أشعار

حلّو المراكب - نادر - الشيخ إمام يبكى بعد وفاة نجيب سرور

البنّ
			
القهوه تحبّ كنكه
والكنكه تحبّ كنبه
والكنبه تحبّ قعده
مبسوطه مربّعه
و كنّا أربعه
أنا و انتِ و انا و انتِ

و كنّا عيون كتير
و طبليّه و زير
ولا بنحبّ نبكى
ولا بنعرف نطير
أنا و انتِ و انا و انتِ

سبنا البوسطه ورانا
فى الترماى اللى داير
العتبه للإمام
كان ريقك جنبى ساكت
حبّيتك من زمان
أنا و انتِ و انا و انتِ

شمّيت لادن سعيد
شمّيته من بعيد
شمّيته من قريّب
خمس سنين حاغيّب
على الشمّاعه خايف
و باخاف على الدولاب
و بادوب على البلاط
و باحسّ الظلّه تقلت
و باسمع الوابور
و باحسّ الميّه تقلب
أنا و انتِ و انا و انتِ

الظُهر الشمس تلحس
الظلّه فى الليمان
والظُهر الشمس تعمل
سيبرتايه دهب
بصّينا لبعض فيها
و مشينا لبعض نبكى
و قعدنا من التعب
أنا و انتِ و انا و انتِ

باقول لك إيه باقول لك
حاجيب حاجات قديمه
قلبى كوره شراب
نلعب والاّ ما نلعب
فرحت لنا المدينه
و امبارح فى التراب
أنا و انتِ و انا و انتِ

و بنفرش ضيّنا 
على ظلّة بعضنا
و احنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنيّنه
أنا و انتِ و انا و انتِ

قصيدة البن بصوت فؤاد حدّاد

البتاع - أحمد فؤاد نجم

فاطمة عادل.. الموهوبة الشابة القديرة، وابنة الفنان الكبير عادل ماضي، الذي هو رب عائلة فنية مدهشة، تعد ظاهرة رائعة في حياتنا الفنية والمسرحية منذ سنوات، بدءاً من الأب، وزوجته الفنانة “سمر عبد الوهاب”، وأبنائهما “فاطمة”، و”حنان” (الصغيرة بطلة فيلم “عين شمس”).. ومحمد عادل المسرحي المقتدر الذي أمتعنا وأشجانا بـ “قهوة بلدي”.

وهبت عمرى للأمل - فاطمة عادل

Add Me on Facebook : فيسوك بتاعي
https://www.facebook.com/diab.live



Mixed By : Me



. بيدج مزيكاتي  .. شرفونا هتنبسطوا

www.facebook.com/Mazzikaty2
Enjoy ..

الليل ملاح ، تايه سواح ، لا بيوصل شط ولا بيرتاح

الليل مشحون أسرار وشجون وألم ونغم ودموع وآهات وكاسات ونايات وعبر وحكم
ومشيت فى الليل خجلان مكسوف ، اكمن الليل عريان مكشوف
أسرار الناس وجراح الناس .. على صدر الليل .. عناقيد وصفوف
ودموع الليل والضلمه جبال ، راسمين على وش السما غربال ..
الماظ مبدور فى كاسات بنور يرسم بالنور ع الارض خيال
هاتقولى بتشكى آمال من ايه ؟ ولا من أوجاع ولا شوق لمتاع ده العمر ان ضاع مش هابكى عليه أبداً يا طبيب .
يا طبيب أنا جرحى ملوعنى وساقينى الحنضل من كاسى . والنار فى ضلوعى بتلسعنى
وانا لسه صغار والعيا آسى .. ولا عمر الليل مرة سمعنى
عليت الآه على أنفاسى .. أبداً يا طبيب
وينام الليل .. والكون حواليه .. ساكن نعسان .. وكأن الموت .. رمى تقله عليه
سكــت العيــان
ونزور فى الليل دنيا الخمار ، ونلاقى الكاس ع الناس دوار ،
ويموت الليل على باب الحان .. هايخش إزاى والدنيا نهار
وقلوب ونفوس كده ع المكشوف .. عريانة تمام 
وتعال نشوف ...
شوف ده الى هناك قدامة كاسين !!  مع إنه لوحده ماهوش إتنين
أهو ده الى بنظرة عين شبكوه وسابوله الكاس ملينان وفاتوة وحكايته تقيله وهمه تقيل
و غزاله بتتغزل فى حصان .. وتقوله أحبك انت وبس
ويفز هناك سيدنا المنظور ، ويطب الكاس فى إيدية مكسور 
ويقول غشاشة هاتلعب بيك .. ويرد التانى عليه بفضول
طب وانت مزعل نفسك ليه حشرى وهاقولك ايه
مانويلى يقول . موس عاندق خق
والسامر يضحك لما يطق .. ويحط الحشرى عنيه فى الارض
وف جوف الليل يغرق مسكين لا يغير حاااال ولا يشغل بال

