ايجا.. ايجا نبداو صفحة جديدةما فيهاش سواد و نمش.. ايجا نبداو حكايو صحيحة من غير تفش.. ايجا نخلقو لبعضنا فرص . ايا هات يديك نقدموا القدام 
ايجا بالخطوة بالخطوة نحقو الي ريناه في المنام 
ايجا نهربوا م ظلام لحلمة فات زينها العادي اما اني لتو غادي  نحلم و نصنع من احلامي كلام
و بيه نكبر  و نفهم و نحاول نقدم القدام 
ايجا لهنا وين الروح حية ، مسرارةو مقدية 
وين كل شئ ماشي و يزيان
وين الخير مالي الدنيا و كل شئ فيها الوان الوان ..
ويم فما أهم صفة للانسان صفة الصدق و الامانة و انتي ماك تعرفني كي نحلم ننسى بش نكون خوانة نولي محلاني في المنام.. متشكلة على الكيف و الكيف كيفي و من خيالي نصنع طيفي  و نمشيه خطوة خطوة في ثنية معبية آمال، حاجة مزيانة مصنوعة فيا و لتو ما شافتها عينيا.. و لا عينيك و لاعينين حتى حد خاطر الحلمة محلاها اما تبقى حلمة و بحروفي نكتب كلمة تخلي وراها حكاية حلوة و منها نبني قوة و نقلك ايجا..ايجا للحلمة و دفاء النور و قوة الكلمة و لكل حاجة بنينة في الدنيا و لكل اسم تكتب اما من غير كنية 
ايجا لعالم ما خير 
ايجا شوف فاما ناس لنا ما تلوج كان على الخير للغير.. و تحب كل شئ مزيان .. ما ترضاش ترى حاجة في دنيا اسمها حرمان 
ايجا لدنيا مش كي الدنيات الكل ، للعالم الي يتمنوا فيه الناس الكل

حلمة_ helma

إنّها الرابعة فجرا ، 
لم تغمض عيناي لحظة واحدة طوال اللّيل كلّه ،آذان الفجر يقطع صمت الليل العقيم، يحمل معه بعض السّكينة لقلبي، كانت ليلة هادئة بعض الشيء عدا مريض الغرفة السّابعة الذي كان بحاجة لتدخّل في أوّل المناوبة، هل كان لا بدّ لي أن أتحمّل كلّ هذا التّعب كي أكتب ؟ 
أشتاقك !

فتحت الشّباك ، نسمات الفجر الباردة تحيي أجزاءًا من صدري الميّتة، فنجان القهوة يدفّء أناملي المرتعشة ، إنّه الفنجان الرّابع ! أكان لا بدّ من كلّ هذا الكافيين كي يتحرّك داخلي فأكتب ؟ 
أفتقدك !

تحملني هذه الليالي لذكريات لطالما أردت نسيانها، تعتصر ذاكرتي المتعبة، تنبش كلّ أدراجها العتيقة، يحاصرني سيل الذكريات، لذلك أكره المناوبات الهادئة، لطالما هربت من ذاكرتي نحو العمل، نحو الاصدقاء، نحو كلّ شيء، أخاف اللّيل ، أخاف اللّيل وحدي ، فأملؤُه بمناوبات لا تزيد سوى من تعبي، و أركض هاربة من ذاتي، أ كان لا بدّ من كلّ هذا الظلام كي أكتب ؟ 
أين أجدك ؟

تحاصرني ذاكرتي من كلّ الجهات ، يحاصرني طيفك، يحتلّني، أراك في كلّ الوجوه، في كلّ الأماكن ، في كلّ وقت و زمن، أراك في انعكاس صورتي على المرآة و في أحلامي المتعبة كلّما جافاني النوم بغتة ، كيف لي أن لا أراك ؟

أتذكّر وعودك كلّها ، أحفظها، تحاصرني هي الأخرى ،" لا قوّة في هذا العالم قادرة على إبعادي عنكِ "
"أعدكِ بأنّي سأكون دائما هنا معك " ، لماذا رحلت ؟
 أكان لا بدّ من هذا الرّحيل ؟

مازلت أنتظرك ، يخبرني عقلي بأنّك لن تعود ، يقول المنطق بأنّك ذهبت لمكان لا عودة منه، لكنّي أكذّب كلّ حقائق الدّنيا و أصدّقك، أخبرتني أنّك لن ترحل !

