حظ رجل(ن) ماعرف جو الحضارة 
بدوي(ن) يتبع مزون الروايح
ماشي(ن) في طوع نفسه واختياره
مااحدن له قايل(ن) وين انت رايح
مايهمه لاجليد ولاحرارة
بين نبت(ن) يطرب المحزون سايح
كل يوم(ن) نازل(ن) فيضة قراره
نبتها عطره مع النسناس فايح
مختلط ريح الخزامى والشجارة
طيرها باعذب شذا الاصوات نايح
ماحسب ربح البضاعة والخسارة
يطربه لاشاف برق الوسم لايح
يشرب الصافي قراح(ن) بغضاره
والطعام الصيد وسمان الذبايح
هكذا ليله يقضي مع نهاره
وانتهيض ساق عذبات القرايح
اشهد ان البر في قلبي وقاره
في فراقه مااتسمع للنصايح
كان حبه في نظر ناس(ن) قشارة 
والله اني في القشر بالحيل طايح 
فاق عندي كل حي وكل حارة
لو مدحته ماتكفيه المدايح
من يعاف البر ماعنده مرارة
بين جدارن اربعة في البيت طايح

البر - محمد العبدالله

sdeem-2