الكلمات :-


عشان البنت اللي حبيتها
وحبتني .. وماكنتليش
وطول عمري اللي راح بيتها
وآخر مرة طلعتليش ..
أنا ماشي ويمكن افوق
على ضلمة ف وسط القبر
على عياط الحيطان والسقف
وارحم م اللي جاي بالصبر
انا ماشي ويمكن اموت
انا ماشي - هعدي وافوت
على بيتك .. وشباكك
وانا آسف .. ومش عارف
ومش هعرف اكون كالعادة
وابات الليل واكون بابك
انا ماشي ويمكن اموت
انا ماشي ويمكن اموت
انا ماشي ويمكن اموت .. واعيش هلفوت بحيل مهدود
اعيش ميت بكانسر دم .. وفقر القلب .. وحزن وغم
..
هتوحشيني .. بلا راجعة
صدمتيني بعين واجعة ..
ف نص الحلم بالجبروت
حلمت صحيت وشوفته حقيقي
ولون الدمع لون التوت
ساعات احمر .. ساعات اسود .. ساعات بسكر به واثبتلك !
دموعي اهي .. بتنهش فيا لحم وعضم
وتكسر ف القلوب كلها
قلوب ازاي ؟
صحيح ازاي ! ودا الاثبات لإني سكرت
مقولتلكيش ومفهمتيش ؟!
قلب ليكي .. قلب فيكي .. قلب حبك .. قال بعيدي
قلب حب الحضن منك .. قلب داق الشهد عندك .. قلب حب يكون عشانك .. قلب عاشق في ملامحك
تن تن
تن تن
كل حاجة .. كل حاجة
ليها قلب
ليها حب خصوصي جداً
ليها عشق أكيد بفعلاً
خلاص سكران ؟؟ '
انا زهقان ، انا قرفان ، انا تعبان
وليه السكرات مبتزورنيش
طلوع الروح دا اصعب وجع ؟؟
واصعب خوف واصعب سيف ؟؟
هههه
من بعد رحيلك هيكونلي
ويبات يدبحلي في نَزيف
...
اسمه ايه .. هو مين ؟
- بلاش يمكن تقابله كمين.
اني عارفه ف السلام !
واني حابه بدون كلام !
اسمه هو اسمي لكن
هو أكتر في الحنان
هو أكتر في الجنان
واني اكتر ف الزحام
والمشاكل
والخناق
واللي فات
كان بالركام
اسمه ايه .. هو مين ؟
- بلاش يمكن تقابله كمين
بكره تعرف واحدة واحدة.
تيجي مرة ف عيني فاتحة
ثم تحصل فيا كسرة
تيجي مرة ف عيني شابكة
ثم تحصل فيا حسرة
ييجي مرة ف عيني عُرس
ثم نفضل بعده خرس
تن تن
تن تن
...
وهسلّم أكتر م الأول
لو شوفته ف شارع هه شوفتك
وهحضّن اكتر م الأول
لو ألمح طرف يكون ريحتك
وهحضّن أكتر م الأول
دا ف حضنه الطرف اللي بريحتك '
سلامات يا عيوني يا فؤادي
وبلاش ف كلامك تتمادي
سلامات سلامات - وانا عكسه
في حاجات هتعيش وتموت عادي
وان جيت للحق انا اولهم
وقريب جدا بمعاد
مكتوبلي عشان بعدك عني
وهسيب للناس خط حِداد
سلامات سلامات .. سلامات
وحوشيلي شوية كلمات
ودعاوي كتير
ودموع اكتر
وما تنسي فروق المقامات
سلامات سلامات .. سلامات
سلامات مع اني مش هسكت
ولا هقفل نصي المشهود
دي قصيدة ونَص اتنين عادي
مانا عادي لقصّي مكتوب
...
سلامات ازاي وانا شايف
نور بيتك وانا لسة مبحلق
مستني طلوعك لو اشوفك
متداري هنااك
انا بسرق ؟
بتبص الناس
على ايه !
الناس دول ارخم افّيه
اتعملوا عشان يبقوا مجازاً
سكاكين بتقطع كوبليه
وتقطع وقت مقابلتنا ..
ف الوقت القاطع لاحضانا
انا فاكر يوم لما عبرنا
بوابة الخوف اللي ف بيتك
وسهرنا الشارق .. ونبيتك
ااه يا عِرَسي يا لعبي يا متهور
اطلعي بلكونتك لاتحول
وألُق الطوب على شباكك
او اكسّر شيشك ..
ايه مالك ؟!
مقصدتش اجرَّح في جَنابك
كان قصدي اضمّك بعيوني
يا عيوني كإيدي على جِنابك
...
انا همشي خلاص
ما فضلت ساعات
مراجيح ف شوارع ف الذات
وحقيقة بانتلي ف الآخر
امسحي في جَميل كل ما فات
مش هكتب تاني لأمثالك
ولا هسرح واتمرمغ فيكي
كان نفسي اكونلك كالمالك
وأكون انا حارسك وحاميكي
وان كان ع الحلو اللي عملته
او قولته ف كام جمله مفيدة
او فجر الليل اللي سهرته
بتغزّل في قصيدة جديدة
كان ضعف مؤقت .. ميضرش
وان شوفتك حظاً .. ميسرش
وان جيتي ركوعاً .. مأظنش
ان يُحيا حنين البدايات
او يُحيا غرام الحكايات
سلامات سلامات .. سلامات
وامسحي في جَميل كل ما فات.

