بنات: قبة سيدنا الولي دول نوروها

محلا البيارق والناس بيزوروها

قبة سيدنا الولي في الجو عالية

محلا البيارق لما نوروها

بياع: حمص حمص، تل ما ينقص، عالنار يرقص

يرقص يرقص ويقول

اللي شاف حمص ولا كلش

حب وإتلوع ولا ولا طالش

فتاة: يسترك هات حبه بقرش

الجميع: هاهاهاهاهاهاهااا.!

بياع: حمص حمص....الله

عجمية,

الله... الله... باللوز

الله...طعمية الله....

اراجوز، الله....

المجموعة: الليلة الكبيرة ياعمي والعالم كتيرة

ماليين الشوادر يابا م الريف والبنادر

دول فلاحين ودول صعايدة دول من القنال ودول رشايده

الليلة الكبيرة ياعمي والعالم كتيرة

العمدة: ياحضرة الاراجوز قول لي

الاراجوز: نعم ياعمدة عاوز ايه

العمدة: منين يروحوا لمتولي ؟

الاراجوز: امدح نبينا وصلي عليه

العمدة: اللهم صلي عليه

الاراجوز: تمشي كده على طول على طول.. لحد ماتلاقي عمارة

تدخل يمين تلقى بتاع فول.. دكانته على ناصيه حارة

المجموعة:دكانته على ناصيه حارة

تدخل يمينك في شمالك.. شارعين وفي التالت تكسر..

على اليمين واخد بالك... وتمشي على طول تتمخطر

العمدة:وامشي على طول واتمخطر!

الاراجوز:تفضل كذا تمشي وتدب..

وتخش من مطرح ما طلعت

ولما تلقى مقلة لب

العمدة:ولما القى مقلة لب

تعرف بانك تهت وضعت !

العمدة: دي وصفه سهلة، دي وصفه هايلة

المجموعة: مع السلامه، مع السلامة، مع السلامة يابوعمة مايله

مع السلامة يابوعمه مايله.

لاعب البخت: فتح عينك، تاكل ملبن

فينك فينك، تاكل ملبن

اوعى لجيبك.. لا العيب عيبك، قرب... جرب... نشن... وسطن ايدك وسطن

إضرب..

البندقية: طاخ!

اللاعب: يحميك يابني تبقى غالبني.

قرب خد لك حتة ملبن

بياع: فريرة للعيل.. يابو العيال ميل

خد لك سبع فرارير..

زمارة.. شخليلة..

عصفورة ياحليلة..

طراطير ياواد طراطير!

المعلن: الليلة السيرك تعالوا دي فرجة تساوي جنية قولوا هيه

الأطفال : هيه هيه هيه

المعلن: بمناسبه هذا المولد يوجد برنامج سواريه... قولوا هيه

الأطفال : هيه هيه هيه

المعلن: في السيرك شجيع يهجم ع السبع ويركب دغري عليه...قولوا هيه..

الأطفال : هيه هيه هيه

المعلن: وبنات قمرات زي الشربات حلوين مش عارف ليه... قولوا هيه

الأطفال : هيه هيه هيه

المعلن: وكمان بلياتشو تعالوا اسمعوا نتشه وشوفوا هيعمل أيه..قولوا هيه

الأطفال : هيه هيه هيه

مدرب الأسود : أنا شجيع السيما.. أبو شنب بريمة

أول ما أقول هالى هب وأصرخ لى صرخة السبع يتكهرب ويبقى فرخة !

حالا بالا سأصارع أسد إنما أيه متوحش

وهخلى وجهه شوارع ! تسقيفة يا ناس ما يصحش !

تسقيفة ؟أمال تشجيعة أمال..

بياع: سمك مقلي كل وبرق لي! صنف زي الفل

بياع: استخار واختار، فشه أو ممبار

يالله سمي وكل

عجوز: اسعى، اسعى، اسعى

مصوراتي : خد لك صورة سته ف تسعه

العجوز: اسعى، اسعى، اسعى

قهوجي: يا سي عجورة النار خسعة!

فلاح: ناس من بلدنا هناك أهم

روح يإبراهيم انده لهم

سلامات سلامات سلامات..

سلامات ع البلديات

فلاح: دي الحضرة والذكر انجلى.

يالله بنا نذكر ياوله

المنشد: ليلتكوا أنس وجلجلة إنشد ولعلع يا وله

شفت ف منام صاحب المقام.ده ابهه

المجموعة: ده ابهه.

