إلقائك هايل جداا شابوووو 👏👏👏👏

اللهم بارك- صوتك بيقشعر قلبي والله-ديما متميزة حبيبي

تحفه 🔥 صوتك بيلمس قلبى 

قصيدة : يا عاشقين اتجمّعوا جنب الدفا
كلمات وإلقاء : مايكل عادل
إهداء : للاجئين والمحرومين من الحق حتى في الهروب

بسم الإله
خالق وطّننا والحياة
بسم الشعوب والناس ولقمة العيش الحلال
بسم الجبال
بسم المزارع
والشوارع
والمَطَر
بسم المطارح
والمسارح
والخَطَر
بسم اللي عاشوا دفيانين وقت الشتا
بسم اللي ماتوا بردانين
وسط العراء
وسط الحَجَر
بسم الطوفان اللي هايقلب كل شيء
بسم الزمايل في المعارك والطريق
يا عاشقين وجه النبي
صلّوا عليه
يا عاشقين
واستعطفوا قلب الشتا ع اللاجئين
والغلبانين
والمحرومين
م الحق حتى في الهروب
قولوا لأطنان الجليد فوق القلوب
تنزل سلام
تحمل رسالة دفيانين من قلبنا
قولوا لأبناء العراء
يستحملوا
قولوا لسكّان العراق
أن يُمهلوا
قلب الحياة مهلة سنين
فوق السنين
يمكن يداوي جرح كل المحرومين
يمكن تعود الأرض
يمكن بعد حين
يا عاشقين وجه النبي
سمّوا على اللي يموت بضربة من البارود
صلّوا على المقتول بجوعه
واللي بردان من عهود

بسم الحياة والمغفرة
والعفو وقت المقدرة
بسم اللي ساكنين الشوارع
والمزارع
والنجوع
بسم اللي سايبين البنادق
والخنادق
والربوع
يا عاشقين وجه النبي
إدعوا الإله
يكفينا شرّ الأجنبي
إدعوا وناجوا في الصلاة
قلب الحياة يعرف معاني الطبطبة
على قلب عيّل كان مُناه
يعرف ملذّات الحياة
إدعوا ف صلاتكم كُل حين
للمحرومين
يلقوا مكانهم في قلوب المدّعين
يلقوا مكانهم جوّة صورة مع فلانة
جنب ذلك ولّا ذاك
يا عاشقين اتجمّعوا جنب الدفا
جانب نيران شعلة غضب
من قلب محروم مـ الحياة
ردّوا الندا
من ده و ده
حاوطوا بقلوبكم كُل حين
اللاجئين
والمحرومين
والأفئدة
كُل ذنوبها إنها
خايفة تموت
متجمّدة


يا عاشقين إتجمّعوا جنب الدفا | مايكل عادل

احمد الطحان_رباعيات

إهداء.. 
لحاجات بنتسنّاها تحصَل.. 
للمُرسَل إليه.. والمُرسِل 
وليها.. لمّا توصَل

حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

رامي وفا | ما يعيشّي طول عمرُه كابوسُه

زي النسيم البارد 
وقت الخراب والزحمة
يوبيل الرحمة.. 
بين مطب المحيا 
ومطب الممات..
زي الكوميديا السودة 
في الدنيا..
وفي الآخرة
وفي الإعلانات..
بنمُر، ونتصنف...

عملوا إيه بالبساطة بياعين الفل؟
وعملنا إيه من غير بساطة احنا؟
واقعين بين المحاولة والمحاولة..

على حِس الكلام السهل بنزوّق قلوبنا..
وبنزوّق جيوبنا، على حس الطريق الصعب..
ملناش حياة في الفلسفة
ملناش حياة في الحرب

طايلانا إيد المجتمع، من قلبنا لجوفنا..
ومكلبشانا ع الصراط، الذكريات
هنمر زي البرق مش م الطيبة، من خوفنا 
يوم الحساب هنصدّق العلامات..
ونبرر الغاية..
هنعدّي فوق السنين 
مساكين ومن غير روس..
ياكل قلوبنا الحنين 
ياكل رجولنا السوس..
بتجرّنا الموازين 
تضحك علينا الشموس
تطلع لنا من بين طُرُقنا النهاية..
آية.. في سبيل المصلحة العامة
وحكاية في لسان اللي مالهوش حكاية 
بنترسم جوّا التاريخ، مش زي ما احنا
بنتشاف أو لأ، على كيف الظروف 
سيمانا على روحنا من المحنة
ومن أثر الوقوف..

نجري ف طابور والدنيّا زي ما هيَّ
والانتظار ملهوش تاريخ صلاحية
وكإن تفاصيل الحَدَث كانت جديدة
وكإنها المرة الأخيرة، والأكيدة..

