Sa Gabi ng Kasal
Tula ni Michael Coroza
Musika ni Joel Costa Malabanan
Dagdag na Gitara ni Levi Bartolome


Nanghihimok ang dilim
Na kapwa natin hubdin
Ang mga hiya natin.

Halina aking liyag
Biyaya ng magdamag
Na magyakap ‘tang hubad.

Sa birtud ng karimlan
Sasaating paghingal
Ang galak ng paglalang.

Sa birtud ng karimlan
Sasaating paghingal
Ang galak ng paglalang.

Pagpapalang papatak
Sa dalumat ang katas
Ng hangad ‘tang liwanag.

At bukas ay gigising
Tayong supling ng dilim
May tala sa paningin                 


Sa Gabi Ng Kasal (Tula ni Mike Coroza at Musika ni Joel Costa Malabanan)

DAKILANG GURO : TEODORO ASEDILLO
Titik ni ni Gregorio V. Bituin Jr. (11 pantig bawat taludtod ) 
Musika ni Joel Costa Malabanan 

Kabutihang asal ang punla mo 
At wikang taal ang itinuturo 
Makabayang diwa'y ipinapayo 
Sa mag-aaral ay mabuting guro 

Ngunit mga Kano'y sakdal-bagabag 
Wikang Ingles ang pilit nilalatag 
Gurong si Asedillo'y di pumayag 
Sa harap ng dayo'y naging matatag 

Bakit wikang dayo ang gagamitin? 
At ang sariling wika'y aalisin ? 
Banyaga na ba ang dapat tanghalin? 
Wikang sarili ba'y wikang alipin? 

Edukasyon noon pa'y pinaglaban 
Na ito'y dapat umangkop sa bayan 
Ngunit si Asedillo’y tinanggalan 
Ng trabaho kahit nasa katwiran 

Kawalang katarungan ang nangyari 
Ngunit siya'y patuloy na nagsilbi 
Di sa eskwela kundi sa marami I
nalay ang buhay sa masang api 

Bakit wikang dayo ang gagamitin? 
At ang sariling wika'y aalisin? 
Banyaga na ba ang dapat tanghalin? 
Wikang sarili ba'y wikang alipin? 

O, Asedillo, dakila kang guro 
Halimbawa mo'y nasa aming puso 
Bayani kang tunay sa ating pulo 
At liwanag ka sa maraming dako

Ang ating bayan ay ating gisingin
At ating isipan ay palayain!
Gurong Dakila ngayo’y  kilalanin
Si Asedillo ay alalahanin!

Bakit wikang dayo ang gagamitin? 
At ang sariling wika'y aalisin? 
Banyaga nga ba ang dapat tanghalin? 
Wikang sarili ba'y wikang alipin? 

Tinig at Gitara: Joel Costa Malabanan
Dagdag na Gitara: Levi Bartolome

DAKILANG GURO (tula ni Greg Bituin at musika ni Joel Costa Malabanan)

KUNG NAIS LUMAYA SA PAGKAALIPIN
Musika at Titik ni Joel Costa Malabanan
Ika-20 ng Hunyo, 2014

Wikang Filipino ngayo'y sinasakal
Ng mga bathalang may diwang kolonyal
Maging sa kolehiyo, asam ipatanggal
Ng nagdisenyo ng adhikaing hangal.

Ang mga makata, mga manunulat
Na nagkapangalan, kumita't sumikat
Ang hagdan ay wikang dapat na itanghal
Ngayon ay tahimik, yakap ang pedestal?

Silang nangagkamal ng salapi't dangal
Ba't walang pag-imik, ba't walang pag-angal?
Hangad maging global, dunong ang kapital
Sa bansa ng dayo, magpapatiwakal?

Ito ang panahon ng pagbabalikwas
Upang manindigan sindihan ang ningas
Ang Filipino ay di dapat tanggalin
Bagkos sa kolehiyo, ating pagyamanin

Kung nais lumaya sa pagkaalipin
Ang pagkatao ay sa wika buuin!

Makitid ang tingin kung kabuhayan lang
Ito ay usapin ng kinabukasan
Di lang nitong guro, kundi nitong bayan
Na pinaiikot lamang ng iilan!

Ang wika'y sandata sa pakikihamok
Tanging kasangkapan sa pakikisangkot
Kung nais langgasin, edukasyong bulok
Wikang Filipino ang lunas at gamot

Ito ang panahon ng pagbabalikwas
Upang manindigan sindihan ang ningas
Ang Filipino ay di dapat tanggalin
Bagkos sa kolehiyo, ating pagyamanin

Kung nais lumaya sa pagkaalipin
Ang pagkatao ay sa wika buuin!


KUNG NAIS LUMAYA SA PAGKAALIPIN (LIVE) ni Joel Costa Malabanan

Tao at Kalikasan
(Tulawit nina Joel Costa Malabanan at Ramoncito Paulin)

Tao, Gitara, Tinig at Harmonica: Joel Costa Malabanan
Inang Kalikasan: Maricris Amigo

                (Unang Bahagi: Awit)

          Nang likhain ng Maykapal ang daigdig
          Nilikha Niya ito nang may kulay at pag-ibig
          May kapayapaan at walang ligalig
          Himig ng pag-asa’y maririnig

          Nilikha niya ang karagatan
          Na sagana sa iba’t ibang likas-yaman
          Dapat na dakilain at pasalamatan
          Ang Kanyang kabutihan

          Nilikha niya ang kagubatan
          Punung-puno ng hayop at mga halaman
          Dapat na dakilain at pasalamatan
          Ang Kanyang kabutihan

          Nilikha Niya ang sangkatauhan
          Na siyang mamamahala nitong kalikasan
          Dapat na dakilain at pasalamatan
          Ang Kanyang kabutihan


          (Ikalawang Bahagi: Tula)
Inang 
Kalikasan:  Ako itong kalikasan, bundok, gubat, karagatan
                   Sa lahat nang nagnanais, may biyayang nakalaan
                   Pakiusap na ingatan, para sa sangkatauhan
                   Bawat taong nagsisikap ay handa kong paglingkuran

Tao:        Ay! sa lahat nang nilikha, nasa akin ang talino
               Kaya ikaw kalikasan, sa dunong ko ay aamo
               Ipagkaloob mo sa akin lahat nang nanaisin ko
                Pagkat ako, bilang tao, panginoon nitong mundo

Inang Kalikasan:  Kalikasan ay igalang, mahalin at pag-ingatan
                             At huwag salaulain sa ngalan ng kasakiman!