#عمرطاهرشلبي

.. عمر طاهر - عشان البنت اللي حبيتها

تلاتة آذار
وماقمش الزار
ولا عايزه يُقام
بخلاف تواريخ او أرقام
او ذكرى عزيزة وغريزة
عمّالة تزيد ف الاظلام
انا عايز اقولك شئ واحد
"كان نفسي اكون عندك سائد"
مش زائد وِحدة احضان
او لمعة عين اما افتكرك
او ثقل دموع بالاطنان
..
لا مؤاخدة يا ست
طيش مني بعدت عن المغزى
الوغزة بتيجي في وريدي
تحتل ف ايدي وبنغزة ..
هكتبلك ضحكة ف تبتسمي
هكتبلك وٙحْشة ف تترسمي
تتقسمي اتنين قاسي رقيق
يا جرئ يا حنين يا برئ
مولودة ف يوم زي اليوم
مولودة ف قلبي ويومياً ..
تفكيري وحلمي المعلوم
بقى شئ مدفون حتمياً
متشكّر جداً لسعادتك
متشكّر جداً لسعادتك
لفظين معانيهم مختلفة
مؤتلفة علاقة وعكسية
مفرد علاقات .. مرّت بيّا
كم مؤلم هذا التعبير
بقى هذا عدل التدابير !
معملتش ذنب
انا كنت ف جنب وبشكيلك
بحيكلهم عنك وبجيلك
وانا لسة بغير
بقى هذا عدل التدبير !
تماثيل بتحاوطك وتراوضك
على كل ماهو لازمله نكير
..
لا مؤاخذة يا ست
طيش مني بعدت عن السير
الميل الواضح ف جنانك
بقى هالك مُهْلك للغير
لا ارادي انا بنزف ~ بنزفلك
طول عمر نباحي بيعزفلك
واكتبلك كام كلمة عتاب
واهديلك دمع بلا حساب
هكتبلك شئ حلو ليومك
هكتبلك شئ حلو ليومك
خلينا اليوم بس احباب
مولودة ف يوم زي اليوم
مولودة ف كون .. مش ملكي
لو ملكي هبيعلك ببلاش
يرأسهم كلي اللي ما عاش
بـ معاش من وقتك وحنينك
لو ملكي انا فعلا هاهديلك
هرميلك كلي على كفوفِك
واتمنى اكون قاطع شوفِك
عن اي طريق
مع كوني غريق ..
في جمالك
شوفي حالك بالك بيديق
على مطرح كنته وانا حبيب
معقولة نسيب !
ونغيب بلا راجعة في القولة !
هنقول علاقِتنا المٙجْدولة !
وهنحكم غيب ..
مطلوب تتناسي واتناسى
معقولة حبيبتي .. معقولة !
اتناسى ف حبك بسهولة !
كان سنك لسة ف مدرستك
جناحات اعدادي ف سنة اولى
كام سنة مع بعض ف دنيتنا
كم كنا عيال قسمتنا حبة العاب
وكبرتي يا نونّا وبدأتي ..
اول خطوات سن شباب
يا ماشاء الله
يا جمال بيزيد ويزوّد
إلحاح الكون ترضي رضاه
تشريف بجمالك وخيالك