المنشد: ويمامه حايمه عليه تسبح ربه

المجموعة: يانور النبي...يانور النبي

المنشد: ميلت فوق يده وجيت احبها

المجموعة: أحبها

المنشد: صحوني م النوم خدت بعضي وتني جي

المجموعة:... تني جي

وبعودة..وبعودة

الجميع : الله حي

زفة المطاهر

نسا: يا أم المطاهر رشي الملح سبع مرات

في مقامه الطهر خشي وقيدي سبع شمعات

أطفال: ياعريس ياصغير

علقة تفوت ولاحد يموت

لابس ومغير وح تشرب مرقة كتكوت

في القهوة

المعلم: بالذمة دا سابع عيل

مزفوف من وقت قليل

القهوجي: مولد شيلالاه يامعلم. عقبال اولادك

المعلم: كلمِ

نداءات: واحد مضبوط واتنين مصري

القهوجي : ع النار حاضر جايلك دغري

يوزع تحيات: مسا التماسي يا مسا التماسي، ياورد قاعد على الكراسي

نداء: هات شاي يا دقدق

القهوجي: عيني وراسي

يدخل الريس حنتيرة مغن القهوه الصعيدي

الجميع: سمعنا ياريس حنتيرة.. للصبح معاك السهيرة

الجميع: سمعنا.... سمعنا

حنتيرة: ياغزال ياغزال

ده العشق حلال

دوبتني دوب

خلتني خيال

ياشفتك فص فراوله...وانا لاقوه ولا حوله

شقلبتني عقلي علاولة

اه ياغزال

يارب ياعلم بالحال

تهدي حبيبي ويصبح عال

واغني وارقع بالموال...

آه يا غزال

المعلم: وقف ياريس حنتيرة

في ناس هنا قاعدة كتيرة

ولاحد قال هات تعميرة، ولاواحد شاي

المجموعة:ولاحد قال تعميرة ولا واحد شاي

المعلم: اللي حيطلب رح يقعد

والل ما يطلبش يبعد

زبون: يالابنا نخرج يامسعد شارع الترماي

يخرجان!

في السيرك

المدرب : انا شجيع السيمة

أبو شنب بريمة

اول ما قول "هالي هوب" واصرخ لي صرخة السبع يتكهرب ويبقى فرخه!

المدرب: حالا بالا سأصارع

اسد انما ايه متوحش

وح خلي في وجهه شوارع

المجموعة: تسقيفة يا ناس ما يصحش

اهه جه اهه جه!

تسقيفة بأه

تسقيفه امال، تشجيعه امال

تعالى لي يا حبيبي تعالى لي

خارج القهوة

الاخر : اوعد يارب اوعد...آدي كمان قهوة

الأول : يللا بنا يامسعد، ندخل على سهوه!

في القهوة الثانية

الغازية: طار في الهوا شاشي وانتى ما تدراشي يا جدع

طرفه شاوري عليك، حكم الهوا ماشي. حكم الهوا ماشي

هوا العصاري. ياواد، على سطح داري ياواد

خدني ورماني رماني عليك هوا العصاري

آهين ياناري..منك ياجاري..

خدني ورماني رماني عليك هوا العصاري

صاحب القهوة: اللي حيطلب راح يقعد ,واللي ما يطلبش يبعد

الزبون: يالللا بنا نخرج يا مسعد شارع الترماي

لعبه زق الطارة

صاحب اللعبة: ورينا القوة

يابني انته وهوه

مين عنده مروة

وعاملي فتوه

يقدر بقداره على زق الطارة ويفرقع بمبه

شاب: وسع وسع وسع

انا ازق الطارة واضرب ميت بمبه

دنا الاسطى عمارة من درب شكمبة

صيتي من القلعة لسويقة الللا لا، انا واخد السمعه

الجميع: طب يالله تعالى

شاب: لاياعم سعيدة.. دي البدلة جديدة

الجميع: ها ها سعيده.. يابو بدله جديدة..

ست: ياولا د الحلال

بنت تايهة طول كده

رجلها الشمال

فيها خلخال زي ده

راجل: زحمة ياولداه

كام عيل تاه


الجميع: دي الليلة الكبيرة ياعمي والعالم كتيرة

ماليين الشوادر يابا م الريف والبنادر

اوبريت الليلة الكبيرة

Nehal_gamal