Du gsehsch guet us
Bisch geng up to date
Und hesch für jede Aalass ds perfekte Outfit
Schnittigi Frisur
Me mues halt mit dr Zyt ga, gäll?

Odr fahre
Imne geile Schlitte (Schlitte, Schlitte, Schlitte)
Und pünktlech si bir Arbeit
De chasch dr ds nöischte Gadget easy leischte
Und fett ga frässe

Uf dine Bilder gsehsch glücklech us
Doch in ächt isch dir schlächt
Bisch übersättigt
Vo all däm Kack

D‘Grawatte schteit dir usgezeichnet
Wi amne Hündli d‘Leine
Ha ghört du machsch gärn ds Männdli
Für paar Likes oder e Ghaltserhöchig
Wasme halt so brucht zum Läbe

Da ghört o mal chli Rueh drzue
Schnäll füf Minute i di Whirlpool
Derzue di letschte News
Churz überflüge
Eländ und Gwalt – “längwilig
Hei si scho geschter brunge”

O dini Fründe gseh glücklech us
Doch in ächt isch ne schlächt
Sie hei zvil vo däm verschissne Kack

We dir alles hie grau erschiint
Wills nüt meh git wo di no reizt
Gönn dir Ferie (gönn dir Ferie) in Miserie (in Miserie)
Abwächslig tuet dir guet

We dir alles hie grau erschiint
Wills nüt meh git wo di no reizt
Gönn dir Ferie (gönn dir Ferie) in Miserie (in Miserie)
We dir alles hie grau erschiint
Wills nüt meh git wo di no reizt
Gönn dir Ferie

Ferie in Miserie

Wie gwinnt me ds Läbe? 
Da gits doch sicher sone Formle
Was söll me säge? 
Da wirds doch sicher sone Norm gä

Es isch wie Fangis schpile
Alei i dim Zimmer
Im Wettbewärb da merkt me när 
Isch me Verlierer oder Gwinner 

So gschmeidig verchleidet und schön verpackt
Das mues ja richtig guet si 
So prächtig u mächtig u sälber gmacht 
E Zettel ar Wand isch kes Zepter ir Hand 

Langsam gsehni ii: 
Verpasse chasch nur was möglech wär
Ds Pendel bewegt sech hin und här
Vilech schtoppts scho gli

I weiss no immer nid wär i bi
I hoffe es het irgendwo no Platz für mi 
I ha weder d’Luscht no d’Energie
Jede Abe z'merke, 
Dass hüt scho wider morn wär gsi

Bildendi Brichte 
Mit Bilder und Gschichte 
Vom kulturelle Unterschid 
Ir Gägewart 

Verschideni Sitte 
Us verblibene Zyte 
D’Natürlechkeit vo Wüeschtesand 
Zu Rägewald 

D’Erfahrig chunnt nid usem Nüt derhär 
Mini Ouge luege scho schtarr und läär i Schpiegel dri

I weiss no immer nid wär i bi
I gloube es het irgendwo e Platz für mi
Alls la lige, alls la schta 
I briche uf, zum äntlech öppis Nöis afa

Wär i bi

Dis Gsicht so fiin
Im helle Schiin
Di Blick voller Rueh
I luege dir zue

E Momänt für d’Ewigkeit
Wo lüchtend vor mir ufgeit
Schtriiche zärtlech über dis glatte Haar
Wünsche mir sehnlech, es wär würklech wahr

I weiss nid, was i dir chönnti schribe
Wirsch du für mi immer flach blibe?

Dänksch äch du o a mi?
I drücke ufnes Härz für di
Zieh di mit zwöine Finger a
Und füehle mi dir so nah

Blibe mit dir bis zum Änd
I ha no immer füf Prozänt
Und we du vor mir scho gli bisch verschwunde
Suecheni so lang bis i ds Ladekabel ha gfunde

I weiss würklech nie, was i dir chönnti schribe
Wirsch du für mi immer flach blibe?

Weiss nid

Oh du bisch so trurig
Grännisch fasch dr ganz Tag
Was isch nur passiert?

Oh du bisch so einsam
Und niemer füehlt e so wie du
Was wosch nur mache ohni si?

