كان بلياتشو متخصص..
يموت قدّامها تضحكله ..
وكان عارف بيبني إزاي ..
ملامح ضحكة على شكله ..

وقف ع الكرسي قدامها ..
وشد المشنقة بإديه ..
وهو لأنه بلياتشو ..
مقالشي هو نفسه في إيه ..

ده كان لما يشوف دمعة ..
يروح ويشيلها في المونتاج ..
وكان لو يوم يعوز ضحكة ..
يقوم يرسمها بالمكياج ..

وقف ع الكرسي قدامها ..
وشد المشنقة بإيديه ..
وجه واحد وقال .. وقّف !!
وضحكوا الناس على الإفّيه .. 
فضل يضحك على نفسه ..
ومش عارف بيضحك ليه ؟!

وقف على كرسي قدامها ..
وشد المشنقة بإيديه ..
دخل بدماغه في الحلقة .. 
وشدوا الكرسي من تحتيه ..
وف المرادي تحديداً ..
مجاش واحد كما العادة ..
في اخر لحظة قال .. وقّف ..

وبص في عينها وقت الموت ..
تخيل وقتها شاف إيه ؟! 
لقاها واقفة بتسقف .. 
مع الجمهور على الإفيه !!

ده كان بلياتشو متخصص ..
مقالشي هو نفسه في إيه ..
وكان عارف بيبني إزاي ..
ملامح ضحكة أو إفيه ..
كان بلياتشو متخصص ..
وراح مع دوشة السوكسيه ..

عمدان النور Gazaga - البلياتشو

Omar Behery