Tao:        Ika’y walang magagawa, ‘wag mo akong hahadlangan
               Aangkinin ko nang lubos ang lahat nang magustuhan     
               Pagkat ako bilang tao, sa taglay kong karunungan
               Ang siyang haring dapat sundin dito sa sandaigdigan

         (Huling Bahagi: Awit at Tula)
    
Korus: 
            Ngunit ikaw, o tao
            Ano ang ginawa mo?
            Nilikha kang tagapangasiwa ng mundo
            Bakit ikaw rin ang nagwawasak nito?

Inang 
Kalikasan:  Ako na nga ang nagbigay upang kayo ay mabuhay
                   Ako itong kalikasang unti-unting pinapatay
                   Kabunduka’y winawasak, karagata’y nilalason
                   Ang dulot ng industriya ay samu’t-saring polusyon

                  Kaya utos ng Lumikha, kayo ngayo’y parusahan
                  Bagyo, lindol at taggutom, ganti nitong kalikasan
                  Hangga’t ang tao ay sakim, patuloy ang kahirapan
                  Mundong likha ng Maykapal, patungo sa katapusan!
          
Korus: 
            Ngunit ikaw, o tao
            Ano ang ginawa mo?
            Nilikha kang tagapangasiwa ng mundo
            Bakit ikaw rin ang nagwawasak nito?

Tao:        Patawarin nawa tayo, ng Maykapal na lumalang
               Habang may pagkakataon, iwasto ang kamalian
               Sa lahat nang naririto, ngayo’y aming panawagan
               Bago maglaho ang lahat, iligtas ang kalikasan!



TAO AT KALIKASAN (TULAWIT nina Joel Costa Malabanan at Ramoncito Paulin)

TREN, TREN TREN
Tula ni Abdon Balde Jr.
Musika ni Joel Costa Malabanan

TREN, TREN, TREN (Tula ni Abdon Balde jr. at musika ni Joel Costa Malabanan)

Kapag Kasama Kita, Mahal
Titik ni Joselito de los Reyes
Musika ni Joel Costa Malabanan

Ikaw ang virus sa aking Windows,
Kapos na baterya ng aking iPhone.
Ikaw ang aking nag-crash na netbook,
Nalilimutang hacked ang aking Facebook.

Kapag kasama kita, Mahal,
Walang silbi o bilang ang teknolohiya.
Kapag kasama kita, Mahal
Walang presyo o upgraded spec ang ligaya.

Ikaw ang tokwa sa aking lugaw.
Puto sa aking dinuguan.
Gatas sa aking leche flan.
Sampalok sa aking sinigang.

Kapag kasama kita, Mahal,
Mas nagkakalasa ang aking buhay
Kapag, kasama kita, Mahal
Walang cholesterol at excess fat ang ligaya.

Ikaw ang kwerdas sa aking gitara
Ang aking tuner pag sablay ang nota
Ang aking pick kapag nagli-lead
May musika sa ating silid.

Kapag kasama kita, Mahal,
Masaya ang konsert at pagtatanghal
Kapag kasama kita, Mahal
Walang humpay ang himig at ligaya.

Dahil sa piling mo, Mahal,
Mas makabuluhan ang aking buhay.
Dahil sa piling mo, Mahal,
Mas makabuluhan ang aking buhay

Paos na Tinig, Gitara at Silindro: Joel Costa Malabanan
Inirekord nang live ngayong Ika-19 ng Nobyembre, 2014
sa bahay habang may nag-iinuman sa labas.

Kapag Kasama Kita, Mahal (Tula ni Joselito delos Reyes at Musika ni Joel Costa Malabanan)


CARIÑO REVOLUCIONARIO
Tula ni Axel Alejandro Pinpin
Musika ni Joel Costa Malabanan

Parang malambot na kutson
sa inaantok kong mata
ang tambak ng natuyong dahon
sa likod-bahay ng magsasakang nasa Kampuhan sa lungsod.
Inaasam na ganito rin ang ating kama
tuwing uuwi ako
sa mahabang pagliban sa mga halik at yakap mo.

Nagkamali ka
noong isipin mong hindi ko na ito hinahanap.
Naaamoy ko ang labi mo
sa bawat pinyang tinatalupan sa baryo.
Sing-init ng kape
kung umagang-walang-almusal
ang yakap mong
may ilang buwan na nang huli kong mahuli
at mabitag sa aking mga bisig.
Mas malimit nang manukso
ang angil at lambing
sa pakikibaka ng masa, hindi pagkagiliw sa iyo,
para magpalukso sa aking puso at dugo.
Mas kapana-panabik
ang umiigting na digma, hindi ang libog,
na abutin ang sukdulan.

Batid kong hindi ka na kayang pangitiin
ng tamis ng salita.
Hindi ka na kikiligin
sa mga tula ng pag-ibig
na itinutugma ko sa paglaya.
Sasabihin mo na namang
sa Bayan na lamang ako makipagtalik.

Oo, hindi ikaw ang una sa buhay ko.
Sana ako’y hindi rin sa ‘yo.

CARIÑO REVOLUCIONARIO (Tula ni Axel Pinpin at Musika ni Joel Costa Malabanan)

Ikot
Tula ni Francis A. Montesena
Musika ni Joel Costa Malabanan

Iniikot ko ang plato nang tumayo ka
at magpaalam. Hindi pa ako tapos kumain,
ganito ang sabi ng lelang ko,
“Iikot mo anak nang hindi ka tumandang binata.”

Nakaugalian ko itong pag-ikot
sa tuwing may mauunang umalis mula sa mesa
na hindi pa ako tapos kumain.
Ilang taon na ba ito?

Parang katulad na rin ng pagsesipilyo
o pagsusuklay ang ginagawang ganito.
Naiwan na ako ng ilang kababatang
nagsipagtayo ng sariling pamilya.

Kahit hindi nila naging ugaling iikot
ang plato kapag ako ang nauunang umalis
sa mga kainan, hindi sila naiwang naghihintay
ng sariling kapalaran ng puso.