الليل ملاح "  لنجم -  مصطفى إبراهيم "

خلي بالْك معايا ما تسوقش الهبل
بهلوانْ ؟ مش بهلوانْ ، فار ؟ أيوه فار
واللبن فار
وكان زمانْ الجماد له في الحبل
وتمخض الجبل
فولدني!
حد قال يا فار انت طالع منينْ ؟
يا فار أبوك الجبل ثابت وجبت منينْ الوسوسة
تكفر حبه أكفر حبتين
تاخذ خطوه قدام آخذ خطوه كسكسة
تشوح لي أشوَّح لك
سنّ بسنّ وعين بعين
وفْن بفن أصل الفنّ أوله نسنسة
توِّجني مَلِكْ
بارك للأرض وبارك لي
الحشرات سبع تاشرات تحت رجلي
انا من فصيلة أصيله
أخويا الوطواط أعجوبه : حيوانْ وطير
واخويا القنفد أعجوبة : حيوانْ ونباتْ شوكي
وانا اللي مش أعجوبه لكن انا اللي فيهم
انا المشتهرْ المنتشر وكل الدنيا جيراني
انا   فار فيراني
في قلبي كلاكيع لغم ونغم
والاَّ بلاشْ
خلينا في الوصف البراني
انا عيني اللي يمين يمين
وعيني اللي شمالْ شمالْ
والحول حواليَّا
حنختلف في دي ما نختلفش في رجليا
قول أربعه
انا الفار الفيراني اللي جلدي حرير
وفْروى قشعرير
وأسناني مسرسعه
بتشق من بوز
ما تقولش لما يبوسْ
إبرة الدبوسْ
وداني مطرطقة من غير حموريهّ
انا مش بسيط زى ما تظن
انا جحرى مش خن
انا لي ناب مملوك وناب انْكشاري
استني
الوصف لسه ما خلصشي
نسيت ديلي اللي طوله خمسة اعشاري
يعني نُصِّى
ويادنيا بصىّ
حارقص وارقـَّص
وخيالي متقصقص
على الحيطانْ
****
والليله دي بنت عرسه يا ابن آوى
شوفْ دلعها حضن صدّ وحضن آوى
رايحْــه جـايه لعب ميهّ في حوض نقاوة
بــسّ قــــولــــوا يــا دراوشــــــــــــــــهْ
رقصـــى إسمــــــــه دوشــــــــــة روشة
أو منــــاوشــــــــــــه أو شــ ..  أوشــ ..
أو شقاوهْ
اللــــــيه دي القــط بايـــــــت ع البلاطهْ
احْــــــنا كــــــنا أتىن وجـــا تالت تلاته
قــــال له ضد الموتْ ما تنفع الاستماتهْ
بــــــس قـــــولــــــوا يــــــــــــادراوشهْ
رقصـــــى إسمـــــه دوشــــــــــه روشهْ
أو مناوشهْ
 أو شــ ..  أوشــ ..
أو شماتهْ
ســاقطه قدامي ومن غير غشّ اراها
دنــــيا تفـــاحَه زباله مقشراها
مــــن شراها باعها من باعها شراها
بــسّ قـــــولـــــوا يـــــــــــــادراوشهْ
رقصــــى إســـــــمه دوشـــــه روشهْ
أو مناوشه
 أو شــ ..  أوشــ ..
أو شراههْ
تنـــكمش م البرد تغطس في العطارهْ
وأمــــا تدألــــج بتدألـــــــــــــج بَطارهْ
يـــا بـــني آدم ولــــك برضه الصدارهْ
بــــسّ قولــــــــــــــــوا يادراوشـــــــهْ
رقصـــــى إسمـــــــــه دوشــــه روشهْ
أو مناوشه
 أو شــ ..  أوشــ ..
أو شطاره
قلـــت إيــــــه الساعه واحدَه إلا ساعه
قلــــت صـــــاحب كرش بيحب اللكاعه
قلــــــت نـــص الليلْ لفرسانْ المجاعه
بـــــس قــولــــــــوا يــا دراوشــــــــة
رقصـــــى إسـمــــه دوشــــــــه روشه
أو مناوشه
 أو شــ ..  أوشــ ..
أو شجاعه
***
ولا حد يفهم في الشجاعة
زى الطاحْونة الجعجاعة
قال انت أول خلق بتسيب السفينْة
خاين؟ ..لأ
خايب؟.. لأ
خايف؟ .. آه
يا بنت يا نعناعة
أما مش طالع أبيع جرانينْ بالْليلْ
انا طالع آكل أقرض انتش انتشي
واضرب الأخماس في الأسداس
أضرب الحماس في الاحْداث
الحركه بركه
سكرانْ؟ يمكن سكرانْ، خايف؟ أيوه خايف
وسلام على الخوفْ مَلِكْ الاحْساس
سلام عليه متراس
وسلام عليه فرّاس
سلام على الفار اللي بيلْعب في عب الفار اللي
بيلْعب في عبّ الناسْ

