Hii leo jaridani tuna habari kwa ufupi, mada kwa kina na jifunze lugha ya kiswahili. 
Katika Habari kwa Ufupi na Leah Mushi anamulika kauli ya Mkurugenzi Mkuu wa UNESCO Bi. Audrey Azoulay, kuhusu siku ya elimu tarehe 24, mwezi huu wa Januari akisema anatoa heshima ya siku hiyo kuwa maalum kwa wanawake na wasichana wa Afghanistan ambao mamlaka ya Taliban imewanyima fursa ya kupata elimu.

Huko nchini Afrika Kusini, mahakama imeruhusu wataalamu wa Umoja wa Mataifa kushiriki kwenye kesi iliyofunguliwa na wananchi wa wilaya ya Kambwe nchini Zambia walioathirika na uchimbaji wa madini uliofanywa na Kampuni ya madini ya Anglo Amerika.

Na leo ni siku ya mwaka mpya wa Kichina ambapo kwa mujibu wa kalenda ya nchi hiyo ni mwaka wa Sungura. Katibu Mkuu wa Umoja wa Mataifa Antonio Guterres ametuma salamu za mwaka mpya kwa taifa hilo na kulishukuru kwa ushirikiano wake linaoutoa kwa Umoja wa Mataifa na dunia kwa ujumla.

Na katika Mada kwa Kina tunakwenda Jamhuri ya Kidemokrasia ya Congo, DRC ambako takriban watu 233,000, wamelazimika kuyahama makazi yao katika wilaya ya Nyiragongo jimboni Kivu Kaskazini  kutokana na vita vinavyochochewa na kundi la wapiganaji waasi la M23 na sasa UNHCR imewajengea makazi badala ya kutegemea kuishi tu katika maeneo ya wazi, shuleni au makanisani. Shuhuda ni mwandishi wetu wa DRC, Byobe Malenga.

Katika kujifunza lugha ya kiswahili, tunabisha hodi Baraza la Kiswahili la Taifa, Zanzibar, BAKIZA kwake Katibu Mtendaji Dkt. Mwanahija Ali Juma akifafanua methali ACHEKAYE KOVU HAJAONA JERAHA.

Karibu na mwenyeji wako ni Anold Kayanda

JARIDA RAW 19 JANUARY 2023

Ni Jumanne ya tarehe 24 mwezi Januari mwaka 2023 ambapo leo tunakwenda nchini Tanzania kuangalia juhudi zinavyofanyika kuhakikisha wanafunzi hususan wa vijijini wanakuwa na mazingira bora ya kuweza kujisomea  nyakati zote. Pia tunakuletea habari kwa ufupi zikimulika hali ya usalama DR Congo, ujumbe wa Katibu Mkuu wa siku hii ya elimu duniani na ripoti ya usafirishaji haramu wa binadamu. Katika mashinani tunakupeleka nchini Kenya.

1.	Hali ya usalama inazidi kuwa mbaya huko Mashariki mwa Jamhuri ya Kidemokrasia ya Congo, DRC hususa jimboni Ituri ambako vikundi vilivyojihami vimeendelea kuua rai ana katika wiki sita zilizopita zaidi ya raia 200 wameuawa, limesema shirika la Umoja wa Mataifa la kuhudumia wakimbizi duniani, UNHCR. 
2.	Ikiwa leo ni siku ya kimataifa ya elimu Katibu Mkuu wa Umoja wa Mataifa amesisitiza kwamba elimu ni haki ya msingi ya binadamu na hivyo kila mtu anastahili kuipata. Kupitia ujumbe wake wa siku hii inayoadhimishwa kila mwaka Januari 24 Antonio Guterres amesema “ Ni msingi wa jamii, uchumi, na uwezo wa kila mtu. Lakini bila uwekezaji wa kutosha, uwezo huu utaishia kwenye mzabibu.
3.	Na ripoti mpya iliyotolewa leo na ofisi ya Umoja wa Mataifa ya madawa na uhalifu UNDOC kuhusu usafirishaji haramu wa binadamu inaelezea hofu kwamba rasilimali za kuwaokoa waathirika wa usafirishaji haramu zimeelekezwa kwenye janga la COVID-19. 
4.	Na leo katika mashinani tutakwenda Turkana nchini Kenya kumsikia Gabriel Ekaale, ambaye alianza kazi yake kama mwalimu wa shule ya upili nchini Kenya, lakini baada ya muda mfupi aligundua kwamba kazi yake inaweza kuwa na manufaa kwa jamii nzima, na sasa anafanya kazi na jamii zilizoathiriwa na ukame.