أبحث عنك في وجوه جميع من أقابلهم ، في كلامهم ، في ضحكاتهم ، في نظراتهم ، في قلوبهم ، لا قلب في العالم يشبه قلبك ، أ تُراني سأجدك ؟
يخبرني قلبي بأنّي سألتقيك ، سألتقيك في قلب صديق عابر، أو في شارع من شوارع المدينة، تلتقي عينانا بطريقة عبثيّة، فأحتضنك بقلبي و أثأر لِوادعي المؤجّل ، مازلت أدين لك بحضن و وداع !
أ كان يجب أن ترحل ؟

نشرت الشّمس شعاعها الأول في الأفق، قطعت ديجور الظّلام الحالك، صوت آلات الإنعاش يلعب بأوتار رأسي، إنّه يوم جديد !
 يوم جديد، كي أشتاقك فيه أكثر ! 
تقوى محمد رمضاني .

أشتاقك !

توحشتك 
توحشت نحبك 
ونتكتب حرفين في ندوة كتبك 
توحشت الرعشة كي نشوفك وقت تلبك 
توحشت الوقت إلي ما يدق كان ليك 
توحشت كل تركينة عفستها ويديا عارقة شادة في يديك  
توحشت القهوة العربي إلي تطيبهالي 
وكل توشويشة ونفخة في وذني تحكيهالي
 
توحشتك 
وتوحشت سكاتك إلي نفهمو عالرمش 
توحشت قلبي إلي عزق ليك وجاشي إلي في حضنك رعش  
توحشت حس ضحكتك لمصورة على عينيك  
توحشت الليالي إلي تبات تحكيلي عليك 
توحشت الربع ساعة إلي نقعد نستناك فيها وإنت retard 
توحشت شيخة لغشاشر الصغار كي تحلي باب الدار 

توحشتك 
وتوحشت خيارك وخنارك 
تڨنڨينك وشهاويك وصندوق أسرارك   
توحشت كل غناية تفكرني فيك 
كل زنقة وكل شارع شقيتو نستنى فيك 
توحشت الصحراء إلي جرينا فيها 
وموجة لبحر إلي عشقناها وغطيتك بيها   
توحشت تربيجاتك إلي طلعتهم عليا  
توحشت ريحتك إلي كي نتعب وتظلام قدامي ترجع الروح فيا 

توحشتك 
وتوحشت كل قرصة قرصتهالي  
وكل حكاية وحلمة كي فقت حكيتهالي 
توحشت كل حاجة بنينة قسمناها بالشطر  
كل درج تعدى وما حسبناهوش مالعمر  

توحشتك 
وتوحشت سماك وهواك وغرامك وصفاك 
توحشت النوارة الحمرة المزروعة في وسط جواجيك  
توحشت نبوسك من خدك ومن كفوف يديك 
توحشت دارنا لمطيشة في وسط الجبل 
توحشت كلماتك إلي ترتحني من رزن لحمل 

توحشتك 
وتوحشت عمري معاك 
كان جا بيدي لا نسيبك ولا نخطاك 
ونقعد نفركس عليك حتى نلقاك   
بش نتوحشك ونرجع نحبك ونشتهاك  
ونشهد بروحي إلي لا نحيتك من جاشي ولا نجم ننساك  

ماكسحهم أياماتي وهوما مش معاك  
توحشت في صحوتي نفيق ونلقاك 

توحشتك ....

[Amine.G]

توحشتك

نمّن بيك
ونمّن الي الليل بطولو
يبات يهتري ويحكيلي عليك
كيفاش في اولو تجي
وفي اخرو مشيت
وحبيت نرجعك ونجيك

نمّن الي ماتحلى تبربيشة
كان في جواجيك
وماتحلى الغزرة
كان كي تترشق في عينيك
نمّن الي حتى وانت مكش هوني
لازم نغير عليك

من شنية ؟
مانعرش

من كل شي يفكّرني فيك
من كل باب تسكّر عليّا وعليك
زمن كل صباح
كي فاق وفيّقني سألني عليك

ونمّن إلي توّة لاك عندي
ولاني ليك
وإلي البعد هزني
والوحش هدّني
ونمّن إلي ماني ناسي
الي الرّوح تفنى عليك
والي قد ماحبيت مانكتبش عليك
تشمت فيّا بلومتي
ونلقى خيالك على ورقتي
المبلولة بدموعي الي تفركس فيك
غادي ولا هوني
بين عقاب الضحك
ومرّار الدوني