Ako itong sumunod,
ang siyang napayukod ng pag-iisa.
Mali siguro ang ikot ko sa plato,
Na dapat ay pakanan sa halip na pakaliwa.

O marahil ay dapat ko ding iikot
ang ginamit na kutsara at tinidor.
Malamang dapat ay ang buong mesa
ang aking iniikot para makasigurado.

Masaya naman ako ngayon, yan ang isinisigaw
ng mga mantel at tisyung pinagpunasan ko
ng masebong bibig na nakahiratiang
kumain kaysa sa umibig.

IKOT Titik Ni Francis Montesena At Musika Ni Joel Malabanan

Sa Muling Pagbabalik
Tula ni Glen Sales
Musika ni Joel Costa Malabanan

Aalis na ako ha, 
Huwag mong ikatampo 
Kung hindi kita lingunin 
Pagsakay ko sa bus. 

Ayaw ko lamang   makita
Ang iyong imaheng paliit nang paliit .
Ayaw ko lamang makita
Ang iyong imaheng paliit nang paliit
Kaya uupo na lamang ako ha 
At  panunuorin ang palabas sa bus 
Hahayaang pagapangin ang lamig 
Ng aircon sa aking balat 
Hanggang makaidlip .

Huwag kang mag-alala  ha 
sa  aking  pag-alis 
Labis akong nananabik 
Sa muling pagbabalik.

Tinig at Gitara: Joel Costa Malabanan
Inirekord sa cellphone ngayong Ika-29 ng Mayo, 2015
sa ganap na ika-9:15 ng umaga. Hilaw pa ang tono
at aayusin pa pag may pagkakataon.



Sa Muling Pagbabalik tula ni Glen Sales at Musika ni Joel Costa Malabanan

Taong 1998 ko pa ginawa ang kantang ito. Ngayon ko lamang nahalungkat sa lumang e-mail ang mp3. Maiigi na ring maiparinig kaysa mapatago na lamang sa baul. Inirekord ko ito sa bahay ni Arturo Sierra sa Meadowood, Bacoor noong Agosto, 2007.

BUHAY NA BAYANI
Musika at Titik ni Joel Costa Malabanan

Ano ang sukatan ng kabayanihan?
May bayani pa kaya sa kasalukuyan?
Marami pa, marami pa kaibigan
Kung iyo lang pagmamasdan

Ang tindera sa palengke na hindi nanlalamang
Ang mabait na pulis na iginagalang
Si tatay o si nanay na nasa ibang bansa
Hangad ang pamilya ay guminhawa

Sila'y buhay na bayani ng ating panahon
Sa tulong nila ang baya'y babangon
Sa sipag at tiyaga, sa pagkakaisa
Ang kaunlaran ay abot-kamay na

Ang titser na nagmamahal sa kanyang propesyon
Kahit kulang ang sweldo'y may'rong dedikasyon
Kabataang may panggalang sa mga matatanda
Bayani rin sa huwarang gawa

Mga magsasakang nagpapakain sa bayan
Bayaning di dapat kalimutan
Mga manggagawa kahit pa kontraktuwal
Bayani rin kung puso'y marangal

Sila'y buhay na bayani ng ating panahon
Sa tulong nila ang baya'y babangon
Sa sipag at tiyaga, sa pagkakaisa
Ang kaunlaran ay abot-kamay na

Kahit anong edad, bata man o matanda
Ugali at gawa ang siyang magpapasya
At ang kabayanihan maliit man o malaki
Kayamana ng lahing kayumanggi!

Sila'y buhay na bayani ng ating panahon
Sa tulong nila ang baya'y babangon
Sa sipag at tiyaga, sa pagkakaisa
Ang kaunlaran ay abot-kamay na



BUHAY NA BAYANI (Musika at Titik ni Joel Costa Malabanan)

Ang tula ay sinulat ni Axel Alejandro Pinpin noong 1996 at nilagyan ko ng tono noong 1997. Ang rekord na ito ay hilaw pa at nairekord noong 2007.

Kaibigang Gitarista (Tula ni Axel Alejandro Pinpin at Musika ni Joel Costa Malabanan)

Isa ito sa pinakaunang kanta na nagawa ko noong 1988, naimpluwensiyahan ito ng "Biyaheng Langit" ni Isagani Ibarra na inawit din ni Lolita Carbon. May linya itong tungkol sa lighter at sigarilyo kahit HINDI naman ako naninigarilyo. Noong una, plano ko itong gawing religious song pero sa huling linya ng awit ay biglang naging love song.

O BIYAHENG LANGIT
Musika at titik ni Joel Costa Malabanan

Ito na ba ang biyaheng langit?
Last trip na ba, siksikan yata?
Kung wala nang bakanteng upuan
Pasensiya na kayo't ako'y sasabit na.

Pasindi nga sa sigarilyo mo
Naiwan ko pala ang lighter ko
Siguro ay katulad rin kita
Naghahanap sa pag-asang nawawala

O biyaheng langit, o biyaheng langit
Kaytagal-tagal na ring hinanap kita
O biyaheng langit, o biyaheng langit
Salamat sa diyos at natagpuan kita.

Kung saan-saan ako ay napadpad
Ang mga paa ko'y manhid na sa paglalakad
Kaya'y ngayong ika'y nakita na
Hinding-hindi na kita iiwan pa!

O biyaheng langit, o biyaheng langit
Kaytagal-tagal na ring hinanap kita
O biyaheng langit, o biyaheng langit
Salamat sa diyos at natagpuan kita.

O biyaheng langit, o biyaheng langit
Kaytagal-tagal na ring hinanap kita
O biyaheng langit, o biyaheng langit
Langit na nga pala ang makapiling ka!

O BIYAHENG LANGIT (Musika at Titik ni Joel Costa Malabanan)

SA BABAENG NATAGPUAN SA CREEK 41
Titik ni Ferdinand Pisigan Jarin
Musika ni Joel Costa Malabanan

Napakahirap dukalin sa isip
Ang sakit na iyong naramdaman
Habang ulit-ulit na naglalagos
Ang tigas ng bareta
Sa iyong dibdib, tadyang, baga at likod.

