برطمان خايخ في قلب لبلاد
هرّاتو الدنيا وزاد قتلو عناد لفّاد
ولبلاد ماكفاهاش همّها وبينها
كملت هزّت هموم لعباد

كل حاجة فيه كيف ما هيّ
نفس السقف الي يقطّر
وكوبة الباب الي ماتتسكرش
والزليزة الناقصة في مزاز الدار
والشعر لمهرّي
الي ماعادش يخبّي
النقب الي في وجه الباب

البرسيان باقي يطربق مالرّيح
والشقوق كيف ما هوما
والسبّالة مزالت تقطر وتصيح

الحيوط مقشّرة
مخربشة وحزينة
ولبلاد باقي واقفة
وشادّة صحيح

تغدر إلي باع وشرى
وتحن علي مزال يحب ويشتهى
وتروف علي قلبو تعبّى لا حكى لا بكى

وباقي تحب 
الي يحبها بميزيريتها
الي يعشقها حتى في غصّتها
الي يمسحلها الي سال من دمعتها
إلي مايسيبهاش وهي في غصرتها
إلي يتفكر زينها ويحيّر شهوتها
يقول مزالت حليلتها ويقتل غبينتها

باقي 
كل شي كيف ماهو
لا فادت فيها سياسة
ولا هناء يجي بالقوّة

وعقاب الشتاء
القلب برد
النفس تسد
والحيل تهد
الكيف طار وزاد فد
وحد ماعاد لاهي بحد
كلها تجري تلحق ماترد
وكل شي تنسى ماعاود تجبد
الاثنين يشبه للأحد
واقتلو يصبح حي
وشي ماستوى
وشي ماتقد
والقلب الي زعمة زعمة فاق
مع سواد الظلام رجع رقد

لا غطاء مزال يعطي شوية دفى
ولا نوّار فتّح وفاح وزيّن لخلاء
ولا نو عنقت السحاب
وشطحت للهواء
ولا مزالت نكتة تفرهد كي تتحكى
ولا عادت الروح يشيّخها لغناء

البرد الي عرفتو وعشّش وكبر فيّا
نشوفو في كل غزرة مالعينين
والوحش الي كلاني بكلمة وحرفين
والكاس لمطرشق شطرين
ولعمر والزهر
الي ماتو بالحيا في تركينة البين

والبخت ذابل
تكتب بالدم والهم
عالحيوط الخايخة
ومعادش مكتوب عالجبين
ومعادش تبهنيس
ومعادش تشيطين
والفرح الي ولّى بالح بلا لوان
ما عاد يحوك فلّي جاشو حزين

برطمان بني فرانسيس
على قد ماهدّو لعمر
نسى إلي هو عريس
في قلب إلي ماتو والحيّين

وبين البينين
التنهيدة مزالت يتيمة وهجّالة
مدام الحال مزال كيف ماهو
وما تفقعتش الدمّالة

ومدام كل حاجة قعدت كيف ماهيّ
لحكاية الي بدات
ماتستحقش كمالة

[Amine.G]

برطمان خايخ

أنا و انت

فراغ

تعرفها تونس ؟
تونس ماهيش مشموم ومرڨوم
تونس تنهيدة وبرشة هموم

تونس
كياسات محفّرة وڨمم تفيض
تزغريطة فوق سطح
ووجيعة تقتل وتغيظ

تونس دمّارنا وزهرنا
تونس جامع وطبرنة
تونس بلوة تاخو وتزيد في عمرنا
وهرة وريشة تعلّي في قدرنا

تونس زادة سكران يبول تحت حيط
قعدلو في جيبو دينار محنون
شاهي حارة مروّب
من نهج بن خلدون

تعرفها انت تونس في الليل ؟
قهاوي معبيّة
ريحة لملاوي الي تعترق
وبوليس بالزي يوقفك في باراج
يلوّج في حق شوية دخان
تي هات الي كتب وفي لامان

يا يجيك برجلة
وبنكتة وبضحكة في لفام
يا يعدّيك ديراكت
حسب تعليماتو للساتيام

تعرفها تونس ؟
تعرف بوشوشة ؟
ميترو على ميترو معبية
والتهمة ؟ مش مشكل ...
نفصلوها حتى في قالب
تخمامة متعدية

شطر لبلاد فوق بعضها
تحب تحيا والحاكم باغضها
على لحية
على كعبة vino
ولا حتى على بوسة ... تتعدّى

وعلى خاطرك مش معانا
مش متاعنا ... مش تابعنا
تذوق المرّار والفدّة
ونهارين توقيف
يتعداو كي شهور العدّة ...

تعرفها تونس ؟
يا ذنوبي كان تعرفها ...