رقصة الفار- بصوت فؤاد حداد

قصيدة الحلزونة - فؤاد حداد 
صوت : رامي وفا 
حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

الحلزونة - فؤاد حداد

  حُسن المعاملة 
حسّن ثوابك وربّيي كل الخصال السامية
قول ده الطريق نحو ربي خطوة ابتدت لسه ميّه

اتقل مايوزن ميزانك يوم الحساب والمفاضلة
الخلق في الدنيا زانك حُسن المعاملة اللي فاضلة

سبح بحمدك وجودي وأتمنى ترضى عليا
يا نفس بالطاعة جودي لجل الجزاء العليا

الجنة تختم حسابنا لو كنا أهل التسامي
مافيهاش من الدنيا نبنا إلا الشبه في الأسامي


دينا الوديدي & علي الهلباوي 
كلمات : محمود مرسى 
الحان : صلاح الشرنوبي
توزيع : محمد صلاح الشرنوبي

حسن المعاملة - علي الهلباوي & دينا الوديدي

رائعة الشيخ امام عيسى بوتيكات 
غناء و الحان شيخ الموسيقيين الراحل 
امام عيسى 
كلمات الشاعر
احمد فؤاد نجم 

كلمات الاغنية 

بوتيكات النات كوانَّات

وشقق مفروشه وعمولات

يا حلاوه الناوه كوانّاوه

يا بلدنا يا آخر فتاكات

بوتيكات النات كوانَّات

**

شبيك لبيك فتح مخك

لبيك شبيك غمض عينك

حتقفّل مخك ح نطخك

ونلوشك لو تفتح عينك

ركب قرنين تركب مازدا

وتعيش سلطان في البرواز دا

مش عاجبك فالجبنه الفاسدة

والعيش والفول والكرَّات

يا حلاوه الناوه كوانّاوه

يا بلدنا يا آخر فتاكات

بوتيكات النات كوانَّات



مين فيكوا ما يعرفش عليوه

شيّال المينا الكحيان

في ثواني اتمول واتحول

بقي مسيو عليوه عليَّان

إزاي؟

ما هي بوظه ومفتوحه

على حس ولاد المفضوحه

وأرانب صاحيه ومدبوحه

تتأستك تبع البنوكات

يا حلاوه الناوه كوانّاوه

يا بلدنا يا آخر فتكات

بوتيكات النات كوانَّات



حتقول الفقرا ومشاكلهم

دي مسائل عايزه التفانين

وأنا رأيي نحلها طوالي

ونموّت كل الجعانين

وبهذا ما حدش حيجوع

لو نعلن هذا المشروع

وح نقفل هذا الموضوع

نهائياً

ونعيش في تبات

يا حلاوه الناوه كوانّاوه

يا بلدنا يا آخر فتكات

بوتيكات النات كوانَّات

الشيخ امام - بوتيكات - جودة عالية - HD

كسميات نجيب سرور مع موسيقى

كلمات فؤاد حدّاد
ألحان حازم شاهين

إسكندريلا - قطر الصعيد

هنا شقلبان محطة اذاعة حلاوة زمان  / أحمد فؤاد نجم