Napakahirap burahin sa isip
Ang naging palahaw ng iyong asawa’t anak.
Ang naging kalunos-lunos mong ayos nang matagpuan

“Hubo’t hubad, pinatay sa saksak .”
“Hubo’t hubad, pinatay sa saksak .”

Kung sabagay, nang lumitaw siya, ang iyong salarin.
Nang gabing iyon, mula sa lugar na pinakamadilim.
Nagdiriwang ang mga ilaw sa bahay-bahay
Ng mga manhid at walang malay

“Hubo’t hubad, pinatay sa saksak .”
“Hubo’t hubad, pinatay sa saksak .”

Katarungan ay mailap
Sa lipuna’y hindi mahagilap….

Sa Babaeng Natagpuan Sa Creek 41 (Tula Ni Ferdinand Pisigan Jarin At Musika Ni Joel Costa Malaba

KAKLASENG BEKI
Tula  ni Frank Rivera
Musika ni Joel Costa Malabanan
(Ika-23 ng Pebrero, 2016 sa bahay)

Humarap si Victor sa kanyang salamin
Hindi nakaligtas sa kanyang paningin
Ang naiwang bakas ng palipad-hangin
Ng kaklaseng Beking kunwari’y mahinhin

Nag-blush siya kaninang nakita ang ngiti
Na laan sa kanya ng kaklaseng Beki
Magpahanggang ngayon pisnging kayumanggi
Namumulang parang may blush-on palagi

Ang kaklaseng Beki gumising sa kanya
Di siya si Victor kundi si Victoria
At sa natuklasan ay nagwagi siya
Dahil ang sarili, kanyang nakilala

O kaklaseng Beki maraming salamat
Nang dahil sa iyo, binago ang lahat
Pati ang pananaw iyong naiangat
Ipagmamalaki ang kulay ng balat

Igalang ang may piniling kasarian
Beki at kahit Tomboy pa man
Irespeto’t mahalin ang kababaihan
At lahat ng tao sa ating lipunan!

O kaklaseng Beki maraming salamat
Nang dahil sa iyo, binago ang lahat
Pati ang pananaw iyong naiangat
Ipagmamalaki ang kulay ng balat

Kung ikaw ay Beki matutong kumilos
Na hindi garapal nang di ka mabastos
Kusa kang igagalang sa ating lipunan
Kung sarili mo ay iyong iginagalang!
 


Kaklaseng Beki (Frank RIvera)


Karagatan ang Pag-ibig ng Isang Ina
Tula ni Beverly Siy
Musika ni Joel Costa Malabanan

Sa lawak nito’y makakalangoy ka
nang buong laya.
Sa lalim nito’y makakasikad ka
nang buong lakas.
Ganyan mag-alaga ng hiyas 
ang mapagmahal na dagat.

Sa pag-aalinlangan ng huwisyo’t prinsipyo 
padadaungin ka niya sa aplaya
at matiyagang maghihintay
hanggang sa iyong maaninaw:
ang sarili mong paa’y 
lubog man sa tubig,
matatag pa rin at nakakatindig.
Ganyan mag-alaga ng hiyas 
ang mapagmahal na dagat.

Sa mata ng panganib,
tahimik ka niyang ihahatid
sa nakakaunawang dalampasigan.
Doon ay maaari mong pagmasdan
ang pagragasa ng karimlan.
Ganyan mag-alaga ng hiyas 
ang mapagmahal na dagat.

Sa pagtangis ng iyong dibdib,
agad niyang lalambingin ang langit
Para magbahagi ito ng ngiti
sa pamamagitan ng isang bahaghari.
Ganyan mag-alaga ng hiyas 
ang mapagmahal na dagat.

Sa pusod ng iyong pagod,
batid niyang mabilis ang pagkaanod.
Ihahagis niya ang lambat
para hulihin ang sigla ng habagat.
Mapapanatag ang iyong katawan
Sa hele ng kanyang kilapsaw.
Ganyan mag-alaga ng hiyas 
ang mapagmahal na dagat.

Karagatan ang pag-ibig ng isang ina.
Sa lawak nito’y makakasirko ka
nang buong laya.
Sa lalim nito’y makakasikad ka
nang buong lakas.
Mayroon pa bang dahilan 
para hindi ka maglayag?

Karagatan Ang Pag - Ibig Ng Isang Ina (Tula Ni Beverly Siy)

ANG KATAWAN NG BABAE'Y HINDI MAKINA
Tula ni Gregorio V. Bituin Jr.
Musika ni Joel Costa Malabanan

Ang katawan ng babae'y hindi makina
Na kung kailan mo nais ay pwede siya
Tanungin siya kung anumang iyong nasa
Hingiin mong lagi ang pagsang-ayon niya

Nais ba ng babae ang anak nang anak
Na pag ayaw nya'y sasabayan mo ng upak
Babae ba'y pagagapangin mo sa lusak
Masunod ka lang kahit siya'y mapahamak

Babae ang nakatatalos ng kanyang sarili
Babae ang may alam kung anong mabuti
Ramdam niya kung anong maaring mangyari
Kaya pag-usapan kung ano ang maigi

Huwag mong ituring na siya'y libangan lang
Na sa libog mo, siya'y isang parausan
Karapatan ng babae ay dapat  igalang
Siya ang mapagpasya sa kanyang katawan

Siya ang mapagpasya sa kanyang katawan
Siya ang mapagpasya sa kanyang katawan
Babae ang mapagpasya sa kanyang kalayaan!


Ang Katawan Ng Babae'y Hindi Makina (tula Ni Greg V. Bituin Jr.)

Nakita ko sa FB ngayong umaga ng Hunyo 29, 2017 ang tula ni Bernadette Santos tungkol sa security guard na umuwi ng bahay kanyang bahay sa San Jose del Monte Bulacan para lang magimbal nang mabatid na minasaker ang kanyang pamilya.  Mabilis kong kinuha ang gitara at cellphone upang hulihin ang emosyon ng tula at gawing Dagling-Awit. Dahil 7:45 am pa lang, mahirap kumanta ngunit ang hirap na pagkanta ay angkop din sa hirap na paksang dapat isiwalat.


Trahedya sa Nasalisihang Gwardiya
Tula ni Bernadette Santos
Musika ni Joel Costa Malabanan

Pupungas-pungas ka pa't 
nagkukusot ng mata
Habang bumabaybay 
pabalik sa bahay
Mabigat ang talukap
sa magdamag na pagbabantay
ng tulad mong abang gwardya.

