل الحوار هنا. هذه الحلقة في الأساس نزلت على بودكاست ”أوف كويست“ قبل شهرين (حلقة أوف كويست: http://rootquest.net/podcast/2334) واليوم قلنا ننزلها لكم هنا في حال ما سمعتوها لسة.

نقاش اليوم عن كتاب خمسة أشياء يندم عليها المرء على فراش الموت و ناقشنا كل نقطة و شاركنا فيها آرائنا و تجاربنا الشخصية. قد تكون من واحدة من أجمل و أكثر الحلقات تأثيراً على الإطلاق و نتمنى تستمتعون فيها مثل ما استمتعنا فيها نحن.
المشاركين في الحلقة:
سعيد الشامسي
 فاطمة المهيري 
عمار صبان
 عمرو ضياء
حلقة مستدفر ١٢٢
موقع شبكة مستدفر

اسم الكتاب:
The Top Five Regrets of the Dying

#134: أوف كويست و أماني الموتى

مين ما يحب الألعاب؟ كلنا كبرنا على لعب واحنا صغار… من مونوبولي لأونو لحتى بلوت! إللي عمار ما يعرف يلعبها. وضيوفنا اليوم  سيدتا أعمال سعوديات دخلتا عالم الألعاب بقوة وأخترعوا لنا شركة ”حجرة ورقة مقص“ واللي تهتم بإختراع وصناعة ألعاب عائلية جديدة وممتعة.

رولا بادكوك ورفاه سحاب أتكلموا معانا عن الألعاب وأحدث انتاجاتهم، وكمان أتكلمنا عن أمور مختلفة كالعادة من التربية لسوق العمل وتطوير الذات وحتى بعض القصص المرحة من زمن الطفولة.

الحوار كان جداً شيق وبإذن الله حيعجبكم، وممكن تعرفوا أكثر عن مشاريع رولا ورفاه على موقعهم (https://www.rpsstudio.co/) أو حسابهم على انستجرام: (@rps_studio)

#135: هل تختار حجرة ورقة أو مقص؟

قبل تقريباً سنتين من اليوم وفي حلقة رقم ٤٢ مي وبدور زوجات رامي وعمار شاركوا معاهم لأول مرة في حلقة من حلقات بودكاست مستدفر، وكانت أول مرة مستمعيننا يعرفوا أكثر عن حياتهم الشخصية.

اليوم الزوجات رجعوا مرة ثانية وبمعلومات أكثر خصوصية! وفي هذه الحلقة بالذات أستعانوا بأحد أحدث ألعاب شركة حجرة ورقة مقص ”حكاوي علاقات“ وهي لعبة تنقسم إلى نوعين من الأسئلة:  1- اختبر معرفتك بشريك حياتك: هي عبارة عن خمسين سؤال يُجيب كل شريك بإجابة تُعبر عن الطرف الآخر في العلاقة.  2- شارك نفسك وعبّر: هي عبارة عن ١٠٠ سؤال عميقة يُجيب فيها كل شخص عن نفسه وعن احتياجاته وعن توقعاته في العلاقة. 
الموضوع كان في شوية فضايح لكن الأزواج في الآخر أتعلموا أشياء جديدة عن بعض… والجميع أستمتع باللعبة وبتسجيل الحلقة وان شاء الله انتم تستمتعوا كمان بسماعها.

#136: حكاوي علاقات ومع الزوجات

مسلسل جن اللي قوّم السوشال ميديا وماقعدها كان موضوع حلقتنا لليوم، وكان طلب خاص من صديقتنا الكاتبة والمخرجة فاطمه المهيري، اختلفت الاراء بين مؤيد ومعارض ومجرد متابع للمسلسل وفي هذي الحلقة فتحنا النقاش والفلسفه على مصراعيها للكل انه يبدي رايه الايجابي أو السلبي عن هذا العمل اللي يعتبر أول إنتاج عربي أصلي من انتاجات نتفلكس.

ضيوف الحلقة كانوا فاطمة المهيري، سعيد الشامسي، عبدالله رافعه، مهاد كاشف و نفله الزعابي.

#137: بلاش تتخوتوا فشّي جن هون

بودكاست مستدفر هو برنامج إذاعي سعودي من تقديم عمار ورامي يأتيكم كل أسبوع فجر يوم الأحد من مدينة جدة ويقدم لكم حوارات عصرية  وترفيهية وثقافية مع مجموعة من أبرز العقول في مجتمعنا اليوم.

ونقدم لكم محتوانا بشكل عفوي وصادق من قلوبنا إلى عقولكم