Mwenyeji wako ni Assumpta Massoi, karibu!

JARIDA LA HABARI ZA UM 24 JANUARI 2023: "SOMA BAG" TANZANIA, USALAMA DRC, ELIMU, MASHIANI

HABARI ZA UN 02 FEBRUARI 2023 NA ANOLD KAYANDA - AZOLLA TANZANIA

Hii leo katika jarida tunamulika:
1. Harakati za kuhakikisha watoto wote walioko kwenye maeneo ya mizozo wanapata elimu na hizi ni juhudi za Mfuko wa  Umoja wa Mataifa uitwao Education Cannot Wait.
2. Kisha tunamulika huko Sierra Leone ambako watu wenye ulemavu wamefikiwa na IFAD kwa lengo la kujiongezea kipato. 
3. Kuelekea siku ya saratani duniani kesho Februari 4, hatua zimechukuliwa kukabiliana na saratani ya shingo ya kizazi.
4. Na mashinani tunabisha hodi Sierra Leone kumulika kampeni  ya kukabiliana na FGM.
Karibu.

HABARI ZA UN 03 FEBRUARI 2023 NA ASSUMPTA MASSOI- ELIMU, SARATANI N.K

Hii leo jaridani tunaangazia siku radio duniani, na wakimbizi wanaorejea nyumbani Burundi. Makala tunakupeleka nchini DR Congo na mashinani tutamsikia Balozi Mwema wa UNHCR.   
     
1.	Katika siku ya redio duniani ambapo Umoja wa Mataifa unamulika nafasi ya chombo hicho kilichobuniwa takribani karne moja iliyopita katika kukuza na kujenga amani  wakati huu ambapo pia ni miaka 75 tangu kuanzishwa kwa operesheni za ulinzi wa amani za Umoja wa Mataifa.
2.	Nchini Burundi wakimbizi waliokimbia ghasia, wanaendelea kurejea nyumbani kutokana na hali ya amani kuzidi kuimarika, na hivi karibuni zaidi wakimbizi wamerejea kutoka Jamhuri ya kidemokrasia ya Congo, DRC wakiwa na matumaini kutokana na kile wanachoshuhudia.
3.	Makala mwandishi wetu wa Jamhuri ya Kidemokrasia ya Congo (DRC) Byobe Malenga anaangazia Redio Ngoma ya Amani, kituo cha redio cha mjini Fizi jimboni Kivu Kusini kinachohamasisha amani hususani katika maeneo ya mashariki mwa DRC.
4.	Na katika mashinani tutamsikia Balozi mwema wa shirika la Umoja wa Mataifa la kuhudumia wakimbizi UNHCR akipasa sauti kwa ajili ya wakimbizi na wote walio hatarini kutojumuishwa katika mijadala ya malengo ya maendeleo endelevu.  

Mwenyeji wako ni Anold Kayanda, karibu!

HABARI ZA UM 13 FEBRUARI 2023 SIKU YA REDIO DUNIANI

Hii leo katika jarida la UN Anold Kayanda anamulika:
1.	Mkutano wa kimataifa wa kuchangisha fedha kwa ajili ya Yemen unaofanyika Geneva, USwisi
2.	Nchini Kenya mradi wa ILO wajengea wanawake wa kimasai uwezo wa kushiriki shughuli za kiuchumi na kijamii na sasa wanaweza sio tu kusoma bali pia ni wajasiriamali.
3.	Makala anakupeleka nchini Jamhuri ya Afrika ya Kati, CAR huko walinda amani wa Umoja wa Mataifa kutoka Tanzania wafundisha wakulima matumizi ya jembe la mkono kwenye kilimo badala ya panga.
4.	Mashinani Dkt. Dorothy Gwajima, Waziri  nchini Tanzania na ujumbe wake kwa wazazi kuhusu  malezi sahihi kwa watoto.
Karibu!