بنطُل على آخر الطريق العيرة
إيه الحقيقة الفاضلة بعد الزيف؟ 
فين النهاية في آخر السيرة
فاز الحكيم، ولّا اللي قلبُه خفيف
بننتهي، وبتفضل الحيرة
واقفة بين القتل، والقتل الشريف.

#هاله_ربيع

المحاولة - هاله ربيع

خليني احبك في البلاد البعيدة 
والزمان القريب 
 والحياه السهلة
خليني أتمشى ف خيالي
دون رادار العقل والعمر المغاير
وصفارات انذار  بيطلقها الفزع
قبل ما نبوح بالكلام 

خليني أحبك والهوى بيدوم  
خليني احبك في الخريف
 والجو مش مفهوم
_ ‏ وشبهي _

خليني احبك و الحياه
بتصفي  م المواعيد 
صدف
وتقصر المسافات
و تزود الحبكة 
وتهيأ الورطه الجميلة

خليني احبك في الخطر
 والنيل  بتتحاش دمعته
وعيوني م المنبع تفيض

خليني احبك في المطر 
 يكتمل معنى القصيد

تايلاند_ شعر وإلقاء | صفاء أبو صبيحة

كان الشغف أيامها يم البحر 
ريحة نسيم من طلتك مالح
أبدر سلام على كفك  الطيب
يطرح بلد خطاويها لامبارح

آخر محاولات الالتئام_شعر وإلقاء|  صفاء أبوصبيحة

ستفتش عنها يا ولدى فى كل مكان"

صدقنى هتموت م التعب 
واللمعه فى عيونك هتدبل
الناس بتفرح بالوصول لو بعد جهد 
والرحله ممكن تبقى احيانا لطيفة 
طب وانت فى مكانك كده من اربع سنين 
لا بلغت نشوة لانتصار زى اللى وصلوا
ولا رحلتك ضافت لعمرك تجربه
واقف على الاعراف فى حيرة ومندهش
نفسك تجرب ..تنطلق ..تلعب ..... تحب !
لكن قلبك زى اطلال القمر لو شمسه غابت
مطفى ..وموحش ..وابتسامتك ميته
مين اللى يكسب لو حاربت ؟
الدنيا ولا انت ؟ 
نَفَسك يجارى السكه والحمل التقيل ؟
تقدر تنام ؟
ياخى دا انت حتى فشلت فى اجابة السؤال
الجملة واضحة
(ستفتش عنها يا ولدى ..فى كل مكان)
طب هى ايه ؟؟ 
وازاى هفتش عن حاجات معرفش كونها ؟
وازاى هقابل الدنيا عريان الامل عاوز احارب
وانا وانت الناس كلها عارفين بأنى وللأسف دايما زبونها
عارف !
دايماً بشوفك واخد القرعة الغلط 
كل ماتشاتك على ارض المنافس 
وكأن علشان تمشى خطوه فى تصفيات الدنيا محتاج كام جريمة
دلوقتى هقدر اسألك
 تقدر تقول تعريف مناسب للهزيمة ؟
 سواء حاربت بخبث او حتى بشرف.
 اعتقد ان الطريقه الوقتى ملهاش اى قيمة 
 زى اللى صارع الموج عشان ينقذ حبيبته 
 وطلع من الميه التقاها بتحضن الشخص الغريب وتقوله اسفه . 
 زى لما الشعر يغرز وبغباء سيف الشعور الحي فى 
قلوب الفلاسفة 
زى ما تكون انطلقت باقصى سرعه فى سكه صعبه 
تقوم ..تقع .. تضرب ..تزق ..تدوس على دماغك كعوب المشكلات ...تكسب أخيراً
تكتشف انك بتجرى دا كله فى سباق مش سباقك 
وانك خسرت 
وانك بقالك ييجى ستاشر سنه بتدعم قضيه اقل من حجم انتمائك
وان المعانى اللى انت بتدرسها للاطفال غلط 
وحبيبتك اتعشت بقلبك 
وان اللى عامله عشانها ميكفيش تدوق طعم اشتياقك
صدقنى هتموت م التعب 
ولسانك المربوط بأستك صمت مش هيقول قصيدتك
وخطاوى عمرك مهما كانت واثقه متداريش غبائك
 
"وسترجع يوماً يا ولدي ..مهزوماً مكسور الوجدان
وستعرف بعد رحيل العمر .. بأنك كنت تطارد خيط دخان"