كلمات للشاعر / احمد حداد

لبن - فرقة اسكندريلا

إذا مش نازلين للناس فـ بلاش

والزم بيتك.. بيتك.. بيتك..

وابلع صوتك..

وافتكر اليوم ده.. لإنّه تاريخ موتى وموتك..

 ...

إذا مش نازلين للناس فَـ بلاش..

مادام الدايرة ماكاملاش

والحاجة ماتامّاش.. وأصحاب الحاجة ماعارفاش..

إيه المعني وأى بطولة فـِ إنّ حياتنا وأحلى سنينَّا..  يروحوا بلاش؟

حاجة ماراكباش!!

...

الله يخرب بيت الفكر.. وبيت اليوم الّى ورّانا الفكر..

لإن الفكر كتاب..

و "عويضة" حياته هباب وتراب..

عايش زمنه الكداب -زىّ العادة- مُرتاب..



 كنكة على دِمْس .. ونفَس مقطوع فى الغاب

ماشبعناش عنه بُعد.. وهوّه ماشبعش غياب..

"عويضة" هناك فى الأرض..

في المدن الأُوَض الّى نايمة على بعض..

...

وأقولّك إيه اللى قطع الدايرة يا أمير؟

وخلّى مابين النبي والخلْق  الغربة وتقطيع المشاوير؟

إن أنا وانت بنلعب طول العمر دورين: طليعة وجماهير..

و"عويضة" بينفخ موت الدِّمس والعالم.. نِمْس..



العالم.. سرقة وقلْع ولبس

و"عويضة" بقلبه الجبس.. الّى معلِّمُه إمتى مايحسش وامتى يحسّ..


بيعدِّى في الأيام جمل المراحيل..

زى ما عدَّاها من أول ما اتخرط الكون

من أول ما طلع للدنيا ووجد قبلُه.. فرعون..

 نفس الأيام نفس النسخة مطبوعة على كل الأعوام..

ماسمعشي بينا.. ماسمعناش.. ماقابلناش.. ما اتكلّمناش.

...

ولإن حمول الأيام مش مرفوعة.. إذا يد "عويضة" ماترفعهاش..

والقولة الحقَّة.. مش حقّة.. إذا صدر "عويضة" ماطلَّعهاش..

والخطوة حتفضل مشلولة.. إذا قُدّامنا "عويضة" ماخطَّاش..

ولإن دى حاجة "عويضة" لسّه مايدركهاش..


ولايدركناش.. ولا يعرفناش..


ولإننا لما دبحنا بعض مناقشة على القهوة لاجل البشرية..

"عويضة" ماسمعناش..

تبقى الدايرة مادايراش..

واما ييجى المخبر يسحبنا عَ الزنازين..



لازم نبقى عارفين..

إن السَّحبة ببلاش..

وان الحدوتة مالافَّاش.. فـَ الدايرة ماتامَّاش.. والدنيا ماحِلْواش..

وانّ "عويضة" لمّا قِبل الظُلم.. ماماتْش..

إحنا مُتنا.. وهوّه.. عاش..

...

الحاجز أكبر من كل الأحلام..

واسْمَك.. من جهلى وجهلك.. واسمي واسمك!!

...

مش حتعلمنى أكتر ما اتعلمت..