Jaridani 27 Feb 2023 na Anold Kayanda - Yemen, Wanawake Wamasai, CAR na Tanzania

Elionora Emiel, mwanafunzi wa kidato cha 4 katika shule ya sekondari ya Mtakatifu Thereza wa Avila mkoani Kilimanjaro nchini Tanzania

Kikao cha 67 cha kamisheni ya hali ya wanawake duniani CSW67 kielekea tamati, mwaka huu 2023 kikiwa kimebeba mada uvumbuzi, mabadiliko ya kiteknolojia, na elimu katika zama hizi za kidigitali kwa ajili ya kufikia usawa wa kijinsia na uwezeshaji wa wanawake na wasichana wote. Mijadala mingi katika mkutano huu imelenga kuwawezesha na kuhakikisha watoto wa kike wanaingia kwenye masomo ya Sayansi, Teknolojia, Uhandisi na Hisabati au STEM ili hapo baadaye waweze kuchangia katika ubunifu wa teknolojia katika enzi hizi za dunia ya kidijitali.  

Kwa muktadha huo, kamisheni hali ya wanawake wakishirikiana na serikali za nchi mbalimbali na mashirika yasio ya kiserikali iliwaalika na kuwajuimisha watoto wa kike katika kikao hicho ili waweze kuwakilisha wanafunzi wenzao, na mmoja wa wanafunzi hao kutoka Tanzania amepata fursa ya kuzungumza na Selina Jerobon wa Idhaa ya Kiswahili ya Umoja wa mataifa katika mahojiano kandoni mwa mkutano huo na kumuelezea matarajio yake katika ulimwengu huu wa kidijitali ni yapi, na ana ujumbe gani kwa wasichana wenzake, lakini anaanza kwa kujitambulisha..

Makala: Wasichana wapatiwe haki zao za elimu bora na wajengewe uwezo wa teknoljia - Elionaora

Leo ni siku ya afya duniani ujumbe ukiwa ni Afya kwa Wote ambapo walinda amani wa Umoja wa Mataifa kutoka Tanzania wanaohudumu kwenye ujumbe wa Umoja wa Mataifa wa kulinda amani nchini Jamhuri ya kidemokrasia ya Congo, DRC, MONUSCO, wametumia siku hii kuwapima magonjwa yasiyo ya kuambukiza, NCDs, wakazi wa Beni-Mavivi jimboni Kivu. Taarifa zaidi na Afisa habari wa kikundi hich cha tatu cha kikosi cha Tanzania cha kutoa msaada wa haraka, TANZ-QRF-3 ndani ya MONUSCO, Luteni Abubakar Muna.

Silaha pembeni sasa ni afya,  TANZQRF3 wakiwa DRC

Mashambulizi dhidi ya raia yanayoendelea huko Mashariki mwa Jamhuri ya Kidemokrasia ya Congo, DRC yanachochewa pia na kitendo cha makundi ya waasi kumiliki silaha. Silaha zinaripotiwa kupatikana kiholela na kutishia usalama wa rai ana mali zao. Ni kwa kutambua hilo, hivi karibuni ofisi ya  Umoja wa Mataifa ya huduma ya kutegua mabomu UNMAS kwa ushirikiano na Ujumbe wa Umoja wa Mataifa wa kulinda amani nchini humo, DRC MONUSCO waliendesha operesheni ya wiki mbili ya kutia alama kwenye silaha lengo likiwa ni kuhakikisha usimamizi bora wa silaha hizo. Je nini kilifanyika? George Musubao, mwadishi wa Idhaa ya Kiswahili ya Umoja wa Mataifa nchini DRC alikuwa shuhuda wetu na ametuma makala hii.

Makala- Utiaji alama kwenye silaha Beni, DRC ikiletwa na George Musubao

Tarehe 03 mwezi Januari mwaka huu wa 2023, Rais wa Jamhuri ya Muungano wa Tanzania Samia Suluhu Hassan alimteua Balozi Hussein Kattanga kuwa

Mwakilishi wa kudumu wa taifa hilo la Afrika Mashariki kwenye Umoja wa Mataifa. Itifaki inahitaji uwasilishaji wa hati za utambulisho kwa Katibu Mkuu wa Umoja wa Mataifa Antonio Guterres tarehe 17 mwezi Aprili mwaka huu wa 2023. Assumpta Massoi wa Idhaa ya Kiswahili ya Umoja wa Mataifa amezungumza na Balozi Kattanga masuala kadhaa lakini kwanza ni ujumbe wa Rais Samia Suluhu  Hassan wa Tanzania kwa Katibu Mkuu Guterres.