العاكس على ارضه بعود
معقود مع جود وكذلك
خطوات بتفك المشدود
يا ماشاء الله
..
آخر كلمات هختم بيها
ايّام كان نفسي اني اجنيها
وارويها احضان
انا مملي وقوع م الاغصان
مكسور غلطان
ازاي ؟
مين فينا بيلعب نسّاي
وبيطلب بُعد عن الجاي
خدي بالك جداً من نفسك
معرفش ازاي كنت بنافسك
على حسب القول اللي اتقالي
طول عمري بحبك بـ تجلّي ..
وعنيّا شهود
شوفي كام مسدود كان عاقنا
وضربتي حٙسبت احنا ضربنا
ولوحدي فضلت
كام مرة خاطرتي وخاطرت
ما علينا حبيبتي ما علينا
لو كنتي معايا وقصادي
وبصيتي لتحت
هتلاقي دموعي لرجلينا
ويا ريت ارتحت
ما علينا حبيبتي ما علينا
انا اه كان نفسي في ايّدينا ..
تربطها دواير من فضة
او حتى بلاستك او رسمة
مرسومة بحبر مع القبضة
ولكني هلبّي لرغباتك
طلباتك أمر
انا هبعد عنك تدريجي
وان جيتي تعيدي هتناسى
بكاسات معدودة من الخمر .

عمرطاهرشلبي#

عمر طاهر - تلاتة آذار ..

كلٌ يبكي على ليلاه
وانا ببكي عليكي يامّا
كلٌ يبكي على مجناه
وانا ببكي عليكي يامّا

عجّزنا من بٙعدك حقيقي ..
حنّية الحرمان بتيجي .. بس انتي ما بتجيش
عيشنا بهمومنا الخيش .. عيشتي وشايفة الوضع
الصورة لسة ف بداية الوجع م الفقد
علاقتنا بيكي؛ اولى للمُسمى بوأد
مفيش علاقات .. مفيش زيارات .. مفيش عبارات بتتقالي .. مشينا وجينا واحنا اغراب

عٙدِت سنين .. وعِدت ف سنة .. عٙدت دموع تغرّقهم .. ما فاضش الا انا ...
لسّاني برسم ف اللي كان كما كان
لسّاني بابني ف اللي راح .. وكإنما
عمّال بهدّ ف جدار الزمان
تصبير لروحي بقول ريثما ...
وتجيلي كالمُعجزة

واقف وايدي معجّزة .. او بايشة باين م الدموع
الغلطة كانت من دُعايا؛ ولا كانت ف الخشوع !
كلُ يبكي على مجناه .. وانا كلي مكسور الجزوع
...
تعرفي ... !
كان نفسي تبقي معايا واحكيلك
تشوفيني وانا بكتبها ، والقيلك ..
تقوليلي "اجبهالك ؟!"

تعيّط ليه ؟
ما كانت لسة جيالك؛ لقيتك روحت بخيالك
لبنت هناك مابتحبكش

ماشي
...
الذنب ذنب الأم ؟ الذنب ذنب الأب ؟
الذنب ذنب اخوات ؟ "زِلنا ما زِلنا الكبش!"

