ماں بولی
اٹھ شاہ حسینا ویکھ لے اسی بدلی بیٹھے بھیس
ساڈی جند نمانڑی کوکدی اساں رل گئے وچ پردیس
ساڈا ہر دم جی کرلاؤندا ساڈی نیر وگاوے اکھ
اساں جیوندی جانیں مر گئے ساڈا مادھو ہویا وکھ
سانوں سپ سمے دا ڈنگدا سانوں پل پل چڑھدا زہر
ساڈے اندر بیلے خوف دے ساڈے بیلے بنڑ گئے شہر
اساں شوہ غماں وچ ڈب گئے ساڈی رڑ گئ نو پتوار
ساڈے بولنڑ تے پابندیاں ساڈے سر لٹکے تلوار
اساں نیناں دے کھوہ گیڑ کے کیتی وتر دل دی پاؤں
اے بنجر رئ نمانڑی سانوں سجنڑ تیری سوہنہ
اساں اتوں شانت جاپدے ساڈے اندر لگی جنگ
سانوں چپ چپیتا ویکھ کے پئے آکھنڑ لوک ملنگ
اساں کھبے غم دے کھوبڑے ساڈے لمے ہو گئے کیس
پا تانڑے بانڑے سوچدے اساں بنڑدے ریندے کھیس
ہنڑ چھیتی دوڑنڑیں بلھیا ساڈی سولی ٹنگی جان
تینوں واسطہ شاہ عنایت دا ناں توڑنڑیں ساڈا مانڑ
اساں پیریں پا لئے گھنگھرو ساڈی پاوے جند دھمال
ساڈی جان لباں تے اپڑی ہنڑ چھیتی مکھ وکھال
ساڈے سر تے سورج ہاڑ دا ساڈے اندر سیت سیال
بنڑ چھاں ہنڑ چیتر رکھ دی ساڈے اندر بھانبڑ بال
اساں مچ مچایا عشق دا ساڈا لوسیا اک اک لوں
اساں خود نوں بھلے سانولا اساں ہر دم جپیا توں
سانوں چنتا چخا چڑھانڑ دی ساڈے تڑکنڑ لگے ہڈ
پھڑ لیکھاں برچھی دکھ دی ساڈے سینے دتی کڈ
اساں در توں دکھڑے چاگدے ساڈے لیکھے لکھیا سوگ
ساڈی واٹ لمیری دکھ دی ساڈے عمروں لمے روگ
ساڈے ویہڑے پھوڑی دکھ دی ساڈا رو رو چویا نور
اے اوکڑ ساڈی ٹال دے تیرا جیوے شہر قصور
آ ویکھ سخن دیا وارثا تیرے جنڈیالے دی خیر
اج پتر بولی ماں دے پئے ماں نال رکھنڑ ویر
اج ہیر تیری پئ سیکدی اج کیدو چڑھیا زنگ
اج تخت ہزارے ڈھے گئے اج اجڑیا تیرا جھنگ
اج ویلے ہو گئے سنجڑے اج سکیا ویکھ چناء
اج پھرن آزردہ رانجھڑے اج کھیڑے کردے چاہ
اج ٹٹی ونجلی پریت دی اج مکے سکھ دے گیت
بنڑ جوگی درد رٹولیا سانوں کوئ ناں ملیا میت

غلام حسین ندیم

New tracks tagged #SufiStrums