2. Mahojiano na Balozi Hussein Kattanga, Mwakilishi wa Kudumu wa Tanzania UN

Hii leo jaridani tunakuletea mada kwa ambapo leo katika mada kwa kina tunakupeleka Jamhuri ya Kidemokrasia ya Congo, DRC ambako walinda amani wa Umoja wa Mataifa wameweka silaha kando na kubeba dawa na vipima mapigo ya moyo. Pia tunakuletea habari kwa ufupi zikiwemo gazia ripoti ya UNICEF kuhusu uaminifu  kwa chanjo za watoto, UNFPA Sudan Kusini, uvumbuzi na ubunifu. Katika kujifunza Kiswahili Mwenyekiti wa Idara za Kiswahili katika vyuo vikuu Afrika Mashariki Aida Mutenyo, anatueleza maana ya “KITENDAWILI”.

1. Ripoti ya Hali ya Watoto Ulimwenguni mwaka 2023 iliyotolewa na shirika la Umoja wa Mataifa la kuhudumia watoto, UNICEF imefichua kuwa mtazamo chanya kuhusu umuhimu wa chanjo kwa watoto ulipungua hadi asilimia 44 wakati wa janga la COVID-19 katika nchi 52 kati ya nchi 55 zilizofanyiwa utafiti. UNICEF inasema mara nyingi mtazamo kuhusu chanjo huwa ni suala linalobadilikabadilika kulingana na wakati maalum na hivyo ukusanyaji wa taarifa zaidi na uchanganuzi mwingine utahitajika ili kubaini kama matokeo haya ya sasa yataonesha mwelekeo wa muda mrefu na inasisitiza umuhimu wa watu kuendelea kuwapa haki ya chanjo watoto ili kuwalinda dhidi ya magonjwa.
2. Shirika la Umoja wa Mataifa la Afya ya Uzazi na Idadi ya Watu duniani UNFPA nchini Sudan lina wasiwasi mkubwa kuhusu ghasia kubwa zinazoendelea nchini humo ambazo zimesababisha kukwama kwa huduma za afya na kuwaweka watu hatarini hususani wanawake wajawazito wanaofikia 219,000. Laila Baker, Mkurugenzi wa UNFPA wa Ukanda wote wa Uarabuni akihojiwa na Idhaa ya Kiarabu ya Umoja wa Mataifa ameeleza kuwa hali ni tete na UNFPA inafanya kila namna kuokoa maisha hata imefikia kulazimika kufanya huduma ya matibabu kwa “maelekezo ya kitabibu kwa njia ya simu pale inapowezekana.” 
3. Na kuelekea kesho tarehe 21 Aprili ambayo ni Siku ya Kimataifa ya Ubunifu na Uvumbuzi ili kukuza ufahamu wa jukumu la ubunifu na uvumbuzi katika nyanja zote za maendeleo ya binadamu kwa kutafuta majawabu ya changamoto za kijamii, Mvumbuzi kijana raia wa Tanzania Gibson Kawago ameshukuru Umoja wa Mataifa kuwa na siku kama hii na akaeleza mipango yake ya kupambana na uchafuzi wa hali ya hewa duniani.
4. Na katika kujifunza lugha ya Kiswahili Mwenyekiti wa Idara za Kiswahili katika vyuo vikuu Afrika Mashariki Aida Mutenyo, anatueleza maana ya “KITENDAWILI”.

Mwenyeji wako ni Flora Nducha, Karibu!

JARIDA LA HABARI ZA UM 20 APRILI 2023 NA FLORA NDUCHA

Jaridani leo tunaangazi machafuko nchini Sudana na msaada ya kibinadamu kwa waathirika. Makala tu tunamulika ibara namba 2 ya haki za binadamu na mashinani tunakupeleka mkoani Rukwa nchini Tanzania, kulikoni? 