ورب العرش والسموات
وحياة دموعك واللي فات من قهر
الخمْر ما بينسّي .. والأمْر ها قد جاء ..
مستاء من كله إلاكي
"دموعي عيون بتلقاكي"
ويفيد بإيه الندم !
عيشنا وروحنا لعدم
واللدغة لادغة ف الكلام الحلو

الكل كان أخطأ صحيح .. 
والكلمة طلعت من لسان بالعلو
والسن مش مقياس لا ، كان فكر مش موجود
روحنا؛ بقينا شهود ..
على ارواحنا .. وايامنا
لمحنا بنظرة قدامنا .. وقولنا؛ ما قولنا "طب هيّ!"

سكرت كتير
سكرت كتير "بأحزاني"
ماتتخضّيش '
والكحة دي !
دي آثار لبرد خفيف
او يمكن الدخان من ناري وانا شارد
بقالي يومين تلاتة طواال
وشعوري بالمُحيطين .. اصبح شعور بارد
ووحدك اللي جوايا
وبكتبلك ...

كلُ يبكي على مجناه
وانا ببكي عليكي يامّا
ودمعي عيون ..
هتثبتلك

وباظن آن الوقت
نعرف حقيقة البدأ؛ نرميها ع التاني
مين اللي كان جاني .. وأناني لحد آخر شد

هيفهموا ايه ! واشمعنى زار الفهم ..
وقت اما عازوا الفهم !
ويزوروا دلوقتي !
بكينا كتير ومن بدري
محدّش حسّ
يا أُمي الدسّ كان فينا ..
وجينا لقينا حضن بليد .. ف نتشتت
بٙعدتي يا أُمي نتأكد
ومنكم نتنسى .. "وبشويش"
...
بشويش دي عادت ع اللي فات !
ولا عايدة على اللي جٙي ! بقولتي لنٙفٙسي بالراحة؛
وراحتي تليق بكائن حٙي !
وانا مش حٙي
...
هستسمحك؛ او يعني صدقًا هستغل ..
لحظات وجودك في خيالي المريض
واقولك جزء من حزني المُمل

ف اقولك حاجة عن هيّا
وكِيف اخترت تبقى بعيد
قرار كان ناتجه اني وحيد
مافيش حتى الحنين ليّا

هقول سارقاكي ..
وفيها بعض الحنان منّك
وكانت خايفة وكإنّك
وكان تجسيدها هي انتي

بٙعدتي؛ بٙعدت وملامتي ..
زارتني وبايتة من يومها
مابقتش مستحمل خلاص
كفاية اللوم معٙ انتي
وهي كفاية معٙ لومها
بجانب كل معلومها
...
معلش يامّا
هستأذنك .. رايح حساب
والغلطة كات منكم

هدفع نتيجة ظن
والظن من زينهم
او بٙعد عُمْر يكون
"الظن كان زينهم"

عمري اللي راح وسطكم
اكبر كتير منكم
وانا ساكت ..
ورغم ان الحياة باخت 
هعافر وليومين تانيين
وايه المانع
لعلّها تيجي من عنده
وبالأيام
تكون "الفاتحة" محض روتين .
#عمرطاهرشلبي