Oh du bisch so nidergschlage
Öpper het dir i dis Härz kotzt
Und alles wo du wosch isch Grächtigkeit
Doch die gits nid

Doch die gits nid, jajajaja…

Oh du hesch vil Hass i dir
Uf ihn und sie und uf d‘Mönschheit
Es söll doch alls in Flamme schta
Und unterga

Oh du hesch vo allem zvil
Und z‘wenig vo däm wo du bruchsch
Du weisch scho lang:
Die Wält isch schlächt

Oh du heschne scho gseh cho
Dä Tag wod zrügg i ds Loch gheisch
Blib nur dert unde, bis alls verbi isch
Oder bis du schtirbsch
Oder bis du schtirbsch, schtirbsch!

Schiiss uf alles!
Hüt isch nüt meh heilig!
Nur dis Wohlbefinde!
Oh, Hail Satan!

Nüt me heilig

Nüt isch wahr
Hani erfahre
Itz isch mir klar
I cha dr Gloube nid bewahre
Dass i Wüsse besitze
Es git keni Norme
Itz fahni a, a allem umezschnitze
Und verleihe nim nöii Forme
A nüt i däm Läbe
I merkes nach und nach
Chani mi feschthäbe
Will alles isch Aasichtssach
Cha nur no hinterfrage
Und muess derbi riskiere
Dass weni witer so töif grabe
Dr Bode unter mir chönnt verliere

Bode verlore

Samschtig Abe - scho wider elei 
Bademantel und Adilette
Alli si wäg, i blibe dehei
Und niemer wird mi rette
Es Gfüehl vo Nechi - ASMR
Dusse dunkel und nass
We doch ufschtah nur nid so schwär wär
I wott so vil und weiss glich nid was

Fettigs Haar und chalti Glider 
Es het no Räschte vom Vortag   
Süscht isch mir alles zwider 
Müed wixe ohni Vorlag
Zvil Zyt und z’wenig z’tüe 
Wahre Wohlschtandsgnuss 
Merci Mami, i gibemer Müeh 
Nid z’ertrinke im Überfluss

I träge es Gschwür im Chopf 
Und füeteres mit Leid
Usemne grosse Topf
Wo leider geng no hie schteit
Ds Händy scho wider i de Händ 
Sinnlos am umedrücke 
Während mini vier Wänd 
Immer enger zämerücke

I warte ufnes Zeiche
Oder dass e Komet
Ändlech die Wält wird preiche
Si isch so obsolet
I bines zäihs Schtück Schinke 
Iiklemmt i altem Brot
Gseh geng no ds Glück mir winke 
Ufemne sinkende Boot

No einisch schliichi zum Chüelschrank 
Ha nur no Fröid am Frässe
Ds Läbe hie macht eim chrank 
Und laht eim schnäll vergässe 
Dass es chönnt anders ga
Und nid so huere abgfuckt 
Ach was mir hei doch alles da 
Vorgfertigt und schön verpackt

Ufbruch, Usbruch, System Change
Ghör ig dr inner Hippie schreie (schreie)
U gibe zrügg: i weiss genau wasd meinsch 
La mi wider ufs Sofa gheie
Mitemne Buech vom Herr Tolle
Ha no nid mal mi sälber gfunde
När chli dür Insta scrolle
I bi so wältverbunde

Und alles nimmt si Louf
E grosse Louf um d’Wett
Es isch wie Usverchouf
Es het solangs no het 
Turnschueh zum halbe Priis 
Sport isch o guet für d’Psyche 
Und e gsundi Läbenswiis
Für se nid no meh z’versüche

Und mir isch längwiilig
Längwiilig ohni di
Es macht mi alles trurig
I gnüege mir eleini nid
Liebi chumm zrügg zu mir 
Nimm mi no eis a d’Bruscht 
I wär itz so gärn bi dir
Säg wo isch d’Läbensluscht

I gseh di struggle und du mi o 
Während alls bachab geit
Es isch jetz halt e so
O we das niemer versteit
Geng no im Gfängnis us Ego u Verstand 
Mit sine kahle Betonmuure
Und mini Zyt verschtriicht im Land 
Vo de raschtlos tickende Uhre

Bachab

Ufbruch

50 Schtutz (live @ RadioBeo)

Nimm e für di aagnähmi Körperhaltig ii
Sitze oder lige – es isch okey, solang du di wohl füehlsch
Jetzt machsch d’Ouge zue und atmisch eismal töif ii und us
Entschpann di und gschpür, wie di Körper liechter wird
La dini Gedanke la Gedanke si
Dr Fokus isch ganz im Hie und Jetz
No eis atmisch töif ii und us
E allumfassendi Rueh erfüllt dis Bewusstsi mit Fride und Liebi
Vergiss, wär du bisch gsi und was chönnt wärde
Bemerk, wie sech dis Sälbscht meh und meh löst. Las la zie
Und no eis atmisch töif ii und us
Gschpür wie di d’Läbensenergie dürdringt
Langsam chersch zrügg i di Körper und machsch d’Ohre uf