1.	Shirika la Umoja wa Mataifa la mpango wa chakula duniani WFP leo limesema linarejelea mara moja operesheni zake za msaada wa kibinadamu nchini Sudan baada ya kuzisitisha kwa muda wafanyakazi watatu wa shirika hilo walipouawa Aprili 15 mwaka huu.
2.	Chad inashuhudia wimbi jipya la wakimbizi wanaouvuka mpaka kutoka Sudan kuingia nchini humo kufuatia mapigano yaliyoanza tarehe 15 mwezi huu kwenye mji mkuu wa Sudan, Khartoum, hali inayofanya mahitaji ya kibinadamu kuongezeka kwa kuzingatia Chad tayari inahifadhi wakimbizi ilhali rasilimali za kuwapatia ni chache. 
3.	Katika makala leo tunamulika ibara ya pili ya tamko la Umoja wa Mataifa la haki za binadamu, inayosema Kila mtu anastahili kuwa na haki zote na uhuru wote ambao umeelezwa katika tamko bila ubaguzi wa aina yoyote kama vile rangi, taifa,jinsia, lugha,,dini,siasa,fikra,asili ya taifa la mtu,miliki, kuzaliwa au kwa hali nyingine yoyote. Na katika ufafanuzi huu tunarejelea makala ya mwaka jana ambamo kwayo Balozi Getrude Mongella kutoka Tanzania alifafanua kipengele cha ubaguzi wa rangi.
4.	Na katika mashinani tutaelekea Sumbawanga mkoani Rukwa nchini Tanzania kusikia jinsi wenyeji wamehamasika na kuamini kwamba chanjo zinaweza kuleta matokeo chanya. 

Mwenyeji wako ni Anold Kayanda, karibu!

JARIDA LA HABARI ZA UM 01 MEI 2023 NA ANOLD KAYANDA

Hii leo katika jarida la Habar iza UN, mwenyeji wako Leah Mushi anamulika haki za binadamu za watu wa jamii ya asili, haki ya elimu kwa watoto wakimbizi, saratani ya shingo ya kizazi na hatimaye jinsi kampeni ya boma kwa boma inasongesha utoaji chanjo kwa jamii ya wamasai nchini Tanzania.
1.	Watu wa jamii ya asili wanaweza kutuongoza katika harakati za kukabiliana na misukosuko na majanga yanayokabili zama zetu hivi sasa, amesema hii leo  huko mjini Geneva, Uswisi, Kamishna Mkuu wa Umoja wa Mataifa kuhusu haki za binadamu Volker Türk akihutubia mkutano wa 16 wa wataalamu wa haki za watu wa jamii ya asili.
2.	Shirika la Umoja wa Mataifa la kuhudumia watoto UNICEF linashirikiana na wadau kuisaidia serikali ya Kenya katika kaunti ya Turkana kuhakikisha elimu ya awali inawafikia watoto wote hususan kwenye kambi ya wakimbizi ya Kakuma.
3.	Katika makala, Anold Kayanda anatupeleka nchini Tanzania ambako Shirika la Umoja wa Mataifa la Afya Ulimwenguni (WHO) kwa kushirikiana na serikali nchini Tanzania linafanya juhudi za kutoa elimu ya uchunguzi wa mapema ili kuzuia saratani ya shingo ya kizazi kwa wanawake nchini humo.
4.	Na mashinani, Edward Ngobei, Mzee kiongozi wa kimasai wilayani Monduli mkoani Arusha nchini Tanzania, anaeleza jinsi yeye pamoja na jamii za eneo hilo wamepokea chanjo mbalimbali kupitia kampeni ya Shirika la Umoja wa Mataifa la Afya Duniani WHO na wadau wake inayopeleka huduma za chanjo mashinani. Karibu!

JARIDA LA  HABARI ZA UN na Leah Mushi - Jamii ya asili, Turkana, Saratani, wamasai

Hii leo jaridani mwenyeji wako ni Leah Mushi akimulika mkutano wa mifumo ya chakula ulioanza leo Roma, Italia; Kauli ya mshiriki kutoka Tanzania kwenye mkutano uliomalizika hivi karibuni hapa makao makuu ya UN; Makala anabisha hodi Rwanda ilhali mashinani anakupeleka Tunisia.

1. Katibu Mkuu wa Umoja wa Mataifa António Guterres amezungumza kwenye mkutano wa viongozi kuhusu Mifumo ya Upatikanaji wa Chakula huko Roma, Italia hii leo akisema bado inastaajabisha kuwa katika dunia yenye utajiri bado kuna watu hawana chakula au wanakufa njaa, huku akipendekeza mambo makuu matatu ya kuzingatia ili kurekebisha mifumo hiyo.

2. Mwanaisha Ulenge ambaye ni Mbunge katika Bunge la Tanzania na pia Mjumbe wa Bunge la Dunia IPU, mmoja wa walioshiriki Jukwaa la Umoja wa Mataifa la Ngazi ya juu la kisiasa kuhusu Malengo ya Maendeleo Endelevu, SDGs, lililokamilika wiki iliyopita akihojiwa na Anold Kayanda wa Idhaa hii ya Umoja wa Mataifa hapa jijini New York, Marekani ametoa wito kwa wanawake ulimwenguni kote kwamba wao pia wanapaswa kuwa na mchango katika kuleta usawa wa kijinsia kwanza kwa wao wenyewe kutojiwekea mipaka.