تونس راهي ماهيش
متع الwikipedia
ومتع الأمن والأمان
والتلافز والتقارير
وإلي يحبّوه يصير

تونس ماهيش متع :
[ويحلو العيش هنا
والشمس ضاربة هنا
والعصافير تزقزق في كبد السماء]

تونس زادة
وجيعة وتلييعة
رجلة ونساوين
فروخ تنطر
وترسكي في الميترو ومنسيين

كيران ونقل جماعي معبيين مالفجاري
على شهرية آخر الشهر
تي زوز فرنك مجنونين

تونس الهم والبين
ضحكة وتفريكة
تتعدّى بعامين

تونس نفسين
صحن لوبيا ومرهوجة
تتعدّى عالعين

وبلّيمين لا فما كيفها

أما بيناتنا ...تونس في وسط هذا لكل :
فوعة ومظاهرات
وصياح وعركات
وعباد ماترخّش
عباد ماتملّش
عباد ماتكلّش

تي يا حسرة عالخوف
وياحسرة على ضرب الكف
ويا حسرة على لوغة
اكبس توة وحدو يترخف
ويا تڨر يا يتمسخ الملف

لا ... ورحمة الي مات
قبل ما يطلّع الروح حلف

لا بش تبقى تونس متاعكم
الي قاسمينها بيناتكم
بخف تف ...

وتف :
علي مزال مافهم
علي مزال في بالو
الي معالي الوزير
كي يسرق يُحْتَرَمْ
وعلي مزال عايش
مع توصيات الرئيس
وإلي مزال بايع روحو بالرخيص

قلّي ...
تعرفها تونس متع ليوم ؟
نعرف إلي لا ...

تونس متع ليوم بيّة
عندها شكون وراها
وشكون حكاها
وشكون شراها

وشكون حسب
وشكون غضب
وشكون تعب
وشكون رواندو مفضوحة مشريّة

باهي ... اخطاك
وايجا نحكيلك
على تونس عقاب الليالي
على حوم حاسة على بعضها وتداري

على ولاد لبلاد
مالتالي للوالي
وأولاد عم
وهوما فيها لمّالي

مدام ماتعرفهاش
برة تعلّم وأفهمها
وشد الصف من تالي

مزلت مافهمتهاش
#تونس والله ماتتكالش بالغالي

[Amine.G]

تعرفها تونس ؟

يتعدا

مريضة

C H E B - M A R S

Imghrane - adak imlane ajda3 ilan s lqimt 

ما تذبلش

نبداو ...
نبداو وننظمو حفنة كلام 
بالصلاة والسلام ...

تنهيدة مع كل حرف 
تحكي غرام 
وتعشيقة مالطرف للطرف
تخلّي الوقت للروح روّام 
وتخلّي لاماير في القلب وشام 
ولقوالة نفس ...
لقوالة جاش يتحس 
وموش علام
 
والحمد لله عالصحّة 
مالفم ما تتنحّى ...
ومايهمش كان نطيروا
 لسابع سما بين الاغيام 
المفيد رزانة المخ وركزة لڨدام

الوقت بطبيعتو ديما يحسب
يقيّد ، ديما لقدّام 

وليّام 
ورقة تطير ماليوميّة 
عدد يتعد 
في وسط شهور منسيّة
مشوار في الشهر مالعمر 
في العب حاجة
 من برشة حوايح مشتهيّة 
 
أسمعني ...
نحكيلك على ريشة البومة 
وعلى دمعة لبلومة 
وعالفرحة والوجيعة 
تتقسم شطّارة بين أولاد الحومة
ولقمة النكد مرجومة 
وغصّة لولد ، في العرق مكنونة 
والكلمة لحلوّة ... شهد في الڨرجومة
  
الملح في الكف كي يولّي ماء 
منفوس .... 
منفوس بالعين والعين علينا حق
والنفوس عاشقة 
والقلب الصافي دواء 

ادخل بلّيمين ...
وفحّج سبعة مرات 
وبسمل توّة يمشي الصفا

وزيد لبخور عجعاجي 
جاوي في سناجق وداد يلاجي 
وشق في كوانن ڨايدة يتحرق يراجي 

خلّي تمشي وتطيح العين 
ويتكشف مكتوب 
تطبع عالجبين 
تكتب بحرف وحرفين 

والحر ...
الحر من غمزة يفهم 
ويعشق كي يشوف غمزتين 
حرج عالرمش 
وفي عوض لڨمارة شامتين ...

تي الصلاة في المزاز 
والبركة مالوسطيّة تتحل 
ويترد الشعر بش يزوزوا لعزاز 

وندوروها فرود أزواز 
والي يمشي عالجمر الحر 
موش كيف الي عافس عالڨزاز 
موش كيف الي يضحك 
في الوجه وفي الظهر غمّاز 

ويا ستّار استر ...
ويا جبّار أحضر 
واشهد عالبال كي يڨمّر 

تزيليفة هوا
رعشة عالخوا 
وذنين تتجلّى على كلمة "نحبّك" بالحفا 

ونزيد ناكل مالدرج لحظة مالوقت 
ونشبع بدقّة زايدة مفضوحة 
حتى كان بلمعة من عيني شلّقت
وما فقت ...

مافقت بالنهار كي راح 
والليل ساكن الارواح 
والريق بلاش نفسين في نفس شاح ...

وبالعاشقين وبالصلاّح 
شهود الضحكة والأفراح 
بدينا ...

وما يخفاكش ... 
الي عز الهدرة السكات 
وهانا وفينا ... 
كيف ما بدينا بكلمة ترمات
وتعدّينا ... ورمينا .... وزدنا نسينا
وقلنا حفنة كلام 
في سكاتنا تحكات ... 

[Amine.G]

مريضة

oumayma

Related tracks