Cheryl Lispier mihó konosí komo "Liesje" a nase na Kòrsou dia 15 di yüni 1974 i ta bini for di un famia hopi musikal.

Liesje a kuminsá kanta for di su 8 aña na skol i aktividatnan di misa. 
Na e edat di 12 aña e la kanta na show di dia di mama akompañá pa su tata defuntu Humpry "Boy Pan" Lispier, despues di esei Liesje a sigui kanta ku su tio Tony Shearman i hopi artista lokal mas.

Liesje a kanta tambe ku artistanan internashonal di taya manera Ricardo Montaner, Nelson Ned, duo ku Peabo Bryson i tambe tabata den e opening act pa e artista Jose Feliciano.

"Liesje" ta ganadó apsoluto den varios festival, manera festival di reflection, Caribbean Gospel festival, Kanto pa Kòrsou i tambe e la sa di bai ku premionan di mihó bos i mihó entonashon den festival di Kalipso i Kantadó Mayó. Liesje a debutá den festival di tumba na aña 2017 i sali den e 12 finalistanan.

Na aña 2010 liesje a saka su promé disko kompakto titulá: Mi stima bo.
Varios ta e piesanan ku a logra bira éksito manera: E sekreto, Mi stima bo i O mi Señor.

E artista aki ta gosa di hopi rèspèt i apresio den pueblo i tambe entre su koleganan músiko.

Loke ta karakterisá e tremendo kantante aki ta su dominió di su bos úniko i potente.

Richenella Brunken is following