3. Makala: Leo inatupeleka mjini Kigali Rwanda ambako mwishoni mwa wiki umekamilika mkutano wa kimataifa wa Women Deliver 2023 (WD2023) au wanawake wanatekeleza. Mkutano ulijikita na suala la ujumuishwaji ili kusongesha usawa endelevu wa kijinsia. Ulihudhuriwa na washiriki zaidi ya 200,000 mtandaoni na ana kwa ana, miongoni mwao ni Martha Wanza kutoka Kenya, anayefanyakazi na shirika la Jumuiya ya wanawake vijana Wakristo nchini humo YWCA.

4. Mashinani: Jinsi mkopo na mafunzo kutoka mfuko wa Umoja wa Mataifa wa maendeleo ya kilimo, IFAD umemuinua kiuchumi Hayet Aouida nchini Tunisia.

Jaridani 24 Julai 2023 na Leah Mushi - Mifumo ya chakula, HLFP na WD2023

Mkutano wa kimataifa wa Women Deliver 2023 (WD2023) au wanawake wanatekeleza umekunja jamvi mwishoni mwa wiki mjini Kigali nchini Rwanda baada ya kuwaleta pamoja washiriki 6,000 ana kwa ana na wengine zaidi ya 200,000 mtandaoni. Lengo kuu la mkutano huo mkubwa kabisa uliozanza Julai 17 hadi 20 na kubeba kaulimbiu “Nafasi, mshikamano na suluhu” lilijikita katika ujumuishwaji ili kusongesha usawa endelevu wa kijinsia kwa kuhusisha sekta mbalimbali. Wadau wakiwemo wakuu wa nchi na serikali na mashirika ya Umoja wa Mataifa likiwemo linalohusika na masuala ya wanawake UN-Women na la idadi ya watu na afya ya uzazi UNFPA walikuwa mstari wa mbele katika mkutano huo Martha Wanza alikuwa miongoni mwa washiriki kutoka Kenya , anafanyakazi na shirika lijulikanalo kama Jumuiya ya wanawake vijana Wakristo nchini humo YWCA. Amezungumza na Eugene Uwimana Afisa uratibu msaidizi wa maendeleo, mawasiliano na mipango katika ofisi ya Mratibu Mkazi wa Umoja wa Mataifa  nchini Rwanda , maswali yake ynarejewa studio na Flora Nducha na Martha akianza kwa kumfafanulia kuhusu shirika lao

MAKALA - Kutoka WD2023 mshiriki wa YWCA azungumza nasi

Hii leo jaridani mwenyeji wako ni Leah Mushi akimulika masuala ya afya hususan mafanikio ya será za kudhibiti uvutaji sigara na tumbaku; elimu kwa watoto waliokosa fursa huko Kenya; nishati salama nchini Tanzania na ujumbe wa Romeo George mwanaharakati wa SDGs.
1.	Miaka 15 baada ya Shirika la Umoja wa Mataifa la afya duniani, WHO kuanzisha sera ya kulinda umma kutoathirika na uvutaji wa sigara unaofanywa na mtu mwingine, zaidi ya watu bilioni 5.6 wamenufaika na sera hiyo ulimwenguni kote, imesema ripoti mpya ya shirika hilo iliyotolewa leo.
2.	Nchini Kenya, UNICEF na wadau wameibuka na mradi wa kusaidia watoto waliokosa fursa ya elimu kurejea tena shuleni.
3.	Makala: Mradi wa COOKFUND unaoendeshwa na shirika la Umoja wa Mataifa la maendeleo ya mitaji, UNCDF nchini Tanzania wasongesha nishati safi na salama.
4.	Mashinani: Romeo George ajulikanye kama RJ, Mwigizaji na mwanaharakati wa malengo ya maendeleo endelevu nchini Tanzania anayehudumu chini ya Shirika la Umoja wa Mataifa la kuhudumia wakimbizi, UNHCR akitaka wakimbizi wapatiwe fursa sawa katika ufanikishwaji wa malengo hayo.

