أَنبَا ولكِن ...!
[قَصيدة دِفَاعيَّة فِي نَقد الذميَّة] *
رؤية وتأليف وإلقاء © هاني ر. صموئيل
#HanyRSamuel

(يمكنكم الاستماع للقصيدة من على قناتي في الساوند كلاود)
https://soundcloud.com/hanyrsamuel/anba-welaken

أَنْبا ولَكِن جَانَا يصوّتْ
دَاخل عَزا بـ يعيَّط فِيهْ
وأصلًا مبيعرفش المَيِّتْ
ولا يوُمْ شَافُه بنِن عينيهْ

مَالنا وَمَال مَركَز تَكوينْ؟
يَا رَئيس مَركز قبطي ثَقافِي
كنتْ إهدا وبطَّلْ تَلوينْ
ربّنا قالَّك: "ارعَ خِرافي"

 دَايمًا للذّميَّهْ بـ تُنشُر
وتكرّس عَلَشَانهَا حَواسَكْ
وف مَال غيرك إنتَ بتحشُر
نَفسَك وتصدَّعلَكْ رَاسَكْ

ذِمِّي ونَاكر وَحي إيمانَكْ
بِسمْ الآب والابنْ مَقُلتِشْ
ولَا فيهْ رُوح أبدًا في بَيَانَكْ
ويا ريتَك أَصلًا مَا كتبتِشْ

قَررتْ إنَّكْ تَسحَب خَلْفَكْ
اِسمْ كِنيستَك جوَّهْ مَعارِكْ
تُحشُر أسمَاءْ تاني بصفّكْ
كَانْ أَفضَلْ جدًّا ما تشارِكْ

فين النَّاقَهْ بتاعتكْ يَعنِي؟
مين قالَّك: تدخّل ف جِدال؟
قلت: "انا هادخل واظهر مُحني"
ما التطبيلْ ف بِلادنا حَلالْ

اِهتمْ بشعبَكْ وكنيستَكْ
مالناش دَعوَهْ بسنُّة غِيرنَا
واِسمع صُوت الحَقّ نيافتكْ
الإصلاَح الدّيني لِخيرنَا

أَنبَا ولكن ما بـ يعرفشِي
يُذكر آيهْ مِن الإنجيلْ!
دِي عقيدهْ وتسليمْ متخافِشي
وثَالوثْ أَقدَسْ وَحي أَصيلْ

إشهَد لَمَسيحَك بِلَا خُوفْ
ما إنتَ ف نظر السّنهْ دي كَافِ-ر
ولَّلا نيافتك نَاوي تطوفْ؟
ما توطّيش للطرف الآخر :( 

قَالوا: "عقيدتك" عَ الملا بَانتْ
وإنت بتلوي دراعها وتنكِر
حَق كَبير في إيماننا الثَّابتْ
خُفت تجَاهِر بيهْ تتكدَّر

هَلْ فيهْ مَرَّهْ الأَزهَر جَاملْ
أيُّهَا قُبطي في أَمر الدّين؟
إِحنا سكوتهم حلو وفاضلْ
والغلا فاحش مُش نَاقصينْ

هُوَّ بـ يعفِي الأزهر إنُّهْ
يدخل معركتُه الجَدليَّهْ
وإنت مدبَّس حنَّا ومانُّو
بل كُل الأُمَّهْ القبطيَّهْ

فين الحِكمَه يا رَجل الدينْ
حَد يجيب لكنيسته مَشاكل؟
دُول ناس مَعَ بَعض وقاعدينْ
مَجَابُوش سِيرة أَي هَياكِلْ

ولمّا يجيبوا سِيرهْ لدينَكْ
أنا عن نفسي هَارُد عَليهم
أو نِبعَت ونقُولَك: فينك؟
ورّي شطارتك يالَّا إدِّيهُمْ

أنا إيماني "إنجيلي" وبَس
والتّقليد دَه "كَلام النّاس"
سِوا كَان صَالح أو مُندَس
مش ها يُفوقْ وَحي الأَنفَاس

وأَي سَلام مُجتمعي ف قصدَك؟
وإنتَ اللي بتهجمْ وخَلاصْ
لا خروج ولا تكوين دُول ضِدَّكْ
ولمَّا يعكوا فيه حُراسْ ... !
- بقلم:  د. هاني ر. صموئيل ©
شاعر ولاهُوتي وباحث في القضايا الكنسيَّة
#HanyRSamuel
٢١ مايو ٢٠٢٤
#قصيدة_أنبا_ولكن
Anba Welaken - Poem © 2024 Hany R. Samuel

(أرجو عدم نسخ المنشور ولكن يمكنك عمل مُشاركة مباشرة من على صفحتي/قناتي ... شكرًا مقدَّمًا للمتفاعلين والداعمين للخدمة).

أَنبَا ولكن - Anba Welaken

Poet, songwriter & theologian. #HanyRSamuel

New tracks tagged #قصيدة أنبا ولكن