Sumpain ng langit
Kaubusan ng hapis
Sinuman sa pamilya mo'y umaglahi
tumambad sariwang dugo-sumisirit
sa karumal-dumal na sinapit
Nilapastangang dangal 
ng mga babae mo sa tahanan
Kinitil na uha 
ng sanggol na kasisilang
Binusabos na mga anghel mong
nilaslas ang kamuwangan

At ikaw, 
hamak na gwardya
alipin ng kunsensya
nagbabantay sa iba
habang kinakatay ang iyong pamilya!

Trahedya sa Nasalisihang  Gwardiya (teksto Ni Bernadette Santos at Musika ni Joel Costa Malabanan)

Taong 1991 ko pa nagawa ang kantang ito. Marami nang versions at marami na ring kumanta pero hindi pa napapakinggan sa radyo. Praktis lang ang recording na ito kaya maraming sabit. Inilagay ko rito para mas marami ang makapakinig.

PAG HINDI NA PUMAPATAK ANG ULAN (Musika at Titik ni Joel Costa Malabanan)

Ang bersyong ito ay nilagyan ng sundot sa lead guitar ni Levi Bartolome.


SPEAK IN ENGLISH ZONE
Musika at Titik ni Joel Costa Malabanan
Ika-13 ng Oktubre, 2010

Taong 1898 nang sumalakay si George Dewey
Sa ngalan ng Benevolent Assimilation  ni McKinley
Ang paglaya sa Kastila ay agad na nawalang saysay
Dahil sa imperyalistang likas yaman ang pakay!

At ang mga Kano at Kastila’y nagbentahan
Twenty million dollars ang naging kabayaran.
Sinimulan ng Thomasites kolonyal na edukasyon
English ang wikang nagsilbing pundasyon

Ang magigiting na bayani ay ipinabitay
Tulad nina Felipe Salvador at Macario Sakay
Pulitika, ekonomiya at ang kulturang popular
Sa puso’t diwa English ang idinadasal.

Ang bayan ko ay Speak in English Zone
Paghahandang yakapin ang globalisasyon
Nag-eeksport kami ng manggagawa’t caregiver
Mga graduates namin ay nasa call center

Pagkatapos ng World War II Parity Rights ang sumakal
At ang nagsilbing tanod ay ang mga base militar
Manggagawa at magsasaka ay nalibing sa kahirapan
At nabaon sa utang ang sambayanan.

Ngayo’y wala nang base militar wala na rin ang Thomasites
Ngunit may VFA at English speaking campaign
At ang mga paaralan hulmahan ng propesyunal
Sinanay upang maglingkod sa mga dayong kapital

Ang bayan ko ay Speak in English Zone
Alipin kami noon hanggang ngayon
Nag-eeksport kami ng manggagawa’t caregiver
Mga graduates namin ay nasa call center.

At ang bansang Pilipinas kahit pa agricultural
Walang makain ang mga mamamayan
Ang aming isip, salita at gawa ay kolonyal
Lahi kami ng alipin sa sarili naming bayan.

Nalulong sa Facebook ang kabataan ni Rizal
Sa pagdodota animo’y mga hangal
Pulitika, ekonomiya at ang kulturang popular
Sa puso’t diwa English ang idinadasal.

Ang bayan ko ay Speak in English Zone
Paghahandang yakapin ang globalisasyon
Nag-eeksport kami ng manggagawa’t caregiver
Mga graduates namin ay nasa call center

Ang bayan ko ay Speak in English Zone
Alipin kami noon hanggang ngayon
Ang pagbabago ang tanging solusyon
Durugin ang kolonyal na edukasyon!

Sariling wika ang ang siyang magpapalaya
Sa sambayanang gapos ng tanikala!













SPEAK IN ENGLISH ZONE (Musika at Titik ni Joel Costa Malabanan)

Sablay ang una kong pagkanta ng Refrain
dahil kinakapa ko ang tono. Sa pangalawang ulit
ay nakuha ko rin. Ginawa ko itong kanta habang
tumatawid sa baha ng bagyong Ondoy.

AWIT SA BAHA
Musika at Titik ni Joel Costa Malabanan

Hindi na huhupa ang patak ng ulan
Languyin ang baha ang tanging paraan
Kung ako'y malunod at di na mamasdan
Sa iyong gunita'y dalawin mo minsan.

Akong bahagi rin nitong kalikasan
Ay di na dapat pang tumutol, lumaban
Alabok o putik na nababanlawan
Umiral, subalit papanaw din naman!

Kung ano ang tanim siyang aanihin
Ang lahat nang gawa'y babalik sa atin
Parang tumingala at saka dumura
Ang patak ay tiyak sa atin ding mukha!

Itong kalikasan at tao'y iisa
Ang patak ng luha ay nagiging baha
Gubat, kabundukan na ating winasak
Ganting kamatayan ang bitbit na sumbat!

Kung ano ang tanim siyang aanihin
Ang lahat nang gawa'y babalik sa atin
Parang tumingala at saka dumura
Ang patak ay tiyak sa atin ding mukha!

AWIT SA BAHA (Musika at Titik ni Joel Costa Malabanan)

Ang tulang ito ay tungkol sa pagbatikos sa kalayaang natamo ng Pilipinas sa ilalim ng mga Hapon noong Oktubre 14, 1943 matapos na "palayain" nila tayo sa Amerika. Ginawa kong kanta ang tula at angkop pa rin sa panahong ito na si Benigno Aquino III na ang pangulo. Ang ipinangako niyang "tuwid na landas" ay unti-unti na ring nagiging "republikang basahan".

REPUBLIKANG BASAHAN
Tula ni Teodoro Agoncillo (1944)
Musika ni Joel Costa Malabanan (2011)
Lead Guitar: Justine Sierra
Areglo: Arturo Sierra

Republika baga itong busabos ka ng dayuhan
Ang tingin sa tanikala’y busilak na kalayaan
Kasarinlan baga itong ang bibig mo’y nakasusi
Ang mata mong nakadilat ay bulag na di mawari.