اهى دى الهزيمة الحق يا ابنى 
ونزار مبيهزرش خد بالك 
وان كنت عاوز الحسبه كامله مكمله
فانت الصراحه فى عمر عداد الهزايم متساويش اصلا ثوانى 
فبلاش تمثل ان خساراتك فريده 
فكر بعمق ازاى هتتقبل حياتك كل يوم خسارات جديدة
ومتفتكرش انك كده عايش فى بؤس وحزن خام
لسه الليالى الكحل جايه بالانتقام
فاصبر بقا وبطل قلق
او اقولك الافضل كتير عن كل دا !
اقفل نزار واجمد كده وحاول تنام 

محمود عبد الناصر
١٣_١٢_٢٠٢٠

دستور الهزايم | محمود عبد الناصر | ٢٠٢٠

قاصر يا قلب 
أقصر يا عمر يا ورد
ما يسيبك المحبوب إلا إذا سيبته

من سيرة اللي ما جاش_ شعر وإلقاء| صفاء أبو صبيحة

ايه هد عزم البحر غير قلة التجديف! 

طفل راشق في الجدار|سامح القصبي| إلقاء صفاء أبو صبيحة

(وثائقي .. عن الناجي الوحيد)
..

في الحرب
قالولنا القادة إننا هنفوز
من قبل ما رُبع سلاحنا يبوظ
ونعوز لإعانة ..

هنفوز علشان ( الله موجود ومعانا ) ..

هنفوز من قبل ما نلبس أي بيادة
وقبل ما حتى ندوس
على رمل الساحة ..

وقالولنا كمان اننا لو موتنا فداء لبيوتنا هيبقى الموت بالراحة ..

وقالولنا ان احنا وحوش وأسود ..
مش أي جنود ..
ومعانا بارود ..
مش أي بارود ..
وجثثنا ماهيطولهاش الدود

علشان الجندي في سِلو بلدنا إن مات .. بيصير جناحات .. ويقوم ويطير ..

القادة قالولنا بإن الحرب يومين بالظبط وتدّي نذير ..
فيدوبك نلحق من دلوقتْ نفوز ع الوقتْ ..
وندهن شَحْم على الجنازير ..
..
وابتدِت الحرب ....
صورايخ م الشرق
وغصن زتون وحمام م الغرب ..

وطيور أبابيبل من عند الرب بتمحي الظالم في المظلوم ..
وف وسط الضرب
لمحت بعيني من الأعداء خنزير بيحوم ..

قنّصت عليه .. وعملت الزووم على نُص عينيه .. وضحكت عليه .. وقتلتُه ..
كات أول مرة أشوف بعينيا الشخص اللي أنا أصبحت ساعتها عليه .. ومازلتُه ..

كات أول مرة أشوف الشر بتاعي في صوتهُ وشكلُه وتوبُه ..
واكتشف ان انا في صباعي شراسة تهِد البيت وتفتفِت طوبُه ..

كات أول مرة أشوف السائد .. 
وامشي عليه من غير ما انتظر العائد ..

كات أول مرة أموّت شخص
وإخْص على اللي يموّت شخص بإذن القائد ..

كات أول مرة
لذلك رُحت عليه .. فتِّشت جيوبُه ..
من وسط حاجاتُه لقيتني بطلّع ورقة قديمة بقالها سنين مِتعانة ..

مكتوبة برعشة إيد إنسان بِيعاني الفَقْد و عَانا ..
..

ولقيت مكتوب ...... :-

لـ حبيبتي راشيل ..
أنا آسف جداً إني مقصر جداً جداً في المراسيل ..
وماتتضايقيش
وطلاما وعدتك إني هعيش .. والله هعيش ..
ادعيلنا كتير علشان ربنا بيحب دُعاكُم قبل دُعانا ..
وسيبي لي على الترابيزة يوماتي مكان محجوز
وماتستنّيش لو كُنتي جعانة ..

وأخيراً بس عشان الحلوة بتاعتي تفُك البوز ..

امبارح هتف القادة
وقالوا :-
إننا هنفوز ..
من قبل ما رُبع سلاحنا يبوظ ..
ونعوز لإعانة ..
هنفوز علشان ( الله موجود ومعانا ) ..

..
.
#بشيكل_فول_وبنص_طعمية
ديسمبر / 2019

وثائقي عن الناجي الوحيد شعر حسام إبراهيم | إلقاء صفاء أبو صبيحة

إلى روح/ محمد أحمد أبو صبيحة
في الجنة إن شاء الله

من سيرة اللي ما جاش_ شعر وإلقاء| صفاء أبو صبيحة

صفاء أبو صبيحة

Recent comments

سالم الشاذلي

Doha Ahmed

omar elawady

Sarah Abdullah Elsebaey

Related tracks