Entschpannigsüebig

Es schüttet chübelwiis Wasser uf d’Schtrasse
E richtige Klassiker im Herbscht
Alles liit nass und chalt ufem Asphalt
Fasch so als obs derte häreghört
D’Gärtner, di schaffe scho ufe Winter zue
Und dr Tag wird jede Tag chli chürzer
E farblos kahle Wald wo mal grüen wär gsi
Temperatur fallt und me merkts ersch hindedri
 
I weiss nid genau was passiert
Und öb ds nur am Wätter liit
Aber i ma nümme gseh
Wi alls zerkeit und immer meh
A Farb verliert, we Zyt vergeit
Uf dr Suechi nachem Unterschid
Zwüsche jetzt und denn
 
D’Flüss trage weniger Wasser als süsch
Und d’Schlöisene si chli meh zue
I gseh Lüt uf dr Suechi nach Boumnüss
Es het für alli gnue – gar nid schwirig z’finde
Gedankekreise schwanke und schliesse
Nid ganz woni mers ha vorgschtellt – ou nei!
Dert wo du bisch gits ke Winter, und hie wirds immer
Schlimmer mitem Umschwung – i wotts wider warm
 
I weiss nid genau was passiert
Und öb ds nur am Wätter liit
Aber i ma nümme gseh
Wi alls zerkeit und immer meh 
A Farb verliert, we Zyt vergeit
Uf dr Suechi nachem Unterschid
Zwüsche hüt und morn

Wätterumschwung

*english below*

Streampower gibt es schon seit 2010. Damals als Schülerband mit coolem Namen gegründet ist die Band seither zusammen mit ihren Mitgliedern erwachsen geworden - der Name ist geblieben.

Knapp vor der Pandemie wurde nach einer längeren Kreativpause die EP «Sunnebad im Untergrund» veröffentlicht – die ersten Aufnahmen aus dem eigenen Keller-Studio und gleichzeitig die erste Episode eines grösseren Projekts mit dem Namen «Erkundig».

Nun ist es endlich soweit und «Erkundig Episode 2: Usbruch usem Iimachglas» erscheint online, überall (https://linktr.ee/streampower). Die Reise wird unbequemer, abgründiger und brachialer – ein auditiver Ausbruch aus dem Alltag und dem Gewohnten – eine ausufernde und zugleich nachdenkliche Abrechnung mit der eigenen Begrenztheit in einer komplizierten Welt. Voller Tränen und Zweifel und mit einer guten Portion Zynisums ist es dennoch ein entschlossener Aufbruch zu neuen Abenteuern. Kommst du mit?
Wenn du uns unterstützen willst, dann kaufe unsere Musik zum selbstgewählten Preis auf www.streampower.bandcamp.com

Bandmitglieder:
Elia von Allmen: Gitarre, Gesang
Levi Ryffel: Keyboards, Piano, Gesang
Sandro Ramseier: Gitarre, Gesang
Markus Kuhn: Bass, Gesang
Andy Weibel: Drums

***

Streampower has been around since 2010, when it was founded as a school band with a cool name. Since then the band has grown up together with its members - the name has remained.

Just before the pandemic, after a longer creative break, the EP "Sunnebad im Untergrund" (“Sunbath Underground”) was released – containing the first recordings from their own basement studio and as the first episode of a bigger project called "Erkundig" (“Exploration”).

Now the time has finally come and "Erkundig Episode 2: Usbruch usem Iimachglas" (“Exploration Episode 2: Outbreak from the Preserving Jar”) is released online, everywhere (https://linktr.ee/streampower). The journey is getting more uncomfortable, more abysmal and more brute - an auditory escape from everyday life and the familiar – a rampant and at the same time thoughtful reckoning with one's own limitations in a complicated world. Full of tears and doubts and with a good dose of cynicism, it is nevertheless a determined departure for new adventures. Are you coming with us?

If you want to support us, then buy our music at a price of your choice on www.streampower.bandcamp.com.

Band members:

Elia von Allmen: guitar, vocals
Levi Ryffel: keys, vocals
Sandro Ramseier: guitar, vocals
Markus Kuhn: bass, vocals
Andy Weibel: drums

Streampower

Popular tracks