Ang buhay mo’y walang patid na hibla ng pagtataksil
Sa sarili, lipi’t angkan sa bayan mong dumaraing.
Kalayaan! Republika! Ang bayani’y dinudusta
Kalayaan pala itong mamatay nang abang-aba!

Kasarinlan pala itong ni hindi mo masarili
Ang dangal ng tahanan mong ibo’t pugad ng pagkasi
Malaya ka bakit hindi? Sa bitayan ika’y manhik
At magbigting mahinahon sa sarili na ring lubid

Kalayaan ---- ito pala’y mayro’n na ring tinutubo
Sa puhunang dila’t laway, at hindi sa luha’t dugo.
Humimbing kang mapayapa, mabuhay kang nangangarap
Sa ganyan lang mauulol ang sarili sa magdamag.

Lumakad ka, hilahin mo ang kadenang may kalansing
Na sa tainga ng busabos ay musikang naglalambing
Limutin mo ang nagdaan, ang sarili ay taglayin
Subalit ang iniisip ay huwag mong bibigkasin

Magsanay ka sa pagpukpok, sa pagpala at paghukay
Pagkat ikaw ang gagawa ng kabaong kung mamatay
Purihin mo ang bayaning may dalisay na adhika
Ngunit huwag paparisan ang kanilang gawi’t gawa

Republika na nga itong ang sa iyo’y hindi sa iyo,
Timawa ka at dayuhan sa lupain at bayan mo
Kalayaan, malaya ka, oo na nga, bakit hindi?
Sa patak ng iyong luha’y malaya kang mamighati

Sa simoy ng mga hangin sa parang at mga bundok
Palipasin mo ang sukal ng loob mong kumikirot
Kasarinlan! Republika! Kayo baga’y nauulol
At ang inyong kalayaa’y tabla na rin ng kabaong?

Republika! Kasarinlan! Mandi’y hindi nadarama
Ang paglaya’y sa matapang at sa kanyong bumubuga
Bawat hakbang na gawin mo sa Templo ng Kalayaan
Ay hakbang na papalapit sa bunganga ng libingan

Ang paglaya’y nakukuha sa tulis ng isang sibat
Ang tabak ay tumatalim sa pingki ng kapwa tabak
Ang paglaya’y isang tining ng nagsamang dugo’t luha
Sa saro ng kagitinga’y bayani lang ang tutungga
Bawat sinag ng paglayang sa karimlan ay habulin
Isang punyal sa dibdib mo, isang kislap ng patalim



REPUBLIKANG BASAHAN (Tula ni Teodoro Agoncillo at Musika ni Joel Costa Malabanan)

Ito ang aking kaunahang religious song para sa mga nananalig
at nanampalataya kay Kristo.

LANDAS
Musika at Titik ni Joel Malabanan
Areglo: Arturo Sierra
Tinig : Joel Malabanan

Sanga-sanga itong landas sa mahabang paglalakbay
Hanap ang paglaya at kapayapaang tunay
May luha ng pagkabigo sa mailap na tagumpay
Subalit iisa pa rin ang ating gabay

Ano nga ba ang gagawin sa buhay na ating taglay?
Sa mundo ay ano ang ating iaalay?
Ang lahat nang pangarap mo ay mawawalang saysay
Kung si Kristo ay wala sa iyong buhay

Ating hanapin ang landas ng tunay na kalayaan
Kay Kristo lamang natin matatagpuan
Ating hanapin ang landas ng tunay na kapayapaan
Kay Kristo lamang natin masusupungan

Materyal at karangyaan at kahit ang katanyagan
Hindi naman madadala sa libingan
Si Kristo ang siyang natatanging daan
Patungo sa buhay na walang hanggan

Kapwa natin’y paglingkuran ang bayan ay pagsilbihan
At ang Dakilang Lumikha’y huwag kalimutran
At sa kanyang pagpapala ay atin ring makakamtan
Hangad na kalayaan at kapayapaan

Ano nga ba ang gagawin sa buhay na ating taglay?
Sa mundo ay ano ang ating iaalay?
Ang lahat nang pangarap mo ay mawawalang saysay
Kung si Kristo ay wala sa iyong buhay

Ating hanapin ang landas ng tunay na kalayaan
Kay Kristo lamang natin matatagpuan
Ating hanapin ang landas ng tunay na kapayapaan
Kay Kristo lamang natin masusupungan

Kay Kristo lamang natin masusumpungan!



Landas- Musika at Titik ni Joel Malabanan

ILUSYON
Musika at Titik ni Joel Costa Malabanan
Tinugtog ng RABAY


May ngiting nababalutan ng pagkukunwari

May damdaming kung minsan ay ikinunukubli

May gabing ang langit ay lubhang mapanglaw

At ang pag-asa ay hindi matanaw


Minsan ay may luhang dulot ng tagumpay

Mayron ding halakhak kahit puso’y nalulumbay

Ang buhay natin ay di mo natitiyak

Ang nasa itaas ay minsang babagsak!


** Ang buhay sa mundo ay isang ilusyon

Kung di ka kikilos at magdedesisyon

Ang bawat pangarap ay isang ilusyon

Sa taong sarili’y walang disposisyon


Pagkat sa lipunang puno ng gamitan

Ang tutulug-tulog ay tiyak maiiwan

Walang kapalarang kusang dumarating

Kung ang naghihintay nama’y nahihimbing!

(Ulitin ang **)


Kumilos ka ngayon at huwag mag-ilusyon
Gumising ka’t masdan kung saan ka naroon
Ang buhay mo’y huwag hayaang paikutin ng iba
Labanan mo silang mapagsamantala

ILUSYON (Musika at Titik ni Joel Costa Malabanan)

Ito ang kaunahang Christmas Song na nagawa ko,
Nilikha noong Nobyembre 7, 2006. Inareglo ni Arturo Sierra
at nilagyan ng haplos ng nasyonalismo at liberation theology.

PASKO NG PAMILYANG PILIPINO
Musika at Titik ni Joel Costa Malabanan

Nagbibigay kulay sa araw ng Pasko
Ang iba’t-ibang ilaw at mga regalo
Ngunit para sa akin, ang mas nanaisin ko
Ay ang makapiling ang pamilya ko.

Nasanay na tayo sa materyal na luho
Tuwing ginugunita ang araw ng Pasko
Ngunit ano ba talaga ang kahulugan nito?
Di ba’t ang pag-ibig sa kapwa tao.

