اشبعي بيهم

كلمات والقاء : ابراهيم غازي
هندسة صوتية : أحمد الصافي

الكلمات

طب ايه يا عم الشتا
جي تعمل إيه بدونها
إرجع وما تعودليش
مبقتش بأحضُنها
كان نفسي لما تطل ..وياها تلقاني
تلقاني بدل الهم طالل بتوب أبهى
تلقاني ما بأدخنش
تلقاني بأشربها
بأهربها وأهرب لها
علشان تكون راضية
تحت الحزام ضربت
والضربة دي قاضية

جي بإيديك الفرح
ولا بإيديك فاضية
مُش فارقة جي بإية أنا عندي ما يكفَّي
بالوحدة متدفي
مِن جمع ما بيُسترش
مِن ناس ما بعد ما أقول
بألقاني حاكي لطُرش
لا بيسمعوا الأوجاع
ولا يفهموا فِ وعود
كان نفسي لما تعود
تلقى الجدايل شال
أربع سنين متساب
عم أتقالتي وخال

كان نفسى أصبح أب
أو ع الأقل أتحب ربع إللي حبيتُه

رُبع إللي أنا مقدمُه

طب إيه
جواز صالونات
ما فِ أخرتُه بيندموا

وبيبكوا ع الماضي

وأنا ماضي ما أتبكالوش بالحق وكفاية

قولتلها دافية
وكيسين فشار وفِ حُضننا بنتي


فا تقول هأجيب الولد
قولتلها بنت كمان بالظبط تبقى أنتي

جي لية يا عم الشتا
مِن مُدة بأستنى
بأتنَّى مِ الأوجاع
وأكتب عن إللي إتباع
وما بين لُقا وداع الأنَّة  فِ سطوري
والأنَّة عفاينة

جي ليه يا عم الشتا
أنا روحي تعبانة
وحبيبتي دفيانة بإللي أتسلب مني

جي ليه يا عم الشتا
بالله تروح عني

روح للي بيغني
فِ أتنين أهم عشاق
طالل نغم عاشقين

أربع سنين راشقين فِ ضلوعي سكاكينها
وباقول فِ آه ورا آه
لا الشعر سكنها
ولا فرح بيداوي

فيا التقاوي الحُزن مخزونة ما تمطرش
صايم بقالي سنين
إرجع عشان ما افطرش

إرجع عشان ما أكبرش
أنا مين ها يسعدني لما أبقا ليلة حزين

إرجع يا عم الشتا
بكفاية كُلي أنين
لا لي عين كما يعقوب تبيض يوم م البكا
ولا صبر كما أيوب فِ عالم التهلكة

أنا ليا قلب أتخذل
مع أنة حب وغزل حبل الوداد مرات
قدم دموعُه فُرات
قمر السما جِبته
عَّيش بشر طاهرين
وأهو مرمي بجنابتُه

ولا هزهم غيبتُه ولا تعبوا يوم مِ البرد
ولا بكيوا
ولا بقيوا
ولا نأيوا كما يوم نأى
حبل الوداد مشنقة يشهد عليه شاتي

إرجع
إرجع يا عم الشتا
أنا مِن زمان شاتي

بين الشتا وشاتي

Minimum Charge | عمرو حسن

اليوم بدأ
والناس بتصحي تروح لأشغالها
و أنا روحي لسه بتسعي بالفطرة مبسوط بترحالها
بتنفس الأشياء مش أكسجين خالص
بتنفسك / صورك / او كل شئ ايدك
خبطت بخفه عليه
بتنفسك و اشتاق
مريض بنفس الداء
دايما بميل للوحدة مش قاصد
و في وسط أصحابي العيل الفاسد
اللي اترمي في القهر من صغره
متكتريش وجعي و تقولي مكتوبله
عارفه الزمان قاسي
بيعلم الانسان
طب ليه مبتعلمش
كل اما كنت العب في الحارة بالاحجار
و ارميها عني بعيد
دايما بروح و اتعب علشان الاقيها
دلوقتي لما كبرت
بقيت بعيط ليه علي حاجة برميها
صاحبي اللي ياما سألني عن قرارات
دايما باخدها في عز من انا خايف
قالي النهاردة عن الفراق حكمه
"قالي النصيب أعمي انت اللـ مش شايف "
انت الغريب فينا
مش كنت قولت زمان
ان البكا للناس والحزن مش لينا
دلوقتي كل الناس شايفه الوجع فينا
الوقت سكينه و مكتفه دراعي
كل الوجع في الناس
من بعض اوجاعي
كان نفسي افضفضلك
و احكيلك المعاناه
من وجعي بكتبلك
كل اللـ بتمناه
ياللي انتي ساكنة العين
و مجمله جفوني
حطيت عياط قلبي
رنات لتليفوني
كل اما حد يرن
بيزيد في قلبي الشوق
صوتي اللي زي الجرس
بقي زي شريط خلصان
و بقيت بحن عشان
مقدرش اعيش دونك
ليه الدموع المربكة
بتحلو في عيونك 
ازاي فارقتي بدون
تنهيدة في وداعنا
و اصحابك الاندال
بيغنوا لـ وجعنا
قربتي ليه من ناس
حالفين ما يجمعنا 
لو حتي حضن مجاز

البيت حيطانه ازاز
متحدفوش الظلط 
صدقنا ليه الغلط
كدبنا ليه الصح
متكدبيش علشان 
انا و انتي مش عايشين
بنموت بنفس الجرح 
مبلومش غير نفسي
ازاي اخون واببرر الاخطاء
و ازاي رميتي في حضني برفانك
انا جوه مني حاجات حبيت اقولهالك
بس انتي مش فاضيه
خدتي اللي فاضل بينا و مشيتي
خدتي الحاجات الحلوة من بيتي
كان نفسي بس احضنك
و اقسم معاكي الهوا
اقصد نفس خدتيه
بعد الفراق سيبتيه
و انا خدته في الرئتين
لكن بفعل الوقت
والحرق في الاعصاب
مبقاش نفس في الرئه
بقي دمع نوعه تقيل
ينفعني وقت البكا
مبلومش غير نفسي
كل اما تيجي
فـ لحظة علي بالي
بستني يوم ينتهي
وأبدأ في ترحالي
وأتنفسك وأشتاق
مزيكا اه مـ الفراق
هي اللي باقيالي
كان نفسي تبقي
زي ما اتمنيت
"ام لعيالي"
كام نفسي لكن منطقي
مش اي شئ نتمني انه يكون
يكون
ولا اي طير اتكسر
يقدر يعيش مسجون
انا زي هذا الطير
مكسور و مستني
تليفوني لما يرن
مكتوب عليه اسمك
يمكن ساعتها افوق
دلوقتي رايح انام
بتمني من ربنا
نتلاقي من تاني
لو حتي ف الاحلام ..

مبلومش غير نفسي | محمد عبدالفتاح

كلمات والقاء / إبراهيم غازي
هندسة صوتية / أحمد الصافي

قصيده"من غير مناسبه موت" (رحمه ناصر)

Rahma Nasser