ونمّن الي وحدي
بش نقعد نعاني في محوني
ونفارع في ايام بيك غرموني

نكذب ...
نكذب وعيني صحيحة
كان قتلك لكلام مش عليك
الله يهديني ويقدّرني عليك
على خاطرني مزلت نمّن بيك
ونحب ... نجيك ... ونورّيك
إلي شي ما نسّاني فيك

وباقي ندعيلك
وندعي عليك
بغزرة من شفرك
ترجّعني مرشوق في جواجيك

بوقت تعدّى وتعب
وهو يستنّى فيك
بنفس ما نجّم يتحس
ويتكلّم كان ليك
بتنهيدة بلاحت
بعد ما صاحت
متسميّة عليك

يزّي ... يزّي ... يهديك
والله مانجمت نخطاك ولا ننساك
ولا نحّي كل صنعة تفكّرني فيك

نكرهك ...
نكرهك
ونتشمّت فيك
ونوجعك
ونتوجع اكثر منّك

انا الحضن الي يلمّك
حتى وانت ماسمّك
تي حب يلمّك
واش يهمّك

وساعات ماكسحك
وساعات ماحنّك
وديما ماقواك
وديما مابنّك :
وقت تضحك ... تتبسّم
وأنا عليك نتدكّك
نلبّك ونزيد نغمّك
ومن روحك لروحي نضمّك

يزّي من الكلام الي يكتب
ويزّي مالسكات الي يعطب
يزّي من بالي
الي ياما فيك سرح
وفي كذبة عاش وفرح
ولحقيقة قلب مالجفى تذبح

تي ... يزّي ... الزّح ...

ماعادش في الصدر ليك هواء
وماعادش جهد للشقى
وماعادش عشقة بأختف تتعطى
وماعادش في القرجومة ليك دعاء

يا بلوة
يا هم
يا صفا

كل شي خذيتو
ما عاد عندي مانعطيك
ولا الدنيا نجمت تورّيك

اما والله نمّن بيك
وباقي ندعيلك وندعي عليك

[Amine.G]

نمّن بيك

أنا و انت

احكيلي ...
احكيلي عليك
عالمنسي في سكاتك
على كلمة حكاتك
على عين عشقتك كي راتك
على بنة عاملة مش هوني قد ما شتهاتك

احكيلي
عالحشمة الي غطاتك
عالدنيا الي قد مافكتلي عطاتك
على دعاوي الوحش في صلاتك

واحكيلي
بالغزرة وبالومية
حتى في ليلة دحسة وعمياء
تي حتى كي تعقد النية
وانت لمعزة إلي في روحي مرمية
أحكيلي ...
على كل حاجة
كتبهالك على حرف الشط
فسختها موجة هايجة
سارية فيها روحي تتربط

تي احكيلي
اش عملت ؟
واش لبست ؟
وقداش من مرة حكيت ؟
وقداش من مرة سكت ؟

حقا ... نسيت ماحكيتلكش
عالروبة الfleurie الي شتهيتهالك
والله تواتيك وتواتي حشمتك ودلالك
اما مانجمتش نشريهالك
خفت لا ما نلقاكش بش نعطيهالك
واش خصني كان انا نلبسهالك
وتسمع سكاتي كي غنالك :
"يا سمرة بروحي نفديك"
أما زعمة انت ليّا وانا ليك
ولا خليني هايم بعيد عليك ؟

وقد مانبعد
صعيب نخليك
ومن غير مانشعر
نرجع نحبك
ومن غزرة القمرة نحزر عليك
وكي ماتطلش من شباك بيتك
نحلف ونحنث
ومانجمش نتغشش عليك

تي هيا الزح زيد أحكيلي عليك
أنا كلامي سكت
وهبالي ماهفت
يستنى فيك

احكيلي 
وزيد بسكاتك غرقني فيك 
بش نقعد نحكيلي ونكتبلك عليك 

[Amine.G]

أحكيلي

وقتاش القمرة تتزرع نوارة
ونقطف من خدودك ضحكة
تيبسلي دمعتي الغداره
ووقتاش يرجعلي ولفي
وتتحل ثنايا الرزق
والحوت يرجع يسرح
قدام ديار البحاره
ووقتاش يبرد جاشي
و تخطاني التنهيده
و نكرهو ضو لمدينه
ونحسبو نجوم الدشره
و كي نبردو مع رياح لفجاري
نفرشلك من كل زهره
غطاء في بالي
وكي تنعس يدي المكبشه
في يدك
و تغير من أختها السارحه
في بدنك
تسألها شوصلها لغادي واش بلها
بعرقنا