Nabubuhay si Kristo sa bawat puso
Kung buo at masaya ang pamilya mo
Kapos man sa pera’y may diwa ng Pasko
Sa nagkakaisang pamilyang Pilipino!

Anuman ang relihiyon at prinsipyo sa buhay
Kung mabuti ang layunin ay magtatagumpay
Kung ang bawat anak ay may magulang na gabay
Ang bawat Pasko ay mayrong saysay!

Yakap at pang-unawa ay mas makabuluhan
Kaysa sa Christmas tree at regalong laruan
Sapagkat sa pamilyang nagmamahalang totoo
Naroon ang tunay na diwa ng Pasko.

Materyal na bagay ay dekorasyon lamang
Pagmamahal ang dapat na isaalang-alang
At ang kaarawan ng Dakilang Lumikha
Ipagdiwang sa tunay na kawanggawa.

Nabubuhay si Kristo sa bawat puso
Kung buo at nagkakaisa ang bayan ko
Sa pamilya magmumula ang diwa ng Pasko
At ang pag-unlad ng Pilipino!

Mabuhay ang Pasko ng pamilyang Pilipino
Maghari ang kapayapaan sa bayan ko.






PASKO NG PAMILYANG PILIPINO (Musika at Titik ni Joel Costa Malabanan)

ISANG DIPANG LANGIT
Amado V. Hernandez
Musika ni Joel Costa Malabanan

(Pinilit ko si Norman Villaruel ng RABAY na lagyan ng baho
ang pagkanta ko kahit walang praktis at biglaan. May mga
ilang sabit pero malinaw naman ang pagkakakanta ko,
Nobyembre 30, 2007 sa bahay ni Arturo Sierra).

Akoy ipiniit ng linsil na puno
hangad palibhasang diwa koy pilitin,
katawang marupok, aniya’y pagsuko,
damdami’y supil na;t mithiin ay supil

Ikinulong ako sa kutang malupit;
bato, bakal, punlo, balasik ng bantay:
lubos na tiwalag sa buong daigdig
at inaring kahit buhay man ay patay

Sa munting dungawan, tanging abot-malas
ay sandipang langit na puno ng luha ,
maramot na birang ng pusong may sugat
watawat ng aking pagkapariwara.

Sintalim ng kidlat ang mata ng tanod,
sa pintong may susi’y walang makalapit
sigaw ng bilanggo sa katabing muog,
anaki’y atungal ng hayop sa yungib.

Ang maghapo’y tila isang tanikala
na kala-kaladkad ng paang madugo,
ang buong magdamag ay kulambong luksa
ng kabaong waring lungga ng bilanggo.

Kung minsa’y magdaan ang payak na yabag,
kawil ng kadena ang kumakalanding;
sa maputlang araw saglit ibibilad,
sanlibong aninong inil'wa ng dilim.

Kung minsan, ang gabi’y biglang magulantang
sa hudyat--may takas!--at asod ng punlo;
kung minsa’y tumangis ang lumang batingaw,
sa bitayang muog, may naghihingalo

At ito ang tanging daigdig ko ngayon--
bilangguang mandi’y libingan ng buhay;
sampu, dalawampu, at lahat ng taon
ng buong buhay ko’y dito mapipigtal.

Nguni’t yaring diwa’y walang takot-hirap
at batitis pa rin itong aking puso:
piita’y bahagi ng pakikilamas,
mapiit ay tanda ng hindi pagsuko.

Ang tao’t Bathala ay di natutulog
at di habang araw ang api ay api,
tanang paniniil ay may pagtutuos,
habang may Bastilya’y may bayang gaganti.

At bukas, diyan din, aking matatanaw
sa sandipang langit na wala nang luha,
sisikat ang gintong araw ng tagumpay . . .
layang sasalubong ako sa paglaya!


Bartolina ng Muntinlupa
Abril 22, 1952


Isang Dipang Langit (Tula ni Amado V. Hernandez at Musika ni Joel Costa Malabanan)

NAPAGTRIPAN LANG 
Musika at Titik ni Joel Costa Malabanan

Madaling araw noon papauwi si Mang Juan
Galing sa pabrikang pinagtatrabahuhan
Nang bigla na lamang mula sa kung saan
Lumapit sa kanya tatlong kabataan
Bumunot ng baril sa kung anong dahilan
At bangkay na naiwan si Mang Juan

Kinabukasan ay nahuli rin ang mga salarin
At nang sa presinto ang mga ito ay tanungin
Ano ang motibo sa ginawang pagpaslang
Sumagot ang isa “napagtripan lang!”

Napagtripan lang, napagtripan lang
Napakababaw na dahilan
Napagtripan lang, napagtripan lang
At isang buhay ang inutang!

Isang araw naman ay mayroong naglalakad
Na isang babaeng maganda at matangkad
Nang bigla na lamang may lumapit na lasing
Babae’y hinalikan sabay na nantsansing
At dahil malakas tili ng babae
May kalalakihang agad nagresponde
Pinagtulungan, binugbog ang lasing
Mabuti na lang at may pulis na dumating
Nang tanungin sa presinto “Ba’t babae’y binastos?”
Sagot ng lasing, “Pasensiya tsip at napagtripan lang!


Napagtripan lang, napagtripan lang
Napakababaw na dahilan
Napagtripan lang, napagtripan lang
Mag-ingat ka’t baka mapagtripan!

Noong Bagong Taon ang marami’y nagsasaya
Dumungaw sa bintana si Aling Maria
Nang bigla na lamang, isang ligaw na bala
Tumama sa noo niya at kumitil sa buhay niya
At habang ang marami noo’y nagsasaya
Kasambahay ni Aling Maria nama’y nagluluksa
Kinabukasa’y nahuli rin ang nagpapautok
Isa pa lang sarhento n gating PNP
Nang tanungin sa presinto: “Di ba’t bawal magpaputok?”
Sagot ng sarhento ay alam n’yo na “Napagtripang lang!”


Napagtripan lang, napagtripan lang
Napakababaw na dahilan
Napagtripan lang, napagtripan lang
At isang buhay ang inutang!