عمر طاهر شلبي - كلٌ يبكي على مجناه ؛ وانا ببكي عليكي يامّا

قبل أي كلام
وفّر اراء المُر
من بداية المسموع
ولنهايته
بلقي بلساني الحر
متعلقوش ع الوزن
وما تسمعوش .. "هيضُر"
...
النص دا بـ يُقال
من تحت بيتك والجيران سامعين
هادية هدوء شارعك
ولا اني جيت متأخر والنجوم نايمين
بطُلّ عليكي من نفس المكان
وف ودني لحن حزين
بعاتبك بيه
بعاتبك والبيبان سامعين ومتعاطفين
والشيش بيحدف نفسه كما كنتي
لمحتك نظرتين بالظبط
وشوفت الحزن وياكي ..
فى خطواتك وبصّاتك ..
على سيرك
فـ جيت بقراري من غيرك
اشوف الحلو زعلان ليه
...
أنا عارف ..
قد تكون حكيت للشجر
كتومة ما بتحكي لبشر
مش من غدرهم؛ لا
احساس كبير ..
عن قلبهم
لو حس بطّل دق
وانا شايف
ان الشجر ثابت
باقي الزروع باعت للنسيم نفسها
"بعشق حروف اسمها"
دي حقيقة طلعت ف الكلام معلش
بقصد اروح عندها
واقصد اشوف حزنها
مقصدش ابيّن شئ ولا إني ابين وش
انا شايف ..
ان الشجر ثابت
باقي الزروع باعت للنسيم نفسها
لون الشجر باهت
ووجوده اصبح في الوجود بقى لها
للدرجة دي !
حس الشجر بيها/سمع الشجر منّٙها
مش هفترق والمهم .. الحزن واصل قلبها
...
عربية جاية ع الملف هناك
ابوكي يا حلوة بيقرّب
خلاص لفت مهوش هوّا
ماخوفتش برده "مستغرب"
...
نرجع لموضوعنا
بقالك فترة بتحطّي مكياج
كان نفسي اأقولك ..
جمالك لما ييجي يزيد ..
يزيد بالكحل ويّا الروج ..
بوضع خفيف
فٙـ خديها مني بنُصح
بلاش تكثيف
برغم العلم اني بغير
ولكن حبي أصبح قُبح
...
مش دي المناسبة
ولا حتى دي سطوري المناسبة
انا بس شوفت قلقت
"بقالك نظرتين ملقتش ..
مكياجك اللي اصبح مُلازمة"
حبيت اهوّن
والفراق معرِفش
طب هوّا هوّن
"لم يصل للوش"
وعنيكي خيرُ دليل
كنتي كفوف منديل
ماسح دموع الناس
ومين يداويكي دلوقتي
كان نفسي أرمي كفوف
بس اللي بيته إزاز .. !
وما عيشناهُ مش وقتي
...
زعلانه ليه !!!
مش ذكرى موتها ومش بسببي
"ما أثقل الإفيه"
دانا سطحي جداً
طمعان لو اوصل سطحها ..
ارسم عنيا نجوم
تقلق ف وقت النوم
تبص شوية واتمٙاسٙك
تنام؛ تسمع صريخ الكون
"كل النجوم وقعت
والكل اصبح في عداد الموت"
ماكنش القصد والله
حبوني وحكيتلهم؛
كرهوني فـ حكيتلهم ..
عنّك وما منّك
زعلانة ليه !!
بتشدي فيّا الخوف يكون ضلّك
ويهرب لما يظهر ضحك .. 
يجيبني لحد باب البيت
كإن انا وحدي ف حياتك كإن انا بس فاضلك
مابتقصديش عارف
ما بتضحكيش .. خايف
يكون احساسي م الاول
سراب قد جاء من زايف
...
علشان اكون مرتاح
بعت رسالة اٙتطمن
نسيت "القلب غيرُ مُتاح"
وكان ف سكوتك اِتطمن
ضميري غواني ورماني
وسابني جليس مكان ما بقول
ونيس للسور
وعازل نفسي عن عالم ..
كئيب من بعد ما بعدتي
مش حلو اكون مُعترف
حلوة اذا زيدتي
...
انا همشي زي ما جيت
كان نفسي اكون "قد جاء ..
ولمحته قد حنيت
ورميت انا زي ما رميت
وحكيت وراح كما جاء
مشبعش مني ومشي ..
روّح وقال مشتاق"

#عمرطاهرشلبي

Popular tracks by Omar Taher