1998, desember

ek het aanhou tussen drome wissel
soos die desember son die lug laat smelt
met die golwe van die geeste se dans
wat toor en draai oor die horison lyn
die skeiding van land en lug, lug en see
en ek in die middel, alleen en vry

verwonderd deur die vrees, my siel was vry
om te dwaal tussen die golf se wissel	
van dit wat my hart oorspoel, my eie see -
om vir die eerste keer te sien hoe smelt
die branders oor die sand se korrel lyn
en te weet dat die strand se water dans

op die ritme van groet en vlug - die dans
wat geanker lê aan land, maak my vry
sing die gedruis van 'n golwende lyn
wat los wil breek en soos seemeeue wissel
deur die hellings van die lug om te smelt
met die wysheid van die wind: die droom see

waar ons herhinneringe waai, my see
waar ek geleer het met toe oë dans
saam alles wat ek moes voel, en ek smelt
met die vure, kyk hoe brand dit my vry
kyk hoe gloei die verlede en wissel
oor al die jare van my lewenslyn

die kind, seun en man lê in daardie lyn
van was, wat is en wat sal kom - my see
ek verdrink in jou draai en jou wissel
ek sien gedaantes wat op water dans
ek was nooit vry nie; ek ketting my vry
die water was nog altyd vuur, ek smelt

saam met die gety 
ek smelt 
en ek smelt
binne die skeiding van 'n enkel lyn
wat dui die hemel en die hel is vry
ek val en styg tussen die twee, my see
is 'n maniese towerspel en 'n dans
waar maskers van gesigte af wissel

ek smelt onder die branders van my see
met 'n lyn wat tussen die pole dans
en ek word vry in 'n wit en swart wisselling.

simptome

ek is in 'n droom
waar hande begin bewe
soos die kop verdwaal

ek is in 'n droom
waar alles soos sterre blink
met kleur wat hol is

ek is in 'n droom
waar vreemdelinge in my
gesig wakker word

ek is in 'n droom
weggeskei van die wêreld
wat my dood beplan

ek is in 'n droom
wat binne my kop bly sing
met gesnyde klank

ek is in 'n droom
waar my stem breek in stemme
soos skerp stukke glas

© Eben Roelofse, 2015



Public domain image: https://www.nga.gov/collection/art-object-page.182273.html

1998, Desember

simulatingyou