دين عشقتك
و يهلك شهاوينا
و يهلك طريق السواني
علاش فاضح خطاوينا
------------------------------------------- #سيف
تي علاش نغزرو مالشباك
وشمشنا عشقة متصدرة في ايدينا
تي وقتاش الليل يطل ؟
ويديك كي باب قلبي تتحل
انت السارية وانا لبحر
ووقتاش نعطيك بوسة مرصوصة
ونلبسك فرد مرة كي الخوصة
ويكمل هبالنا في وسط الحوسة

ووقتاش نحمّلك بالراحة
كي قطرة نو ستناوها الفلاّحة
كي غمضة نوم عاملة مرتاحة

ووقتاش نشدّك من يديك
وفي تراكن جاشي ندور بيك
ونورّيك ... ونعبث بيك
تي شبيك ؟
ماتفهمش ... ما تعرفش :

قداش سألت روحي
في الساعة مرّات
وقداش كتبتلك
حروف ماتقرات

تي وقتاش
يصفى لهوا
من دخان لمعامل
ووقتاش يرجع الصفا
وترجع لنفس لعمايل
ووقتاش
تتعدى بجنبي وماتحسبهاش
ترجع تتكى عندي وما تتغطاش
تزيدني دقة في روحي وماتحقرهاش

ونرجعو نحسبو للعشرة
ونتفكرو إلي بيناتنا عشرة
ونزيدو شوية للبرشة

تي يزي مالبعد وكل منامة حرشة
ويزي ما عملت فيها بهلولة وطرشة

الشي هذا لاهو متاعنا ولا يخرج علينا
لا ينفعنا ولا يفهم حر شهاوينا
والطريق الي ماشية فيه عمرو ما يواتينا

لازم ترجع ليالينا
ويرجع كيفك عامل مغناني
وبنة البعد تزيد تشهينا ...
وترجع تقرب خطاوينا
------------------------------------------------- #أمين
: نص مشترك 
[Amine.G] & سيف الزين

خطاوينا (Amine.G & سيف الزّين)

يا غلطة لعمر
يا ثنية تعبها بلاش سفر
يا شطر لحلاوة
وكل المر
يا شبعة
الي قام سعدو
وزهرو ما حضر

اي شبيه
كان سمعت منّي كلمتين
محصورين في قلبي توة سنين

واي شبيه
كان بتنا
ليلة من بعضنا شبعانين
وليلة بعدها عاشقين
وتزيد تكبر الرعشة
وتولّي الدقة دقتين

واي شبيه كان تدمع العين
وترجع محبة هاك السنين
وعزقة في الروح ترجعنا حيّين

واي شبيه كان حد مايشبّهلك
ولا ينجّم حد يوصلك
ولا ينجّم الزمان يصدّي شبابك
ولا ينجّم البعد ينسّيك احبابك

قد ما حاولت نحّيك من جاشي
ونمحي حروفي الي تشبّه لحكاياتهم
ونبدلك بللاّتهم ...

شي ... مانجّمتش ...

عيوني ماطاوعتني
ورجعو من غير مايشاورو
في خيالك لمتخبي مرشوقين

قد ماتبرّي بكية فراق الميتين
قد ما تزيد تشعّل نار الحيّين

تي افهم
الي قلبك وقلبي
على بعضهم مفطومين

وحتى كان يسكت مايدق
ويهفت حس جاشي
الي منك تحرق
عمرو مايرجّعلي عمري
الي من جرة بلاك تسرق

يا رعشة كنيني
الي لبّو لعرق
يا تزلزيلة لوطا
كي تمشي عليها
وانا ندعي
تبلعني كي تتشق

يا حرارة لكنين
وفزعة النّو بعد لبرق
يا نفس يرجّع الروح
بعد ما لكلام نشح وسكت
والريق شاح وزاد شرق

تي وقتاش تطّل
ويرجع يفتّح معاك
نوّار الفل

وترجع يدّي
بعرقة من يدك تتبل

يا أصل المشكل
وكل الحلّ

يا غلطة ماتصلحتش
تصورت في ورقة لعمر

مهما بردو أطرافي
كي نتوحشك
يرجع يشعل في روحي الجمر

يا دعيوة الخير في سواد الشر
يا خبابل لبحر واسرار البر
يا أحلى غلطة في جاشي تتحفر

انت هي ...غلطة لعمر

[Amine.G]

حلمة_ helma

Nour Chelly

Related tracks