روح علِّم أبو الواد والبت..

الّي حيرميهم فى فرن الثورة يطيبوا بُكرة..

والّي لحد الوقت مايعرفشي إزّاي يكتب وازّاي يقرا...

وازّاي يعشق.. وازّاي يكره.. 

ولا عنده فكرة عنّك.. أو عن بكرة..


ولا ليك ذكرى..


لانا.. ولا إنت.. نجحنا ف تغيير الفكرة..

...

الفاس يردم بذرة..

المنجل يحصد سبلة..

الشغل يجيب أجرة..

وانت بعيـد..  بحكاية مامفهوماش..

بينَّنا وبينُه شعْرة وأرقّ من الشعرة..


دة الّي مفروض ناسج علم الثورة وصانع بكرة..


واحنا شهدا.. مع إنّنا.. ماحاولناش..

حاجة ماراكْباش!

الدايرة المقطوعة - عبد الرحمن الأبنودي

 أشكر أستاذي و زميلي الاستاذ عبد النور الذي أتاح لي هذه الفرصه لأعلن كل خطاياي أمامكم و علي الملأ لعلي أتطهر منها . نعم أنا مثال للمحامي الفاسد , بل أكثر فسادا مما يتصوره أستاذي 

انا ابن لهذة المرحلة والمراحل التى سبقتها
تفتح وعى مع التجربة الناصرية امنت بها ودافعت عنها فرحت بانتصارتها وتجرعت مرارة هزائمها وانكسارتها.
هنت عندما هان كل شيء وسقطت كما سقط الجميع فى بئر سحيق من اللامبالاة والاحساس بالعجز وقلة الحيلة.

ادركت قانون السبيعنات ولعبت عليه وتفوقت
تاجرت فى كل شيء فى القانون والاخلاق والشرف
انا لا انكر شيئا ومستعد للحساب وتحمل المسئولية
بل اكثر من ذلك اعترف امامكم اننى دخلت هذه القضية طامعا فى مبلغ تعويض ضخم لكنى اصطدمت بحالة خاصة شديدة الخصوصية
جعلتنى اراجع نفسي اراجع موقفى كله اراجع حياتى وحياتنا
اصطدمت بالمستقبل.
نعم صبي من الذين حكم عليهم ان يكونوا ضمن ركاب اتوبيس الموت
رايت فيه المستقبل الذى يحمل لنا طوق نجاة حقيقى
رايتنا نسحقه دون ان يهتز لنا جفن نقتله ونحن متصورون ان هذه هى طبائع الامور.

كان لابد لى ان اقف..
ان هذه جريمة جريمة كبرى لابد ان يحاسب من تسبب فيها
انى لا اطلب سوى محاسبة المسؤلين الحقيقين
عن قتل عشرين تلميذا لم يجنوا شيئا سوى انهم ابناؤنا 

ابناء العجز والاهمال والتردى كلنا فاسدون .. كلنا فاسدون
لا استثنى احدا .. حتى بالصمت العاجز الموافق قليل الحيلة

سيدى الرئيس
كل ما اطالب به ان نصلى جميعا صلاة واحدة لله الواحد اله العدل الواحد الاحد القهار
لست صاحب مصلحة خاصة
وليست لى سابق معرفة بالشخوص الذين اطلب مسائلتهم
ولكن لدى علاقة ومصلحة فى هذا البلد

لدى مستقبل هنا اريد ان احميه انا لا ادين احد بشكل مسبق
ولكنى اطالب المسئولين عن هذه الكارثة بالمثول امامكم فهل هذا كثير ؟ اليسوا بشرا خطائين مثلنا اليسوا قابلين للحساب والعقاب مثل باقى البشر!!
سيدى الرئيس
انا ومعى المستقبل كله نلوذ بكم ونلجأ اليكم
فاغيثونا .. اغيثونا
والله الموفق..

البتاع - أحمد فؤاد نجم

شعر مصرى Poetry

Recent comments

Sayed Amin

توم وجيري

توم وجيري

Omar Ahmed عمر أحمد

Related tracks