Ang sabi ng kaibigan ko’y gumawa rin lamang ng kanta
Ba’t di pa raw ballad o magandang lovesong kaya
Ang sagot ko: “Pare pasensiya na
Pagkat ito ay aking napagtripang lang!”

Napagtripan lang, napagtripan lang
Napagtripan lang na kantahin
Kaya’t sakali mang di n’yo nagustuhan
Pasensiya na at napagtripan lang

Napagtripan lang, napagtripan lang
Napagtripan lang na kantahin
Napagtripan lang, napagtripan lang
Lagot ako kapag inyong napagtripan din!

NAPAGTRIPAN LANG (musika at titik ni Joel Costa Malabanan)

Chant sa mga kilos-protesta ang chorus. Nalikha noong 1998 at
palaging binabago ang lyrics. Ang rekording ay praktis lamang kaya
maraming sablay. Nirekord noong Agosto 30, 2007 sa Bacoor, Cavite

Joel Costa Malabanan - tinig at akustik na gitara
Ivan Villaruel -lead guitar
Norman Javier - bass guitar
Arturo Sierra -drums


BAYAN, BAYAN, BAYAN KO
Musika at Titik ni Joel Costa Malabanan

Bayan, bayan, bayan ko di pa tapos ang laban mo
Bumangon ka kumilos ka, ipagtanggol ang laya mo
Bayan, bayan, bayan ko, di pa tapos ang laban mo
Bumangon ka, kumilos ka ipagtanggol ang laya mo

Lupang sakaha’y winasak naging golf course ng mga dayuhan
At ang mga magsasaka, itinaboy sa kabundukan
At doon sa call center ay bawal mag-unyon
Habang kapitalista’y tumutubo ng milyon

Bayan, bayan, bayan ko di pa tapos ang laban mo
Bumangon ka kumilos ka, ipagtanggol ang laya mo
Bayan, bayan, bayan ko, di pa tapos ang laban mo
Rebolusyon ni Bonifacio, isulong mo, isulong mo!

Tuloy ang pagtaas ng presyo ng langis
Ang Shell, Petron at Caltex ay waring nang-iinis
Hindi dapat payagang dayuhan ang magpasya
Sa kinabukasan ng ating bansa!

Bayan, bayan, bayan ko di pa tapos ang laban mo
Bumangon ka kumilos ka, ipagtanggol ang laya mo
Bayan, bayan, bayan ko, di pa tapos ang laban mo
Rebolusyon ni Bonifacio, isulong mo, isulong mo

Nakasanla ang bukas ngating mga anak
Sa dambuhalang utang sa IMF-World Bank
Hindi dapat bayaran ang utang ng iilan
Na nagpapahirap sa sambayan!

Bayan, bayan, bayan ko di pa tapos ang laban mo
Rebolusyon ni Bonifacio, isulong mo, isulong
Bayan, bayan, bayan ko, di pa tapos ang laban mo
Bumangon ka, kumilos ka ipagtanggol ang laya mo!

Bayan, Bayan, Bayan Ko (Musika at Titik ni Joel Costa Malabanan)

Handog sa Ika-150 taong Kabayanihan ng Supremo ng Katipunan

Tinig at Gitara: Joel Costa Malabanan
Dagdag na Gitara: Levi Bartolome

AWIT KAY ANDRES BONIFACIO
Titik ni Pat V. Villafuerte
Musika ni Joel Costa Malabanan

Andres Bonifacio: isinilang kang dukha sa purok ng Tundo
Kaya nang maulila, itong pananaguta’y isinabalikat mo
Ang tatlo mong kapatid upang di mangagutom  nagbanat ka ng buto,
Sa tulong nitong lakas, ng sipag at tiyaga sila  ay binuhay mo
Kung salat man sa dunong hindi ka nagpabayang bumasa ng aklat
Dito mo natuklasang may puwag sa daigdig ang tulad mong mahirap
Kaya’t ang Katipunang naging bungang-isip mo ay iyong itinatag
Ang naging layunin mo, pamahalaang Kastila  ay dapat nang ibagsak
Iyong pinamunuan itong makasaysayang pambansang himagsikan
Kaya’t dinakila kang pambansang bayani ng bansang minamahal;
Ngunit iyong nalasap itong kasumpa-sumpang imbing kamatayan
Nang sa Bundok Buntis, Maragondon, Cavite ikaw ay pinaslang
Andres Bonifacio, ika’y di lang dakila’t pinupuring bayani
Kundi idolong tunay, sulong gabay na tanglaw  nitong aming lahi
Sa aming puso’t diwa ay pakaasahan mong ang siyang magbibinhi
Darakilain ka sa lahat ng bayan ng lahing kayumanggi.


AWIT KAY ANDRES BONIFACIO (Tula ni G. Pat V. Villafuerte at Musika ni Joel Costa Malabanan)

Tinig at Gitara: Joel Costa Malabanan
Lead Guitar: Levi Bartolome

Inirekord noong Ika-29 ng Mayo, 2013
sa studio ni Levi Bartolome, pwedeng i-download at palaganapin!


O KUNG PASYON
Tula  ni  Axel Alejandro  Pinpin
Musika ni Joel Costa Malabanan

Kung hindi nyo kami papahintulutang mangarap ni managinip,
hindi namin kayo bibigyang pagkakataong matulog ni umidlip.
Kung hindi nyo kami papayagang magtanim,
hindi namin kayo papatikimin ng aming aanihin

O kung pasyon ang paglaban para sa lupa,
Ookupahin namin ang bawat pulgada
Ng mga abenida at kalsada
Sa mga lungsod mula sa mga tumana.

O kung pasyon ang paglaban para sa lupa,
Ookupahin  namin ang bawat gusali
Ng mga Ortigas at Makati
Sa lungsod mula sa mga hasyenda ng hari.

O kung pasyon ang paglaban para sa lupa,
Ookupahin namin ang bawat kuwarto
Ng mga ahensya ng gobyerno at ng palasyo
Sa Malakanyang mula sa mga bukid ng nangasiphayo.

Kayong mga walang pakialam na nanood,
Kayong mga tumunganga at tumanghod –
Pakinggan ang aming tinig,
Tunghayan ang aklasang magbubukid,

Ang lahat ng pag-aari –
NGAYON  na ang pagbawi.
NGAYON  na ang pagbawi!



joel costa malabanan

Popular tracks