Jaridani 31 Julai 2023 na Leah Mushi - Uvutishwaji moshi wa sigara wapungua

SASA NI MADA KWA KINA ambayo leo inatupeleka nchini Tanzania kumulika kilimo cha parachini na jinsi kinachangia kutekeleza malengo ya Umoja wa Mataifa ya Maendeleo endelevu hususan la kutokomeza umaskini. Lakini zaidi ya yote tutasikia hatua ya shirika la Umoja wa Mataifa la Chakula na kilimo duniani, FAO nchini Tanzania ya kuhakikisha wanapanda miche sahihi ya mbegu kama vile aiha ya HASS yenye soko kubwa nje ya nchi. Mwandaaji wa nada hii kwa kina ni Assumpta Massoi.

2. PARACHICHI ni mkombozi na sasa FAO na wadau wachukua hatua kuinua wakulima

Karibu kusikiliza jarida la Umoja wa Mataifa ambapo hii leo utasikia kutoka Ofisi ya Umoja wa Mataifa ya Haki za Binadamu OHCHR ambayo imesikitishwa sana na ripoti kwamba huko Darfur nchini Sudan wanawake na wasichana wanatekwa nyara na kushikiliwa katika mazingira ya yasiyo ya kiutu katika maeneo yanayodhibitiwa na wanamgambo waasi (RSF). 

Pia utapata ufafanuzi wa Ibara ya 12 ya Tamko la Umoja wa Mataifa la Haki za Binadamu ambalo mwaka huu linatimiza miaka 75. 

Makala utasikia utekelezaji wa SDGs nchini Tanzania na mashinani tutasalia kutoka kwa Wakimbizi wa DRC walioko nchini Tanzania.

JARIDA 03 NOVEMBA 2023

Vijana wana dhima kubwa katika kusongesha malengo ya maendeleo endelevu, SDGs yanayofikia ukomo mwaka 2030. Mashirika ya Umoja wa Mataifa kwa kutambua nafasi hiyo ya vijana wanatumia vijana wenyewe ili wawe mabalozi wa mashirika hayo mashinani ili kupigia chepuo yale yaliyomo kwenye SDGs. Mathalani nchini Tanzania shirika la Umoja wa Mataifa la kuhudumia watoto, UNICEF lina mabalozi na miongoni mwao ni Emmanuel Cosmas Msoka yeye akijikita kwenye masuala ya usafi wa maji, usafi wa mazingira (WASH) na ubunifu. Na ndiye tunammulika leo katika makala ambapo katika mahojiano naFlora Nducha wa Idhaa hii ya Kiswahili ya Umoja wa Mataifa, Emmanuel ambaye mwezi Septemba mwaka huu alishiriki vikao vya ngazi ya juu vya vijana kuhusu malengo ya maendeleo endelevu, SDGs alielezea mambo kadhaa akianza na kile alichoondoka nacho.

MAKALA-Emmanuel Cosmas Msoka azungumza na Flora Nducha kuhusu SDGs

Idhaa ya Kiswahili ya Umoja wa Mataifa inatangaza habari kila siku kwa lugha ya Kiswahili, Kiarabu, Kichina, Kiingereza, Kifaransa, Kireno, Kirusi na Kihispania. Na mara moja kwa wiki inakuwa na vipindi vya lugha ya French Creole, Kibengal, Kihindi, Urdu na kiindonesia.
Radio ya UM inabadilisha taarifa zake kutokan na habari mpya zinavyokuja kila mara kwa siku. Pia inaandaa makala na kufanya uchambuzi wa mada mbalimbali za kijamii, kisiasa, kiuchumi, maendeleo na masuala yanayohusu tamaduni yanyohusisha Umoja wa Mataifa na kazi zake. Vipindi vya Idhaa ya Kiswahili ya Umoja wa Mataifa au UNNews  viko vingi na ni kuanzia habari,  makala, vipindi maalumu na taarifa za habari za kila siku na zile za kila wiki.
Na vipindi vyote hivyo vinaweza kutumiwa na vyombo vingine vya habari au watangazaji, na vinaweza kutumiwa kama chanzo cha habari kwa waandishi.  binafsi.Na kwa kuongezea tuu ni kwamba vipindi vyote hivyo na sauti zingine kwenye tovuti yetu vinatolewa bure bila malipo yoyote. Unaweza pia kujisajli kwenye ukurasa wetu ili upokee taarifa kila wakati zinapochapishwa.
Kwa uchaguzi zaidi wa ushirikiano usisite kuwasilina nasi.

New tracks tagged #Umoja wa Mataifa